ଜିସାଇୟ 16

ମୟାବତି ଆହାହିଲ୍‌ୱି ଅବସ୍ତା

1 ଏପେଙ୍ଗ୍‌ ବାଟାନି ସେଲାତାଂ ହାଣ୍‌କୁ ବାହାତାଂ ଦେସ୍‌ଆଦିକାରି କାଜିଂ ସିୟନ୍‌ ଗାଡ଼୍‌ନି ମାଡ଼ିତ ମେଣ୍ଡାଂ ପକାଟ୍‌ । 2 ଇନାକିଦେଙ୍ଗ୍‌କି ମୟାବନି ଗାଡ଼୍‌ଚେକ୍‌ ଅର୍ଣ୍ଣନ ନାଗୁଡ଼୍ ନାସି ହାଞ୍ଜେଙ୍ଗ୍‌ ସବୁ ବାହାତ ବୁଲାନି ପଟିଲାକେ ଆରି ପଟିତି ଚିନ୍‌ ବିନ୍‌ ବାହା ଲାକେ ଆନିକ୍‌ । 3 ବୁଜାୟ୍‌ କିୟାଟ୍‌, ବିଚାର୍‌ କିୟାଟ୍‌; ମୁଣ୍ଡାମେଦନ୍ତ ଜାର୍‌ ଡ଼ିଗାତିଂ ନାଣା ଲାକେ କିୟାଟ୍‌; ହପ୍ୟାତି ମାନାୟ୍‌ତିଂ ଡ଼ୁକାଟ୍‌; ବୁଲାନାକାରିଂ ୱେଚ୍‌ମାଟ୍‌ । 4 ମା ପକ୍‌ନି ମାନାୟ୍‌ତିଂ ମି ଲାହାଂ ବାହାକିଦେଂ ହିୟାଟ୍‌; ୱିସ୍ତିକ୍‌ କାରିଆ ମୁମ୍‌ଦାଂ ଏପେଙ୍ଗ୍‌ ମୟାବତି କାଜିଂ ବାହା ଆଡ; ଇନାକିଦେଂକି ବେମାର୍ କିନି ଲକୁ ଆରେ ମୁଡ଼଼େଏ କିଦେଂ ଆଡୁର୍‌, ବିନାସ୍ ତିର ଆଜ଼଼ି ମାନାତା, ବିରଦିକାର୍‌ୟା ଦେସ୍‌ତାଂ ହନ୍‌ନାରା । 5 ଆରେ, ଦୟାତ ର ଗାଦି ରଚ୍‌ନାକା ଆନାତ୍‌ ଆରି ରୱାନ୍‌ ହାତ୍‌ପାତ ଦାଉଦ୍‌ତି ତୁମ୍‌ ବିତ୍ରେ ତା ଜପି ନିଲ୍‌ନାନ୍‌; ହେୱାନ୍‌ ନିୟାୟ୍‌ ଇଟ୍‌କାଡ଼୍‌ କିଜ଼ି ବିଚାର୍‌ କିନାର୍‌ ଆରି ଦରମ୍‌ ସାଦୁନ୍‌ କିନିତାକେ ଜାଗ୍ରତ୍ ଆନାନ୍‌ । 6 ଆପେଙ୍ଗ୍‌ ମୟାବନି ଗରବ୍‌ ବିସ୍ରେ ୱେଚାପ୍‌ନା ଜେ, ହେୱାନ୍‌ ବେସି ଗାର୍‌ବି, ତା ଆକ୍ରିୟା ଆରି ତା ଗାର୍‌ବି ଆରି ତା କୁଟ୍‌ କାତା ୱେଚାପ୍‌ନା; ତା ଦରମ୍‌ ଇଚୁକ୍‌ପା ହିଲୁତ୍‌ । 7 ଇଦାଂକାଜିଂ ମୟାବ ମୟାବନି କାଜିଂ ତରହର୍‌ ଆନାଦେର୍‌, ୱିଜ଼଼ାର୍‌ ମାନାୟ୍‌ ତରହର୍‌ ଆନାଦେର୍‌; ଇନାକିଦେଂକି ଏପେଙ୍ଗ୍‌ ବେସି ଦୁକ୍‌ତାକାଦେର୍‌ ଆଜ଼଼ି କିର୍‌ହେରସ୍‌ ତାକେ ହାର୍‌ଦି କାଦି କାଜିଂ ଆଡ଼୍‌ବାନାଦେର୍‌ । 8 ଇନେସ୍‌କି ହିସ୍‌ବନ୍‌ନି ଜମିସବୁ ଆରି ସିବ୍‌ମାର ଅଙ୍ଗୁର୍‌ତାଲା ୱାଜ୍‌ଜି ହାନାତା; କୁଟୁମ୍‌ନି ଆଦିକାରିର୍‌ ହେବେନି ପିସ୍ତିମାଚି ମାର୍‌କୁସବୁ ଡ୍ରିକ୍‌ଚି ତୁଇତାର୍ଣ୍ଣା; ହେୱାର୍‌ ସବୁ ଜାସେର୍‌ ପାତେକ୍‌ ହାଚାର୍‌, ବାଟା ପାତେକ୍‌ ଜେଡ଼େକେତେ ହାଚାର୍‌; ତା କେନ୍ଦାଂସବୁ ଚାରିବେଣ୍‌ତାଂ ନାଦାର୍‌ ଆତାତ୍‌, ହେୱାର୍‌ ସବୁ ହାମ୍‌ଦୁର୍ ଲାକେ ହେଦାଂ ଲାମ୍ ଆଜ଼଼ି ହାଚାତ୍‌ । 9 ଇଲାକେ ଆପେଙ୍ଗ୍‌ ଜାସେର୍‌ ଲାକେ ଆଡ଼୍‌ବିନି କାଡ଼୍‌ଦ ସିବ୍‌ମାର ଅଙ୍ଗୁର୍‌ରାସ୍‌ କାଜିଂ ଆଡ଼୍‌ବାନାନା; ଏ ହିସ୍‌ବନ୍‌, ଏ ଇଲିୟାଲି ଆପେଙ୍ଗ୍‌ ନି ଅଙ୍ଗୁର୍‌ରାସ୍‌ନି ଏସ୍‌ତାଂ ନିଙ୍ଗେଙ୍ଗ୍‌ ତିର୍‌ତାନାପ୍‌; ଇନାକିଦେଂକି ମି ହେନ୍ତାକା ପାଡ୍‌ଚେତାର୍‌ ବେହାକ୍‌ କାଡ଼୍‌ନି ପାଡ଼୍‌ ଆରି ମି ତାସ୍‌ ଜପି ଜୁଜ୍‌ନି ଗାର୍‌ଜେନ୍ ୱେନ୍ୟାନାତା । 10 ଇଚିସ୍‌, ୱାରି ଆରି ସର୍‌ଦା ଦେହା ଆନାତା; ଆରେ, ଅଙ୍ଗୁର୍‌ରାସ୍‌ତ କେର୍‌କଣ୍‌ କି ୱାରିନି ଗାଜେର୍‌ ଆଉତା; ଇନେର୍‌ ପାଦ୍‌ କାଜିଂ ଆସ୍ତି ଅଙ୍ଗୁର୍‌କୁଇତ ଅଙ୍ଗୁର୍‌ରାସ୍‌ ହପ୍‌ତୁଦେର୍‌; ଆପେଙ୍ଗ୍‌ ଅଙ୍ଗୁର୍‌ ରୁଣ୍ଡାୟ୍‌କିନିତ ୱାରିନି ଗାଜେର୍‌ତ ଟେବା ଆନାତ୍‌ । 11 ଇ କାରଣ୍‌ତାଂ ମା ନାଡ଼ି ମୟାବନି କାଜିଂ ଆରି ମା ୱାସ୍କି କିର୍‌ହେରସ୍‌ତି କାଜିଂ ଗମଣ୍ ଲାକେ ଆଡ଼୍‌ନାତା । 12 ଆରେ, ମୟାବ ଆପେ ଏକାୱାନି ସମୁତ ଆରି ଗଜାବାହାତ ଜାର୍‌ତିଂ ବିପ୍ତି ଆଜ଼଼ି ପାର୍ତାନା କିନି କାଜିଂ ଦରମ୍‌ତ ହଣିୱେଡ଼ାଂ ହେୱାନ୍‌ ଇମ୍‌ଣାକାପା ଲାବ୍‌ ପାୟା ଆଉନ୍‌ । 13 ହାଚି ସମୁତ ନିତ୍ରେମାପ୍ରୁ ମୟାବ ବିସ୍ରେ ଇ କାତା ଇଞ୍ଜି ମାଚାନ୍‌ । 14 ମାତର୍‌ ନଙ୍ଗ୍‌ ନିତ୍ରେମାପ୍ରୁ ଇ କାତା ଇନାନ୍‌, କୁଲିଲାହାଂ ଜିନାକାନ୍‌ ତିନ୍ ବାର୍ହୁ ଲାକେ ତିନି ବାର୍ହୁ ବିତ୍ରେ ମୟାବନି ଗାଜା ଜାଜ୍‌ମାଲ୍‌ ତା ବେସିହେନି ଟେବା ଆତାର୍‌, ଆରେ ଆରେ ଗାଣା କିଆ ଆଉତ୍‌ ।