ଜିସାଇୟ 39

ବାବିଲ୍‌ନି କାବୁର୍ ହିନାକାନ୍‌

1 ହେ ସମୁତ ବଲ୍‌ଦନ୍‌ତି ମେହି ବାବିଲ୍‌ ରାଜା ମରଦକ୍‌ ବଲ୍‌ଦନ୍‌ ହିଜକିୟ ଲାଗାଂ ଆକିଂ ଆରି କେଚ୍‌କଣ୍‌ନିକା ପକ୍‌ତାନ୍‌; ଇନାକିଦେଂକି ହେୱାନ୍‌ ବେମାର୍‌ ଆତିଲେ ଆରି ଉଜ୍‌ ଆଦେଂ କାବୁର୍‌ ହେୱାନ୍‌ ୱେନ୍‌ଞ୍ଜି ମାଚାନ୍‌ । 2 ହେବେ ହିଜକିୟ ହେୱାର୍‌ କାଜିଂ ସାରି ଆଜ଼଼ି ଜାର୍‌ତି ବେସିଦାମ୍‌ନି ଜିନିସ୍‌ ଇଲ୍‌, ରୁପା, ହନା, ବାସ୍‌ନା ଜିନିସ୍‌, ବେସିଦାମ୍‌ନି ଚିକାଣ୍‌ ଆରି ଜାର୍‌ ଆତ୍‌ଆତ୍ୟାର୍‌ ଆରି ତା ଟୁଣ୍ଡିନି ସବୁ ଜିନିସ୍‌ ହେୱାରିଂ ଚଚ୍‌ଚାନ୍‌; ହିଜକିୟ ଇନାକା ହେୱାରିଂ ଚଚ୍‌ୱାତାନ୍‌, ଇଲାକେ ଇମ୍‌ଣି ଜିନିସ୍‌ ତା ଇଞ୍ଜ କି ତା ସବୁ ରାଜିତ ହିଲ୍‌ୱାତାତ୍‌ । 3 ହେପଦ୍‌ନା ଜିସାଇୟ ବେଣ୍‌ବାକ୍‌ଣାୟ୍‌କିନାକାନ୍‌ ହିଜକିୟ ରାଜା ଲାଗାଂ ୱାଜ଼଼ି ତାଂ ଇଚାନ୍‌, "ଇ ମାନାୟାର୍‌ ଇନାକା ଇଚାର୍‌ ? ହେୱାର୍‌ ଇମେତାଂ ମି ତାକେ ୱାତାର୍‌ ?" ତାପାଚେ ହିଜକିୟ ଇଚାନ୍‌, "ହେୱାର୍‌ ଦେହା ଦେସ୍‌ନି ବାବିଲନ୍‌ତାଂ ନା ଲାଗାଂ ୱାତାର୍‌ନା ।" 4 ଇଦାଂପାଚେ ହେୱାନ୍‌ ୱେନ୍‌ବାତାନ୍‌, "ହେୱାର୍‌ ମିଞ୍ଜ ଇନାକା ହୁଡ଼ୁତାର୍‌ନା ?" ତାପାଚେ ହିଜକିୟ ଇଚାନ୍‌, "ନା ଇଞ୍ଜ ଇନା ଇନାକା ମାନାତ୍‌, ସବୁ ହେୱାର୍‌ ହୁଡ଼୍‌ତାର୍‌ନା; ଇନାକା ଆନ୍‌ ହେୱାରିଂ ଚଚ୍‌ୱାତାଂନା, ଇଲାକେ ଇନାକାପା ଜିନିସ୍‌ ନା କଟି ଇଞ୍ଜ ହିଲୁତ୍‌ ।" 5 ଇଦାଂପାଚେ ଜିସାଇୟ ହିଜକିୟଙ୍ଗ୍‌ ଇଚାନ୍‌, "ମେଲ୍ୟାଆଦିକାର୍‌ ନିତ୍ରେମାପ୍ରୁ ବଚନ୍‌ ୱେନାଟ୍‌ । 6 ହୁଡ଼ାଟ୍‌, ମି ଇଞ୍ଜମାନି ସବୁ ଜିନିସ୍‌ ଆରି ନେଞ୍ଜେଙ୍ଗ୍‌ ପାତେକ୍‌ ମି ଆକର୍‌ ରୁଣ୍ଡାଇକିତି ସବୁ ଜିନିସ୍‌ ବାବିଲ୍‌ତ ଅନିକାଜିଂ ସମୁ ୱାନାତା; ନିତ୍ରେମାପ୍ରୁ ଇଚାନ୍ନା, ଇନାକା ପିହ୍‌ୟା ଆଉତ୍‌ । 7 ଆରେ, ମି ମାଜ଼଼ିର୍‌ ବିତ୍ରେ ଇମ୍‌ଣାକାର୍‌ ମି ନେତେର୍‌ତାଂ ଉବ୍‌ଜାତାକାର୍‌ ଆରି ମିତାକେଣ୍ଡାଂ ଉବ୍‌ନାର୍‌, ହେୱାରିଂ ହେୱାର୍‌ ଅସିହାନାର୍‌ ଆରି ହେୱାର୍‌ ବାବିଲ୍‌ ରାଜାନି ରାଜାର୍ ଇଞ୍ଜ ବେଜୁ ଆଜ଼଼ି ମାନାର୍‌ ।" 8 ହେକାଡ଼୍‌ଦ ହିଜକିୟ ଜିସାଇୟତିଂ ଇଚାନ୍‌, "ଏନେଙ୍ଗ୍‌ ନିତ୍ରେମାପ୍ରୁତି ଇମ୍‌ଣି ବଚନ୍‌ ଇଚାୟ୍‌ନା, ହେଦାଂ ହାର୍‌ଦାକା ।" ହେୱାନ୍‌ ଆରେ ଇଚାନ୍‌, "ଇନାକିଦେଂକି ନା ସମୁତ ସୁସ୍ତା ଆରି ହାତ୍‌ପାନିକା ଏକାନାତ୍‌ ।"