1 ଇଦାଂପାଚେ ଦିନେକ୍‌ନି କାରା ୱେଡ଼ାଲିଂ ଅବ୍ରାହାମ୍ ମମ୍ରିନି ଅଲନ୍‌ ମାର୍‌ ତାରେନ୍‌ ଜାର୍‌ ତୁମ୍‌ ଦୁୱେର୍‌ତ କୁଚ୍‌ଚି ମାଚାନ୍‌; ଇ ୱେଡ଼ାଲିଂ ନିତ୍ରେମାପ୍ରୁ ହେ ବାହାତ ହେୱାନିଂ ଚଜ୍ୟା ଆତାନ୍‌ । 2 ହେବେ ହେୱାନ୍‌ ଇଟ୍‌କାଡ଼୍‌ କିଜ଼ି ହୁଡ଼୍‌ତାନ୍‌, ତିନ୍‌ ଜାଣ୍‌ ଆଣ୍ଡ୍ରାହିମ୍‌ଣାଂ ହେୱାନ୍‌ ମୁମ୍‌ଦ ଡାଣ୍ଡାହାଣ୍‌; ଆରେ, ହୁଡ଼୍‌ତି ଦାପ୍ରେ ବେଟ୍‌ ଆଦେଂ ତୁମ୍‌ ଦୁୱେର୍‌ତାଂ ବେଗି ହାଲ୍‌ଜି ଜୁୱାର୍‌ କିଜ଼ି ଇଚାର୍‌, 3 ଏ ମାପ୍ରୁ, ଗୱାରି କିଦ୍‌ନାଙ୍ଗା, ଗାଜାକାଦେର୍‌, ଜଦି ଏପେଙ୍ଗ୍‌ ନା ଜପି ସାରି ଆତିସ୍‌, ତେବେ ଇ ଆଡ଼ିଏନ୍‌ତି ବାହାତ ଇବେ ଅଲପ୍‌ ସମୁ ମାନାଟ୍‌ । 4 ଗୱାରି କିଦ୍‌ନାଙ୍ଗା, ନାଂ ଅଲପ୍‌ ଏସ୍‌ ତାତେଂ ହିଦା ଆରେ, ଏପେଙ୍ଗ୍‌ ପାନାଙ୍ଗ୍‌ ନୁଜ଼୍‌ଜି ଇ ମାର୍‌ ତାରେନ୍‌ ଜମାଟ୍‌ 5 ଇନେକିଦେଂକି "ଏପେଙ୍ଗ୍‌ ମି ଆଡ଼ିଏନ୍‌ ଲାଗାୟ୍‌ ୱାତାଦେର୍ଣ୍ଣା, ଇଦାଂକାଜିଂ ନାଂ ଇଚୁକ୍‌ କାଦି ତାତେଂ ହିଦାଟ୍‌, ଆରେ ଚିଚି ପାଚେ ଏପେଙ୍ଗ୍‌ ହାନାଦେର୍‌ ।" ହେଏଚେକାଡ଼୍‌ଦ ହେୱାର୍‌ ଇଚାର୍‌, "ଇନାକା ଇନାଦେରା, ହେଦାଂ କିୟାଟ୍‌ ।"

6 ହେବେ ଅବ୍ରାହାମ୍‌ ବେଗି ତୁମ୍‌ ଇଞ୍ଜ ସାରା ଲାଗାୟ୍‌ ହାଲ୍‌ଜି ଇଚାନ୍‌, "ସାତ୍‌ (ଆଡା*18:6 ଇନାକା କଡ଼େ କେଜି ଆନାତ୍‌ (ସାତ୍‌ କେଜି ହାତ୍‌ପା)) ହାର୍ଦି ଗୁଣ୍ଡା ଅଜ଼ି ବେଗି ରୁଟି ରଚା ।" 7 ଇଦାଂପାଚେ ଅବ୍ରାହାମ୍‌ ଗଟ୍‌ଣାତ ବେଗି ହାଲ୍‌ଜି ହାର୍ଦାକା କୱାଣ୍‌ ବାଚା ହିମ୍‌ଣା ତାସି ଆଡ଼ିଏନିଂ ହିତିଲେ, ହେୱାନ୍‌ ହେଦାଂ ବେଗି ୱାନ୍‌ଞ୍ଚାନ୍‌ । 8 ହେଏଚେକାଡ଼୍‌ଦ ହେୱାନ୍‌ ଦେଂ, ପାଲ୍‌ ଆରି ୱାନ୍‌ଚି ଜେଇ ତାସି ହେୱାର୍‌ ଲାଗାୟ୍‌ ଇଡ଼୍‌ତାନ୍‌, ଆରେ, ହେୱାର୍‌ ତିନି ୱେଡ଼ାଲିଂ ମାର୍‌ ଦଲ୍‌ଦ କଡିଂ ଲାଗାୟ୍‌ ନିଲ୍‌ତାନ୍‌ ।

9 ତା ପାଚେ ହେୱାର୍‌ ହେୱାନିଙ୍ଗ୍‌ ୱେନ୍‌ବାତାର୍‌, "ନି ଡକ୍ରି ସାରା ଇମେତାକେ ?"

ହେୱାନ୍‌ ଇଚାନ୍‌, "ହୁଡ଼ାଟ୍‌, ହେଦେଲ୍‌ ତୁମ୍‌ତ ମାନାତ୍‌ ।"

10 ହେୱାର୍‌ ବିତ୍ରେତାଂ ରୱାନ୍‌ ଇଚାନ୍‌, "ଇ ମାସ୍ତ ଆର୍‌ରଗ ୱାନାପ୍‌ ହେୱେଡ଼ାଲିଂ ଆପେଙ୍ଗ୍‌ ଇନେସ୍‌ପା ମାସ୍‌ଦି ୱାନାପ୍; ହୁଡ଼ା, ହେ ୱେଡ଼ାଲିଂ ନି ଡକ୍ରି ସାରା ୱାକ୍‌ତ ର ମାଜ଼ି ମାନ୍‌ଗାନାନ୍‌ ।" ଇ କାତା ସାରା ତୁମ୍‌ ଦୁୱେର୍‌ତ ହେୱାର୍‌ ପାଚେ ମାନ୍‌ଞ୍ଜି ୱେଚାତ୍‌ । 11 ହେ ସମୁତ ଅବ୍ରାହାମ୍‌ ଆରି ସାରା ହାତାନ୍‌ ଆରି ବୁଡ଼ାବୟଁସ୍‌ ଆଜ଼ି ମାଚାର୍‌, ଆରେ, ସାରାତି ହେନ୍ଦ୍ରାହକ୍‌ନାକା ବନ୍ଦ୍‌ ଆଜ଼ି ମାଚାତ୍‌ । 12 ଇଦାଂକାଜିଂ ସାରା ଗ୍ଡାଇଜି ମାନେ ମାନେ ଇଚାତ୍‌, "ନାଦାଂ ଇ ୱିସ୍ତିୱେଡ଼ାଲିଂ କି ଏଲେଂ ୱାରି ଆନାତ୍‌ ? ବେସିକିଜ଼ି ନା ମାପ୍ରୁ ପା ବୁଡ଼୍‌ହି ।"

13 ହେଏଚେକାଡ଼୍‌ଦ ନିତ୍ରେମାପ୍ରୁ ଅବ୍ରାହାମ୍‌ତିଂ ଇଚାନ୍‌, ଜାର୍ତି ହାତାନ୍‌ ୱେଡ଼ାଲିଂ କି ହାତ୍‌ପା ହିମ୍‌ଣା ଜଲମ୍‌ ଆନାତ୍‌, ଇଦାଂ ବାବି କିଜ଼ି ସାରା ଇନେକିଦେଂ ଗ୍ଡାଇତାତ୍‌ ? 14 ନିତ୍ରେମାପ୍ରୁତି ଇନାକା କାମାୟ୍‌ ଆଟ୍‌ୱା କି ? ଇ ମାସ୍ତ ଆର୍‌ରଗ ଏକାୱାତିସ୍‌, ଆତି ସମୁତ ଆପ୍ ମାସ୍‌ଦି ୱାନାପ୍‌, ହେ ସମୁତ ସାରା ୱାକ୍‌ତ ମାଜ଼ି ମାନ୍‌ଗାନାନ୍‌ ।

15 ହେବେ ସାରା ମୁନାକିଜ଼ି ଇଚାତ୍‌, "ଆନ୍‌ ଗ୍ଡାଇୱାତାଂନା" ଇନେକିଦେଂକି ହେଦେଲ୍‌ ପାଣ୍ଡ୍ରାଜ଼଼ି ମିଚ୍‌ ଇଚାତ୍‌ । ମତର୍‌ ନିତ୍ରେମାପ୍ରୁ ଇଚାନ୍‌, "ଏନ୍‌ ହାତ୍‌ପା ଗ୍ଡେଇତାୟ୍‌ ।"

16 ଇଦାଂପାଚେ ହେ ଲକୁ ହେବେତାଂ ନିଂଜି ସଦମ ନିପ ହାଚାର୍‌, ଅବ୍ରାହାମ୍‌ ହାଜ଼ି ଚଚ୍‌ଚେଂ ହେୱାର୍‌ ଲାହାଂ ତାଂତାନ୍‌ । 17 ହେବେ ନିତ୍ରେମାପ୍ରୁ ଇଚାନ୍‌, "ଆପ୍‌ ଇନାକା କିଦେଂ ମାନ୍‌ କିନାପା, ହେଦାଂ କି ଅବ୍ରାହାମ୍‌ତାଂ ଡ଼ୁକ୍‌ନାସ୍‌ ?" 18 ଅବ୍ରାହାମ୍‌ତାଂ ରଞ୍ଜାଙ୍ଗ୍‌ ଗାଜା ଆରି ବାଡ଼୍‌କାସ୍‌ କୁଟୁମ୍‌ ଉବ୍‌ଜା ଆନାତ୍‌ ଆରି ପୁର୍ତିନି ୱିଜାର୍‌ କୁଟୁମ୍‌ ତାତାଂ ଆର୍ସିବାଦ୍‌ ପାୟାନାର୍ । 19 ଇନେକିଦେଂକି ତା ୱାନିଦିନ୍ତ ହିମ୍‌ଣାୱାକ୍‌ଡ଼ା ଆରି ଇଲ୍‌କୁଟୁମ୍‌ନିକାର୍‌ ଇନେସ୍‌ ନିୟାୟ୍‌ ଆରି ଦାରୁମ୍‌ବେବାର୍‌ କିଦେଂ ନିତ୍ରେମାପ୍ରୁତି ହାଜ଼ିତ ତାଂନାର୍‌, ଇଦାଂକାଜିଂ ହେୱାରିଂ ହେୱାନ୍‌ ଇନେସ୍‌ ବଲ୍‌ ହିନାନ୍‌, ଇ ହାତୁର୍‌ତିଂ ଆପ୍‌ ତାଂ ବାଚି କିତାପ୍‌ନା; ହେବେ ନିତ୍ରେମାପ୍ରୁ ଅବ୍ରାହାମ୍‌ତି ବିସ୍ରେ ଜାର୍‌ ଇଚି ବଚନ୍‌ ପୁରା କିନାନ୍‌ ।

20 ନିତ୍ରେମାପ୍ରୁ ଅବ୍ରାମ୍‌ତିଂ ଇଚାନ୍‌, "ସଦମ ଆରି ହମରାନି ବିରୁଦ୍‌ତ ପିୟକିର୍‌ଡ଼ି ନିଂନାତା, ହେୱାର୍ତି ପାପ୍‌ ବେସି; 21 ଲାଗିଂ ଆପ୍‌ ତାରେନ୍‌ ହୁଡ଼୍‌ଦେଂ ହାଲ୍‌ଜି ମା ଲାଗାୟ୍‌ ୱାତି କାନ୍ଦାଣ୍‌ ହିସାବ୍ରେ ହେୱାର୍‌ ୱିଜ଼ୁତାକେ କିତାର୍ଣ୍ଣା କି ଆକାୟ୍‌, ହେଦାଂ ପୁନାସ୍‌ ।"

22 ଇଦାଂପାଚେ ହେ ମୁଣିକାର୍‌ ହେବେତାଂ ମାସ୍‌ଦି ସଦମ ନିପ ହାଚାର୍‌: ମତର୍‌ ଅବ୍ରାହାମ୍‌ ହେ ପାତେକ୍‌ ନିତ୍ରେମାପ୍ରୁତି ମୁମ୍‌ଦ ନିଲ୍‌ଚି ମାଚାନ୍‌ । 23 ଇଦାଂପାଚେ ଅବ୍ରାହାମ୍‌ ନିତ୍ରେମାପ୍ରୁତି ଲାଗାୟ୍‌ ହାଲ୍‌ଜି ଇଚାନ୍, "ଏନ୍‌ କି କୁର୍ଲିୟା ଲାହାଂ ଦାର୍ମିତିଂ ବୁଡାୟ୍‌ କିନାୟ୍‌ ? 24 ଆଜ଼ିମାନ୍‌ଗାନାତ୍‌, ଗାଡ଼୍‌ ବିତ୍ରେ ପଚାସ୍‌ ଜାଣ୍‌ ଦାର୍ମି ମାନ୍‌ଗାନାର୍‌; ହେବେନି ମାଦିନିକାର୍‌ ପଚାସ୍‌ ଜାଣ୍‌ ଦାର୍ମିର୍‌ କାଜିଂ କି ହେ ବାହା ରାକ୍ୟା କିୱାଦାଂ ବୁଡାୟ୍‌ କିନାୟ୍‌ ? 25 କୁର୍ଲିୟା ଲାହାଂ ଦାର୍ମିତିଂ ନାସ୍‌ କିନି କାମାୟ୍‌ ମି ତାକେଣ୍ଡାଂ ଦେହା ମାନେତ୍‌ ଆରି ଦାର୍ମିତିଂ କୁର୍ଲିୟାତି ହମାନ୍‌ କିନାକା ମି ତାକେଣ୍ଡାଂ ଦେହା ମାନେତ୍‌ । ୱିଜ଼ୁ ପୁର୍ତିନି ବିଚାର୍‌କାର୍‌ୟା କି ନିୟାୟ୍‌ ବିଚାର୍‌ କିଉୟ୍‌ ?"

26 ହେବେ ନିତ୍ରେମାପ୍ରୁ ଇଚାନ୍‌, "ଆପ୍‌ ଜଦି ସଦମ ଗାଡ଼୍‌ତ ପଚାସ୍ ଜାଣ୍‌ ଦାର୍ମିରିଂ ହୁଡ଼୍‌ନାପ୍‌, ତେବେ ହେୱାର୍ତି କାଜିଂ ୱିଜ଼ୁ ବାହା ରାକ୍ୟା କିନାସ୍‌ ।"

27 ହେବେ ଅବ୍ରାହାମ୍‌ ଉତର୍ ହିତାନ୍‌, "ହୁଡ଼ା, ଆନ୍ ଦୁଡ଼ି ଆରି ନିସ୍‌ମତର୍‌ ଆତିସ୍‌ ପା ନା ମାପ୍ରୁତି ଲାଗେ କାତା ଇଞ୍ଜେଙ୍ଗ୍‌ ଅବ୍ୟାସ୍‌ ଆତାଂନା । 28 ଆଜ଼ିମାନ୍‍ଗାନାତ୍‌, ପଚାସ୍‌ ଜାଣ୍‌ ଦାର୍ମିର୍‌ ବିତ୍ରେ ପାଞ୍ଚ୍‌ଜାଣ୍‌ ଉଣା ମାଚିସ୍‌; ହେ ପାଞ୍ଚ୍‌ ଜାଣ୍‌ ଉଣା ଆନି କାଜିଂ କି ଏନ୍‌ ୱିଜ଼ୁ ଗାଡ଼୍‌ ବୁଡାୟ୍‌ କିନାୟ୍‌ ?" ନିତ୍ରେମାପ୍ରୁ ଇଚାନ୍‌, "ଆପ୍‌ ଚାଲିସ୍‌ ପାଞ୍ଚ୍‌ ଜାଣ୍‌ ଗାଟାତିସ୍‌, ହେଦାଂ ବୁଡାୟ୍‌ କିଉସ୍‌ ।"

29 ଅବ୍ରାହାମ୍‌ ତାଙ୍ଗେଙ୍ଗ୍‌ ଆର୍‌ରଗ ଇଚାନ୍‌, "ଆଜ଼ିମାନ୍‌ଗାନାତ୍‌, ହେବେ ଚାଲିସ୍‌ ଜାଣ୍‌ ଗାଟାଦ୍‌ନାର୍‌ ।" ନିତ୍ରେମାପ୍ରୁ ଇଚାନ୍‌, "ହେ ଚାଲିସ୍‌ ଜାଣ୍‌ କାଜିଂ ହେଦାଂ ବୁଡାୟ୍‌ କିଉସ୍‌ ।"

30 ଆର୍‌ରଗ ଅବ୍ରାହାମ୍‌ ଇଚାନ୍‌, "ମାପ୍ରୁ ରିସା ଆୱିତିସ୍‌ ଆରେ କାତା ଇଞ୍ଚାଙ୍ଗ୍‌ମା; ଆଜ଼ିମାନ୍‌ଗାନାତ୍‌, ହେବେ ତିରିସ୍‌ ଜାଣ୍‌ ଗାଟାଦ୍‌ନାର୍‌ । ନିତ୍ରେମାପ୍ରୁ ଇଚାନ୍‌, ତିରିସ୍‌ ଜାଣ୍‌ ଗାଟାତିସ୍‌, ହେଦାଂ ବୁଡାୟ୍‌ କିଉସ୍‌ ।"

31 ଅବ୍ରାହାମ୍‌ ଇଚାନ୍‌, ହୁଡ଼ା, "ମାପ୍ରୁତି ମୁମ୍‌ଦ ଆନ୍‌ ଆର୍‌ରଗ କାତା ଇଞ୍ଜେଙ୍ଗ୍‌ ବିଚାର୍‌ ପାୟାତାଂନା; ଆଜ଼ିମାନ୍‌ଗାନାତ୍‌, ହେବେ କଡ଼େ ଜାଣ୍‌ ଗାଟାଦ୍‌ନାର୍‌ ।" ନିତ୍ରେମାପ୍ରୁ ଇଚାନ୍‌, "ହେ କଡ଼େ ଜାଣ୍‌ କାଜିଂ ଗାଡ଼୍‌ ଆପ୍‌ ହେଦାଂ ବୁଡାୟ୍‌ କିଉସ୍‌ ।"

32 ଅବ୍ରାହାମ୍‌ ଇଚାନ୍‌, "ମାପ୍ରୁ ରିସା ଆୱିତିସ୍‌ ଆରେ ରଗ ମତର୍‌ ଇନାଂ; ଆଜ଼ିମାନ୍‌ଗାନାତ୍‌, ହେବେ ଦାସ୍‌ ଜାଣ୍‌ ଗାଟାଦ୍‌ନାର୍‌ ?" ନିତ୍ରେମାପ୍ରୁ ଇଚାନ୍‌, "ହେ ଦାସ୍‌ ଜାଣ୍‌ କାଜିଂ ଆସେଙ୍ଗ୍‌ ହେଦାଂ ବୁଡାୟ୍‌ କିଉସ୍‌ ।" 33 ହେଏଚେକାଡ଼୍‌ଦ ନିତ୍ରେମାପ୍ରୁ ଅବ୍ରାହାମ୍‌ ଲାହାଂ ଏଲେଙ୍ଗ୍‌ କାତାବାର୍ତା ୱିସ୍ତି ହାଚାନ୍‌, ଆରେ, ଅବ୍ରାହାମ୍‌ ପା ଜାର୍‌ ବାହାତ ମାସ୍‌ଦି ହାଚାନ୍‌ ।