1 ନିଂଗାଟ୍‌, ଅଜଡ଼୍‌ ଆଡ, ଇନେକିଦେଂକି ମି ଅଜଡ଼୍‌ ଏକାୱାତାତ୍‌ ଆରି ନିତ୍ରେମାପ୍ରୁତି ସାକ୍ତି ମି ଜପି ହତ୍‌ନାତା । 2 ଇନେକିଦେଂକି, ହୁଡ଼ାଟ୍‌, ମାଜ୍‌ଗା ପୁର୍ତିତିଂ ଆରି ବେସି ମାଜ୍‌ଗା କୁଟୁମ୍‌ନିକାରିଂ ଡାବାୟ୍‌ କିନାତ୍‌; ମତର୍‌ ମି ଜପି ନିତ୍ରେମାପ୍ରୁ ହତ୍‌ନାନ୍‌ ଆରି ତା ସାକ୍ତି ମି ଜପି ଚଞ୍ଚ୍‌ନାତ୍‌ । 3 ଆରେ, ବିନ୍‌ ଦେସ୍‌ନିକାର୍‌ ମି ଅଜଡ଼୍‌ ଲାଗାଂ ଆରି ରାଜାର୍‌ ମି ନାଡ଼଼ିସ୍‌ନିକାରା ଅଜଡ଼୍‌ ଲାଗାଂ ୱାନାର୍‌ । 4 ଏପ୍‌ ଏରିକିଜ଼଼ି ଚାର୍‌ବେଣ୍‌ତାଂ ହୁଡ଼ାଟ୍‌, ହେୱାର୍‌ ୱିଜ଼ାର୍‌ ରବେ ଆନାରା, ହେୱାର୍‌ ମି ଲାଗାଂ ୱାନାରା; ମି ମାଜ଼ିର୍‌ ଦେହାତାଂ ୱାନାର୍‌ ଆରି ମି ଗାଚ୍‌କୁ ହେୱେକ୍‌ ବାପାଂତାଂ ତାହିୱାନିକ୍‌ । 5 ହେପାଦ୍‌ନା ଏପେଙ୍ଗ୍‌ ହେଦାଂ ହୁଡ଼୍‌ଜି ଅଜଡ଼୍‌ ଆନାଦେର୍‌ ଆରି ମିଦାଂ ନେଞ୍ଜେଡାକି ଦକ୍‌ ଦକ୍‌ ଆଜ଼ି ହାନାତ୍‌; ଇନେକିଦେଂକି ହାମ୍‌ଦୁର୍‌ତ ଜିନିସ୍‌ ମି ନିପ ୱାନିକ୍‌, ବିନ୍‌ ଦେସ୍‌ନିକାର୍‌ତି ଦନ୍‌ ମି ଲାଗାଂ ୱାନାତ୍‌ । 6 ବେସି ଉଟ୍‌କୁ, ମିଦିୟନ ଆରି ଐପାର ତାଂନିକିଂ-ଉମ୍‌ନିକିଂ ମିଙ୍ଗ୍‌ ମାଦି କିଦ୍‌ନିକ୍‌; ହେ ସବୁ ସିବା ଦେସ୍‌ତାଂ ୱାନିକ୍‌; ହେୱାଙ୍ଗ୍‌ ହନା, ଦୁପ୍‌ନି ତାନିକ୍‌ ଆରି ନିତ୍ରେମାପ୍ରୁତି କାତା ସୁଣାୟ୍‌ କିନିକ୍‌ । 7 କେଦରନି ସବୁ ମେଣ୍ଡାମାନ୍ଦା ମି ଲାଗାଂ ରୁଣ୍ଡା ଆନିକ୍‌, ନବାୟତ୍‌ର୍‌ ମେଣ୍ଡାମାନ୍ଦା ମିଙ୍ଗ୍‌ ହେବା କିଦ୍‌ନିକ୍‌; ହେୱାଙ୍ଗ୍‌ ୱେନ୍‌ଜି ମା ଗାର୍‌ଣିବେଦି ଜପି ୱାନାନିକ୍‌, ଆରେ ଆପ୍‌ ଜାର୍‌ତି ତୁଜ୍‌ନାକା ସାରି ଲାକେ ଇଞ୍ଜିଙ୍ଗ୍‌ ରଚ୍‌ନାସ୍‌ । 8 ବାଦାଡ଼୍‌ ଲାକେ ଜାର୍ ନିୟାୟ୍‌ ଆରି ଜାର୍‌ ଜାର୍‌ ବାଡ଼୍‌ଦ ଉମ୍‌ନି ପାଣ୍ଡ୍‌କାଂନି ନିୟାୟ୍‌ ଉମ୍‌ଜି ୱାନିକା ଜେ ଇୱାଙ୍ଗ୍‌, ଇୱାଙ୍ଗ୍ ଇନିକିକ୍‌ ? 9 ନିଚେ ଏସ୍‌କୁପ୍‌ଲିଂ ମାଙ୍ଗେଙ୍ଗ୍ କାତ୍‌ନିକ୍, ଆରେ ତର୍ସିସ୍‌ନି ଜାଜ୍‌ସବୁ ଆଗେହାଲ୍‌ଜି ଆଜ଼଼ି ଜାର୍‌ ଜାର୍‌ ଲାହାଙ୍ଗ୍‌ ହେୱାର୍‌ତି ରୁପା ଆରି ହନା ଅଜ଼଼ି, ମି ହିମ୍‌ଣାକାଂ ଦେହାତାଂ ତାସିୱାଜ଼଼ି, ମି ପର୍‌ମେସ୍ୱର୍‌ ନିତ୍ରେମାପ୍ରୁତି ତର୍‌ କାଜିଂ ଆରି ଇସ୍ରାଏଲ୍‌ନି ଦାର୍‌ମିର୍‌ କାଜିଂ ୱାନାର୍‌, ଇନାକିଦେଂକି ହେୱାନ୍‌ ମିଙ୍ଗେଙ୍ଗ୍‌ ପୁଇପୁୟା କିତ୍‌ତାନ୍‌ନା । 10 ଆରେ, ବିଦେସ୍‌ତାକାର୍‌ ମି ଡାଣ୍ଡ୍‌କାତି ରଚ୍‌ନାର୍‌ ଆରି ହେୱାର୍‌ତି ରାଜାର୍‌ ମିଂ ସାରିନି ହେବାକିଦ୍‌ନାର୍‌; ଇନାକିଦେଂକି ଆପ୍ ଜାର୍ ଜାର୍ କାକ୍ରିକିତାଂ ମିଙ୍ଗେଙ୍ଗ୍‌ ଟ୍ରାକ୍‌ତାପ୍‌, ମତର୍‌ ଜାର୍‌ ମାନ୍ତ ଆପ୍‌ ନି କାଜିଂ ଦୟା କିଦ୍‌ନାପା । 11 ବିନ୍‌ ଦେସ୍‌ନିକାର୍‌ତି ଦନ୍‌ ଆରି ତା ଲାହାଂ ହେୱାର୍‌ତି ରାଜାର୍‌ ଇନେସ୍‌ ମି ଲାଗାଂ ତାଇୱାନାର୍‌, ଇଦାଂ କାଜିଂ ମି ଗାଡ଼୍‌ନି ଦୁୱେର୍‌ସବୁ ଦିନ୍‌କେ ମେଲା ମାନ୍‌ଗାନାତ୍‌, ୱେଡ଼ାନାଣା ହେ ସବୁ ବନ୍ଦ୍‌ ଆଜ଼ିମାନୁତ୍‌ । 12 ଇନେକିଦେଂକି ଇମ୍‌ଣି ଦେସ୍‌ ଆରି ରାଜି ମି ହେବା କିଦୁତ୍‌, ହେଦାଂ ନାସ୍‌ ଆନାତ୍‌, ଆଁ, ହେ ଦେସ୍‌ସବୁ ସାକ୍ତି ହୁଦାଂ ବୁଡା ଆନାତ୍‌ । 13 ଲିବାନନ୍‌ନି ଜାଜ୍‌ମାଲ୍‌ ମି ଲାଗାଂ ୱାନାତ୍‌, ଦେବଦାରୁ, ତିଦର୍‌, ରବେ ଆଜ଼ି ମା ପୁଇପୁୟା ବାହା ହଲିକିନି କାଜିଂ ୱାନିକ୍‌, ଆରେ ଆପ୍‌ ଜାର୍‌ ପାନା ବାହା ଗାଜା ଜାଜ୍‌ମାଲ୍‌ କିନାସ୍‌ । 14 ଆରେ, ଇମ୍‌ଣାକାର୍‌ ମିଙ୍ଗ୍‌ ଦୁକ୍‌ ହିଦ୍‌ନାର୍‌, ହେୱାର୍‌ତି ମାଜ଼ିର୍‌ ତାରେନ୍‌ ଆଜ଼ି ମି ଲାଗାଂ ୱାନାର୍‌ ଆରି ଇମ୍‌ଣାକାର୍‌ ମିଙ୍ଗ୍‌ ପଲ୍ୟା ଇଞ୍ଜ୍‌ନାର୍‌, ହେୱାର୍‌ ୱିଜ଼ାର୍‌ ମି ପାନା ତାରେନ୍‌ ଜୁୱାର୍‌ କିଦ୍‌ନାର୍‌; ଆରେ, ହେୱାର୍‌ ମିଙ୍ଗେଙ୍ଗ୍‌ ନିତ୍ରେମାପ୍ରୁତି ଗାଡ଼୍‌, ଇସ୍ରାଏଲ୍‌ନି ପୁଇପୁୟା ଦାର୍ମିର୍‌ତି ସିୟନ୍‌ ଇଞ୍ଜି ଇନାର୍‌ । 15 ଏପ୍‌ ୱାସ୍ତାକା ଆରି ଗିଣ୍‌ ଆତିଲେ ଇନେର୍‌ ମି ବିତ୍ରେ ହିଜ଼ି ବୁଲାଚାଲା ଆୱାତାର୍‌, ହେବେ ପିସ୍ତି ଆପ୍‌ ମିଙ୍ଗ୍‌ ୱିଜ଼୍‌ୱି କାଡ଼୍‌ ପାତେକ୍‌ ଜାଜ୍‌ମାଲ୍‌ ଆରି ବେସି ଆଣ୍ଡ୍ରାହିମ୍‌ଣାଂ ରିତିନିତି ୱାରି ଲାକେ କିନାସ୍‌ । 16 ଏପ୍‌ ବିନ୍ ଦେସ୍‌ନି ଜାକୁବ୍‌ କୁଟୁମ୍‌ ଆରି ବାଡ଼୍‌କାସ୍‌ ରାଜାର୍ ମିଙ୍ଗେଙ୍ଗ୍ ପହପାଲି କିଦ୍‌ନାର୍ ଆରି ଜାତୁନ୍ ଅଦ୍‌ନାର୍, ଇନେସ୍ କି ଆୟା ପା ହିମ୍‌ଣାଂତି ଜାତୁନ୍ ଅଜ଼଼ି ମାନାତ୍‌ । 17 ଆପ୍‌ ପିତାଡ଼୍‌ ପାଲ୍‌ଟା ହନା ତାନାସ୍‌ ଆରି ଲୱା ପାଲ୍‌ଟା ରୁପା, ୱେଜ଼୍‌ଗୁ ପାଲ୍‌ଟା ପିତାଡ଼୍‌ ଆରି କାଲ୍‌କୁ ପାଲ୍‌ଟା ଲୱା ତାନାସ୍‌; ଆରେ, ଆପ୍‌ ମି ମୁଣିକା ପାଦ୍‌ତ ସୁସ୍ତାତିଂ ଆରି ମି ଆଦିକାରି ପାଦ୍‌ତ ଦାର୍ମିତିଂ ବାଚିକିନାସ୍‌ । 18 ମି ଦେସ୍‌ତ ଉତ୍‌ପାତ୍‌ କାତା ଆରି ମି ହାନ୍ଦିନି ବିତ୍ରେ ତୁହିନାକା ଆରି ନାସ୍‌ନି କାତା ଆରେ ୱେନ୍ୟା ଆଉତ୍‌; ମତର୍‌ ଏପ୍‌ ଜାର୍‌ ଡାଣ୍ଡ୍‌କାତି ତର୍‌ ମୁକ୍‌ଡ଼ାନାକା ଆରି ଜାର୍‌ ଗାଡ଼୍‌ଦୁୱେରିଂସବୁନି ତର୍‌ ୱାରିକିୟ୍‌ କିଜ଼଼ି ଇଟ୍‌ନାସ୍‌ । 19 ୱେଡ଼ାଲିଂ ୱେଡ଼ା ମି ଅଜଡ଼୍‌ ଆରେ ଆଉତ୍‌, କି ଅଜଡ଼୍‌ କାଜିଂ ଲେଂଜ୍‌ ମିଙ୍ଗ୍‌ ଅଜଡ଼୍‌ ହିଦୁତ୍‌; ମତର୍‌ ନିତ୍ରେମାପ୍ରୁ ମି କାଜିଂ ୱିଜ଼୍‌ୱିକାଡ଼୍‌ ପାତେକ୍‌ ଅଜଡ଼୍‌ ଆରି ମି ପର୍‌ମେସ୍ୱର୍‌ ମି ଜାଜ୍‌ମାଲ୍‌ ଲାକେ ଆନାନ୍‌ । 20 ମି ୱେଡ଼ା ଆରେ, ୱେଡ଼଼ାହାଲୁତ୍‌, କି ମି ଲେଂଜ୍‌ ଜାର୍‌ତିଂ କାଞ୍ଜୁତ୍‌ଦେ; ଇନେକିଦେଂକି ନିତ୍ରେମାପ୍ରୁ ମି ୱିଜ଼୍‌ୱିକାଡ଼୍‌ ପାତେକ୍‌ ଅଜଡ଼୍‌ ଲାକେ ଆନାତ୍‌ ଆରି ମି ଆଡ଼୍‌ବିନି ଦିନ୍‌ ୱିଜ୍‌ନାତ୍‌ । 21 ପା ମି ଲକୁ ୱିଜ଼ାର୍‌ ଦାର୍ମି ଆନାର୍‌, ହେୱାର୍‌ ୱିଜ଼୍‌ୱିକାଡ଼୍‌ ପାତେକ୍‌ ଦେସ୍‌ ଆଦିକାର୍‌ କିନାର୍‌, ହେୱାର୍‌ ମା ଜାଜ୍‌ମାଲ୍‌ନି ମା ରୁସ୍‌ତି କେନ୍ଦା ଆରି ମା କେଇଦାଂ ରୁସ୍‌ତି କାରୁମ୍‌ ଆନାତ୍‌ । 22 ଇଚ୍‌ରୁକାନ୍‌ ହାଜାର୍ ଆନାନ୍‌ ଆରି ହାରୁକାନ୍‌ ବାପୁକାଟି କୁଟୁମ୍‌ ଆନାର୍‌; ଆପ୍‌ ନିତ୍ରେମାପ୍ରୁ ସମାନ୍‌କାଡ଼୍‌ଦ ଇଦାଂ ବେଗି ଗିଟାୟ୍‌କିନାନ୍‌ ।