1 ଇଦାଂପାଚେ ଇସ୍‌ହାକ୍‌ ଜାକୁବତିଂ କୁକିକିଜ଼ି ଆର୍ସିବାଦ୍‌ କିତାନ୍‌ ଆରି ଇ ବଲ୍‌ ହିଜ଼ି ତାଙ୍ଗେଙ୍ଗ୍‌ ଇଚାନ୍‌, "ଏନ୍‌ କିଣାନ୍‌ ଦେସ୍‌ନି ଇମ୍‌ଣି ଗାଡ଼୍‌ଚେଂ ବିବା କିଉୟ୍‌ । 2 ନିଙ୍ଗା, ପଦନ୍‌ ଅରାମିୟତ ନି ତାଡ଼ିନି ଆବା ବତୁୟେଲ୍‌ତି ଇଞ୍ଜ ହାଲ୍‌ଜି ହେବେ ମିଞ୍ଜି ମାମା ଲାବନତି ଇମ୍‌ଣି ଗାଡ଼୍‌ଚେଂ ବିବା କିୟା । 3 ୱିଜ଼େତିଂ ସାକ୍ତିକାଟି ଇସ୍ୱର୍‌ ଆର୍ସିବାଦ୍‌ କିଜ଼ି ନିଙ୍ଗେଙ୍ଗ୍‌ ବାର୍‌ବିନ୍‌ ଲକ୍‌କୁଟୁମ୍‌ କିଦ୍‌ନି କାଜିଂ ବାଡାଦେଂ ଆରି ବେସି ବଁସ୍‌ କିଦେନ୍‌ । 4 ଆରେ ଅବ୍ରାହାମ୍‌ତି କାଜିଂ ହିୟାତି ଆର୍ସିବାଦ୍‌ ନିତାଂ ଆରି ନି ବଁସ୍‌ତ ପୁରା କିଦେନ୍‌; ହେବେ ଇସ୍ୱର୍‌ ନି ବାହାକିନି ବାହା ଇ ଇମ୍‌ଣି ଦେସ୍‌ ଅବ୍ରାହାମ୍‌ତିଂ ହିତାନ୍ନା, ହେ ଦେସ୍‌ତ ନି ଆଦିକାର୍‌ ଆୟେତ୍‌ ।" 5 ଇଦାଂପାଚେ ଇସ୍‌ହାକ୍‌ ଜାକ୍‌ବତିଂ ହେଲହିତିଲେ, ହେୱାନ୍‌ ପଦନ୍‌ ଅରାମିୟ ବତୁୟେଲ୍‌ତି ମେହି ଲାବନତି, ଇଚିସ୍‌, ଜାକୁବ ଆରି ଏସାଉତି ତେହି ରିବିକାତି ଟଣ୍ଡେନ୍‌ ଲାଗାୟ୍‌ ହାଚାନ୍‌ ।

6 ଇଦାଂପାଚେ ଇସ୍‌ହାକ୍‌ ଜାକୁବତିଂ ଆସିର୍ବାଦ୍‌ କିଜ଼ି ବିବା କାଜିଂ ପଦନ୍‌ ଅରାମିୟତିଂ ହେଲ ହିତାନ୍‌, ଆରେ, ଏସାଉ ଆର୍ସିବାଦ୍‌ କିନି ୱେଡ଼ାଲିଂ ତାଙ୍ଗେଙ୍ଗ୍‌ ବଲ୍‌ ହିଜ଼ି ଇଚାନ୍‌ "ଏନ୍‌ କିଣାନ୍‌ ଦେସ୍‌ନି ଇମ୍‌ଣି ଗାଡ଼୍‌ଚେଂ ବିବା କିମା ।" 7 ଆରେ ଜାକୁବ ତା ତେହି ଲାତ୍ରାହିତି ବଲ୍‌ ମାନିକିଜ଼ି ପଦନ୍‌ ଅରାମିୟତ ହାଜ଼ିଆସ୍ତାନ୍‌, 8 ଇଦାଂ ହୁଡ଼୍‌ଜି ଏସାଉ ତା ଲାତ୍ରାହି ଇସ୍‌ହାକ୍‌ତି କିଣାନ୍‌ ଦେସ୍‌ନି ଗାଚ୍‌କୁ କାଜିଂ ମାନ୍ତହିଲ୍‌ୱିତିଲେ ପୁନ୍‌ଞ୍ଜି 9 ହେଦାଂକାଜିଂ ଡକ୍ରିକ୍‌ ମାଚିସ୍‌ ପା ଇସ୍ମାଏଲ୍‌ ଲାଗାୟ୍‌ ହାଲ୍‌ଜି ଅବ୍ରାହାମ୍‌ତି ନାତ୍‌ଣି ଇସ୍ମାଏଲ୍‌ତି ଟଣ୍ଡେନ୍‌ଗାଡ଼୍‌ହି ନବାୟତ୍‌ନି ତଣ୍‌ଦେଲ୍‌ ମହଲତ୍‌ ତର୍‌ନି ଗାଡ଼ିଂ ବିବା କିତାନ୍‌ ।

10 ଇଦାଂପାଚେ ଜାକୁବ ବେର୍‌ସେବାତାଂ ହସି ହାରଣ୍‌ ନିପ ହାଜ଼ିଆସ୍ତାନ୍‌ । 11 ଆରେ, ୱେଡ଼ା ହାଚିଲେ ହେୱାନ୍‌ ଇମ୍‌ଣି ର ବାହାତ ନାଣା ହୁନ୍‌ଞ୍ଚାନ୍‌; ଆରେ, ହେ ବାହାତ ର କାଲ୍‌ ଅଜ଼ି କାପ୍‌ଡ଼ା ଡ଼ାପ୍‌ଚି ହୁଞ୍ଜ୍‌ନି କାଜିଙ୍ଗ୍‌ ହେ ବାହାତ ହୁନ୍‌ଞ୍ଚାନ୍‌ । 12 ହେବେ ହେୱାନ୍‌ କ୍ଡେଞ୍ଜ୍‌କଣ୍‌ତ ପୁର୍ତିତ ରଚ୍‌ଚି ର ପାଉଚ୍‌ ହୁଡ଼୍‌ତାନ୍‌, ହେବେନି କାପ୍‌ଡ଼ା ବାଦାଡ଼୍‌ ଡୁନାକା; ଆରେ, ହୁଡ଼ା, ହେଦାଂ ହିଜ଼ି ଇସ୍ୱର୍‌ତି ଦୁତ୍‌କ୍‌ ଦୁମ୍‌ନାକା ଆରି ଜୁତ୍‌ନାକା । 13 ଆରେ ହୁଡ଼ା, ନିତ୍ରେମାପ୍ରୁ ତା ଜପି ନିଲ୍‌ଚି ଇଚାନ୍‌, "ଆପ୍‌ ନିତ୍ରେମାପ୍ରୁ ନି ଆଗେନି ଆକର୍ତି ଅବ୍ରାହାମ୍‌ତି ଇସ୍ୱର୍‌ ଆରି ଇସ୍‌ହାକ୍‌ତି ଇସ୍ୱର୍‌" ଆନାପ୍‌; ଏନ୍‌ ଇ ଇମ୍‌ଣି ଦେସ୍‌ତ ହୁନ୍‌ଞ୍ଚାୟ୍‌ନା, ହେଦାଂ ଆପ୍‌ ନିଂ ଆରି ନି ବଁସ୍‌ତିଂ ହିଦ୍‌ନାପ୍‌ । 14 ନି କୁଟୁମ୍‌ ପୁର୍ତିତ ଦୁଡ଼ି ଲାକେ ହେନି ଆନାର୍‌, ଆରେ, ଏନ୍‌ ୱେଡ଼ାହନିନିପ ଦିଗ୍‌ ଆରି ୱେଡ଼ାହାନିନିପ ଆରି ହାଗି ଆରି ମିଗ, ଚାରିବେଣ୍‌ତାଂ ବାଡାନାଦେର୍‌; ଆରେ, ନିତାଂ ଆରି ନି ବଁସ୍‌ତାଂ ପୁର୍ତିନିକାର୍‌ ୱିଜ଼ାର୍‌ ବଁସ୍‌ ଆର୍ସିବାଦ୍‌ ପାୟାନାର୍‌ । 15 ଆରେ, ହୁଡ଼ା, ଆପ୍‌ ମି ସାକା ଆନାପ୍‌, ଆରେ ଏନ୍‌ ଇମ୍‌ଣି ଇମ୍‌ଣି ବାହାତ ହାନାୟ୍‌, ହେ ହେ ବାହାତ ଆପ୍‌ ନିଙ୍ଗେଙ୍ଗ୍‌ ରାକ୍ୟା କିଦ୍‌ନାପ୍‌ ଆରି ଆରେରଗ ନିଂ ଇ ଦେସ୍‌ତ ତାହିୱାଦ୍‌ନାପ୍‌; ଇନେକିଦେଂକି ଆପ୍‌ ଇନାକା ନିଂ ଇଞ୍ଚାପ୍‌ନା, ହେଦାଂ ପୁରା କିୱି ପାତେକ୍‌ ଆପ୍‌ ମିଂ ପିସ୍ତୁପ୍‌ ।

16 ଇଦାଂପାଚେ ହୁଚ୍‌କାଣ୍‌କୁ ରିଂତିଲେ, ଜାକୁବ ଜାଲ୍‌ଦି ଆଜ଼ି ଇଚାନ୍‌, "ଆତିସ୍ପା ଇ ବାହାତ ନିତ୍ରେମାପ୍ରୁ ମାନାନ୍‌, ମତର୍‌ ଆନ୍‌ ହେଦାଂ ପୁନ୍‌ୱାତାଂ ।" 17 ଆରେ, ହେୱାନ୍‌ ପାଣ୍ଡ୍ରାଜ଼ି ଆରେ ଇଚାନ୍‌, "ଇଦାଂ ଇନେସ୍‌ ବୟଙ୍କାର୍‌ ବାହା! ଇଦାଂ ତ ନିଚେ ଇସ୍ୱର୍‌ତି ଇଲ୍‌, ଇଦାଂ ତ ସାର୍ଗେନି ଦୁୱେର୍‌ ।"

18 ଇଦାଂପାଚେ ଜାକୁବ ନାଡ଼ିହିଂ ନିଂଜି ଇମ୍‌ଣି କାଲ୍ କାପ୍‌ଡ଼ା ଡ଼ାପ୍‌ଚି ମାଚାନ୍‌, ହେଦାଂ ଅଜ଼ି ମୁଣ୍ଡା ଲାକେ ରଚ୍‌ଚି ତା ଜପି ଚିକାଣ୍‌ ୱାକ୍‌ତାନ୍‌ । 19 ଆରେ, ହେ ବାହାନି ତର୍‌ ବୈତେଲ୍‌*28:19 ଇଚିସ୍‌ ପରମେସ୍ୱର୍‌ ଇଲ୍‌ ଇଡ଼୍‌ତାନ୍‌; ମତର୍‌ ପୁର୍ବେ ହେ ଗାଡ଼୍‌ନି ତର୍‌ ଲୁସ୍‌ ମାଚାତ୍‌ । 20 ଆରେ ଜାକୁବ ତୁସ୍‌ପିସ୍‌ ଇଚାନ୍‌, "ଜଦି ନିତ୍ରେମାପ୍ରୁ ନା ସାକା ଆନାନ୍‌ ଆରି ନା ଇ ହାନି ହାଜ଼୍‌ଦ ନାଂ ରାକ୍ୟା କିଦ୍‌ନାନ୍‌, ଆରେ, ପଟ କାଜିଂ କାଦି ଆରି ଉସ୍ପିନି କାଜିଂ ହେନ୍ଦ୍ରା ହିଦ୍‌ନାନ୍‌, 21 ଆରେ ଜଦି ଆନ୍‌ ବିୱାହିଂ ଆବାଇଞ୍ଜ ଆରେରଗ ୱାନାଙ୍ଗ୍‌, ଲାଗିଂ ନିତ୍ରେମାପ୍ରୁ ନା ଇସ୍ୱର୍‌ ଆନାନ୍‌, 22 ଆରେ, ଆନ୍‌ ଇ ଇମ୍‌ଣି କାଲ୍‌ ମୁଣ୍ଡା ଲାକେ ରଚ୍‌ଚାଙ୍ଗ୍‌ନା, ହେଦାଂ ଇସ୍ୱର୍‌ତି ଇଲ୍‌ ଆନାତ୍‌, ଆରେ ଏନ୍ ନାଂ ଇନାକା ସବୁ ହିଦ୍‌ନାୟ୍‌, ହେବେନି ଦାସ୍ ବାଗ୍‌ତାଂ ର ବାଗ୍‌ ଆନ୍‌ ନିଂ ନିଜେ ହିଦ୍‌ନାଙ୍ଗ୍‌ ।"