1 ଇସବୁ ଗଟ୍‌ଣା ପାଚେ ମିସର୍‌ନି ରାଜା ଅଙ୍ଗୁର୍‌ରାସ୍‌ ଉଣିବାହା ଆହ୍‌ନାକାନ୍‌ ଆରି ରାନ୍ଦିୟା ତା ହାଉକାର୍‌ ମିସର୍‌ ରାଜାତି ବିରୁତ୍‌ କିଜ଼ି ଅପମାନ୍‌ କିତାର୍‌ । 2 ତାପାଚେ ପାର ତା ଅଙ୍ଗୁର୍‌ରାସ୍‌ ଉଣିବାହା ଅନାକାନିଂ ଆରି ମୁଡ଼୍‌ ରାନ୍ଦିୟା ଇ ରି ଚାକର୍‌ କାଜିଂ ରିସା ଆତାନ୍, 3 ପାଚେ ରାକ୍ୟାକିନାକାନ୍‌ ମେଲ୍ୟାର୍‌ ମୁଡ଼୍‌ଦାକାନ୍‌ ଇମ୍‌ଣି ବନ୍ଦି ଇଞ୍ଜ ଜସେପ୍ ବନ୍ଦି ମାଚାନ୍‌, ହେବେ ହେୱାରିଙ୍ଗ୍‌ ବନ୍ଦି କିଜ଼ି ଇଡ଼୍‌ତାନ୍‌ । 4 ତାପାଚେ ରାକ୍ୟାକିନାକାନ୍‌ ମେଲ୍ୟାର୍‌ ମୁଡ଼୍‌ଦାକାନ୍‌ ଜସେପତି କେଇଦ ହେୱାରିଙ୍ଗ୍‌ ହେଲାୟ୍‌ କିତିଲେ, ଜସେପ୍ ହେୱାର୍‌ତି ଜାତୁନ୍‌କିଦେଂ ଲାଗାତାନ୍‌ । ଇ ବାନି ହେୱାର୍‌ ଅଲପ୍‌ଦିନ୍‌ ଜଇଲ୍‌ଇଞ୍ଜ ମାଚାର୍‌ ।

5 ଇଦାଂପାଚେ ମିସର୍‌ନିକାନ୍‌ ରାଜାତି ହେ ଜଇଲ୍‌ଗେସ୍‌ପିସ୍‌ ଅଙ୍ଗୁର୍‌ରାସ୍‌ ଉଣାକାନ୍‌ ଆରି ରାନ୍ଦିୟା ରିୟାର୍‌ ର ନାଣା ରି ବାନି ଅରତ୍‌ମାନାକା ରିଣ୍ଡି କ୍ଡେଞ୍ଜ୍‌କଣ୍‌ ହୁଡ଼୍‌ତାର୍‌ । 6 ହେବେ ଜସେପ୍ ନାଡ଼ିହିଂ ହେୱାର୍ ଲାଗେ ୱାନି ୱେଡ଼ାଲିଂ ହେୱାରିଙ୍ଗ୍‌ ମୁମ୍‌ ୱାଚ୍‌ଚାକା ହୁଡ଼୍‌ତାନ୍‌ । 7 ପାଚେ ପାରତି ଇମ୍‌ଣି ଚାକରାର୍‌ ତା ଲାହାଂ ତା ହାଉକାର୍‌ତି ବନ୍ଦି ଇଞ୍ଜ ବନ୍ଦି ମାଚାର୍‌, ହେୱାରିଙ୍ଗ୍‌ ହେୱାନ୍ ୱେନ୍‌ବାତାନ୍‌, "ନେଞ୍ଜେଙ୍ଗ୍‌ ମି ମୁମ୍‌ ଇନେକିଦେଂ ୱାଜ୍‌ଜାତାତ୍‌ନା ? 8 ହେୱାର୍‌ ଉତର୍‌ ହିତାର୍‌, ଆପେଙ୍ଗ୍‌ କ୍ଡେଞ୍ଜ୍‌କଣ୍‌ ହୁଡ଼୍‌ତାପ୍‌ନା, ମତର୍‌ ହେବେନି ଅରତ୍‌ କିଦେଂ ଇନେର୍‌ ହିଲୁର୍‌ ।" ତେବେ ଜସେପ୍ ହେୱାରିଙ୍ଗ୍‌ ଇଚାନ୍‌, "ଅରତ୍‌ନି ଗିଆନ୍‌ କି ଇସ୍ୱର୍‌ତି ତାରେନ୍‌ ଆକାୟ୍‌ ? ଗୱାରି କିଦ୍‌ନାଙ୍ଗା, ମି କ୍ଡେଞ୍ଜ୍‌କଣ୍‌ ନାଂ ୱେଚ୍‌ଚାଟ୍‌ ।"

9 ତାପାଚେ ମୁଡ଼୍‌ ଅଙ୍ଗୁର୍‌ରାସ୍‌ ଉଣାକାନ୍‌ ଜସେପତିଂ ତା କ୍ଡେଞ୍ଜ୍‌କଣ୍‌ କାତା ୱେଚ୍‌ଚାନ୍‌, "ହୁଡ଼ା, ର ଅଙ୍ଗୁର୍‌କୁଡ଼ି ନା ମୁମ୍‌ଦ ମାଚାତ୍‌, 10 ହେ ଅଙ୍ଗୁର୍‌କୁଡ଼ିତ ତିନ୍‌ଗଟା କେନ୍ଦାଂ ମାଚିକ୍‌, ଆରେ, ହେଦାଂ ଗିଲ୍‌ତିଲେ, ପାଚେ ପୁଇ ଡିତାତ୍‌, ଆରେ ସବୁ କେନ୍ଦାକାଂ ଜୁବ୍‌ଡ଼ା ଜୁବ୍‌ଡ଼ା ଆଜ଼ି ଅଙ୍ଗୁର୍‌ ହେନ୍‌ତାତ୍‌ । 11 ହେଏଚେକାଡ଼୍‌ଦ ନା କେଇଦ ପାରତି ଅଙ୍ଗୁର୍‌ରାସ୍‌ ଉଣିବାହା ମାଚିଲେ ହେ ବାହାତ ଆନ୍‌ ହେ ଅଙ୍ଗୁର୍‌ପାଡ଼୍‌ ଅଜ଼ି ପିଜ୍‌ଜି ପାରତି କେଇଦ ହେ ବାହା ହିତାଂ ।"

12 ହେବେ ଜସେପ୍ ତାଂ ଇଚାନ୍‌, "ଇବେନି ଅରତ୍‌ ଇଦାଂ; ହେ ତିନ୍‌ କେନ୍ଦାଂ ତିନ୍ ଦିନ୍‌ତିଂ ବୁଜାନାତ୍‌ ।" 13 ତିନ୍‌ ଦିନ୍‌ ବିତ୍ରେ ପାର ନି କାପ୍‌ଡ଼ା ନିକ୍‌ଚି ନିଙ୍ଗେଙ୍ଗ୍‌ ନିଜ୍‌ ପାଦ୍‌ତ ଆରେରଗ ବାଚି କିଦ୍‌ନାନ୍‌; ହେବେ ଏନ୍‌ ଆଗେଲାକେ ଅଙ୍ଗୁର୍‌ରାସ୍‌ ଉଣାକାନ୍‌ ଆସି ଆରେରଗ ପାରତି କେଇଦ ଅଙ୍ଗୁର୍‌ରାସ୍‌ ଉଣିବାହା ହିନାଦେର୍‌ । 14 ମତର୍‌ ନିଦାଂ ମଙ୍ଗଲ୍‌ ଆତିସ୍‌, ନାଂ ଏତ୍‌ କିଦ୍‌ନାୟ୍‌, ଆରେ, ନା କାଜିଂ ଦୟାକିଜ଼ି ପାରତି ଲାଗେ ନା ବିସ୍ରେ ୱେଚ୍‌ଚି ଇ ବନ୍ଦିଇଞ୍ଜାଙ୍ଗ୍‌ ମୁକ୍‌ଡ଼ାୟ୍‌ କିଦ୍‌ନାୟ୍‌ । 15 ଇନେକିଦେଂକି ଏବ୍ରିୟର୍‌ତି ଦେସ୍‌ତାଂ ମାନାୟାର୍‌ ନାଂ ହାତେ ଚରି କିଜ଼ି ତାହିୱାତ୍‌ତାର୍ଣ୍ଣା; ଆରେ ଇ ବାହାତ ବିତ୍ରେ ଆନ୍‌ ଇନାକାପା କିୱାତାଂନା, ଆତିସ୍‌ପା ହେୱାର୍‌ ନାଂ ଇ ବନ୍ଦିଇଞ୍ଜ ବନ୍ଦ୍‌ କିତାର୍ଣ୍ଣା ।

16 ହେବେ ହେୱାନ୍‌ ହାର୍ଦି ଅରତ୍‌ କିତାନ୍‌, ମୁଡ଼୍‌ ରାନ୍ଦିୟା ଇଦାଂ ହୁଡ଼୍‌ଜି ଜସେପତିଂ ଇଚାନ୍‌, "ଆନ୍‌ ପା କ୍ଡେଞ୍ଜ୍‌କଣ୍‌ ହୁଡ଼୍‌ତାଂନା; ହୁଡ଼ା, ନା କାପ୍‌ଡ଼ା ଜପି ରୁଟିଙ୍ଗ୍‌ ତିନ୍‌ଗଟା ଟପାଙ୍ଗ୍‌ । 17 ୱିଜ଼େତିଂ ଜପ୍‌ଣି ଟପାତ ପାରତି ତିନି କାଜିଂ ବାର୍‌ବିନ୍‌ କାଦି ମାଚାତ୍‌; ଆରେ ପଟିଂ ୱାଜ଼ି ନା କାପ୍‌ଡ଼ାତ ମାଚି ଟପାତାଂ ହେଦାଂ ଅଜ଼ି ଚିଚିକ୍‌ ।"

18 ହେଏଚେକାଡ଼୍‌ଦ "ଜସେପ୍ ଉତର୍‌ କିତାନ୍‌, ଇବେନି ଅରତ୍‌ ଇଦାଂ, ହେ ତିନ୍‌ ଟପା ତିନ୍‌ ଦିନ୍‌ ବୁଜାନାତ୍‌ । 19 ତିନ୍‌ ଦିନ୍‌ ବିତ୍ରେ ପାର ନି ଗାଗାଡ଼୍‌ତାଂ ନି କାପ୍‌ଡ଼ା ନିକ୍‌ଚି ନିଙ୍ଗେଙ୍ଗ୍‌ ମାର୍‌ ଜପି ଡ଼ତ୍‌ତାନ୍‌, ଆରେ, ପଟିଂ ୱାଜ଼ି ନି ଗାଗାଡ଼୍‌ନି ଜେଇ ତିନିକ୍‌ ।"

20 ଇଦାଂପାଚେ ତିନ୍‌ ଦିନ୍ତ ପାରତି ଜଲମ୍‌ ଦିନ୍‌ ଏକାୱାତିଲେ ହେୱାନ୍‌ ତା ୱିଜ଼ାର୍‌ ଆଡ଼ିୟାର୍‌ କାଜିଂ ବଜି ଜାଲ୍‌ଦି କିତାନ୍‌ । ହେବେ ହେୱାନ୍‌ ତା ୱିଜ଼ାର୍‌ ଆଡ଼ିୟାର୍‌ ମୁମ୍‌ଦ ମୁଡ଼୍‌ ଅଙ୍ଗୁର୍‌ରାସ୍‌ ଉଣାକାନ୍‌ ଆରି ମୁଡ଼୍‌ ରାନ୍ଦିୟା ପା କୁକ୍‌ତାର୍‌ । 21 ଆରେ, ଜସେପତି ଇଚି ଅରତ୍‌ ଇସାବ୍ରେ ପାର ମୁଡ଼୍‌ ଅଙ୍ଗୁର୍‌ରାସ୍‌ ଉଣାକା ପିଣ୍ଡ୍‌ନାକାନିଂ ତା ଜାର୍‌ ପାଦ୍‌ତ ଆରେରଗ ବାଚି କିତାନ୍‌; ହେବେ ହେୱାନ୍‌ ପାରତି କେଇଦ ଅଙ୍ଗୁର୍‌ରାସ୍‌ ହିଦେଂ ଲାଗାତାନ୍‌ । 22 ମତର୍‌ ଜସେପ୍ ମୁଡ଼୍‌ ରାନ୍ଦିୟା ମାର୍‌ତ ଡ଼ଇ କିତାନ୍‌; 23 ଆତିସ୍‌ପା, ମୁଡ଼୍‌ ଅଙ୍ଗୁର୍‌ରାସ୍‌ ଉଣାକାନ୍‌ ଜସେପତିଂ ଏତ୍‌ କିୱାତାନ୍, ମତର୍‌ ତାଂ ବାଣାଜ଼ି ହାଚାନ୍‌ ।