1 ଅବ୍ରାମ୍‌ତି ନବେନ ବାର୍ହୁ ବୟଁସ୍‌ତ ନିତ୍ରେମାପ୍ରୁ ହେୱାନିଂ କ୍ଡେଞ୍ଜି କିଜ଼ି ଇଚାନ୍‌, "ଆପ୍‌ ୱିଜ଼େତିଂ ସାକ୍ତିକାଟି ଇସ୍ୱର୍‌; ମା ଲାଗାୟ୍‌ ଦାର୍ମିକାମାୟ୍‌ କିଜ଼ି ଏନ୍‌ ପୁରା ଆ । 2 ଆପ୍‌ ନି ଲାହାଂ ଜାର୍‌ ନିୟମ୍‌ ତିର୍‌ କିଜ଼ି ନିଙ୍ଗେଙ୍ଗ୍‌ ବେସି ବାଡାୟ୍‌ କିନାସ୍‌ ।" 3 ହେବେ ଅବ୍ରାମ୍‌ ଡାଣ୍ଡାହାଡ଼୍‌ ମାକ୍‌ତିଲେ, ଇସ୍ୱର୍‌ ତା ଲାହାଂ ବେଣ୍‌ କିଜ଼ି ଇଚାନ୍‌, 4 "ହୁଡ଼ା, ଆପ୍‌ ନି ଲାହାଂ ଜାର୍‌ ନିୟମ୍‌ ତିର୍‌ କିତାପ୍‌ନା, ଏନ୍‌ ବେସି କୁଟୁମ୍‌ନି ଆକ ଆନାୟ୍‌ । 5 ଆରେ, ନି ତର୍‌ ଅବ୍ରାମ୍‌ ଆରେ ମାନ୍‌ଗୁତ୍‌, ମତର୍‌ ଅବ୍ରାହାମ୍‌ ଆନାତ୍‌ । ଇନେକିଦେଂକି ଆପ୍‌ ନିଂ ବେସି କୁଟୁମ୍‌ନି ଆକବୁଡା କିତାପ୍‌ । 6 ଆପ୍‌ ନିଂ ବେସି ବାଡାୟ୍‌ କିଦ୍‌ନାପ୍‌, ନିତାଂ ବେସି କୁଟୁମ୍‌ ଉବ୍‌ଜାୟ୍‌ କିୟ୍‌କିନାସ୍‌ ଆରି ରାଜାର୍‌ ମିତାଂ ଉବ୍‌ଜା ଆନାର୍‌ ।

7 ଆପ୍‌ ନି ଲାହାଂ ଆରି ନି ଆଗେୱାନି ବଁସ୍‌ ରିତିନିତି ଲାହାଂ ଇମ୍‌ଣି ନିୟମ୍‌ ତିର୍‌ କିତାପ୍‌, ହେଦାଂ ୱିଜ଼୍‌ୱିକାଡ଼୍‌ତିର୍‌ ଆନାତ୍‌ । ହେବେଣ୍ଡାଂ ଆପ୍‌ ନିଦାଂ ଆରି ନି ଆଗେୱାନିଦିନ୍ତ ବଁସ୍‌ନି ଇସ୍ୱର୍‌ ଆନାସ୍‌ । 8 ଆରେ, ଏନ୍‌ ନଂ ଇମ୍‌ଣି କିଣାନ୍‌ ଦେସ୍‌ତ ବାହା କିନାୟା, ହେବେନି ୱିଜ଼ୁ ଆପ୍‌ ମିଙ୍ଗେଙ୍ଗ୍‌ ଆରି ମି ୱାନିଦିନ୍ତ ବଁସ୍‌ତିଂ ୱିଜ଼୍‌ୱିକାଡ଼୍‌ନି ଆଦିକାର୍‌ କାଜିଂ ହିନାସ୍‌ ଆରି ଆପ୍‌ ହେୱାର୍ତି ଇସ୍ୱର୍‌ ଆନାସ୍‌ ।"

9 ଇସ୍ୱର୍‌ ଅବ୍ରାହାମ୍‌ତିଂ ଆରେ ଇଚାନ୍‌, "ଏନ୍‌ ମା ନିୟମ୍‌ ମାନି କିନାୟ୍‌; ଏନ୍‌ ଆରି ମି ଆଗେୱାନିଦିନ୍ତ ବଁସ୍‌ନି ଆଣ୍ଡ୍ରାଙ୍ଗ୍‌ ହେଦାଂ ମାନି କିନାର୍‌ । 10 ମିଦାଂ ଆରି ମି ଆଗେୱାନିଦିନ୍ତ ବଁସ୍‌ନି ଲାହାଂ କିତି ଇମ୍‌ଣି ନିୟମ୍‌ ଏପେଙ୍ଗ୍‌ ମାନି କିନାଦେର୍‌ ହେଦାଂ ଇଦାଂ, ମି ଜାଣ୍‌କେ ଆଣ୍ଡ୍ରାହିମ୍‌ଣାଂ ସୁନତ୍‌*17:10 ପୁଟ୍‌କିନି ତଲ୍‌ ରାସ୍‌ନାକା ଆନାର୍‌ । 11 ଏପେଙ୍ଗ୍‌ ଜାର୍‌ ଜାର୍ତି ପୁଟ୍‌କିନି ତଲ୍‌ ରାଜ଼୍‌ନାଦେର୍‌; ଆରେ ହେଦାଂ ମି ଲାହାଂ ମାଦାଂ ନିୟମ୍‌ନି ଚିନ୍‌ ଆନାତ୍‌ । 12 ଆବାର୍‌ଲାତ୍ରା ମି ଜାଣ୍‌କେ ହିମ୍‌ଣାଙ୍ଗ୍‌ତି ଆଟ୍‌ ଦିନ୍‌ ପାଚେ ସୁନତ୍‌ ଆନାର୍‌ । ଆରେ, ଇମ୍‌ଣାକାର୍‌ ନି କୁଟୁମ୍‌ ଆକାୟ୍‌, ଏଲେଙ୍ଗ୍‌ ବିଦେସ୍‌ନି ଇମ୍‌ଣି ମାନାୟ୍‌ ମି ଇଞ୍ଜ ଚଞ୍ଚାକାର୍‌ କି ମଲ୍‌ତ କଡ଼୍‌କା ଆନାନ୍‌, ତାତି ପା ସୁନତ୍‌ ଆନାର୍‌ । 13 ଆରେ, ମି ଇଞ୍ଜ ଚଞ୍ଚାକାନ୍‌ କି ମଲ୍‌ନି କଡ଼୍‌କା ମାଜ଼ି ସୁନତ୍‌ ଆତିସ୍‌ପା କିନାକା ମାନାତ୍‌; ହେବେନି ୱିଜ଼୍‌ୱିକାଡ଼୍‌ ରଚ୍‌ଚି ମି ଗାଗାଡ଼୍‌ତ ମା ନିୟମ୍‌ନି ଚିନ୍‌ ମାନ୍‌ଗାନାତ୍‌ । 14 ମତର୍‌ ଇନେର୍ତି ପୁଟ୍‌କିନି ତଲ୍‌ ରାଜ଼୍‌ୟା ଆୱିତିସ୍‌, ଏଲେଙ୍ଗ୍‌ ଜେ ସୁନତ୍‌ଆୱିତି ଆଣ୍ଡ୍ରେନ୍‌, ହେ ପାରାଣି ଜାର୍‌ ମାନାୟାରିଂ ବିତ୍ରେତାଂ ଅଚିନା ଆନାନ୍‌; ହେୱାନ୍‌ ମା ନିୟମ୍‌ ଉଡ଼ାତାନ୍‌ ।"

15 ତାପାଚେ ଇସ୍ୱର୍‌ ଅବ୍ରାହାମ୍‌ତି ଇଚାନ୍‌, "ଏନ୍‌ ଜାର୍‌ କଗ୍‌ଲେ ସାରିତିଂ ଆରେ ସାରି ଇଞ୍ଜି କୁକ୍‌ମା; ହେଦେଲ୍‌ତି ତର୍‌ ସାରା ଆତାତ୍‍ । 16 ଆପ୍‌ ହେଦେଲିଂ ଆର୍ସିବାଦ୍‌ କିନାସ୍‌ ଆରି ତା ତାଂ ନିଙ୍ଗେଙ୍ଗ୍‌ ର ମାଜ଼ି ହିନାସ୍‌; ଆପ୍‌ ହେଦେଲିଂ ଆର୍ସିବାଦ୍‌ କିନାପ୍‌, ହେଦେଲ୍‌ ବାର୍‌ବିନ୍‌ କୁଟୁମ୍‌ନି ମୁଡ଼୍‌ଆୟା ଆନାତ୍‌, ତା ତାଂ ବାର୍‌ବିନ୍‌ ଦେସ୍‌ନି ରାଜାର୍‌ ଉବ୍‌ଜାଣ୍‌ ଆନାର୍‌ ।"

17 ହେଏଚେକାଡ଼୍‌ଦ ଅବ୍ରାହାମ୍‌ ଡାଣ୍ଡାହାଡ଼୍‌ ମାଗ୍‌ଜି ଗ୍ଡାଇତାନ୍‌, ଆରେ, ମାନେ ମାନେ ଇଚାନ୍‌, "ଆଣ୍ଡ୍ରେନ୍‌ ସଏ ବାର୍ହୁ ବୟଁସ୍‌ତ କି ହିମ୍‌ଣାଙ୍ଗ୍‌ ଗାଟାନାର୍‌ ? ନବେ ବାର୍ହୁନି ବୟଁସ୍‌ତ ସାରା କି ଗାଟାନାତ୍‌ ?" 18 ହେବେଣ୍ଡାଂ ଅବ୍ରାହାମ୍‌ ଇସ୍ୱର୍‌ତିଂ ଇଚାନ୍‌, "ଇସ୍ମାଏଲ୍‌ ନି ମୁମ୍‌ଦ ଜିଜ଼ି ମାନେନ୍‌ ।"

19 ହେଏଚେକାଡ଼୍‌ଦ ଇସ୍ୱର୍‌ ଇଚାନ୍‌, "ନି ଡକ୍ରି ସାରା ନି କାଜିଂ ନିଜେ ମାସି ଗାଟାନାତ୍‌, ଆରେ, ଏନ୍‌ ତା ତର୍‌ ଇସ୍‌ହାକ୍‌ ଇଟ୍‌ନାୟ୍‌, ଆରେ, ଆପ୍‌ ତା ଲାହାଂ ଜାର୍‌ ନିୟମ୍‌ ତିର୍‌ କିନାପ୍‌: ହେଦାଂ ହେୱାନ୍ତି ଆଗେୱାନିଦିନ୍ତି ବଁସ୍‌ ପାକ୍ୟାତ ୱିଜ଼୍‌ୱିକାଡ଼୍‌ ନିୟମ୍‌ ଆନାତ୍‌ । 20 ଆରେ, ଇସ୍ମାଏଲ୍‌ ବିସ୍ରେ ନି ପାର୍ତାନା ୱେଚାପ୍‌; ହୁଡ଼ା, ଆପ୍‌ ହେୱାନିଂ ଆର୍ସିବାଦ୍‌ କିନାପ୍‌, ଆରେ, ବେସି କୁଟୁମ୍‌ କିସି ହେୱାନ୍ତି ବୟଁସ୍‌ ବେସି ବାଡାୟ୍‌ କିନାପ୍‌ । ହେୱାନ୍‌ତାଂ ବାର୍‌ ଜାଣ୍‌ ରାଜାର୍‌ ଜଲମ୍‌ ଆନାର୍‌ ଆରି ଆପ୍‌ ହେୱାନିଂ ଗାଜା କୁଟୁମ୍‌ କିନାପ୍‌ । 21 ମତର୍‌ ୱାନି ବାର୍ହୁନି ଇ ୱେଡ଼ାଲିଂ ସାରା ପଟତ ଇମ୍‌ଣି ଇସ୍‌ହାକ୍‌ ଜଲମ୍‌ ଆନାନ୍‌, ତା ଲାହାଂ ଆପ୍‌ ଜାର୍‌ ନିୟମ୍‌ ତିର୍‌ କିନାପ୍‌ ।" 22 ଏଲେଙ୍ଗ୍‌ କାତାବାର୍ତା ୱିସ୍ତି ପର୍‌ମେସ୍ୱର୍‌ ଅବ୍ରାହାମ୍‌ ତାକେଣ୍ଡାଂ ଜପି ହାଚାନ୍‌ ।

23 ଇଦାଂପାଚେ ଅବ୍ରାହାମ୍‌ ଜାର୍‌ ମାଜ଼ି ଇସ୍ମାଏଲ୍‌ତିଂ ଆରି ଜାର୍‌ ଇଞ୍ଜାକାନ୍‌ ଆରି ମଲ୍‌ କଡ଼୍‌କାମାଜ଼ି ୱିଜ଼ାର୍‌ ଲକୁରିଂ, ଇଚିସ୍‌ ଅବ୍ରାହାମ୍‌ତି ଇଞ୍ଜମାନି ଜାଣ୍‌କେ ଆଣ୍ଡ୍ରାହିମ୍‌ଣାକାଂ ଅଜ଼ି ଇସ୍ୱର୍‌ତି ବଲ୍‌ ଇସାବ୍ରେ ହେ ନାଞ୍ଜିଙ୍ଗ୍‌ ୱିଜ଼ାକାର୍ତି ସୁନତ୍‌ କିନାର୍‌ । 24 ଅବ୍ରାହାମ୍‌ତି ନବେନ ବାର୍ହୁ ବୟଁସ୍‌ତ ସୁନତ୍‌ କିୟାଆତାନ୍‌ । 25 ଆରେ, ହେୱାନ୍ତି ମାଜ଼ି ଇସ୍ମାଏଲ୍‌ତି ତେର ବାର୍ହୁ ବୟଁସ୍‌ତ ସୁନତ୍‌ କିୟାଆତାନ୍‌ । 26 ଏଲେଙ୍ଗ୍‌ ର ନାଞ୍ଜିଙ୍ଗ୍‌ ଅବ୍ରାହାମ୍‌ତି ଆରି ହେୱାନ୍ତି ମାଜ଼ି ଇସ୍ମାଏଲ୍‌ତି ସୁନତ୍‌ ଆତାତ୍‌ । 27 ଆରେ, ତା ଇଞ୍ଜାକାର୍‌ ଆରି ବିଦେସିୟାର୍ତି ଲାଗେତାଂ ମଲ୍‌ କଡ଼୍‌କାମାଜ଼ି ହେୱାନ୍ତି ଇଞ୍ଜାକାର୍‌ ୱିଜ଼ାର୍‌ ଆଣ୍ଡ୍ରାହିମ୍‌ଣାଂ ସୁନତ୍‌ ଆତାର୍‌ ।