ଜିସାଇୟ 3

ଜିହୁଦା ଆରି ଜିରୁସାଲମ୍‌ନି ସାସ୍ତି

1 ହୁଡ଼ାଟ୍‌, ମାପ୍ରୁ, ମେଲ୍ୟାର୍‌ଆଦିକାରି ନିତ୍ରେମାପ୍ରୁ ଜିରୁସାଲମ୍‌ ଆରି ଜିହୁଦା ତାକେ ବାଡ୍‌ଗା, ଇଚିସ୍ ଅଲ୍‌ଗା ବାନି ସବୁ ବାଡ୍‌ଗା ଆରି ଏଜ଼଼ୁଙ୍ଗ୍‌ କାଦି ଲାକେ ୱିଜ଼ୁ କାଦି ଆରି ଏଜ଼ୁଙ୍ଗ୍‌ ଲାକେ ୱିଜ଼ୁ ଆରାଣ୍‌ ଦେହା କିତାର୍ଣ୍ଣା; 2 ବିର, ବାପୁକାଟାକାନ୍‌, ବିଚାର୍‌କାରିଆ, ବେଣ୍‌ବାକ୍‌ଣାୟ୍‌କିନାକାନ୍‌, ଚୁଟ୍‌କିୟାର୍‌, ପାରାଚିନାର୍‌; 3 ପଚାସ୍‌ଜାଣ୍‌ ବିତ୍ରେ ମେଲ୍ୟା, ମାଜାନ୍‌, ମତ୍ରି, ସବୁବାନି ରଚ୍‌ନାକାର୍‌ ବୁଦିଆ ଆରି ଚୁଟ୍‌କିୟାର୍‌ ଦେହା କିୟାଆନାର୍‌ । 4 "ଆପ୍‌ ହିମ୍‌ଣାକାଂ ହେୱାର୍‌ତି ଆଦିକାରି କିନାପ୍‌ ଆରି ହାରୁହିମ୍‌ଣାଂ ହେୱାର୍‌ ଜପି ସାସନ୍‌ କିନାର୍‌ । 5 ଆରେ, ମାନାୟାର୍‌ ରୱାନ୍‌ ବିନ୍‌ ରୱାନ୍‌ ହୁକେ ଆରି ଜାଣ୍‌କେ ମାନାୟାର୍‌ ଜାର୍‌ ପାଡ୍‌ହାଇଞ୍ଜି ହୁକେ ବାନ୍ୟା ଆନାର୍‌; କାଡ଼୍‌ଦେର୍‌ ପାରାଚିନାର୍‌ ବିରୁଦ୍‌ତ ଆରି ପୁନ୍‌ୱି ଲକୁ ମାଜାନ୍‌ ଲକୁ ବିରୁଦ୍‌ତ ଗାର୍‌ବିୟା ବେବାର୍ କିନାର୍‌ । 6 ଇନେ ଇନେର୍‌ ଜାର୍‌ ଟଣ୍ଡେନ୍‌ନିଂ ତା ଆକର୍‌ଇଞ୍ଜ ଆସ୍ତି ଇନାର୍‌, ନି ହେନ୍ଦ୍ରା ମାନାତ୍‌, ଏନ୍‌ ମା ସାସନ୍‌କାରିୟା ଆ, ଆରେ, ଇ ଚିନ୍‌ବିନ୍ ଆତି ରାଜି ନି ଆସ୍ତିଦିନ୍‌ ଆଏତ୍‌; 7 ହେୱାନ୍‌ ହେ ନାଜିଂ ଜାର୍‌ କାଟ୍‌ କିଜ଼ି ଇନାନ୍‌ ଆନ୍‌ ଉପ୍‌କାର୍‌କାରିୟା ଆଉଙ୍ଗ୍‌: ଇନେକିଦେଂକି ମା ଇଞ୍ଜ କାଦି କି ହେନ୍ଦ୍ରା ହିଲୁତ୍‌; ଏପେଙ୍ଗ୍‌ ନାଙ୍ଗ୍‌ ମାନାୟାର୍‌ତି ସାସନ୍‌କାରିୟା କିଦ୍‌ମାଟ୍‌ ।" 8 ଇନେକିଦେଂକି ଜିରୁସାଲମ୍‌ ନାସ୍‌ ଆରି ଜିହୁଦା ମୁଞ୍ଚାତ୍‌ନା; ଇନେକିଦେଂକି ନିତ୍ରେମାପ୍ରୁତି ପାଣ୍‌ବାର୍ତି କାଣ୍‌କୁକାଂ ରିସା କିନି କାଜିଂ ହେୱାର୍‌ତି ୱେନ୍ଦୁଲ୍‌ ଆରି କିତାକା ହେୱାନ୍ତି ବିରୁଦ୍‌ତ ଆନାତ୍‌ । 9 ହେୱାର୍‌ତି ମୁମ୍‌ନି ହତି କାତା ହୁଦାଂ ହେୱାରିଂ ବିରୁଦ୍‌ତ ସାକି ହିନାର୍‌; ଆରେ, ହେୱାର୍‌ ହପ୍‌ଚି ଡ଼଼ୁକ୍‌ଚି ଇଟୁର୍ ହେୱାର୍ତି ଜିବୁନ୍ ଦୁକ୍‌ନି ଲଗୁ, ଇନାକିଦେଂକି ହେୱାର୍‌ ପାପ୍‌ କିତାର୍ଣ୍ଣା । ହେୱାର୍‌ତି ପାରାଣ୍‌ ୱିଜ଼୍‌ନାତ୍‌! ଇନେକିଦେଂକି ହେୱାର୍‌ ଜାର୍‌ତି ନାସ୍‌ ନିଜେ କିନାରା । 10 ଏପେଙ୍ଗ୍‌ ଦାର୍ମିତି ବିସ୍ରେ ଇନାଟ୍‌ ଜେ, ତା ମଙ୍ଗଲ୍‌ ଆନାତ୍‌, ଇନେକିଦେଂକି ହେୱାର୍‌ ଜାର୍‌ ଜାର୍‌ କରମ୍‌ନି ପାଡ଼୍‌ ତିନାର୍‌ । 11 ବାନ୍ୟା ଲକାର୍‌ତି ଏଚେକ୍ ବୟଁକାର୍ ଦିନ୍‌ ୱାନାତ୍‌! ତାଦି ଅମଙ୍ଗଲ୍‌ ଗିଟା ଆନାତ୍‌; ଇନେକିଦେଂକି ତାଦି କେଇଦାଂରଚ୍‌ଚି କାମାୟ୍‌ ପାତିପାଡ଼୍‌ ତାଙ୍ଗେଙ୍ଗ୍‌ ହିୟାନାତ୍‌ । 12 ନା ମାନାୟାର୍‌ ବିସ୍ରେ ହୁଡ଼୍‌ତିସ୍‌, କାଡ଼୍‌ଦେର୍‌ ନା ମାନାୟାର୍‌ତି କାରାପ୍ ବେବାର୍ କିନାର୍‌ ଆରି କଗ୍‌ଲେକ୍‌ ହେୱାର୍‌ ଜପି ସାସନ୍ କିନିକ୍‌ । ଏ ନା ଲକୁ, ନି ହାଜ଼ିତାଙ୍ଗ୍‌ନାକାର୍‌ ମିଙ୍ଗ୍‌ ବାଣା ଆଦ୍‌ନାର୍‌ ଆରି ମି ହାନାକା ହାଜ଼ି ନାସ୍‌ କିଦ୍‌ନାର୍‌ । 13 ନିତ୍ରେମାପ୍ରୁ ତା ବାହା ଇଡ୍‌ଜି ତା ମାନାୟ୍‌ତିଂ ବିରୁଦ୍ କିଦେଂ ଜାଲ୍‌ଦି ଆନାନା, କୁଟୁମ୍‌ରିଂ ବିଚାର୍‌କିଦେଂ ନିଙ୍ଗ୍‌ନାନା । 14 ନିତ୍ରେମାପ୍ରୁ ଜାର୍‌ ମାନାୟାର୍‌ତି ପାରାଚିନାର୍‌ତି ଆରି ଆଦିକାରିର୍‌ତି ଲାହାଂ ବିଚାର୍‌ତ ଏକାନାନ୍‌; ଏପେଙ୍ଗ୍‌ ନେ ଅଙ୍ଗୁର୍‌ବାଡ଼୍‌ ୱିସ୍ତାଦେର୍‌: ହିଲ୍‌ୱାକାର୍‌ତାଂ ଚରିକିତି ଜିନିସ୍‌ ମି ଇଞ୍ଜ ମାନାତ୍‌; 15 ଏପେଙ୍ଗ୍‌ ଜେ ମା ଲକୁରିଂ ୱିହ୍‌ନାଦେରା ଆରି ହିଲ୍‌ୱାକାରିଂ ମୁମ୍‌ ରେତିକିନାଦେରା, ଇବେ ମି ମାନ୍ ଇନାକା ? ମାପ୍ରୁ, ହେନିନି ନିତ୍ରେମାପ୍ରୁ ଇ କାତା ଇନାନ୍‌ । 16 ଆରେ ନିତ୍ରେମାପ୍ରୁ ଇଚାନ୍‌, ସିୟନ୍‌ନି ଗାଡ଼୍‌ଚେକ୍‌ ଆକ୍ରାୟାଣିକ୍‌ ଆରି ଜାର୍‌ ଜାର୍‌ ଗାଡେଲ୍ ଲାମାୟ୍‌କିଜ଼଼ି ଆରି ଏଡ଼଼ାଜ଼ି ହାନିକ୍‌, ହାଲ୍‌ଜି ଚଞ୍ଚଲ୍‌ ହାଜ଼ି ହାନାକା ଆରି କାଲ୍‌କୁକାଂ ଚିଲର୍‌ ଚାଲର୍‌ ସବଦ୍‌ କିନିକ୍‌; 17 ଇଦାଂ କାଜିଂ ମାପ୍ରୁ ସିୟନ୍‌ନି କଗ୍‌ଲେକ୍‌ତି କାପ୍‌ଡ଼ା ଗାଜି ଲାକେ କିନାନ୍‌ ଆରି ନିତ୍ରେମାପ୍ରୁ ହେୱେକ୍‌ତି କାପ୍‌ଡ଼଼ା ଟାଂଗ୍ରି କିଜ଼଼ି ପିହ୍‌ନାନ୍‌ 18 ହେ ନାଜିଂ ମାପ୍ରୁ ହେୱେକ୍‌ତି ଗରବ୍‌ ଲାକେ ପାଞ୍ଜୁଲିଂ, କାପ୍‌ଡ଼଼ାତ ଆର୍‌ପିସ୍‌ମାନି ନାତା, ହାସ୍‌କୁ; 19 କିତୁଲ୍‌ତତୁସ୍‌ନାକା, ସାକାଂ, ଅଡ୍‌ନି; 20 ନାତାଗାଚ୍‌ନାକା, କାଲ୍‌ଦି ଆନ୍ଦୁ, ମେଙ୍ଗାଙ୍ଗ୍‌ଗାଚ୍ୟାନାକା, ବାସ୍‌ନାଚିକାଣ୍‌ବାହା, ନୁଲ୍‌ଗାଚ୍‌ୟା ଆନାକା; 21 ୱାତୁସ୍‌, ନାତ; 22 ପାର୍ବୁତ ଉସ୍‌ପିନି ହେନ୍ଦ୍ରା, ବଣ୍‌ଙ୍ଗ ଆଙ୍ଗି, ସାଲ୍‌, ଜାଲ୍ୟା; 23 ଦାର୍ପାଣ୍‌, କୱାଣ୍‌ହେନ୍ଦ୍ରା, କାପ୍‌ଡ଼ାତ ଗାଚ୍‌ନାକା, ଆରି ଅଡ୍‌ନି ଉନ୍‌ଦି ତୁଇନିକ୍‌ । 24 ହେବେ ବାସ୍‌ନାଚିକାଣ୍‌ ପିସ୍ତି ଗାନ୍ଦାନି କୁଲ୍‌ତାକା, ମେଙ୍ଗାଙ୍ଗ୍‌ଗାଚ୍ୟାନାକା ପିସ୍ତି ଡରି ହଲ୍‌ନି ତେମୁଲ୍‌ ପିସ୍ତି ତେମୁଲ୍‌ ୱିସ୍ତାକା ଆରି ଡାବାୟ୍‌କିୟାତି ହେନ୍ଦ୍ରା ପିସ୍ତି ବାସ୍ତା; ହଲ୍‌ନାକା ପିସ୍ତି ହୁସ୍ତିଚିନା ଆନାତ୍‌ । 25 ମି ଆଣ୍ଡ୍ରାଙ୍ଗ୍‌ କାଣ୍ଡାତ ଆରି ମି ସାକ୍ତିକାଟାକାର୍‌ ଜୁଜ୍‌ତ ହାନାର୍‌ । 26 ସିୟନ୍‌ନି ଗାଡ଼ ହାକ୍‌ଡ଼଼ିତ ଆଡ଼୍‌ବିନିକ୍‌ ଆରି ହେଦେଲ୍‌ ଚି ଆଜ଼ି ବୁଇଁତ କୁଚ୍‌ନାତ୍‌ ।