1 ହେ ଦିନା ଏପେଙ୍ଗ୍‌ ଇନାୟ୍‌, "ଏ ନିତ୍ରେମାପ୍ରୁ, ଆନ୍‌ ମି ଦନ୍ୟବାଦ୍‌ କିନାଙ୍ଗ୍‌; ଇନାକିଦେଂକି ଏନେଙ୍ଗ୍‌ ମା କାଜିଂ କାକ୍ରି ମାଚାୟ୍‌, ନି କାକ୍ରି କମାଆତ୍‌ତାତ୍‌ ଆରି ଏନେଙ୍ଗ୍‌ ମାଙ୍ଗେଙ୍ଗ୍‌ ସୁସ୍ତା କିତ୍‌ତାୟ୍‌ନା । 2 ହୁଡ଼ାଟ୍‌, ପର୍‌ମେସ୍ୱର୍‌ ମା ମୁକ୍‌ଡ଼ାନାକା; ଆସେଙ୍ଗ୍‌ ପାର୍ତି କିନାସ୍‌ ଆରି ପାଡ୍ରା ଆଉସ୍‌; ଇନାକିଦେଂକି ଜିହବା ନିତ୍ରେମାପ୍ରୁ ମା ତାଂ ବାଡ୍‌କାସ୍‌ ଆରି କେର୍‌କଣ୍‌; ଆରେ, ହେୱାନ୍‌ ନା ମୁକ୍‌ଡ଼ାୟ୍‌କାରିୟା ଆତ୍‌ତାନ୍ନା ।" 3 ଇଦାଂ କାଜିଂ ଏପେଙ୍ଗ୍ ୱାରିତାଂ ମୁକ୍‌ଡ଼ାନାକା କୁଇତାଂ ଏସ୍ ଉଦ୍‌ନାଦେର୍‌ 4 ଆରେ, ହେ ଦିନ୍ତ ଏପେଙ୍ଗ୍‌ ଇନାଦେର୍‌, "ନିତ୍ରେମାପ୍ରୁତି ଦନ୍ୟବାଦ୍‌ କିୟାଟ୍‌, ତା ତର୍‌ଦାଂ ପାର୍‌ତାନା କିୟାଟ୍‌, କୁଟୁମ୍‌ନିକାର୍‌ ବିତ୍ରେ ତା କିତିକାମାୟ୍‌ ସବୁ ପ୍ରର୍‌ଚାର୍‌ କିୟାଟ୍‌, ତା ତର୍‌ ଆଦିକାର୍‌ ନିକା ଇଞ୍ଜି ଡାକ୍‌ପୁଟାୟ୍‌ କିୟାଟ୍‌ । 5 ନିତ୍ରେମାପ୍ରୁତି ଉଦେସ୍‌ତ କେରାଟ୍‌; ଇନାକିଦେଂକି ହେୱାନ୍‌ ପାଣ୍‌ମେହା କାମାୟ୍‌ କିତାନ୍‌ନା; ହେଦାଂ ସବୁନିପ ପୁର୍ତିନି ପୁନ୍ୟାଆଏତ୍‌ । 6 ଏ ସିୟନ୍‌ ନିକାଦେର୍‌, ଏପେଙ୍ଗ୍‌ ୱାରିନି କାଟ୍‌ କିଜ଼଼ି କିୟାଟ୍‌; ଇନାକିଦେଂକି ଇନେନ୍‌ ଇସ୍ରାଏଲ୍‌ନି ଦାର୍‌ମି ଲାକେ, ହେୱାନ୍‌ ମି ବିତ୍ରେ ଗାଜାକାନ୍‌ ଆନାନ୍‌ ।"