1 ନିତ୍ରେମାପ୍ରୁ ଜାର୍‌ ଚିକାଣ୍‌କାସ୍ୟାତି ମାନାୟ୍‌ନିକାନ୍‌, ଇଚିସ୍‌, କରସ୍‌ ବିସ୍ରେ ଇ କାତା ଇନାର୍‌, ଆପ୍‌ ତା ମୁମ୍‌ଦ ବାରବିନି କୁଟୁମ୍‌ତିଂ ପେଜ୍‌ନି କାଜିଂ ତା ତିନାକେଇ ଆସ୍ତାପ୍‌ନା ଆରି ଆପ୍‌ ରାଜାର୍‌ତି ମ୍ଡେଙ୍ଗ୍‌ଦିଡରି ରିକ୍‌ନାସ୍‌; ଆପ୍‌ ତା ମୁମ୍‌ଦ କାପାଟ୍‌ ସବୁ ଜେନାସ୍‌ ଆରି ଗାଡ଼୍‌ଦୁୱେର୍‌ ସବୁ ବନ୍ଦ୍‌ ଆଉକ୍‌; 2 "ଆପ୍‌ ମି ଆଗେ ଆଗେ ହାନାପ୍‌, କଦ୍ରାଙ୍ଗ୍‌ ବାହାଙ୍ଗ୍‌ ସବୁ ସମାନ୍‌ କିନାପ୍‌; ଆପ୍‌ ପିତାଡ଼୍‌ନି କାବାଟ୍‌ ସବୁ ଡ୍ରିକ୍‌ଚି ଗାଣ୍ଡ୍ରା ଗାଣ୍ଡ୍ରା କିନାପ୍‌ ଆରି ଲୱା କିର୍ଣି ସବୁ ରାସ୍‌ଦି ତୁହିନାପ୍‌; 3 ଆରେ, ଆପ୍‌ ମାଜ୍‌ଗାନି ଦନ୍‌କଟି ଆରି ଡ଼ୁକ୍‌ତି ବାହାତ ରୁଣ୍ଡାୟ୍‌ କିତି ସମ୍ପତି ସବୁ ମିଙ୍ଗେଙ୍ଗ୍‌ ହିଦ୍‌ନାପ୍‌, ତାପାଚେ ମି ତର୍‌ ଆସ୍ତି କୁକ୍‌ତାନାକାପ୍‌ ଆପ୍‌ ଜେ ନିତ୍ରେମାପ୍ରୁ, ଇସ୍ରାଏଲ୍‌ନି ପର୍‌ମେସ୍ୱର୍‌ ଆନାପ୍‌, ଇଦାଂ ଏପ୍‌ ପୁଞ୍ଜେଙ୍ଗ୍‌ ଆଡ଼୍‌ନାଦେର୍‌ । 4 ମା ଆଡ଼ିଏନ୍‌ ଜାକୁବ୍‌ ଆରି ମା ବାଚିକିତି ଇସ୍ରାଏଲ୍‌ କାଜିଂ ଆପ୍‌ ମି ତର୍‌ ଆସ୍ତି ମିଙ୍ଗେଙ୍ଗ୍‌ କୁକ୍‌ତାନାପା; ଏପ୍ ମାଙ୍ଗେଙ୍ଗ୍‌ ପୁଞ୍ଜ୍‌ୱିତିସ୍‌ ଆଁ ଆପ୍‌ ମିଙ୍ଗେଙ୍ଗ୍‌ ପାଦ୍‌ ହିତ୍‌ତାପ୍‌ନା । 5 ଆପ୍‌ ନିତ୍ରେମାପ୍ରୁ, ଆରେ ଜେତାକାନ୍‌ ହିଲୁର୍‌; ନାଂ ପିସ୍ତି ଆରେ ପର୍‌ମେସ୍ୱର୍‌ ହିଲୁନ୍‌; ଏପ୍‌ ମାଂ ପୁଞ୍ଜ୍‌ୱିତିସ୍‌ ଆପ୍ ମି ମ୍ଡେଙ୍ଗ୍ ଗାଚ୍‌ଚାନାପ୍‌; 6 ହେବେ ନାଂ ପିସ୍ତି ଜେତାକାର୍‌ ଇନେର୍ ହିଲୁର୍‌, ଇଦାଂ ୱେଡ଼ାହତ୍‌ନି ବାହାତାଂ ୱେଡ଼ାଆର୍‌ନି ଦିଗ୍‌ ପାତେକ୍‌ ଲକୁ ପୁନାର୍‌; ଆପ୍‌ ନିତ୍ରେମାପ୍ରୁ, ଆରେ ନାଂଜେତାକାର୍‌ ଇନେର୍‌ ହିଲୁର୍‌ । 7 ଆପ୍‌ ଅଜଡ଼୍‌ ରଚ୍‌ନାପ୍‌ ଆରି ଆପ୍‌ ମାଜ୍‌ଗା ଉପ୍‌ଜାଣ୍ କିନାପ୍‌; ଆପ୍‌ ସୁସ୍ତା ହାନ୍ଦାୟ୍‌ କିନାପ୍‌, ବିପଦ୍ ଉପ୍‌ଜାୟ୍ କିନାପ୍‌; ଆପ୍‌ ନିତ୍ରେମାପ୍ରୁ ଇଦାଂ ସବୁ ପୁରା କିନାପ୍‌ । 8 ଏ ଆକାସିଂ, ଏନ୍‌ ଜପିତାଂ ବାର୍ହାଆୟିକିୟା, ବାଦାଡ଼୍‌ତାଂ ଦାର୍ମିନିବାର୍ହା କିୟା; ଇନେସ୍‌କି ମୁକ୍‌ଡ଼ାନା ଉବ୍‌ଜାନାତ୍‌, ଇଦାଂକାଜିଂ ପୁର୍ତି ଡ୍ରିଙ୍ଗ୍‌ନାତ୍‌ ଆରି ହେୱାନ୍‌ ଦାର୍ମିନିକା ରଞ୍ଜେମାଟ୍‌ ଗାଜା କିନାପ୍‌; ଆପ୍‌ ନିତ୍ରେମାପ୍ରୁ ଇଦାଂ ଉବ୍‌ଜାୟ୍‌ କିତାପ୍‌ନା ।

9 ଇନେର୍‌ ଜାର୍‌ ଉବ୍‌ଜାଣ୍‌କାରିୟା ଲାହାଙ୍ଗ୍‌ ବିରୁଦ୍ କିନାନ୍, ହେୱାନ୍‌ ଦୁକ୍‌ନି ଲକୁ, ପୁର୍ତିନି କାପ୍‌ରି ବିତ୍ରେ ଇଚୁକ୍‌ କାପ୍‌ରି ମାତର୍‌, ଚିକ୍‌ଲା ଇନାକା ତା ରଚ୍‌ଚି କୁମୁରେନିଂ ଇନାନ୍‌, ଏନ୍‌ ଇନାକା ରଚ୍‌ଚାୟ୍‌ନା ? କି ମି କାମାୟ୍‌ ଇନାକା ଇନାତ୍‌, ତା କେଇ ହିଲୁତ୍‌ ? 10 ଇନେନ୍‌ ଆବାଂ ଇନାନ୍‌, ଏନେଙ୍ଗ୍‌ ଇନାକା ଜଲମ୍‌କିତାୟ୍‌ନା, କି କଗ୍‌ଲେଙ୍ଗ୍‌ ଇନାନ୍‌, ଏନ୍‌ ଇନାକା ଗାଟାଆତାୟ୍‌ନା ? ହେୱାନ୍‌ ଦୁକ୍‌ନି ଲଗୁ । 11 ନିତ୍ରେମାପ୍ରୁ, ଇସ୍ରାଏଲ୍‌ନି ଦାର୍‌ମି ଲାକେ ଆରି ହେୱାନ୍ତି ରଚ୍‌ନିମୁଣିକା ଇ କାତା ଇନାନ୍, ୱାନିଦିନ୍‌ତି ଗଟ୍‌ଣାନି ବିସ୍ରେ ମାଂ ୱେନ୍‌ବାଆଦା; ଏପେଙ୍ଗ୍‌ ମା ହିମ୍‌ଣାତିଂ ବିସ୍ରେ ଆରି ମା କେଇକିତି କାମାୟ୍‌ ବିସ୍ରେ ମାଂ ବଲ୍‌ ହିଦା । 12 ଆପ୍‌ ପୁର୍ତି ରଚ୍‌ଚାପ୍‌ନା ଆରି ତା ବିତ୍ରେ ମାନାୟ୍‌ତିଂ ଉବ୍‌ଜାଣ୍‌ କିତାପ୍‌ନା; ଆପ୍‌, ମା କେଇଦାଂ ନେ ଆକାସିଂ ଚିତ୍ରାକାବ୍ରା କିତାୟ୍‌ନା ଆରି ହେବେନି ସବୁ ବିସ୍ରେ ଆପ୍‌ ବଲ୍‌ ହିତାପ୍‌ନା । 13 ଆପ୍‌ ଦାର୍ମିତ ତାଙ୍ଗେଙ୍ଗ୍‌ ଉବ୍‌ଜାୟ୍‌ କିତାପ୍‌ନା ଆରି ଆପ୍‌ ତା ସବୁ ହାଜ଼଼ି ସଲକ୍‌ କିନାପ୍‌; ହେୱାନ୍‌ ମା ଗାଡ଼୍‌ ଆରେରଚ୍‌ନାନ୍‌ ଆରି ହେୱାନ୍‌ ମା ପେଜ୍‌ୟାତି ମାନାୟ୍‌ତିଂ ପିସ୍ତି ହିଦ୍‌ନାନ୍‌, ମଲ୍‌ କାଜିଂ କି ଇନାମ୍‌ କାଜିଂ ଆକାୟ୍‌," ଇଦାଂ ୱିଜ଼଼େତିଂସାକ୍ତିକାଟି ନିତ୍ରେମାପ୍ରୁ ଇନାନ୍‌ ।

14 ନିତ୍ରେମାପ୍ରୁ ଇ କାତା ଇନାନ୍‌, "ମିସର୍‌ନି କସ୍ଟନିକା, କୁସ୍‌ତ ବେପାର୍‌କିତି ପାଡ଼୍‌ ଆରି ଗାଜାନିକା ସବାୟିୟର୍‌ ମି ଲାଗାଂ ୱାନାର୍‌ ଆରି ମିୱାର୍‌ ଆନାର୍‌; ହେୱାର୍‌ ମି ପାଚେ ୱାନାକାର୍‌ ଆନାର୍‌; ବିୱାହିଂ ଲାହାଙ୍ଗ୍ ମେହାଜ଼଼ି ହେୱାର୍‌ ୱାନାର୍‌; ଆରେ, ହେୱାର୍‌ ମିଙ୍ଗେଙ୍ଗ୍‌ ଜୱାର୍‌ କିଦ୍‌ନାର୍‌ ଆରି ଗୱାରି କିଜ଼ି ଇଞ୍ଜ୍‌ନାର୍‌, ନିଚୟ୍‌ ପର୍‌ମେସ୍ୱର୍‌ ମି ବିତ୍ରେ ମାନାନ୍‌; ତାଂ ପିସ୍ତି ଆରେ ଇନେର୍‌ ହିଲୁର୍‌, ଆରେ ଇନେର୍‌ ପର୍‌ମେସ୍ୱର୍‌ ହିଲୁର୍‌ ।" 15 ଏ ମୁକ୍ତିକାରିୟା, ଇସ୍ରାଏଲ୍‌ନି ପର୍‌ମେସ୍ୱର୍‌, ଏନ୍‌ ନିଚୟ୍‌ ୱାସ୍କିଡ଼଼ୁକ୍‌ନି ପର୍‌ମେସ୍ୱର୍‌ ନିକାୟ୍‌ । 16 ହେୱାର୍‌ ଲାଜା ଆନାର୍‌, ଆଁ, ହେୱାର୍‌ ୱିଜ଼଼ାର୍‌ ବିପ୍‌ତି ଆନାର୍‌; ପୁତ୍‌ଡ଼ାଙ୍ଗ୍‌ ରଚ୍‌ନାକାର୍‌ ୱିଜ଼଼ାର୍‌ ରଞ୍ଜେମାଟ୍‌ ଅପ୍‌ମାନ୍‌ ଆନାର୍‌ । 17 ମାତର୍‌ ଇସ୍ରାଏଲ୍‌, ନିତ୍ରେମାପ୍ରୁତି ହୁଦାଂ ୱିଜ୍‌ୱିଜିକାଡ଼୍ ତିର୍‌ ମୁକ୍‌ଡ଼ାନାକା ପାୟାଆନାତ୍‌; ଏପେଙ୍ଗ୍‌ ଜୁଗ୍‌ୱିଜ୍‌ନି ପାତେକ୍‌ ଲାଜୁ କିବା ବିପ୍ତି ଆଉଦେର୍‌ । 18 ଇନାକିଦେଂକି, ଆକାସିଂନି ଉପ୍‌ଜାଣ୍‌କାରିୟା ନିତ୍ରେମାପ୍ରୁ ଇଲାକେ ଇନାନ୍‌; ହେୱାନ୍‌ ପର୍‌ମେସ୍ୱର୍‌ ଆନାନ୍‌; ହେୱାନ୍‌ ପୁର୍ତିତିଂ ରଚ୍‌ଚି ଜାଲ୍‌ଦି କିତାନ୍‌: ହେୱାନ୍‌ ହେଦାଂ ରଚ୍‌ଚାନ୍‌, ହେୱାନ୍‌ ହେଦାଂ ୱାରାକା କିଜ଼ି ଉବ୍‌ଜାୟ୍‌ କିୱାଦାଂ କୁଚ୍‌ନିଜମ୍‌ନି ବାହା ଆନି କାଜିଂ ରଚ୍‌ଚାନ୍‌, ଆପ୍ ନିତ୍ରେମାପ୍ରୁ, ଆରେ ଇନେର୍‌ ହିଲୁର୍‌ । 19 ଆପ୍‌ ଡ଼ୁକ୍‌ନିତ ମାଜ୍‌ଗାନି ଦେସ୍‌ନି ଇମ୍‌ଣି ବାହାତ ଇନ୍‌ୱାତାପ୍‌ନା; ଏପେଙ୍ଗ୍‌ ପଲ୍ୟା ମାଂ ଡେକ୍ତାନାଦେର୍‌, ଇଦାଂ ଆପ୍‌ ଜାକୁବ୍‌ ଲାତ୍ରାତିଂ ଇନ୍‌ୱାତାପ୍‌ନା, ଆପ୍‌ ନିତ୍ରେମାପ୍ରୁ ଦାର୍ମିନିକାପ୍‌, ଆପ୍‌ ସଲ୍‌କେନି ନ୍ୟାୟ୍‌ କାତା ହପ୍‌ନାପ୍‌ ।

20 ଏ ବାରବିନି କୁଟୁମ୍‌ ବିତ୍ରେ ରାକ୍ୟା ପାୟାତି ମାନାୟାର୍‌, ଏପେଙ୍ଗ୍‌ ରବେ ଆଜ଼଼ି ୱାଡ, ରଞ୍ଜେମାଟ୍‌ ଲାଗେ ୱାଡ; ଇମ୍‌ଣାକାର୍‌ ଜାର୍‌ତି କାର୍‌ତି ପୁତ୍‌ଡ଼ାଙ୍ଗ୍‌ନି ମାର୍‌ ପିନ୍‌ଣ୍ଡି ବୁଲାନାର୍‌ ଆରି ମୁକ୍‌ଡ଼ାୟ୍‌ କିନି କାଜିଂ ଆଡ୍‌ୱି ପେନ୍‌କୁ ଲାଗାଙ୍ଗ୍‌ ପାର୍ତାନା କିନାର୍‌, ହେୱାଙ୍ଗ୍‌ତି ଇଚୁକ୍‌ପା ଗିଆନ୍‌ ହିଲୁତ୍‌ । 21 ଏପେଙ୍ଗ୍‌ ହପାଟ୍‌ ଆରି ହେଦାଂ ଏକିକିୟାଟ୍‌: ଆଁ, ହେୱାର୍‌ ହାରି ଜଜନା କିଏର୍‌; ଆଗେ କାଡ଼୍‌ଦାଂ ଇନେର୍‌ ଇଦାଂ ୱେଚ୍‌ଚାନ୍‌ନା ? ପ୍ଡାନି କାଡ଼୍‌ଦାଂ ଇନେର୍‌ ଇଦାଂ ହପ୍‌ତାନ୍‌ନା ? ଆପ୍‌ ନିତ୍ରେମାପ୍ରୁ କି ଇଦାଂ କିୱାତାପ୍‌ନା ? ମାଙ୍ଗ୍‌ ପିସ୍ତି ବିନ୍‌ ପର୍‌ମେସ୍ୱର୍‌ ହିଲୁର୍‌, ଆପ୍‌ ଦାର୍ମିନି ପର୍‌ମେସ୍ୱର୍‌ ଆରି ରାକ୍ୟାକାରିୟା; ମାଙ୍ଗ୍‌ ପିସ୍ତି ଆରେ ଇନେର୍‌ ହିଲୁର୍‌ । 22 ଏ ପୁର୍ତିନି ହାରିହାରା ବାହାନି ୱିଜ଼଼ାକାର୍‌, ଏପେଙ୍ଗ୍‌ ମା କାଜିଂ ହୁଡ଼୍‌ତିସ୍‌ ମୁକ୍ତି ପାୟାଆଡ; ଇନାକିଦେଂକି ଆପ୍‌ ପର୍‌ମେସ୍ୱର୍‌, ମାଂ ପିସ୍ତି ଜେତାକାର୍‌ ହିଲୁର୍‌ । 23 ଆପ୍‌ ଜାର୍‌ ତର୍‌ ଅଜ଼଼ି ପାର୍ମାଣ୍ କିତାପ୍‌ନା ଆରେ ଦାର୍ମିନି ବଚନ୍‌ ମା ମୁମ୍‌ଦାଂ ହତ୍‌ତାତ୍‌ନା, ହେଦାଂ ବିନେନିକା ଆଉତ୍‌, ମା ମୁମ୍‌ଦ ଜାଣ୍‌କେ ମେଣ୍ଡାଙ୍ଗ୍‌ କୁନ୍ଦିକିନାର୍‌, ଜାଣ୍‌କେତି ୱେନ୍ଦୁଲ୍‌ ପାର୍ମାଣ୍ କିନାତ୍‌ । 24 ମାନାୟାର୍‌ ମା ଇସାପ୍ରେ ଇନାର୍‌, "କେବଲ୍‌ ନିତ୍ରେମାପ୍ରୁତି ତାକେ ଦାର୍ମିନିକା ଆରି ସାକ୍ତି ମାନାତ୍‌ ।" ତା ତାକେ ମାନାୟାର୍‌ ୱାନାର୍‌, ଆରେ ଇମ୍‌ଣାକାର୍‌ ତା କାଜିଂ ରିସା ଆଜ଼଼ିମାଚାର୍‌, ହେୱାର୍‌ ୱିଜ଼଼ାର୍‌ ଲାଜାନାର୍‌ । 25 ଇସ୍ରାଏଲ୍‌ନି ସବୁ ଲାତ୍ରା ବଁସ୍‌ ନିତ୍ରେମାପ୍ରୁତିତାକେ ଦାର୍ମିକିଆ ଆନାର୍‌ ଆରି ବାଟ୍‌ପା‌ଣ୍‌ କିନାର୍‌ ।