Gênesis 15

Ọvaar Ubinọkpaabyi ọtạk echekha ọnạng Abram

1 Ngwọ o oseng, Ọvaar Ubinọkpaabyi uyin okhebha Abram ọkpaakh-ẹ udik, oben-ẹ bẹ́,

"Abram, nạng-ọ ojor,

amma wọ nde ọkhọhnkpa kwọ,

m’mbạra nsi-ọ ẹtaam chididen."

2 Masẹ Abram ọbhaang idik nnọ, ubhina bẹ́, "O Ọvaar Ubinọkpaabyi kw’Ẹfa phyibh, mbạng vọ m’anạng-m s’nạn nnwa nkhaam? Eliyeza kw’ubin Damaskọs sạng kw’m’uchi-m obo? 3 Abram okhenka ode ubira kwaam, amma sạng mfhon-ẹ. Ọma nnwa khaam tạm nánạnga. Ubira nwa wọ m’uchi-m obo."

4 Ma wọ, Ọvaar Ubinọkpaabyi ọkpaakhẹ Abram udik, oben-ẹ bẹ́, "Mma e, oche ngwọ sạng. Ubira nwa sạng kw’m’uchi-ọ obo, nnwa kw’ubin k’adima pọ wọ m’uchi-ọ obo e."

5 Ma wọ, Ubinọkpaabyi utim Abram uyin k’iyaan, ọkhọhkh-ẹ ndudoru s’ining k’akpaang, oben-ẹ bẹ́, "Kk’asia oche kw’ndudoru isaabhẹ, ọnạng kòde kw’m’okke sẹ ubhik. Oche ngwọ gwọ kw’iva p’iva pọ kwạna m’asaabh."

6 Abram ocher idik nnọ s’Ọvaar Ubinọkpaabyi ọkpaakh-ẹ k’udik ọkka. Osenga ma, Ọvaar ọtạkh-ẹ masẹ ọnạng kw’otor-otor k’akhẹ k’ititikha.

7 Ọvaar Ubinọkpaabyi ọbạra oben Abram bẹ, "Amma nde Ọvaarnạng kwọ, amma wọ wa ntạkh-ọ k’Ur, k’ẹkhạma ch’anạng p’Kaldi, nkwu nnạng ibyi nna, ọfha atạkha sẹ akhaama."

8 Abram ubhin-ẹ bẹ́, "O Ọvaar Ubinọkpaabyi kw’Ẹfa phyibh, m’nsi yạn nsonga bẹ, isisek nna ide saam k’udik ọkka o?"

9 Ọvaar Ubinọkpaabyi ubhin-ẹ bẹ́, "Sọhng ata aror ọbhaamkwa, ọttạra uvukpokha, ọttạra uvudim p’ade icho k’ittaan-k’ittaan, ọttạra ikpua, ọttạra ikpembukha,*15.9 Ikpembukha means pigeon. tima kwu."

10 Abram ọtạk nten nnọ phyibh utima ukwu, ọbhaakha chidede k’ibyi ifa, ochok ikpokha sidede ikkeri oyok. Ọnọhn mạnkkeni vọ f’nạn akpokha afa nọ́bhaakha. 11 Masẹ adẹdẹ asạk bẹ́, akwu achi abukhu p’ekpo mbyọ o, Abram ukhubh bẹ.

12 Okpe kw’iwu kk’ẹsạkha ma ẹchọhkha, Abram ọtaabh ọda bẹ gbroooong urungubạnga kw’upyi bẹ kkạng, ọbạra ojor-ojora, ububh-ẹ. 13 Ma wọ, Ọvaar Ubinọkpaabyi Abram bẹ́, "Songa k’udik ọkka bẹ, iva p’iva pọ m’ade akhikhennạng k’ofhon kw’nạn kwabẹ núdia. Anạng m’age bẹ k’ibira, abạra anạng bẹ irem k’ọttọhk masẹ icho ẹnọhna. 14 Okhenka, amma m’nnạng ẹkhạma ch’ege bẹ k’ibira irem. K’ekpongannạm-kpe, abẹ m’atima ẹkhaama chididen annaanga ibira ch’ofhon ngwọ. 15 Ọma oyeni kakhọ k’ifor, m’aruk akpen tạrr atạm, brasẹ n’ape ator ab’atte k’idira. 16 Ottong igbọ innebung s’iva p’iva pọ, abẹ m’akwuna ma isisek nna, ukwuru bẹ́, okpe tạm nóbenga kw’m’nkubh anọng p’Amọr ma ibyi nna, ukwuru mpyibha sabẹ."

17 Okpe kw’ududon kk’udima, irungu ipyi bẹ kkạng. Abram ose isọhkha s’ekpon ining k’ẹtaanga, ọttạra ikke s’n’iyạma ekpon, ch’eseng k’ngekha s’nten nnọ sabẹ abhaak akpokha afa, eseng efona. 18 Ma iwu njọ, Ọvaar Ubinọkpaabyi ọtạk echekha oben Abram bẹ́, "Iva p’iva pọ bọ m’ntạkha isisek nna, tạma k’ọraanga kw’Ijip, tạrr ukpira k’ọraanga kw’Yupharetes bẹ́, abẹ akhaama. 19 Ifhon s’irukhu ma isek nnọ ide: Ken, ọttạra Keniz, ọttạra Kadạmọn, 20 ọttạra Het, ọttạra Pẹriz, ọttạra Rephayim, 21 ọttạra Amọr, ọttạra Kenaan, ọttạra Girgash, ọttạra aJẹbus."