1 ମାତର୍‌ ଏ ଜାକୁବ୍‌, ଇନେନ୍‌ ନିଙ୍ଗେଙ୍ଗ୍‌ ଉବ୍‌ଜାୟ୍‌ କିତ୍‌ତାନ୍‌, ଏ ଇସ୍ରାଏଲ୍‌, ଇନେନ୍‌ ନିଂଙ୍ଗେଙ୍ଗ୍‌ ରଚ୍‌ଚାତାନ୍‌, ହେ ନିତ୍ରେମାପ୍ରୁ ନଙ୍ଗ୍‌ ଇ କାତା ଇଞ୍ଜ୍‌ନାନ୍‌; ପାଣ୍ଡ୍ରାଆମା, ଇନାକିଦେଂକି ଆପେଙ୍ଗ୍‌ ମିଙ୍ଗେଙ୍ଗ୍‌ ମୁକ୍‌ଡ଼ାୟ୍‌ କିତ୍‌ତାପ୍‌ନା; ଆପ୍‌ ମି ତର୍‌ ଆସ୍ତି ମିଙ୍ଗେଙ୍ଗ୍‌ କୁକ୍‌ତାତାପ୍‌ନା, ଏପ୍‌ ମାୱାଦେର୍‌ । 2 ଏପ୍‌ ନାଗୁଡ଼୍‌ ନାସି ହାନିହିଂ ଆପ୍‌ ମି ସାଙ୍ଗ୍‌ ଆଦ୍‌ନାପ୍‌ ନାଗୁଡ଼୍‌ତିଂ ହାନିହିଂ, ହେ ସବୁ ମିଙ୍ଗେଙ୍ଗ୍‌ ୱାହି କିଦୁପ୍‌; ଏପ୍‌ ନାଣିତିଂ ହାନିହିଂ କାଡ୍ୟାଆଉଦେର୍‌, କି ନାଣିଗଡିଂ ମିଙ୍ଗେଙ୍ଗ୍‌ କେଦ୍‌ଦୁତ୍‌ । 3 ଇନାକିଦେଂକି ଆପ୍‌ ନିତ୍ରେମାପ୍ରୁ, ମି ପର୍‌ମେସ୍ୱର୍‌, ଇସ୍ରାଏଲ୍‌ନି ପୁଇପୁୟା ଇସ୍ୱର୍‌ ଦାର୍‌ମିଲାକେ, ମି ରାକ୍ୟାକାରିୟା ଆନାନ୍‌; ଆପ୍‌ ମି ମୁକ୍ତିନି ମଲ୍‌ଲାକେ ମିସର୍‌ ଆରି ମି କୁଟୁମ୍‌ କୁସ୍‌ ଆରି ସବା ଦେସ୍‌ ହିତ୍‌ତାପ୍‌ନା । 4 ଏପ୍‌ ମା କାଣ୍‌କୁତାଂ ବେସି ଦାମ୍‌ ଆରି ମାଜାନ୍‌ ଆତାଦେର୍‌ନା ଆରେ ଆପ୍‌ ମିଙ୍ଗେଙ୍ଗ୍‌ ଜିଉନଦ୍‌ନାପା; ଇଲାକେ ଆପ୍ ମିଙ୍ଗେଙ୍ଗ୍‌ ମାନ୍‌ବାଦ୍‌ଲାତି ମାନାୟ୍‌ତିଂ ଆରି ମି ପାରାଣ୍‌ ବାଦୁଲ୍‌ତ ଗସ୍ଟିତିଂ ହିନାପ୍‌ । 5 ପାଣ୍ଡ୍ରାମାଟ୍‌; ଇନାକିଦେଂକି ଆପ୍‌ ମି ଲାହାଙ୍ଗ୍‌ ମାନାପ୍‌; ଆପ୍‌ ୱେଡ଼ାହତ୍‌ନି ଦିଗ୍‌ତ ମି ଲାତ୍ରାତିଂ ତାହିୱାନାପ୍‌ ଆରି ୱେଡ଼ାହାନି ଦିଗ୍‌ତାଂ ମିଙ୍ଗେଙ୍ଗ୍‌ ରୁଣ୍ଡାୟ୍‌ କିଦ୍‌ନାପ୍‌; 6 ଆପ୍‌ ଦିଗ୍‌ତିଂ ଇନାପ୍‌, ପିସ୍ତି ହିୟାଟ୍‌ ଆରି ଦିଗ୍‌ନି ଦିଗ୍‌ତ ଇନାସ୍‌, ଟେବାୟ୍‌ କିଜ଼ି ଇଟ୍‌ମାଟ୍‌; ମା ମାଜ଼଼ିରିଂ ଦେହାତାଂ ଆରି ମା ଗାଚ୍‌କୁକାଂ ପୁର୍ତିନି ସେସ୍‌ବାଗ୍‌ତାଂ ତାହି ୱାଡ; 7 ମା ତର୍‌ଦ ଡାକ୍‌ପୁଟା ଆରି ଇନେରିଂ ଆପ୍‌ ଜାର୍‌ ଜାଜ୍‌ମାଲ୍‌ତାଂ ଉବ୍‌ଜାୟ୍‌ କିତାପ୍‌ନା, ଇଲାକେ ଜାଣ୍‌କେତିଂ ତାହିୱାଡ; ଆପ୍‌ ତାଙ୍ଗେଙ୍ଗ୍‌ ମେହାୟ୍‌ କିତାପ୍‌ନା; ଆଁ, ଆପ୍‌ ତାଙ୍ଗେଙ୍ଗ୍‌ ରଚ୍‌ଚାପ୍‌ନା ।

8 କାଣ୍‌କୁ ମାନ୍‌ଞ୍ଜି କାଣା ଆରି କିତୁଲ୍‌ ମାନ୍‌ଞ୍ଜି ବୈରା, ଇ ମାନାୟ୍‌ତିଂ ହପ୍‌ଚି ତାହିୱାଡ । 9 ସବୁଦେସ୍ତାକାର୍‌ ମେହାଣ୍‌ ଆୟେର୍‌ ଆରି କୁଟୁମ୍‌ ସବୁ ରବେ ଆୟେର୍‌; ହେୱାର୍‌ ବିତ୍ରେ ଇନେନ୍‌ ହେଦାଂ ହପ୍‌ତେଙ୍ଗ୍‌ ଆଡ଼୍‌ନାନ୍‌ ଆରି ଆଗେନି ବିସ୍ରେନିକା ମାଙ୍ଗେଙ୍ଗ୍‌ ଚଚ୍‌ଚେଦେଂ ଆଡ୍‌ନାୟ୍‌ ? ହେୱାର୍‌ ଦସ୍‌ହିଲ୍‌ୱାକାର୍‌ ଆନି କାଜିଂ ଜାର୍‌ ଜାର୍‌ ସାକିରିଂ ତାହିୱାଏର୍‌; ଇଚିସ୍‌ ହେୱାର୍‌ ୱେନ୍‌ଜି ଇଦାଂ ହାତ୍‌ପା ଇଞ୍ଜି ଇନେର୍‌ । 10 "ନିତ୍ରେମାପ୍ରୁ ଇନାନ୍‌, ଏପେଙ୍ଗ୍‌ ଇନେସ୍‌କି ପୁନ୍‌ଞ୍ଜି ମା ତାକେ ପାର୍ତି କିନାଦେର୍‌ ଆରି ଆପ୍‌ ହେୱାପ୍‌ ଆନାପ୍‌ ଇଞ୍ଜି ବୁଜାନାଦେର୍‌, ଇଦାଂ କାଜିଂ ଏପେଙ୍ଗ୍‌ ମା ସାକି ଆରି ମା ବାଚିକିୟାତି ଆଡ଼ିଏନ୍‌ ଆନାଦେର୍‌," ମା ଆଗେ ଇନାକାପା ଇସ୍ୱର୍‌ ରଚ୍ୟାଆୱାତାତ୍‌, କି ମା ପାଚେ ଆଉତ୍‌ । 11 "ଆପ୍‌, ଆପ୍‌ ଆଁ ନିତ୍ରେମାପ୍ରୁ ଆନାପ୍‌ ଆରି ମାଙ୍ଗ୍‌ ପିସ୍ତି ଆରେ ରାକ୍ୟା କାରିୟା ହିଲୁର୍‌ । 12 ଆପ୍‌ ହପ୍‌ନାପା, ଆପ୍‌ ମୁକ୍ତି କିତାପ୍‌ନା ଆରି ଆପ୍ ଚଚ୍‌ଚାପ୍‌ନା, ଆରେ ମି ବିତ୍ରେ ଇମ୍‌ଣି ବିନ୍‌ଦେସ୍‌ନି ପେନ୍‌କୁ ହିଲ୍‌ୱିତିଂ; ଇଲାକେ ନିତ୍ରେମାପ୍ରୁ ଇନାନ୍‌, ଏପ୍‌ ସାକି ଆନାଦେର୍‌ ଆରି ଆପ୍‌ ପର୍‌ମେସ୍ୱର୍‌ ଆନାପ୍‌ । 13 ଆଁ, ୱେଡ଼ାନି ଆଗେତାଂ ଆପ୍‌ ହେୱାପ୍‌ ଆନାପ୍‌ ଆରି ମା କେଇଦାଂ ରାକ୍ୟାକାରିୟା ଇନେର୍‌ ହିଲୁର୍‌; ଆସ୍‌ କାମାୟ୍‌ କିନାସ୍‌, ଆରେ ଇନେର୍‌ ହେଦାଂ ଅନ୍ୟାୟ୍‌ କିନାର୍‌ ?"

14 ମି ମୁକ୍ତିକାରିୟା, ଇସ୍ରାଏଲ୍‌ନି ଦାର୍‌ମିଲାକେ ନିତ୍ରେମାପ୍ରୁ ଇ କାତା ଇଞ୍ଜ୍‌ନାନ୍‌, "ଆପ୍‌ ମି କାଜିଂ ବାବିଲ୍‌ତ ଲକ୍‌ ପକ୍ତାତାପ୍‌ନା ଆରି ଆପ୍‌ ହେ ୱିଜ଼଼ାରିଂ ପାଲାରି ଆତି ମାନାୟ୍‌ ଲାକେ ତାହିୱାନାସ୍‌; କଲଦିୟାରିଂ ଆଁ ହେୱାର୍‌ତି ୱାରିତାଂ ଡ଼଼ାତ୍‌ପିସ୍‌ ଡଙ୍ଗାତ ତାହିୱାନାସ୍‌ । 15 ଆପ୍‌ ନିତ୍ରେମାପ୍ରୁ ମି ଦାର୍‌ମିନିକାପ୍‌ ଲାକେ, ଇସ୍ରାଏଲ୍‌ନି ରାକ୍ୟାକାରିୟା, ମି ରାଜା ଆନାପ୍‌ ।" 16 ଇନେର୍‌ ହାମ୍‌ଦୁର୍‌ତ ହାଜ଼଼ି ଆରି ବେସି ଏସ୍‌ରାସିତାଂ ହାଜ଼଼ି ରଚ୍‌ନାର୍‌; 17 ଇନେର୍‌ ଗଡ଼଼ାଗାଡ଼଼ି ଆରି ଗଡ଼ାଙ୍ଗ୍‌, ମେଲ୍ୟାର୍‌ ଆରି ବିରରିଙ୍ଗ୍‌ ହପ୍‌ଚି ତାହିୱାନାର୍‌; ହେୱାର୍‌ ରଞ୍ଜେମାଟ୍‌ ତାରେନ୍‌ ହୁନ୍‌ଞ୍ଜି ଆରେ ନିଙ୍ଗୁର୍‌, ହେୱାର୍‌ ଡ଼ୁଗ୍‌ତି ଆରି ଆହ୍‌ନି ସାଲ୍‌ତା ୱିସ୍ତିବାଡ୍‌ତାନି ନୁଲ୍‌ ଲାକେ ପାଗ୍ୟାନାର୍‌; ହେ ନିତ୍ରେମାପ୍ରୁ ଇ କାତା ଇନାନ୍‌; 18 "ଏପେଙ୍ଗ୍‌ ଆଗେନି ବିସ୍ରେସବୁ ଏତ୍‌ କିଉଦେର୍‌, କି ପ୍ଡାନି ବିତ୍ରେସବୁ ବୁଦିତ ଅଉଦେର୍‌ । 19 ହୁଡ଼ାଟ୍‌, ଆପ୍‌ ର ପୁନି କାମାୟ୍‌ କିନାସ୍‌; ହେଦାଂ ନଂ ଗାଜାନାତ୍‌; ଏପେଙ୍ଗ୍‌ କି ହେଦାଂ ପୁନୁଦେର୍‌ ? ଆରେ, ଆପ୍‌ ବାଟା ବିତ୍ରେ ହାଜ଼଼ି ଆରି ବାଲିବାଟାତ ନାଗୁଡ଼ କିନାସ୍‌ । 20 ବାଡ଼ଦ ପସୁଙ୍ଗ୍‌, ରାମାଣ୍‌ କଲ୍ୟାଙ୍ଗ୍‌ ଆରି ମୁକ୍‌ରି ପଟିଂ ମା ଜାଜ୍‌ମାଲ୍‌ କିନିକ୍‌; ଇନାକିଦେଂକି ଆପ୍‌ ଜାର୍‌ ବାଚିକିତି ମାନାୟ୍‌ତି ଉଣ୍ଡେଙ୍ଗ୍‌ ବାଟା ବିତ୍ରେ ଏଜ଼ୁଙ୍ଗ୍‌ ଆରି ବାଲିବାଟାତ ନାଗୁଡ଼୍ କିଜ଼଼ି ହିନାସ୍‌; 21 ହେ ମାନାୟ୍‌ତିଂ ଆପ୍‌ ଜାର୍‌ ୱାରିକିୟ୍‌କିନାକା ହାନ୍ଦାୟ୍‌ କିନି କାଜିଂ ଉବ୍‌ଜାୟ୍‌ କିତାପ୍‌ନା ।

22 ଆତିସ୍‌ପା ଏ ଜାକୁବ୍‌, ଏନ୍‌ ମା ଲାଗାଂ ପାର୍‌ତାନା କିୱାତାୟ୍‌ନା; ଏ ଇସ୍ରାଏଲ୍‌, ଏନ୍‌ ମା ବିସ୍ରେ ୱାସ୍ତାୟ୍‌ନା । 23 ଏନ୍‌ ଜାର୍‌ କାଟ୍‌ପୁଜାକାଜିଂ ମେଣ୍ଡା ମା ଲାଗାଂ ତାହିୱାୱାତାୟ୍‌; କି ଏନ୍‌ ଜାର୍‌ ପୁଜାକିତାକା ହୁଦାଂ ମାଙ୍ଗ୍‌ ସମାନ୍‌ କିଦ୍‌ୱାତାୟ୍‌ନା । ଆପ୍‌ ପୁଜା କିଜ଼଼ି ମିଙ୍ଗେଙ୍ଗ୍‌ ଆଡ଼ିଏନ୍‌ ଲାକେ କିଦ୍‌ୱାତାପ୍‌ନା; ଦୁପ୍‌ନି କାଜିଂ ମିଙ୍ଗେଙ୍ଗ୍‌ ୱାହି କିଦ୍‌ୱାତାପ୍‌ନା । 24 ଏପ୍‌ ରୁପା ଡାବୁଙ୍ଗ୍‌ ଅଜ଼଼ି ମା କାଜିଂ ବାସ୍‌ନା ଦୁପ୍‌ନି କଡ଼୍‌ୱାତାୟ୍‌ନା, କି ମି ପୁଜାନି କ୍ଡୱାତ ମାଙ୍ଗେଙ୍ଗ୍‌ ପାଞ୍ଜି କିଦ୍‌ୱାତାୟ୍‌ନା; ମାତର୍‌ ଏନ୍‌ ଜାର୍‌ ପାପ୍‌ ହୁଦାଂ ମାଙ୍ଗେଙ୍ଗ୍‌ ଆଡ଼ିଏନ୍‌ ଲାକେ କିତ୍‌ତାଦେର୍‌ନା, ଏନ୍‌ ଜାର୍‌ ବାର୍‌ବିନି ଅଦରମ୍‌ତ ମାଙ୍ଗେଙ୍ଗ୍‌ ୱାହି କିତ୍‌ତାୟ୍‌ନା । 25 ଆପ୍‌, ଆପ୍‌ ନେ ଜାର୍‌ କାଜିଂ ମି ଦର୍‌ମ୍‌ହିଲ୍‌ୱାକାଦିଂ କେମା କିନାପ୍‌ ଆରି ମି ପାପ୍‌ ସବୁ ଆପ୍‌ ଏତ୍‌ କିଉପ୍‌ । 26 ମାଙ୍ଗେଙ୍ଗ୍‌ ଏତୁ କିଇକିଦାଟ୍‌; ଆପ୍‌ ହାରିତିଂ ବିଚାର୍‌ କିନାପ୍‌; ଏପ୍‌ ଦସ୍‌ଆୱାଦାଂ ଆନି କାଜିଂ ଜାର୍‌ କାତା ଇନାଟ୍‌ । 27 ମି ପ୍ରତୁମ୍‌ ଆବା ପାପ୍‌ କିତାନ୍‌ ଆରି ମି ମାଦିଣିନିକାର୍‌ ମା ବେରୁତ ଅନ୍ୟାୟ୍‌ କିତ୍‌ତାର୍‌ନା । 28 ଇଦାଂକାଜିଂ ଆପ୍‌ ପୁଇପୁୟା ବାହାତାଂ ଆଦିକାରିରିଂ ରାଡ଼ା କିନାପ୍‌, ଆପ୍‌ ଜାକୁବ୍‌ ରାଣ୍‌ ଆରି ଇସ୍ରାଏଲ୍‌ତିଂ ନିନ୍ଦାବାହା କିନାଙ୍ଗ୍‌ ।"