ଜିସାଇୟ 22

ଜିରୁସାଲମ୍‌ କାଜିଂ ବେଣ୍‌ବାକ୍‌ଣାୟ୍‌କିନାକା

1 ଜିରୁସାଲମ୍ ବିସ୍ରେନି ବେଣ୍‌ବାକ୍‌ଣାୟ୍‌କିନାକା । ନଙ୍ଗ୍‌ ମିତାଂ ଇନାକା ଆନାତା ଜେ, ଏପେଙ୍ଗ୍‌ ୱିଜ଼ାଦେର୍‌ ଇଲ୍‌ନି ଜେଗନ୍ ଜପି ହାନାଦେର୍‌ନା ? 2 ଏ ୱାରିନି ଗାର୍‌ଜେନ୍‌ ପୁରା, କିରଇନି ଗାଡ଼୍‌, ୱାରିତିଂ ପୁରାକିନାକାୟ୍‌; ମି ବୁଡାତି ମାନାୟ୍‌ କାଣ୍ଡାତ ବୁଡାଆୱାତାର୍‌ନା, କି ହେୱାର୍‌ ଜୁଜ୍‌ତ ହାୱାତାର୍‌ନା । 3 ମି ସାସନ୍‌କାରିୟା ୱିଜ଼଼ାଦେର୍‌ ରଞ୍ଜେମାଟ୍‌ ହାଚାର୍‌, ହେୱାର୍‌ ୱିଲ୍‌କୁ ଆସ୍ତାକାର୍‌ କାଜିଂ ଗାଚ୍ୟାତାର୍‌; ମି ବିତ୍ରେ ପାୟାତି ୱିଜ଼଼ାର୍‌ ମାନାୟ୍‌ ରଞ୍ଜେମାଟ୍‌ ଗାଚ୍ୟାତାର୍‌, ହେୱାର୍‌ ଦେହା ହନ୍ତାର୍‌ । 4 ଇଦାଂକାଜିଂ ଆନ୍‌ ଇନ୍‌ଚାଙ୍ଗ୍‌, ନାଙ୍ଗେଙ୍ଗ୍‌ ପିସ୍ତି ବିନ୍‌ ନିପ ହୁଡ଼ାଟ୍‌, ଆନ୍‌ ବେସି ରାଗାଂ ଆଡ଼୍‌ବାନାଂ; ନା କୁଟୁମ୍‌ନି ଗାଡ଼୍‌ଚେତି ନାସ୍‌ ଆନି ବିସ୍ରେ ନାଙ୍ଗେଙ୍ଗ୍‌ ଦୁକ୍‌ସାରାୟ୍‌ କିନି କାଜିଂ ଚେସ୍ଟା କିମାଟ୍‌ । 5 ଇନାକିଦେଂକି କ୍ଡେଚ୍‌କଣ୍‌ ଡେଙ୍ଗା ମାପ୍ରୁତି, ଆଦିକାରି ନିତ୍ରେମାପ୍ରୁ ପକ୍ୟାଜ଼଼ି ଜିତାନି, ୱିସ୍ପାନାକା, ତାନ୍ଦ୍ରାତାଂ ଡାଣ୍ଡ୍‌କାତି ଡ୍ରିଙ୍ଗ୍‌ଦେଂ ଆରି ମାଡ଼ିଙ୍ଗ୍‌ ଆଡ଼ବିନି ଦିନ୍‌ ଇଦାଂ । 6 ଆରେ, ଏଲମ୍‌ ଗଡ଼଼ାଗାଡିଦୁମ୍‌ତାକାର୍, ମାନାୟାର୍‌ ଗଡ଼ାଦୁମ୍‌ତାର୍‌ ମେଲ୍ୟାର୍‌ ଲାହାଙ୍ଗ୍‌ ୱିଲ୍‌ ଆରି ଆମ୍‌କୁ ଏଚ୍‌କାତାର୍‌ ଆରି ଆଡାନାକା ମେଲା କିତାନ୍‌ । 7 ଆରେ, ମି ବେସି ଜିହୁଦାନି ନେକ୍ରିଜମି ମାଡିମାଜାୟ୍ ସବୁ ହାଗାଡ଼ିକାଂ ପୁରାନିକା ମାଚାତ୍‌ ଆରି ଗଡ଼ାଆସ୍ତାକାର୍‌ ଜିରୁସାଲମ୍‌ ଦୁୱାର୍‌ତ ଜାଗ୍ରତ ଆଜ଼଼ି ମାଚାର୍‌ । 8 ଆରେ, ନିତ୍ରେମାପ୍ରୁ ହେ ଜିହୁଦାନି ରାକ୍ୟାକିନି ହାଜ଼଼ିତିଂଡାବାୟ୍‌ କିତି ହେନ୍ଦ୍ରା ଜେସି ତୁଇତାର୍‌ ଆରି ହେ ଦିନ୍‌ ଏପେଙ୍ଗ୍‌ ରାନ୍‌ଇଲ୍‌ନି ଜୁଜ୍‌ଆତ୍ୟାର୍ ତାକେ ହୁଡ଼୍‌ତାନ୍‌ । 9 ଆରେ, ଦାଉଦ୍‌ଗାଡ଼୍‌‍ ଡ୍ରିଙ୍ଗ୍‌ତି ବାହା ବେସି ଇଞ୍ଜି ଏପେଙ୍ଗ୍‌ ହୁଡ଼୍‌ତାଦେର୍‌ ଆରି ତାରେନ୍‌ନି ବାନ୍ଦ୍‌ ଏଜ଼଼ୁଙ୍ଗ୍‌ ସବୁ ରବେ କିତାୟ୍‌ । 10 ଆରେ, ଏପେଙ୍ଗ୍‌ ଜିରୁସାଲମ୍‌ନି ଇଲ୍‌ସବୁ ଗାଣା କିତାଦେର୍‌ ଆରି ଡାଣ୍ଡ୍‌କାତି ଦେହା କିନି କାଜିଂ ଇଲ୍‌ ସବୁ ଡ୍ରିକ୍‌ତାୟ୍‌ । 11 ଏପେଙ୍ଗ୍‌ ପା ପ୍ଡାନି ବାନ୍ଦ୍‌ନି ଏଜ଼ୁଙ୍ଗ୍‌ କାଜିଂ ରି ଡାଣ୍ଡ୍‌କାତି ପା ବାହାତ ର ଏଜ଼ୁଙ୍ଗ୍‌ ଜାଲ୍‌ଦି କିତାର୍‌; ମାତର୍‌ ଜେ ଇଦାଂ ସାଦୁନ୍‌ କିତାନ୍‌, ଏପେଙ୍ଗ୍‌ ତା କାଜିଂ ହୁଡ଼୍‌ଦାୱାତାଦେର୍‌, କି ଜେ ଆଗେକାଡ଼୍‌ଦ ଜଜନା ଇଚାନ୍‌, ଏପେଙ୍ଗ୍ ତାଙ୍ଗେଙ୍ଗ୍‌ ମାନି କିୱାତାଦେର୍‌ । 12 ଆରେ, ହେ ଦିନା ମାପ୍ରୁ, ଆଦିକାରି ନିତ୍ରେମାପ୍ରୁ ଆଡ଼୍‌ବାତାନ୍‌ ଆରି କାନ୍ଦାଣ୍‌ ଆରି କାପ୍ଡା ଟଡ଼୍‌ଡି ଜୱାର୍‌ କିଜ଼ି ଆରି ମ୍ଡେଙ୍ଗାଙ୍ଗ୍ ବାସ୍ତା ଉସ୍‌ପେଦେଂ କାଜିଂ କୁକ୍‌ତାର୍‌; 13 ମାତର୍‌ ହୁଡ଼ାଟ୍‌, ୱାରିତାଂ ବୁଲାଜ଼଼ି, କଡି ଆରି ଅଡା, ଜେଇ ତିନ୍‌ଞ୍ଜି ଆରି ଅଙ୍ଗୁର୍‌ରାସ୍‌ ଉଣାସ୍‌; ୱାଡ, ଆସେଙ୍ଗ୍‌ ତିନାସ୍‌ ଉଣାସ୍‌, ଇନାକିଦେଂକି ୱିଗାଲିଂ ଆସେଙ୍ଗ୍‌ ହାନାସ୍‌ । 14 ଆରେ, ୱିଜ଼଼ୁତିଂସାକ୍ତିକାଟି ନିତ୍ରେମାପ୍ରୁ ହାୱାକାନ୍‌ ମା କିତୁଲ୍‌ତ ୱେଚ୍‌ଚା ତାନ୍‌ନା, ନିଜେ ମି ହାକି କାଡ଼୍‌ ପାତେକ୍‌ ମିଦାଂ ଇ ପାପ୍‌ କିତାକା କେମା ଆଉତ୍‌, ମାପ୍ରୁ ୱିଜ଼଼ୁତିଂସାକ୍ତିକାଟି ନିତ୍ରେମାପ୍ରୁ ଇଲାକେ ଇନ୍‌ଚାନ୍‌ନା । 15 ୱିଜ଼଼ୁତିଂସାକ୍ତିକାଟି ନିତ୍ରେମାପ୍ରୁ ଇ କାତା ଇଞ୍ଜ୍‌ନାନ୍‌, ଏପେଙ୍ଗ୍‌ ଇ ଗୁମୁସ୍ତା ଲାଗାଂ, ଇଚିସ୍‌, ଇଲ୍‌ନି ମୁଡ଼୍‌ଦାକାନ୍‌ ସିବନ୍‌ ଲାଗାଂ ହାଲ୍‌ଜି ଇନାଟ୍‌, 16 ଏପେଙ୍ଗ୍‌ ଇବେ ଇନାକା କିନାଦେରା ? ଆରି ଇବେ ଇନେର୍‌ ମାନାର୍‌ ଜେ, ଏପେଙ୍ଗ୍‌ ଜାର୍‌ କାଜିଂ ର ଦୁଗେର୍‌ କାର୍‌ନାଦେରା ? ହେୱାନ୍‌ ତ ଜପ୍‌ଣି ବାହାତ ତା ଦୁଗେର୍‌ ବାହା କାର୍‌ତାନ୍‌ନା ଆରି କାଲ୍‌ଦ ଜାର୍‌ କାଜିଂ ବାହା କାର୍‌ନାୟା । 17 ହୁଡ଼଼ାଟ୍, ବିରତି ନିୟାଇନି ନିତ୍ରେମାପ୍ରୁ ବାଡ଼୍‌କାସ୍ତାଂ ମିଙ୍ଗେଙ୍ଗ୍‌ ତୁହିହିଦ୍‌ନାନ୍‌, ଆଁ, ହେୱାନ୍‌ ଡ଼଼ାଟ୍ ବାବ୍ରେ ମିଙ୍ଗେଙ୍ଗ୍‌ ଆସ୍ତି ତୁହିଦ୍‌ନାର୍‌ । 18 ହାତ୍‌ପାତ ହେୱାନ୍‌ ବଲ୍‌ ଲାକେ ମିଙ୍ଗେଙ୍ଗ୍‌ ବୁଲାଇକିଜ଼ି ଆରି କିନ୍ଦ୍‌ରାଇ କିଜ଼ି ର ଗାଜା ଦେସ୍ତ ତୁହିଦ୍ନାନ୍‌; ହେବେ ଏପେଙ୍ଗ୍‌ ହାନାଦେର୍‌ ଆରି ହେବେ ମିଦାଂ ଜାଜ୍‌ମାଲ୍‌ ଲାକେ ଗଡ଼଼ାଗାଡ଼ିଂ ମାନ୍‌ଗିନିଂ, ଏପ୍‌ ଜାର୍‌ ମାପ୍ରୁ ଇଲ୍‌ନି ପ୍ରାଲ୍‌ ଲାକେ ଆନାଦେର୍‌ । 19 ଆରେ, ଆପ୍‌ ମିଙ୍ଗ୍‌ ମି ପାଦ୍‌ତାଂ ଆରି ହେୱାନ୍‌ ମିଙ୍ଗେଙ୍ଗ୍‌ ମି ବାହାତାଂ ଜାଲ୍‌ଜି ତାସି ତାରେନ୍‌ ରାତ୍‌ତାନାନ୍‌ । 20 ଆରେ, ହେ ଦିନା ଆପେଙ୍ଗ୍‌ ଜାର୍‌ ଆଡ଼ିଏନିଂ, ହିଲ୍‌କିୟତି ମେହି ଇଲିୟାକିମ୍‌ତିଂ କୁକ୍‌ନାସ୍‌; 21 ଆରେ, ଆପ୍ ମି ହେନ୍ଦ୍ରା ତାଙ୍ଗେଙ୍ଗ୍‌ ଉସ୍‌ପି କିନାସ୍‌ ଆରି ମି ମ୍ଡେଗାଂଗାଚ୍‌ନାକା ତାଙ୍ଗେଙ୍ଗ୍‌ ବାଡ଼୍‌କାସ୍‌ କିନାସ୍‌ ଆରି ମି କିତିଆଦିକାର୍‌ ତା କେଇଦ ହେଲାୟ୍‌ କିନାସ୍‌; ତାପାଚେ ହେୱାନ୍‌ ଜିରୁସାଲମ୍‌ତ ବାହାକିତାକାରିଂ ଆରି ଜିହୁଦା ଲାତ୍ରାନି ବାୱା ଆନାନ୍‌ । 22 ଆରେ, ଆପ୍‌ ଦାଉଦ୍‌ଲାତ୍ରାନି କୁଚି ତା ନିପିତ ଇଟ୍‌ନାପ୍‌, ହେୱାନ୍‌ ଜେତିସ୍‌, ଇନେନ୍‌ ବନ୍ଦ୍‌ କିଦେଂ ଆଡୁର୍‌ ଆରି ହେୱାନ୍‌ ବନ୍ଦ୍‌ କିତିସ୍‌, ଇନେର୍‌ ଜେତେଙ୍ଗ୍‌ ଆଡୁର୍‌ । 23 ଆରେ, ଆପ୍‌ ଦାଉଦତି ର କୁଟି ଲାକେ ର ଦେହା ବାହାତ ତାଙ୍ଗେଙ୍ଗ୍‌ ବିଦ୍‌ଡ଼୍‌ କିନାସ୍‌ ଆରି ହେୱାନ୍‌ ଜାର୍‌ ଆବା ଲାତ୍ରାନି ଗାଜା ଜାଜ୍‌ମାଲ୍‌ ଗାଦି ଲାକେ ଆନାନ୍‌ । 24 ଆରେ, ମାନାୟାର୍‌ ତା ଆବା ଲାତ୍ରାନି ହମାନ୍‌ ଗାଜା ଜାଜ୍‌ମାଲ୍‌, ହିମ୍‌ଣାୱାକ୍‌ଡ଼ା ଆରି ଉଣିବାହାତାଂ କଲ୍‌ସି ପାତେକ୍‌ ସବୁନି ହିରୁଟି ବାହା ତା ଜପି ଡ଼଼ଇକିନାନ୍‌ । 25 ୱିଜ଼଼େତିଂସାକ୍ତିକାଟି ନିତ୍ରେମାପ୍ରୁ ଇଞ୍ଜ୍‌ନାନ୍‌, "ଇମ୍‌ଣି କୁଟି ହାର୍‌ ବାହାତ ଚିଟି ମାଚାତ୍‌, ହେଦାଂ ହେ ଦିନା ୱିସ୍‌ଦି ହାନାତ୍‌ ଆରି ହେଦାଂ କାର୍‌ୟାଜ଼଼ି ତାରେନ୍‌ ଆର୍‌ନାତ୍‌, ଆରି ହେଦାଂ ଜପି ମାନାକା ବଜ୍‌ ନସ୍ଟ ଆନାତ୍‌, ଇନାକିଦେଂକି ନିତ୍ରେମାପ୍ରୁ ଇଦାଂ ଇନ୍‌ଚାନ୍‌ନା ।"