1 ଆମସ୍‌ ମାଜ଼ି ଜିସାଇୟ, ଜିହୁଦା ଆରି ଜିରୁସାଲମ୍‌ ବିସ୍ରେ ଇମ୍‌ଣି ଦର୍ସନ ପାୟା ଆତାନ୍‌, ହେବେନି ବିସ୍ରେ । 2 ହାରିହାରା କାଡ଼୍‌ଦ ଇ ଲାକେ ଗିଟାଆନାତ୍‌, ନିତ୍ରେମାପ୍ରୁତି ଇଲ୍‌ନି ମାଡ଼ି, ମାଡ଼ିଙ୍ଗ୍‌ନି ଟିପ୍‌ ଜପି ରଚ୍ୟା ଆନାତ୍‌ ଆରି ବାକିମାଡ଼ିଙ୍ଗ୍‌ ପିସ୍ତି ଉଚ୍ ଆନିକ୍‌; ଆରେ, ସବୁ କୁଟୁମ୍‌ ନାଗୁଡ଼୍‌ ଲାକେ ହେ ବିତ୍ରେତିଂ ବଡ଼଼ାଜ଼଼ି ୱାନିକ୍‌ । 3 ଆରେ, ବେସି କୁଟୁମ୍‌ ହାଲୁ ହାଲୁ ଇନାର୍‌, "ଏପେଙ୍ଗ୍‌ ୱାଡ, ଆପେଙ୍ଗ୍‌ ନିତ୍ରେମାପ୍ରୁତି ମାଡ଼ିତ, ଜାକୁବ୍‌ତି ପର୍‌ମେସ୍ୱର୍‌ ଇଞ୍ଜ ହାନାସ୍‌; ହେବେ ହେୱାନ୍‌ ଜାର୍‌ ହାଜ଼ି ବିସ୍ରେ ମାଙ୍ଗେଙ୍ଗ୍‌ ହିକ୍ୟା ହିଦ୍‌ନାନ୍‌ ଆରି ମାସେଙ୍ଗ୍‌ ତା ହାଜ଼ିତିଂ ହାନାସ୍‌ ।" ଇନେକିଦେଂକି ସିୟନ୍‌ତାଂ ବିଦି ଆରି ଜିରୁସାଲମ୍‌ତାଂ ନିତ୍ରେମାପ୍ରୁତି ବଚନ୍‌ ହନାତ୍‌ । 4 ଆରେ, ହେୱାନ୍‌ ଦେସ୍‌ନିକାର୍‌ ବିତ୍ରେ ବିଚାର୍‌ କିଦ୍‌ନାନ୍‌ ଆରି ବେସି କୁଟୁମ୍‌ ବିସ୍ରେ ଟିକ୍‌ଟାକ୍ କିନାନ୍‌; ହେବେ ହେୱାର୍‌ ଜାର୍‌ତି କାଣ୍ଡା ଡ୍ରିକ୍‌ଚି ନାଙ୍ଗେଲ୍‌ନି କାହ୍‌ଣା କିନାର୍‌ ଆରି ଜାର୍‌ ଜାର୍‌ ବାଲା ଡ୍ରିକ୍‌ଚି କୱେସ୍‌ ରଚ୍‌ନାର୍‌; ର ଦେସ୍‌ନି ଲକୁ ବିନ୍‌ ଦେସ୍‌ନି ଲକୁ ବିରୁଦ୍‌ତ କାଣ୍ଡା ନିକୁର୍‌, ନଲେ ହେୱାର୍‌ ଆରେ ଜୁଜ୍‌ ହିକା ଆଉର୍‌ । 5 ଏ ଜାକୁବ୍‌ ଲାତ୍ରା, ୱାଡ, ଆସେଙ୍ଗ୍‌ ନିତ୍ରେମାପ୍ରୁତି ଅଜଡ଼୍‌ତ ହାନାସ୍‌ ।

6 ଇନେକିଦେଂକି ଏପେଙ୍ଗ୍‌ ଜାର୍‌ ଲକ୍‌ ଜାକୁବ୍‌ ଲାତ୍ରାତିଂ ପିସ୍ତାଦେର୍ଣ୍ଣା, ଇନେକିଦେଂକି ହେୱାର୍‌ ଗୁଣିୟାର୍ ବେବାର୍‌ତ ବାର୍ତି ଆରି ପଲେସ୍ଟିୟର୍‌ତି ନିୟାୟ୍‌ କିନାକାର୍‌ ଆତାର୍ଣ୍ଣା, ଆରେ, ହେୱାର୍‌ ବିନ୍‌ଦେସ୍‌ନି ମାଜ଼ିର୍‌ ଲାହାଙ୍ଗ୍‌ କେଇ ମେହାୟ୍‌ କିତାର୍ଣ୍ଣା । 7 ହେୱାର୍‌ତି ଦେସ୍‌ ପା ରୁପା ଆରି ହନାତ ବାର୍ତି; ହେୱାର୍‌ ଦନ୍‌ ଇସାପ୍‌ ଆକାୟ୍‌; ଆରେ, ହେୱାର୍‌ତି ଦେସ୍‌ ଗଡ଼ାହାଗାଡ଼୍ ବାର୍ତି ଆରି ହେୱାର୍‌ତି ଗାଗାଡ଼୍‌ ଇସାପ୍‌ ଆକାୟ୍‌ । 8 ହେୱାର୍‌ତି ଦେସ୍‌ ପା ପୁତ୍‌ଡ଼ାଂତ ବାର୍ତି; ହେୱାର୍‌ ଜାର୍‌ତି ୱାଚ୍‌କାଂତାଂ ରଚ୍‌ଚି ରସ୍ତାକା ଜିନିସ୍‌ତିଂ ଜୱାର୍‌ କିନାର୍‌ । 9 ହାରୁ ମାନାୟ୍‌ ଲାଜୁତିଂ ଆରି ଗାଜା ମାନାୟ୍‌ ହାନାନ୍‌; ଇଦାଂ କାଜିଂ ହେୱାରିଂ କେମା ହିମାଟ୍‌ । 10 ଏପେଙ୍ଗ୍‌ ନିତ୍ରେମାପ୍ରୁତି ବଇଁକାର୍‌ ରିସା ଆରି ତା ଜାଜ୍‌ମାଲ୍‌ କାରାତିଂ, ପାରାତ ହଣ୍‌ଜି ହାଲାଟ୍‌ ଆରି ଚିକ୍‌ଲା ତାରେନ୍ ଜାର୍‌ତିଂ ଡ଼ୁକାଟ୍‌ । 11 ମାନାୟ୍‌ତି ଉଚ୍ କାଣ୍‌କୁ ହାନାନ୍‌ ଆରି ମାନାୟାର୍‌ତି ଆକାର୍‌ ତାରେନ୍ ଆନାତ୍‌, ଆରି ହେ ନାଜିଂ କେବଲ୍‌ ନିତ୍ରେମାପ୍ରୁତି ଆଗେ ୱାରିକିୟା ଆନାନ୍‌ । 12 ଇନେକିଦେଂକି ଆକ୍ରିୟାର୍‌, ଗରବ୍‌ ଆରି ପୁଲା ୱିଜ଼ାର୍‌ତି ବିରୁତ୍‌ତ ମେଲ୍ୟାର୍‌ଆଦିକାରି ନିତ୍ରେମାପ୍ରୁତି ର ଦିନା ଏକାୱାନାତ୍‌, ହେବେ ହେୱାନ୍ ତାରେନ୍ କିନାନ୍‌, 13 ଇଚିସ୍‌, ହେ ଦିନା ଲିବାନନ୍‌ତି ପାନ୍ତାକା ଆରି ଉନ୍ନତି ସବୁ ଏରସ୍‌ ମାର୍‌ନି ଲାକେ ଆରି ବାସନର୍‌ତି ୱିଜ଼଼ୁ ଆଲନ୍ ମାର୍‌ନି ବିରୁଦ୍‌ତ; 14 ଆରେ, ସବୁ ପାନ୍ତି ମାଡ଼ିନି ବିରୁଦ୍‌ତ ଆରି ସବୁ ଉନ୍ନତି ହାରୁ ମାଡ଼ିନି ବିରୁଦ୍‌ତ; 15 ଆରେ, ସବୁ ଗାଜା ମାଚା ବିରୁଦ୍‌ତ ଆରି ୱିଜ଼ୁ ହାର୍‌ଡାଟ୍‌ କୁୱାଡ଼୍‌ନି ବିରୁଦ୍‌ତ; 16 ତର୍ସିସ୍‌ନି ସବୁ ଜାଜ୍‌ନି ବିରୁତ୍‌ତ ଆରି ହଲ୍‌ନି ସବୁ ରଚ୍‌ନିକାମାୟ୍‌ନି ବିରୁତ୍‌ତ ଆନାତ୍‌ । 17 ଆରେ, ମାନାୟ୍‌ନି ଉଚା ତାରେନ୍‌ ଆନାତ୍‌ ଆରି ମନାୟାର୍‌ତି ଆକାର୍‌ ତାରେନ୍‌ ଆନାତ୍, ଆରେ ହେ ନାଜିଂ କେବଲ୍‌ ନିତ୍ରେମାପ୍ରୁତି ୱାରିକିୟା ଆନାତ୍‌ । 18 ଆରେ, ପୁତ୍‌ଡ଼ାସବୁ ନସ୍ଟ ଆନାତ୍‌ । 19 ଆରେ, ଏଚେକାଡ଼୍‌ଦ ନିତ୍ରେମାପ୍ରୁ ପୁର୍ତିତିଂ ବେସି କଂପାୟ୍‌ କିଦେଙ୍ଗ୍‌ ନିଙ୍ଗ୍‌ନାନ୍‌, ହେପଦ୍‌ନା ମାନାୟାର୍‌ ହେୱାନ୍ତି ବଇଁକାର୍‌ନିକା ଆରି ଜାଜ୍‌ମାଲ୍‌ନି ଅଜଡ଼ତାଂ କାଲ୍ ପାରା ଆରି ପୁର୍ତିନି କ୍ଡୟିଦ ହଣ୍‌ଗାନାର୍‌ । 20 ନିତ୍ରେମାପ୍ରୁ ପୁର୍ତିତିଂ ମାନାୟ୍‌ତିଂ ବେସି କଂପାଇ କିଦେଂ ନିଙ୍ଗ୍‌ତାନ୍‌, ହେୱାନ୍ତି ବଇଁକାର୍‌ନି ଆରି ହେୱାନ୍ତି ଜାଜ୍‌ମାଲ୍‌ ଅଜଡ଼ତାଂ କାଲ୍‌ନି ପାରା ଜେୟାତି ବାହାତ ହଣି କାଜିଂ; 21 ମାନାୟାର୍‌ ଜାର୍‌ତି ତିନାକା ରଚ୍‌ଚି ରୁପା ପୁତ୍‌ଡ଼ା ଆରି ହନା ପୁତ୍‌ଡ଼ାକାଂ ହେ ନାଜିଂ; ଅର୍ଲି ଆରି ବାଦୁଡ଼଼ି ଲାଗାଂ ତୁଇନାନ୍‌ । 22 ଏପେଙ୍ଗ୍‌ ମୁଙ୍ଗେଲ୍‌ତାଂ ପାରାଣ୍‌ ଡ଼଼ୁଇ ଆସ୍ତି ଜିବୁନ୍‌ ମାନାୟାର୍‌ତି ବାର୍ସି କିମାଟ୍, ଇନେକିଦେଂକି ହେୱାନ୍‌ନ୍ତି ଇମ୍‌ଣାକାପା ମଲ୍ ହିଲୁତ୍‌ ?