1 ମିସର୍‌ ବିସ୍ରେନି ବେଣ୍‌ବାକ୍‌ଣାୟ୍‌କିନାକା ବଚନ୍‌ । ହୁଡ଼ାଟ୍‌, ନିତ୍ରେମାପ୍ରୁ ଦେହାନି ବାଦାଡ଼୍‌ତ ଜୁଜ଼଼ି ମିସର୍‌ତ ୱାନାନା; ଆରେ, ତା ମୁମ୍‌ଦ ମିସର୍‌ତ ପୁତ୍‌ଡ଼ା କମ୍ପାନିକ୍‌ ଆରି ମିସର୍‌ନି ୱାସ୍କି ତାଦି ବିତ୍ରେ ରୁଗ୍‌ନାତ୍‌ । 2 ଆରେ, "ଆପ୍‌ ମିସ୍ରିୟାରିଙ୍ଗ୍‌ ମିସ୍ରିୟାର୍‌ତିଂ ସବୁନିପ ଟିଙ୍ଗ୍‌ଲାୟ୍‌ କିନାସ୍‌; ତାପାଚେ ହେୱାର୍‌ ୱିଜ଼଼ାର୍‌ ଜାର୍‌ ଜାର୍‌ ଟଣ୍ଡେନ୍‌ନିଂ ଆରି ୱିଜ଼଼ାର୍‌ ଜାର୍‌ ଜାର୍‌ ପାହାନିକାର୍‌ ବେରୁତ ଜୁଜ୍‌ କିନାର୍‌; ଗାଡ଼୍‌ ଗାଡ଼୍‌ ବେରୁତ, ରାଜି ରାଜି ବେରୁତ, ଜୁଜ୍‌ କିନାର୍‌ । 3 ଆରେ, ମିସର୍‌ତ ଜିବୁନ୍‌ ତା ବିତ୍ରେ ୱାରାକା କିୟାନାତ୍‌ ଆରି ଆପ୍‌ ତା ଜଜନା ଗୁହ୍‌ନାପ୍‌; ତାପାଚେ ହେୱାର୍‌ ପୁତ୍‌ଡ଼ା, ବାସ୍‌ନା, ଚୁଟ୍‌କିୟାର୍‌ ଆରି ଗୁଣିୟାରିଂ ଡେକ୍‌ନାର୍‌ । 4 ଆରେ, ଆପ୍‌ ମିସ୍ରିୟାରିଂ ର ଦୟାହିଲ୍‌ୱି ମାପ୍ରୁ କେଇଦ ହେଲାୟ୍‌ କିନାନ୍‌ ଆରି ର ଦେହାନି ରାଜା ହେୱାର୍‌ ଜପି ରାଜ୍ କିନାନ୍‌," ଏଦାଂ ମାପ୍ରୁ ୱିଜ଼଼ୁତିଂସାକ୍ତିକାଟି ନିତ୍ରେମାପ୍ରୁ ଇନାନ୍‌ । 5 ଆରି, ହାମ୍‌ଦୁର୍‌ ଏଜ଼ୁଙ୍ଗ୍ ୱାଚ୍‌ନିଂ ଆରି ଜଡ଼ି ନିଗ୍‌ଜି ୱାଜ୍‌ଜି ହାନାତ୍‌ । 6 ଆରେ, ଜଡ଼ି ସବୁ ଗାନ୍ଦା ଆନାତ୍‌; ମିସର୍‌ନି ଜାରାଣିଂ ହିରୁ ଆଜ଼଼ି ୱାଚ୍‌ନିଙ୍ଗ୍; ନାଡ଼଼ା ଆରି ଏଜ଼ୁଙ୍ଗ୍‌ ୱାଚ୍‌ନିଙ୍ଗ୍ ବଡ଼ାଆନିଂ । 7 ନିଲଜଡ଼ି କଚଣ୍‌ତ, ନିଲଜଡ଼ିନି ତିରବାର୍‌ତି ବାହାସବୁ ଆରି ନିଲ୍‌ଜଡ଼ି କଚଣ୍‌ତ ଇନାକାପା ୱିତ୍‌ନାର୍‌, ହେ ସବୁ ୱାଜ୍‌ଜି ଉମ୍‌ନାତ୍‌ ଆରେ ଇନାକା ମାନୁତ୍‌ । 8 ଡଙ୍ଗାଗାଟ୍‌ୱାର୍ ପା ଆଡ଼୍‌ବାନାର୍‌ ଆରି ଇନେର୍‌ ନିଲ୍‌ଜଡ଼ିତ ବାଣ୍‌ହିଂ ଇଜ଼୍‌ନାର୍‌, ହେୱାର୍‌ ୱିଜ଼ାକାର୍‌ ଏସ୍‌କି ଆନାର୍‌, ଆରେ ଇମ୍‌ଣାକାର୍‌ ଏଜ଼ୁଙ୍ଗ୍‌ତାକେ ଜାଲ୍‌ ମେତ୍‌ନାର୍‌, ହେୱାର୍‌ ନିରାସ୍‌ଆନାର୍‌ । 9 ଆରେ ଇମ୍‌ଣାକାର୍‌ ନିର୍ମଲ୍ ନୁଲ୍ କାମାୟ୍ ଆରି ହେନ୍ଦ୍ରା ଡ଼ଚ୍‌ନାର୍, ହେୱାର୍ ଲାଜ୍ ଆନାର୍‌ । 10 ଆରେ, ତା ମୁଣ୍ଡାଂସବୁ ଗନ୍ଦା ଗନ୍ଦା ଆନିକ୍, କୁଲି କାଜିଂ କାମାୟ୍‌ କିନାକାର୍‌ ଲକୁ ୱିଜ଼଼ାକାର୍‌ ୱାସ୍କିତ ଦୁକ୍‌ଆନାର୍‌ । 11 ସୟନ୍‌ନି ଆଦିକାରି ହାତ୍‌ପା ବୁଦିହିଲାକାର୍‌ ମାନାର୍‌; ପାରନି ହିକ୍ୟାକାଟାକାନ୍‌ ମତ୍ରିର୍‌ ମାନ୍‌ ପସୁଲାକେ ଆତାନ୍‌ନା; ଏପେଙ୍ଗ୍ ଇନେସ୍‌ ଆଜ଼ି ପାରଙ୍ଗ୍ ଇନାଦେରା, ଆପେଙ୍ଗ୍ ଗିୟାନିର୍ ମେହିକାପ୍‌, ପାରାଚିନ୍‌ ରାଜାର୍‌ତି ମେହିର୍‌ ? 12 ଲାଗିଂ ମି ମାନାୟାର୍‌ ଇମେତାକେ ? ହେୱାର୍‌ ନଙ୍ଗୟ୍‌ ମିଙ୍ଗେଙ୍ଗ୍ ଜାଣାୟ୍‌ କିଦେର୍‌ ଆରି ୱିଜ଼଼େତିଂସାକ୍ତିକାଟି ନିତ୍ରେମାପ୍ରୁ ମିସର୍‌ ବିସ୍ରେ ଇନାକା ଜଜନା କିତାର୍‌ନା, ହେଦାଂ ହେୱାର୍‌ ପୁନେର୍‌ । 13 ସୟନ୍‌ନି ଆଦିକାରି ବୁଦିହିଲ୍‌ୱାକାର୍‌ ଆତାର୍‌ନା, ନପନି ମୁଡ଼୍‌ଦାକାର୍‌ କାରାପ୍ ଆତାର୍ନା; ଇନେର୍‌ ମିସର୍‌ନି ମାନାୟାରିଂ କାନାନି ଲାକେ, ହେୱାର୍‌ ମିସର୍‌ ତାକେ ବିପଦ୍‌ତାକେ ହାଲିକିତାର୍‌ନା । 14 ନିତ୍ରେମାପ୍ରୁ ମିସର୍‌ ବିତ୍ରେ ବୁଦିହିଲ୍‌ୱି ଲାକେ ଜିବୁନ୍ ମେହାୟ୍ କିତାର୍‌ନା; ଆରେ, ହଚ୍‌ଚି ଲଗୁ ଇନେସ୍ ଜାର୍ କାକ୍‌ତିତ ଜଲାଜ଼଼ି ହାନାନ୍, ହେ ଲାକେ ହେୱାର୍ ମିସରତିଂ ତାଦି ଜାଣ୍‌କେ କାମାୟ୍‌ତ ବିନ୍‌ହାଜ଼଼ିତ ହାଲି କିତାର୍‌ନା । 15 ଲାଗ୍‌, କାପ୍‌ଡ଼ା କି ନିଙ୍ଗୁଣ୍‌, କି ତାଲ୍‌କେନ୍ଦାଂ କି ଏଜ଼ୁଙ୍ଗ୍‌ତାକେ ମାନାକା କାଚ୍ରା ଇନାକାପା କିଦେଂ ଆଡ଼୍‌ନାତ୍‌, ଇ କାମାୟ୍‌ ମିସର୍‌ କାଜିଙ୍ଗ୍ କିଉଦେର୍‌ ।

16 ହେ ଦିନ୍‌ ମିସର୍‌ କଗ୍‌ଲେକାଂ ଲାକେ ଆନାତ୍‌, ଆରେ, ଆଦିକାର୍‌ନି ନିତ୍ରେମାପ୍ରୁ, ତା ଜପି ଇମ୍‌ଣି କେଇ ଜଲାୟ୍‌ କିନାତ୍‌, ହେୱାର୍‌ତି ହେ କେଇ ଜଲାନି କାଜିଙ୍ଗ୍ ହେୱାନ୍‌ କମ୍ପାନାତ୍‌ ଆରେ ପାଣ୍ଡ୍ରୁଆନାତ୍‌ । 17 ମିସର୍‌ କାଜିଙ୍ଗ୍ ଜିହୁଦା ଦେସ୍‌ ନାସ୍‌କି ଲାକେ ଆନାତ୍‌, ଆଦିକାର୍‌ନି ନିତ୍ରେମାପ୍ରୁ ତା ବିରୁଦ୍‌ତ ଇମ୍‌ଣି ଜଜନାକିନାର୍‌, ହେ କାଜିଙ୍ଗ୍ ଇନେର୍‌ ସବୁ ମାନାୟାରିଂ ଜିହୁଦାନି ତର୍‌ ଇନାର୍‌, ହେୱାନ୍‌ ପାଣ୍ଡ୍ରୁ ଆନାନ୍‌ । 18 ହେ ଦିନା ମିସର୍‌ ଦେସ୍ ବିତ୍ରେ ପାଞ୍ଚ୍‌ ଗାଡ଼୍‌ କିଣାନ୍‌ନିୟାର୍ ବେଣ୍‌ବାଟ୍‌ନିକାର୍ ଆନାର୍‌ ଆରି ମେଲ୍ୟାଦିକାରି ନିତ୍ରେମାପ୍ରୁତି ତର୍‌ଦ ପାର୍ମାଣ୍ କିନାର୍, ର ଗାଡ଼୍ ନାସ୍‌ନି ଗାଡ଼୍ ଇଞ୍ଜି ଡାକ୍‌ପୁଟା ଆନାତ୍‌ । 19 ହେ ଦିନା ମିସର୍‌ ଦେସ୍‌ତ ମାଦି ବାହାତ ନିତ୍ରେମାପ୍ରୁ ଇସାପ୍ରେ ର ପୁଜାଗାର୍‌ଣି ଆନାତ୍‌ ଆରି ହେବେନି ହାନ୍ଦି ଲାଗାଂ ନିତ୍ରେମାପ୍ରୁ ଇସାପ୍ରେ ର କାମ୍‌ ରଚ୍‌ଚାର୍‌ । 20 ଆରେ, ହେଦାଂ ମିସର୍‌ ଦେସ୍‌ତ ଆଦିକାରିୟା ନିତ୍ରେମାପ୍ରୁତି ଚିନ୍‌ ଆରି ସାକି ଲାକେ ଆନାତ୍‌; ଇନାକିଦେଂକି ହେୱାର୍‌ ୱିଜ଼ାକାର୍‌ କାଜିଂ ନିତ୍ରେମାପ୍ରୁତି ତର୍‌ ଆଡ଼୍‌ବାନାର୍‌, ତାପାଚେ ହେୱାନ୍‌ ରୱାନ୍‌ ରାକ୍ୟା କାରିୟା ଆରି ସାଇଜ କାରିୟାଂ ପକ୍‌ନାନ୍‌ ଆରି ହେୱାନ୍‌ ହେୱାରିଂ ମୁକ୍‌ଡ଼ାୟ୍‌ କିଦ୍‌ନାନ୍‌ । 21 ଆରେ, ମିସର୍‌ତିଂ ନିତ୍ରେମପ୍ରୁତି ଜାଣାଚିଣା ହିୟାନାତ୍‌ ଆରି ହେ ଦିନା ମିସର୍‌ ନିକାର୍‌ ନିତ୍ରେମାପ୍ରୁଙ୍ଗ୍ ପୁନାର୍‌; ଆରେ ହେୱାର୍‌ ପୁଜା ହିଜ଼ି କେର୍‌ନାର୍‌ ଆରି ନିତ୍ରେମାପ୍ରୁ ଲାଗାଂ ମାନ୍‌ସିଂ କିଜ଼ି ହେଦାଂ ପୁରା କିନାର୍‌ । 22 ଆରେ, ନିତ୍ରେମାପ୍ରୁ ମିସର୍‌ତିଂ ଟ୍ରାକ୍‌ନାନ୍, ଟ୍ରାକ୍‌ନାନ୍ ଆରି ଉଜ୍ କିନାନ୍; ଆରେ ହେୱାର୍ ନିତ୍ରେମାପ୍ରୁତି ଲାଗେ ମାସ୍‌ଦି ୱାନାର୍, ହେବେ ହେୱାନ୍ ହେୱାରିଂ ଗୱାରି ମାନିକିଜ଼଼ି ହେୱାରିଂ ଉଜ୍ କିନାନ୍ । 23 ହେ ଦିନା ମିସର୍‌ତାଂ ଅସୁରତ ର ଗାଜାହାଡ଼କ୍‌ ଆନାତ୍‌, ତାପାଚେ ଅସୁରିୟାର୍‌ ମିସର୍‌ତ ଆରି ମିସରିୟାର୍‌ ଅସୁରିୟାତ ଜାଆସ୍‌ ଆତାର୍‌; ଆରେ ମିସରିୟାର୍‌ ଅସୁରିୟାର୍‌ତି ଲାହାଂ କେର୍‌ନାର୍‌ । 24 ହେ ଦିନା ଇସ୍ରାଏଲ୍‌, ମିସର୍‌ ଆରି ଆସୁର୍‌ ଲାହାଂ ତିନି ଦେସ୍ ପୁର୍ତିନି ବିତ୍ରେ ଆର୍ସିବାଦ୍‌ ପାୟାନାର୍‌ । 25 ଇନାକିଦେଂକି ଆଦିକାରିୟା ନିତ୍ରେମାପ୍ରୁ ହେୱାରିଂ ଆର୍ସିବାଦ୍‌ କିତାନ୍‌ନା, "ମା ଲକୁ ମିସର୍‌ତ, ମା କେଇ କିତି କାମାୟ୍‌ ଆସୁର୍‌ ଆରି ମା ଆଦିକାର୍‌ ଇସ୍ରାଏଲ୍‌ ଆସିର୍‌ବାଦ୍‌ ଆଏର୍‌ ।"