1 ଇଦାଂପାଚେ ନିତ୍ରେମାପ୍ରୁ ଅବ୍ରାମ୍‌ତିଂ ଇଚାନ୍‌, "ଏପେଙ୍ଗ୍‌ ଜାର୍‌ ଦେସ୍‌ ଆରି ଇଞ୍ଜି କୁଟୁମ୍‌ ଆରି ମାଜ଼ିତି ଇଲ୍‌ ପିସ୍ତି, ଆନ୍‌ ଇମ୍‌ଣି ଦେସ୍‌ ମିଙ୍ଗେଙ୍ଗ୍‌ ଚଚ୍‌ଚାନାଂ, ହେ ଦେସ୍‌ତ ହାଲାଟ୍‌ । 2 ଆପେଙ୍ଗ୍‌ ମି ତାକେଣ୍ଡାଂ ର ଗାଜା କୁଟୁମ୍‌ ରଚ୍‌ନାସ୍‌, ଆରେ, ଆପେଙ୍ଗ୍‌ ମିଙ୍ଗେଙ୍ଗ୍‌ ଆର୍ସିବାଦ୍‌ କିଜ଼ି ମି ତର୍‌ ଗାଜା କିନାପ୍‌; ଏପେଙ୍ଗ୍‌ ଆର୍ସିବାଦ୍‌ନି ଚିନ୍‌ ଆନାଦେର୍‌ ।

3 ଇମ୍‌ଣାକାର୍‌ ମିଙ୍ଗେଙ୍ଗ୍‌ ଆସିର୍‌ବାଦ୍‌ କିଦ୍‌ନାର୍‌,

ଆନ୍‌ ହେୱାରିଂ ଆର୍ସିବାଦ୍‌ କିନାଂ;

ଆରେ, ଜେଇନେର୍‌ ମିଙ୍ଗେଙ୍ଗ୍‌ ସାଇପ୍‌ ହିଦ୍‌ନାର୍‌, ଆନ୍‌ ତାଂ ସାଇପ୍‌ ହିନାଂ; ଆରେ ମିତାଂ ପୁର୍ତିନି ସବୁ ଲାତ୍ରା ଆର୍ସିବାଦ୍‌ ପାୟାନାର୍‌ ।"

4 ଇଦାଂପାଚେ ଅବ୍ରାମ୍‌ ନିତ୍ରେମାପ୍ରୁଙ୍ଗ୍‌ ଇ ବଚନ୍‌ ଇସାପ୍ରେ ହାଚାର୍‌, ଆରେ, ଲତ ତା ଲାହାଙ୍ଗ୍‌ ହାଚାନ୍‌; ହାରଣ୍‌ତାଂ ହାନି ସମୁତ ଅବ୍ରାମ୍‌ତି ବୟଁସ୍‌ ସତୁରି ପାଞ୍ଚ୍‌ ବାର୍ହୁ ଆଜ଼ି ମାଚାତ୍‌ । 5 ଇଲାକେ ଅବ୍ରାମ୍‌ ଜାର୍‌ ଡକ୍ରୁହି ସାରିଙ୍ଗ୍‌ ଆରି ଟଣ୍ଡେନ୍‌ ମାଜ଼ି ଲତଙ୍ଗ୍‌ ଆରି ହାରଣ୍‌ ତାକେ ଜାର୍‌ତି ଇଡ଼୍‌ତି ଦନ୍‌ ଆରି ପାୟାତି ପାରାଣିକାଂ ଅଜ଼ି କିଣାନ୍‌ ଦେସ୍‌ ଉଦେସ୍‌ତ ହାଲ୍‌ଜି କିଣାନ୍‌ତ ଏକାତାର୍‌ । 6 ଅବ୍ରାମ୍‌ ହେ ଦେସ୍‌ ହିଜ଼ି ହାଲୁ ହାଲୁ ସିକିମ୍‌ ଲାଗାୟ୍‌ ମରିନି ଅଲନ୍‌ ମାର୍‌ ଦଲ୍‌ତ ଏକାତାର୍‌ । ହେ ସମୁତ କିଣାନିୟ ହେ ଦେସ୍‌ତ ବାହା କିଜ଼ିମାଚାର୍‌ । 7 ଇଦାଂପାଚେ ନିତ୍ରେମାପ୍ରୁ ଅବ୍ରାମ୍‌ତିଂ ଚଜ୍ୟାଜ଼ି ଇଚାନ୍‌, ଆପ୍‌ ମି କୁଟୁମ୍‌ତିଂ ଇ ଦେସ୍‌ ହିଦ୍‌ନାପ୍‌; ଇଦାଂକାଜିଂ ଅବ୍ରାମ୍‌ ଜାର୍‌ ଲାଗାୟ୍‌ ଚଞ୍ଜ୍ୟା ଆଦ୍‌ନାକାନ୍‌ ନିତ୍ରେମାପ୍ରୁ ଉଦେସ୍‌ତ ହେ ବାହାତ ଗାର୍‌ଣି ରଚ୍‌ଚାନ୍‌ । 8 ଇଦାଂପାଚେ ହେୱାନ୍‌ ହେ ବାହା ପିସ୍ତି ବୈତେଲ୍‌ନି ୱେଡ଼ାହନି ନିପ ମାଡ଼ିତ ହାଲ୍‌ଜି ଜାର୍‌ ତୁମ୍‌ ନିଲି କିତାନ୍‌; ହେବେନି ୱେଡ଼ାହାନି ନିପ ବଇତେଲ୍‌ ଆରି ୱେଡ଼ାହନି ଦିଗ୍‌ନିପ ଅୟ ଗାଡ଼୍‌ ମାଚାତ୍‌; ଆରେ, ହେବେ ନିତ୍ରେମାପ୍ରୁତି ଉଦେସ୍‌ତ ର ପୁଜାଗାର୍‌ଣି ରଚ୍‌ଚି ନିତ୍ରେମାପ୍ରୁତି ତର୍‌ଦ ପାର୍ତାନା କିତାନ୍‌ । 9 ହେଦାଂ ପାଚେ ଅବ୍ରାହାମ୍‌ ହାଲୁ ହାଲୁ ଆରେ ୱେଡ଼ାହନି ନିପ ହାଚାନ୍‌ ।

10 ହେ ୱେଡ଼ାଲିଂ ହେ କିଣାନ୍‌ ଦେସ୍‌ତ କାତାର୍‌ ଆତିଲେ ଅବ୍ରାମ୍‌ ମିସର୍‌ ଦେସ୍‌ତ ମାଞ୍ଜେଙ୍ଗ୍‌ ହାଚାନ୍‌; ଇନେକିଦେଂକି ଦେସ୍ତ ବେସି କାତାର୍‌ ଆର୍‌ଜି ମାଚାତ୍‌ । 11 ଇଦାଂପାଚେ ମିସର୍‌ ଦେସ୍‌ତ ହଣ୍‌ଗେଦେଂ ଜାଲ୍‌ଦି ଆତିଲେ, ଅବ୍ରାମ୍‌ ଜାର୍‌ ଡକ୍ରି ସାରିଙ୍ଗ୍‌ ଇଚାନ୍‌, "ୱେନା, ଏନ୍‌ ହୁଡ଼୍‌ଦେଂ ହଲ୍‌ନାକାୟ୍‌, ହେଦାଂ ଆନ୍‌ ପୁନାଙ୍ଗ୍‌ । 12 ଇଦାଂକାଜିଂ ମିସର୍‌ ଦେସ୍‌ନି ଲକୁ ନିଂ ହୁଡ଼୍‌ଜି ନା ଡକ୍ରି ଇଞ୍ଜି ପୁନ୍‌ଚିସ୍‌, ନାଂ ଅସ୍ତି ନିଂ ଜିବୁନ୍‌ ଇଡ଼୍‌ଦାନାର୍‌ । 13 ଇଦାଂ କାଜିଂ ଆନ୍‌ ଗୱାରି କିଦ୍‌ନାଙ୍ଗା, ଏନ୍‌ ନା ତଣ୍‌ଦେଲ୍‌, ଇଦାଂ ଇନାୟ୍‌; ହେବେଣ୍ଡାଂ ନି କାଜିଂ ନା ମଙ୍ଗଲ୍‌ ଆନାତ୍‌ ଆରି ନି କାଜିଂ ନା ପାରାଣ୍‌ ରାକ୍ୟା ପାୟାନାତ୍‌ ।" 14 ଇଦାଂପାଚେ ଅବ୍ରାମ୍‌ ମିସର୍‌ ଦେସ୍‌ତ ହଟିଲେ, ମିସରିୟାର୍‌ ଲକୁ ତା କଗ୍‌ଲେଙ୍ଗ୍‌ ବେସି ହଲ୍‌ନାକା ହୁଡ଼୍‌ତାର୍‌ । 15 ଆରେ, ମୁଣିକାତି ଆଦିକାରିର୍‌ ହେଦେଲିଂ ହୁଡ଼୍‌ଜି ପାରତି ଲାଗେ ତାତି ୱାରିକିୟ୍‌ କିତିଲେ, ହେ କଗ୍‌ଲେ ମୁଣିକାତି ଇଞ୍ଜ ତାହିୱାୟାତାର୍‌ । 16 ପାର ହେଦେଲ୍‌ କାଜିଂ ଅବ୍ରାମ୍‌ତିଂ ୱାରିକିଜ଼ି ହେୱାନିଂ ମେଣ୍ଡା, କଡିଂ, ଗଦ ଆରି ଆଡ଼ିଏନ୍‌ ଆଡ଼ିୟାଣି ଆରି ତେୟା ଗଦ ଆରି ଉଟ୍‌ ହିତାନ୍‌ ।

17 ମତର୍‌ ଅବ୍ରାମ୍‌ତି ଡକ୍ରୁହି ସାରିତି କାଜିଂ ନିତ୍ରେମାପ୍ରୁ ପାର ଆରି ହେୱାନ୍ତି କୁଟୁମ୍‌ ଜପି ବେମାର୍‌ ଗିଟାୟ୍‌କିତାନ୍‌ । 18 ଇଦାଂକାଜିଂ ପାର ଅବ୍ରାମ୍‌ତିଂ କୁକ୍‌ଚି ଇଚାନ୍‌, "ଏପ୍‌ ମା ଲାହାଂ ଇଦାଂ ଇନା ବେବାର୍‌ କିତାୟ୍‌ ? 19 ହେ କଗ୍‌ଲେ ନି ଡକ୍ରି, ଇ କାତା ମାଂ ଇନେକିଦେଂ ୱେଚ୍‌ଚା ୱାତାୟ୍‌ ? ହେଦେଲିଂ ଇନେକିଦେଂ ଜାର୍‌ ତଣ୍‌ଦେଲ୍‌ ଇଞ୍ଜି ଇନ୍‌ଚାୟ୍‌ ? ହେଦାଂକାଜିଂ ଆପ୍‌ ହେଦେଲିଂ ବିବା କିଦେଂ ଅତାପ୍‌; ନଂ ନି ଡକ୍ରିଙ୍ଗ୍‌ ହୁଡ଼ା, ହେଦେଲିଂ ଅସି ହାଲା ।" 20 ପାଚେ ପାର ମାନାୟାରିଙ୍ଗ୍‌ ହେଦେଲ୍‌ ବିସ୍ରେ ବଲ୍‌ ହିତାନ୍‌, ଆରେ ହେୱାର୍‌ ସବୁ ଦିନିସ୍‌ ଲାହାଂ ଅବ୍ରାମ୍‌ ଆରି ହେୱାନ୍ତି ଡକ୍ରିଙ୍ଗ୍‌ ହେଲ ହିତାନ୍‌ ।