1 ଇ ୱିଜ଼ୁ ଗିଟାତି ପାଚେ ଇସ୍ୱର୍‌ ଅବ୍ରାହାମ୍‌ତି ପାର୍ତି କିଜ଼ି ପରିକ୍ୟା କିତାନ୍‌, "ଏ ଅବ୍ରାହାମ୍‌ । ହେବେ ହେୱାନ୍‌ ଉତର୍‌ କିତାନ୍‌, ହୁଡ଼ା, ଆନ୍‌ ଇବେ ମାନାଙ୍ଗ୍‌ ।" 2 ହେଏଚେକାଡ଼୍‌ଦ ହେୱାନ୍‌ ଇଚାନ୍‌, "ଏନ୍‌ ନଂ ଜାର୍‌ ମାଜ଼ିଙ୍ଗ୍‌, ନି ରୱାନ୍‌ମତର୍‌ ମାଜ଼ିଙ୍ଗ୍‌, ଇଚିସ୍‌, ଏନ୍‌ ଇନେରିଙ୍ଗ୍‌ ଜିଉନନାୟା, ହେ ଇସ୍‌ହାକ୍‌ତିଂ ଅଜ଼ି ମରିୟା ଦେସ୍‌ତ ହାଲା; ଆରେ, ଆନ୍‌ ହେ ଦେସ୍‌ତ ଇମ୍‌ଣି ମାଡ଼ି ଇଞ୍ଜ୍‌ନାପ୍‌, ହେ ମାଡ଼ି ଜପି ହେୱାନିଙ୍ଗ୍‌ କାଟ୍‌ପୁଜା କିଆ ।"

3 ହେବେଣ୍ଡାଂ ଅବ୍ରାହାମ୍‌ ଉଟ୍‌ଲାହାକାଡ଼େ ନିଂଜି ଗଦ ଜପି ଗାଡ଼ିକିଜ଼ି ରିୟାର୍‌ ଆଡ଼ିୟାର୍‌ ଆରି ଜାର୍‌ ମାଜ଼ି ଇସ୍‌ହାକ୍‌ତିଂ ହାଙ୍ଗ୍‌ଦ ଅତାନ୍‌, ଆରେ କାଟ୍‌ପୁଜା କାଜିଂ ୱେଜ଼୍‌ଗୁ କାଦ୍‍ଦି ଇସ୍ୱର୍‌ ଇଚି ବାହାତ ହାଚାର୍‌ ।

4 ଇଦାଂପାଚେ ତିନ୍‌ ଦିନ୍‌ତ ଅବ୍ରାହାମ୍‌ ଇଟ୍‌କାଡ଼୍‌ କିଜ଼ି ଦେହାତାଂ ହେ ବାହା ହୁଡ଼୍‌ତାନ୍‌ । 5 ହେଏଚେକାଡ଼୍‌ଦ ଅବ୍ରାହାମ୍‌ ହେ ଆଡ଼୍‌ୟାରିଂ ଇଚାନ୍‌, "ଏପେଙ୍ଗ୍‌ ଇ ବାହାତ ଗଦ ଲାହାଂ ମାନାଟ୍‌, ଆନ୍‌ ଆରି କାଡ଼୍‌ଦେ ରିୟାପ୍‌ ହେ ବାହାତ ହାଲ୍‌ଜି ପାର୍ତନା କିଜ଼ି ପାଚେ ମି ଲାଗାୟ୍‌ ମାସ୍‌ଦି ୱାନାପ୍‌ ।"

6 ହେବେ ଅବ୍ରାହାମ୍‌ ପୁଜା ୱେଜ଼୍‌ଗୁ ଅଜ଼ି ଜାର୍‌ ମାଜ଼ି ଇସ୍‌ହାକ୍‌ ନିପିତ ପିଣ୍ଡ୍‌ଜି କେଇଦ ନାଣି ଆରି କାଟ୍ରି ଅତାର୍‌, ଆରେ, ରିୟାର୍‌ ରଚେ ହାଚାର୍‌ । 7 ଆରେ ଇସ୍‌ହାକ୍‌ ତା ଲାତ୍ରାହି ଅବ୍ରାହାମ୍‌ତିଂ କୁକ୍‌ଚି ଇଚାନ୍‌, "ଏ ନା ଆବା ।" ହେବେ ହେୱାନ୍‌ ଉତର୍‌ ହିତାନ୍‌, ମାଜ଼ି, ହୁଡ଼ା, ଆନ୍‌ ଇବେ, "ହେଏଚେକାଡ଼୍‌ଦ ହେୱାନ୍‌ ୱେନ୍‌ବାତାନ୍‌, ଇଦାଂ ହୁଡ଼ା, ନାଣି ଆରି ୱେଜ଼୍‌ଗୁ, ମାତର୍‌ ପୁଜା କାଜିଂ ମେଣ୍ଡା ହିମ୍‌ଣା ଇମେତ୍‌ ?" 8 ହେବେ ଅବ୍ରାହାମ୍‌ ଇଚାନ୍‌, "ମାଜ଼ି, ଇସ୍ୱର୍‌ ନିଜେ ପୁଜା କାଜିଂ ମେଣ୍ଡା ହିମ୍‌ଣା ହିଦ୍‌ନାନ୍‌ ।" ପାଚେ ରିୟାର୍‌ ରଚେ ହାଚାର୍‌ ।

9 ଆରେ ଇସ୍ୱର୍‌ ଇଚି ବାହାତ ଏକିତିଲେ, ଅବ୍ରାହାମ୍‌ ହେବେ ର ଗାର୍‌ଣି ରଚ୍‌ଚି ତା ଜପି ୱେଜ଼୍‌ଗୁ ଗାଡ଼ିକିଜ଼ି ତା ମେହି ଇସ୍‌ହାକ୍‌ତିଂ ଗାଚ୍‌ଚି ଗାର୍‌ଣିନି ୱେଜ଼୍‌ଗୁ ଜପି ତ୍ରେପ୍‌ତାନ୍‌ । 10 ଇଦାଂପାଚେ ଅବ୍ରାହାମ୍‌ କେଇ ପେଜ଼୍‌ଦି ମେହିଙ୍ଗ୍‌ ଅହ୍‍ନି କାଜିଂ କାଟ୍ରି ଆସ୍ତାନ୍‌ । 11 ଏଲେଙ୍ଗ୍‌ ସମୁତ ଆକାସ୍‌ତାଂ ନିତ୍ରେମାପ୍ରୁତି ଦୁତ୍‌ ତାଂ କୁକ୍‌ଚି ଇଚାନ୍‌, "ଏ ଅବ୍ରାହାମ୍‌, ଏ ଅବ୍ରାହାମ୍‌; ହେବେ ଅବ୍ରାହାମ୍‌ ଇଚାନ୍‌, ହୁଡ଼ା, ଆନ୍‌ ଇବେ ।"

12 ହେବେଣ୍ଡାଂ ହେୱାନ୍‌ ଇଚାନ୍‌, "ଏନ୍‌ ହେ କାଡ଼୍‌ଦେ ଜପି କେଇ ପେଜ଼୍‌ମା ଆରି ତାଙ୍ଗେଙ୍ଗ୍‌ ଇନାକାପା କିମା; ଇନେକିଦେଂକି ଇସ୍ୱର୍‌ କାଜିଂ ନି ପାଣ୍ଡ୍ରୁ ମାନାତ୍‌, ଇଦାଂ ନଂ ଆପ୍‌ ବୁଜାତାପ୍‌; ଇନେକିଦେଂକି ଏନ୍‌ ମାଂ ଜାର୍ତି ମାଜ଼ି, ଜାର୍ତି ରୱାନ୍‌ ମତର୍‌ ମାଜ଼ିଙ୍ଗ୍‌ ହିଦେଂ ପା ମୁନା କିୱାତାୟ୍‌ ।"

13 ହେଏଚେକାଡ଼୍‌ଦ ଅବ୍ରାହାମ୍‌ ହୁଡ଼୍‌ଜି ତା ଜେନ୍‌ପାଡ଼୍‌କାନି ବୁଟାତ କମଅଡ଼୍‌ଜ଼ାଜ଼ି ମାଚାତ୍‌ ରଞ୍ଜାଙ୍ଗ୍‌ ମେଣ୍ଡା ହୁଡ଼୍‌ତାନ୍‌; ହେବେ ଅବ୍ରାହାମ୍‌ ହାଲ୍‌ଜି ହେ ମେଣ୍ଡାତିଂ ତାହି ତା ମାଜ଼ି ବାଦୁଲ୍‌ ହେଦିଲିଂ ପୁଜା କିତାନ୍‌ । 14 ଆରେ, ଅବ୍ରାହାମ୍‌ ହେ ବାହାନି ତର୍‌ ମାପ୍ରୁ ହିତ୍‌ତାନ୍‌ ଜିହବା ଜିରି*22:14 ନିତ୍ରେମାପ୍ରୁ ଜଗାଇକିଦ୍‌ନାନ୍‌ ଇଡ଼୍‌ତାନ୍‌ । ଇଦାଂକାଜିଂ ନେଞ୍ଜେଙ୍ଗ୍‌ ପାତେକ୍‌ ଲକୁ ଇନାର୍‌, ମାଡ଼ିତ ନିତ୍ରେମାପ୍ରୁ ହିଦ୍‌ନାନ୍‌ ।

15 ଆରେ ନିତ୍ରେମାପ୍ରୁ ଦୁତ୍‌ ରିହା ଆକାସ୍‌ତାଂ ଅବ୍ରାହାମ୍‌ତିଂ କୁକ୍‌ଚି ଇଚାନ୍‌, 16 ନିତ୍ରେମାପ୍ରୁ ଇଞ୍ଜ୍‌ନାନା, ଏନ୍‌ ମାଂ ଜାର୍‌ତି ମାଜ଼ିଙ୍ଗ୍‌, ଜାର୍ତି ରୱାନ୍‌ମତର୍‌ ମାଜ଼ିଙ୍ଗ୍‌ ହିଦ୍‌ଦେଂ ପାର୍ମାଣ୍‌ କିୱାତାୟ୍‌; 17 ନିଦାଂ ଇ କାମାୟ୍‌ କାଜିଂ ଆପ୍‌ ଜାର୍‌ ତର୍‌ଦ ପାର୍ମାଣ୍‌ କିଜ଼ି ଇନାପା, ଆପ୍‌ ନିଂ ଇନେସ୍‌କିଜ଼ିପା ଆର୍ସିବାଦ୍‌ କିଜ଼ି ଆକାସ୍‌ନି ହୁକାଂ ଆରି ହାମ୍‌ଦୁର୍‌ନି ବାଲି ଲାକେ ନିଦାଂ ବଁସ୍‌ ବେସି ବାଡାୟ୍‌ କିନାପ୍‌; ନି ବଁସ୍‌ ସତ୍ରୁନିକାର୍‌ନି ଗାଡ଼୍‌ନି ଦୁୱାର୍‌ ଆଦିକାର୍‌ କିନାର୍‌ । 18 ଆରେ "ପୁର୍ତିନି ୱିଜ଼ୁ କୁଟୁମ୍‌ ନି ବଁସ୍‌ ହୁକେ ଆର୍ସିବାଦ୍‌ ପାୟା ଆନାର୍‌; ଇନେକିଦେଂକି ଏନ୍‌ ମା ବଚନ୍‌ ପାଲି କିତାୟ୍‌ନା ।" 19 ଇଦାଂପାଚେ ଅବ୍ରାହାମ୍‌ ହେ ଆଡ଼୍‌ୟାର୍ତି ଲାଗାଂ ମାଜ଼୍‌ଦି ହାଚାନ୍‌; ଆରେ ହେୱାର୍‌ ନିଂଜି ରଚେ ବେର୍‌ସେବାତ ହାଚାର୍‌ ଆରି ଅବ୍ରାହାମ୍‌ ବେର୍‌ସେବାତ ବାହା କିତାନ୍ ।

20 ହେ ଗଟ୍‌ଣା ପାଚେ ଅବ୍ରାହାମ୍‌ତିଂ ଇ କାବୁର୍‌ ହିଆତାତ୍‌, ୱେନାଟ୍‌, ମିଲ୍‌କା ପା ନି ଟଣ୍ଡେନ୍‌ ନାହର୍‌ କାଜିଂ ହିମ୍‌ଣାୱାକ୍‌ଡ଼ା ଗାଟା ଆତାନ୍ନା । 21 ହେୱାନ୍ତି ପାଣ୍‌ୱା ମାଜ଼ି ଉସ୍‌ ଆରି ହେୱାନ୍ତି ଟଣ୍ଡେନ୍‌ ବୁସ୍‌ ଆରି ଅରାମ୍‌ନି ଲାତ୍ରାହି କମୁଏଲ୍‌, 22 ଆରେ, କେସଦ୍ ଆରି ହସ ଆରି ପିଲଦସ୍‌ ଆରି ଜିଦ୍‌ଲପ୍‌ ଆରି ବତୁୟେଲ୍‌ 23 ହେ ବତୁୟେଲ୍‌ନି ଗାଡ଼୍‌ହି ରିବିକା, ଅବ୍ରାହାମ୍‌ତି ଟଣ୍ଡେନ୍‌ ନାହର୍‌ କାଜିଂ ମିଲ୍‌କା ଇ ଆଟ୍‌ ଜାଣ୍‌ ମାଜ଼ିରିଂ ଜଲମ୍‌ କିତାତ୍‌ । 24 ଆରେ, ନାହର୍‌ତି ରୁମା ତର୍‌ନି ସାନ୍‍ଲିତାଂ ଟେବହ, ଗହମ୍‌, ତହସ୍‌ ଆରି ମାକା, ଇୱାର୍‌ ଜଲମ୍‌ ଆତାର୍‌ ।