1 ନିତ୍ରେମାପ୍ରୁ ଇ କାତା ଇନାନ୍‌, "ଏପେଙ୍ଗ୍‌ ନିୟାୟ୍‌ବିଚାର୍‌ କିୟାଟ୍‌; ଦାରମ୍‌କାରମ୍‌ କିୟାଟ୍‌; ଇନାକିଦେଂକି ମା ମୁକ୍‌ଡ଼ାନାକା ୱାନାତା ଆରି ମା ଦରମ୍‌ ହନାକା ଲାଗେ । 2 ଇମ୍‌ଣି ମାନାୟ୍‌ ଇଦାଂ କିନାନ୍‌ ଆରି ଇମ୍‌ଣି ମାନାୟ୍‌ ମାଜ଼ି ଇଦାଂ ଡାଟ୍‌ ଲାକେ ଚାଲାନାନ୍‌; ଇନେନ୍‌ ଜମ୍‌ନିବାର୍‌ ପାଲି କିଜ଼ି ବିଟାଡ଼୍‌ କିଉନ୍‌ ଆରି ସବୁ ବାନି ବାନ୍ୟାକାମାୟ୍‌ ଜାର୍‌ କେଇତିଂ ମଦାୟ୍‌ କିନାନ୍‌, ହେୱେନ୍‌ ଦନ୍ୟ ।" 3 "ହାତେନେ ନିତ୍ରେମାପ୍ରୁ ଜାର୍‌ ମାନାୟାର୍‌ତାଂ ନାଙ୍ଗ୍‌ ବିନେ କିଦ୍‌ନାନ୍‌," ନିତ୍ରେମାପ୍ରୁତାକେ ମେହାଣ୍‌ ବିଦେସିର୍‌ ଲକୁ ଇନ୍‌ମାଟ୍‌; ନଲେ "ହୁଡ଼ାଟ୍‌ ଆନ୍‌ ରଞ୍ଜାଙ୍ଗ୍‌ ୱାଚ୍‌ଚି ମାର୍‌, ଇଦାଂ ବେଜୁ ଇନ୍‌ମାଟ୍‌ ।" 4 ଇନେକିଦେଂକି, ବେଜୁର୍‌ ବିତ୍ରେ ନିତ୍ରେମାପ୍ରୁ ଇ କାତା ଇନାନ୍‌, "ଇମ୍‌ଣାକାର୍‌ ମା ଜମ୍‌ନିବାର୍‌ ପାଲି କିନାର୍‌ ଆରି ମା ହାର୍ଦି ବିସ୍ରେ ବାଚି କିନାନ୍‌ ଆରି ମା ନିୟମ୍‌ତ ଚାଲାନାର୍‌; 5 ହେୱାରିଂ ଆପ୍‌ ମା ଇଲ୍‌ ବିତ୍ରେ ଆରି ମା କୁୱାଡ଼୍‌ ବିତ୍ରେ ମାଜ଼ି ଗାଡ଼୍‌ ପିସ୍ତି ହଲ୍‌ନି ବାଟା ହାର୍ଦି ଏତ୍‌କିନି ମୁଣ୍ଡା ଆରି ତର୍‌ ହିନାସ୍‌; ଆପ୍‌ ହେୱାରିଂ ୱିଜ଼୍‌ୱିକାଡ଼୍‌ପାତେକ୍‌ ତର୍‌ ହିନାସ୍‌, ହେଦାଂ କାଟା ଆଉତ୍‌ ।" 6 ଆରେ, ଇମ୍‌ଣି ବିଦେସିର୍‌ ନିତ୍ରେମାପ୍ରୁତିଂ ବେଣ୍‌କିନି କାଜିଂ ଆରି ନିତ୍ରେମାପ୍ରୁତି ତର୍‌ତିଂ ଜିଉନନି କାଜିଂ ଆରି ତା ଆଡ଼ିୟା ଆନି କାଜିଂ ନିତ୍ରେମାପ୍ରୁତାକେ ମେହାଣ୍‌ ଆନାନ୍‌, ଇଚିସ୍‌, ଇମ୍‌ଣାକାର୍‌ ଜମ୍‌ନିବାର୍‌ ପାଲି କିଜ଼ି ହେଦାଂ ବିଟାଡ଼୍‌ କିଉର୍‌ ଆରି ମା ନିୟମ୍‌ ମାନି କିନାର୍‌; 7 ହେ ୱିଜ଼ାରିଂ ଆସେଙ୍ଗ୍‌ ଜାର୍‌ ୱାରିନି ମାଡ଼ିତ ତେନାସ୍‌ ଆରି ମା ପାର୍ତାନା ଇଞ୍ଜ ହେୱାରିଂ ୱାରିକିୟ୍‌ କିନାସ୍‌; ହେୱାର୍‌ତି କାଟ୍‌ପୁଜା ଆରି ପାପ୍‌କେମା ପୁଜାସବୁ ମା ପୁଜାଗାର୍‌ଣି ଜପି ଇଟ୍ୟାନାତ୍‌; ଇନେକିଦେଂକି ମା ଇଲ୍‌ ସବୁକୁଟୁମ୍‌ନି ମାନାୟାର୍‌ ପାର୍ତାନା ଇଲ୍‌ ଇଞ୍ଜି ଡାକ୍‌ପୁଟା ଆନାତ୍‌ । 8 ଜେ ଇସ୍ରାଏଲ୍‌ନି ଦେହାହାଚି ମାନାୟାରିଂ ରୁଣ୍ଡାୟ୍‌ କିନାର୍‌, ହେ ମାପ୍ରୁ, ନିତ୍ରେମାପ୍ରୁ ଇନାନ୍‌, "ତା ରୁଣ୍ଡାୟ୍‌କିତି ନିଜର୍‌ ଲକ୍‌ ପିସ୍ତି ଆସେଙ୍ଗ୍‌ ବିନ୍‌ ଲକାରିଂ ତା ଲାଗାଂ ରୁଣ୍ଡାୟ୍‌ କିନାସ୍‌ ।"

9 ଏ ବୁଇଁନି ପସୁଙ୍ଗ୍‌ସବୁ, ଏ ରାନ୍‌ନି ୱିଜ଼ୁ ପସୁ, ଏପେଙ୍ଗ୍‌ ଗୁସ୍ତେଙ୍ଗ୍‌ ୱାଡ । 10 ତା କାନାକାର୍‌ କାଣାର୍‌, ହେୱାର୍‌ ୱିଜ଼ାର୍‌ ଗିଆନ୍‌ ହିଲ୍‌ୱାକାର୍‌; ହେ ୱିଜ଼ାର୍‌ ଗୁଲା ନିକୁଡ଼୍‌, ହେୱାର୍‌ ୱେଇକିଦେଂ ଆଡୁର୍‌; ହେୱାର୍‌ କେଞ୍ଜ୍‌ନାର୍‌, ହୁଞ୍ଜ୍‌ନାକାର୍‌, ଡୁଗ୍‌ଦେଂ ସୁକ୍‌ ପାୟାନାର୍‌ । 11 ଆରେ, ହେ ନିକୁଡ଼ିଂ ଗାଜାପଟ, ହେୱାର୍‌ ଇନାୱାଡ଼ାଙ୍ଗ୍‌ ପାଞ୍ଜୁର୍‌; ଆରେ, ଇୱାର୍‌ ବୁଦିକିନିସାକ୍ତି ହିଲ୍‌ୱି ଗଡ଼଼ିଆ; ହେ ୱିଜ଼ାର୍‌ ଚାର୍‌ବେଣ୍‌ତାଂ ଜାର୍‌ ଜାର୍‌ ଲାବ୍‌ ସେସ୍ଟାତ ଜାର୍‌ ଜାର୍‌ ହାଜ଼ି ନିପ ମାସ୍‌ଦାନାରା । 12 ଜାଣ୍‌କେ ଇନାର୍‌, "ୱାଡ, ଆସେଙ୍ଗ୍‌ ଅଙ୍ଗୁର୍‌ରାସ୍‌ ତେନାସ୍‌ ଆରି ଆସେଙ୍ଗ୍‌ କାଲିଙ୍ଗ୍‌ ଉଣ୍‌ଜି ହଚ୍‌ନାସ୍‌; ଆରେ, ଇନେସ୍‌ ନେଞ୍ଜେଙ୍ଗ୍‌, ହେଲାକେ ୱିଗାପା ଆନାତ୍‌, ହେଦାଂ ବେସି ଗାଜା ଦିନ୍‌ ଆନାତ୍‌ ।"