1 ଏ ଦେସ୍‌ନିକାଦେର୍‌, ଲାଗେ ୱାଜ଼଼ି ୱେନାଟ୍‌, ଏ ଗସ୍ଟିନିକାଦେର୍‌, ଏପେଙ୍ଗ୍‌ ମାନ୍‌ଦିୟାନ୍‌ କିୟାଟ୍‌; ପୁର୍ତି ଆରି ହେବେ ବାର୍ତିଆତାକା ୱେନେତ୍‌; ଜଗତ୍‌ ଆରି ହେବେଉବ୍‌ଜାତି ସବୁ ବିସ୍ରେ ୱେନାଟ୍‌ । 2 ଇନାକିଦେଂକି ଦେସ୍‌ନି ମାନାୟ୍‌ ବିରୁଦ୍‌ତ ନିତ୍ରେମାପ୍ରୁତି କାକ୍ରି ଆରି ହେୱାର୍‌ତି ସବୁ ମେଲ୍ୟାର୍‌ତି ବିରୁଦ୍‌ ତାଦି ବେସି କାକ୍ରି ମାନାତ୍‌; ହେୱାନ୍‌ ହେୱାରିଂ ପୁରା ଲାକେ ବୁଡାୟ୍‌ କିତାନ୍‌ନା, ହେୱାନ୍‌ ହେୱାରିଂ ବୁଡାନି କାଜିଂ ହେଲାୟ୍‌ କିତାର୍‌ନା । 3 ହେୱାର୍‌ତି ହାତି ମାନାୟାର୍‌ ବାର୍‌ତ ତୁହିୟାଆନାତ୍‌, ହେୱାର୍‌ତି ମଡ଼୍‌ତାଂ ବାନ୍ୟା ଗାନ୍ଦା ନିଙ୍ଗ୍‌ନାତ୍‌ ଆରି ହେୱାତି ନେତେର୍‌ତ ମାଡ଼ିଂ ବଡ଼଼ାଜ଼଼ି ହାନିକ୍‌ । 4 ଆରେ, ଆକାସିଂ ମେଲ୍ୟା ୱିଜ଼଼ାର୍‌ କିତି ପାୟାନାର୍‌ ଆରି ଜପିଣିକିଂ ୱେଡ଼଼ା, ଲେଞ୍ଜ୍‌ ବୁଡାଆନିକ୍‌, ଆରି ହୁକାଂ ଲେକାଆକି ଲାକେ ବୁଡାଆନିକ୍‌; ଆରି, ଇନେସ୍‌କି ଅଙ୍ଗୁର୍‌ତାଲାନି ଜିରାନି ଆକି ଆରି ତଗା ମାର୍‌ନି ଜିରାନିଆକି, ହେଲାକେ ହେୱାର୍‌ତି ଆଦିକାରିର୍‌ ସବୁ ଜିରା ପାୟାନାର୍‌ । 5 ଇନାଦେଂକି ମା କାଣ୍ଡା ସାର୍ଗେତ ଜାଲ୍‌ଦି କିଆ ଆତାତ୍‌ନା; ହୁଡ଼ାଟ୍‌, ବିଚାର୍‌ କିଦେଂ ହେଦାଂ ଇଦମ୍‌ନିକା ଆରି ମା ରାଣ୍‌ନି ମାନାୟାର୍‌ତି ଜପି ଆର୍‌ନାତ୍‌ । 6 ନିତ୍ରେମାପ୍ରୁତି କାଣ୍ଡା ନେତେର୍‌ତ ସାରି, କ୍ଡୱାତ ଆରି ଅଡାନି କେର୍‌ୱେଟିନି କ୍ଡୱାତ ସାରି ଆତାତ୍‌ନା; ଇନାକିଦେଂକି ବସ୍ରାତ ନିତ୍ରେମାପ୍ରୁତି ର ପୁଜା ଆରି ଇଦମ୍‌ ଦେସ୍‌ତ ର ଗାଜାଟୁଣ୍‌ପାନାକା ଆନାତ୍‌ । 7 ଆରେ, ହେୱାର୍‌ ଲାହାଙ୍ଗ୍‌ ରାନ୍ତିକଡ଼ିଂ, ସଣ୍ଡ୍‌ ଲାହାଂ ବେଣ୍ଡ୍‌ୟା ସଣ୍ଡ୍‌ ୱାନିକ୍; ହେବେ ହେୱେକ୍‌ତି ଦେସ୍ ନେତେର୍‌ତ ହଚ୍‌ନାର୍ ଆରି ହେୱାର୍ତି କ୍ଡୱା ଦୁଡ଼଼ିତ ବାର୍ତି ଆଜ଼଼ି ୱାନିକ୍‌ । 8 ଇନାକିଦେଂକି ଇଦାଂ ନିତ୍ରେମାପ୍ରୁତି ତା ବାଦୁଲ୍‌ନି ଦିନ୍‌, ଇଦାଂ ସିୟନ୍‌ନି ଗଣ୍ଡ୍‌ଗଲ୍‌ ବିସ୍ରେନି ପାତିପାଡ଼୍‌ନି ର ବାର୍‌ହୁ । 9 ଆରେ, ତାପାଚେ ଇଦମ୍‌ନି ଜାରାଣ୍‌ ସବୁ ଦୁପ୍‌ନିତ, ତାପାଚେ ଦୁଡ଼ିସବୁ ଗନ୍ଦକ୍‌ତ ମେହାଆନାତ୍‌ ଆରି ତାପାଚେ ବୁମି କାଚାଜ଼଼ି ଦୁପ୍‌ନି ଆନାତ୍‌ । 10 ହେଦାଂ ୱେଡ଼଼ାନାଣା ହାଉତ୍‌; ହେବେ କଦା ସବୁୱେଡ଼଼ାଂ ନିଙ୍ଗ୍‌ନାତ୍‌; ଆଣ୍ଡ୍ରାଙ୍ଗ୍‌ ଇସାପ୍ରେ ହେଦାଂ ବାଲିବାଟା ଆଜ଼଼ି ମାନାତ୍‌; ୱିସ୍‌ୱିକାଡ଼୍‌ ପାତେକ୍‌ ହେଦିଲିଂ ଇନେର୍‌ ହାଞ୍ଜେଙ୍ଗ୍ ଆଡୁର୍‌ । 11 ମାତର୍‌ ଏସ୍‌ପଟି ଆରି ଲାୱା ହେଦାଂ ଆଦିକାର୍‌; ଆରେ, କୁର୍‌ୱା ଆରି ଗାଡ୍‌କାୱା ତା ବିତ୍ରେ ବାହା କିନିକ୍‌; ଆରେ, ହେୱାନ୍‌ ତା ଜପି ଅରାୱାତାକା ଜିନିସ୍‌ ଲାଚ୍‌ନି ବାଡ୍‌ଗେ ଆରି ୱାରାକାବାର୍ତି ଓଲମ୍‌ ଜେଲ୍‌ନାର୍‌ । 12 ହେୱାର୍‌ ତାପାଚେ ମୁଡ୍‌ଦାକାର୍ ରାଜ୍ କିଦେଂ କୁକ୍‌ନାର୍; ମାତର୍‌ ଇନେର୍‌ ହେବେ ମାନୁର୍‌ ଆରି ହେବେନି ଆଦିକାରି ୱିଜ଼଼ାର୍‌ ବୁଡାନାର୍‌ । 13 ତାପାଚେ କାଚ୍ରା ସବୁ ୱାଡ଼ିଙ୍ଗ୍‌ ଆରି କାଚେଲିଂ, ୱାଡ଼଼ିକୁଡ଼଼ି ପାନ୍‌ନାତ୍, ହେଦାଂ ବିଲାଇଙ୍ଗ୍‌ତି ମାନିବାହା ଆରି କୁର୍‌ୱାନି ହାରାନି ବାହା ଆନାତ୍‌ । 14 ଆରେ, ହେବେ ରାନ୍ତି ପସୁଙ୍ଗ୍‌, ହୁଣ୍ଡାର୍‌ ଲାହାଙ୍ଗ୍‌ ମେହାନିକ୍‌ ଆରି ଅଡା ପେନ୍‌ ତା ହାଙ୍ଗ୍‌ଦାଂକାଦିଂ କୁକ୍‌ନାତ୍‌; ଆରେ, ପାଙ୍ଗ୍‌ନାୟ୍‌ ହେବେ ବାହାକିଜ଼ି ଜମ୍‌ନି ବାହା ଗାଟାଆନାତ୍‌ । 15 ହେ ବାହାତ କୁର୍‌ୱା ତା ବାହା କିଜ଼ି ରଣ୍ଡା ଆର୍‌ଜି ଆରି ହିମ୍‌ଣା ପ୍ଡିପ୍‌ଚି ପଟତାରେନ୍‌ ରବେ ରୁଣ୍ଡାୟ୍ କିନାତ୍‌; ଆରେ, ରାମାଣିଂ ୱିଜ଼଼ୁ ଜାର୍‌ ଜାର୍‌ ହାଂଦିକିକ୍‌ ଲାହାଙ୍ଗ୍‌ ହେବେ ରୁଣ୍ଡାନିକ୍‌ । 16 ଏପେଙ୍ଗ୍‌ ନିତ୍ରେମାପ୍ରୁତି ପତିତାଂ ଡେକ୍‌ଚି ପଡ଼଼ି କିୟାଟ୍‌; ଇୱାର୍‌ ବିତ୍ରେ ଇନେର୍‌ ପା ଟେବା ଆଉର୍‌, ଇନେର୍‌ ତା ହାଂହିଲ୍‌ୱାକାର୍‌ ଆଉର୍‌; ଇନାକିଦେଂକି ନା ୱେଇ ହୁଦାଂ ହେୱାନ୍‌ ଇଦାଂ ବଲ୍‌ କିତାନ୍‌ନା ଆରି ତା ଜିବୁନ୍‌ ହେୱାରିଂ ରୁଣ୍ଡାୟ୍‌ କିତାତ୍‌ନା । 17 ଆରେ, ହେୱାନ୍‌ ହେୱାର୍‌ କାଜିଂ ଦରମ୍‌ଗୁଡ଼଼ି କିତାର୍‌ନା ଆରି ତା କେଇ ଲାଚ୍‌ନି ଡରି ହୁଦାଂ ହେଦାଂ ବାଗ୍‌ କିଜ଼ି ହେୱାରିଂ ହିତାନ୍‌ନା; ହେୱାର୍‌ ହେଦାଂ ସବୁୱେଡ଼ାଂ ଆଦିକାର୍‌ କିନାର୍‌, ହେୱାର୍‌ ଆଣ୍ଡ୍ରାଙ୍ଗ୍‌ ଇସାପ୍ରେ ତା ବିତ୍ରେ ବାହା କିନାର୍‌ ।