1 ଇଦାଂପାଚେ ହିଜକିୟ ରାଜା ହେଦାଂ ୱେଚିଲେ, ଜାର୍‌ ହେନ୍ଦ୍ରା କେଚ୍‌ଚି ଆରି ବାସ୍ତା ପର୍‌ଚି ନିତ୍ରେମାପ୍ରୁତି ଇଞ୍ଜ ହାଚାନ୍‌ । 2 ଆରେ, ହେୱାନ୍‌ ରାଜାଇଞ୍ଜିନି ମୁଣିକା ଇଲିୟାକିମ୍‌ତିଂ, ସିବନ୍‌ ଲେକିକିନାକାନିଂ ଆରି ମାପ୍ରୁହେବାକିନି ପାରାଚିନାରିଂ ବାସ୍ତା ପରିକିଜ଼ି ଆମସ୍‌ ମେହି ଜିସାଇୟ ବେଣ୍‌ବାକ୍‌ଣାୟ୍‌କିନାକାନ୍‌ ଲାଗାୟ୍‌ ପକ୍‌ତାନ୍‌ । 3 ହେବେ ହେୱାର୍‌ ହେୱାନିଂ ଇଚାର୍‌, "ହିଜକିୟ ଇଲାକେ ଇଞ୍ଚାନ୍‌ନା, ନେଞ୍ଜେଙ୍ଗ୍‌ନି ଦିନା ବିପଦ୍‌, ଲେତ୍‌ନାକା ଆରି ଅପ୍‌ମାନ୍‌ ଦିନ୍‌: ଇନାକିଦେଂକି ହିମ୍‌ଣାଂ ଗାଟାଆନି ସମୁ ୱାନାତା, ମାତର୍‌ ଗାଟାଆଦେଂ ସାକ୍ତି ହିଲୁତ୍‌ । 4 ଆଜ଼଼ିମାନାତ୍‌, ଜିତି ପର୍‌ମେସ୍ୱର୍‌ତି ଅପ୍‌ମାନ୍‌ କିନି କାଜିଂ ଜାର୍‌ ମାପ୍ରୁ ଅସୁରିୟ ରାଜା କାଜିଂ ହାଚାକାର୍‌ ରବସାକିନି ସବୁ କାତା ନିତ୍ରେମାପ୍ରୁ ମି ପର୍‌ମେସ୍ୱର୍‌ ହେୱାନାନ୍‌, ଆରି ନିତ୍ରେମାପ୍ରୁ ମି ପର୍‌ମେସ୍ୱର୍‌ ଇମ୍‌ଣି କାତା ୱେଚାନ୍‌ନା, ଇଦାଂ କାଜିଂ ଲେତ୍‌ନାନ୍‌; ଇଦାଂକାଜିଂ ଇମ୍‌ଣି ବାକି ମାନାର୍‌, ହେୱାର୍‌ କାଜିଂ ଏପ୍‌ ପାର୍ତାନ୍‌ କିୟାଟ୍‌ ।" 5 ଇଲାକେ ହିଜକିୟ ରାଜାତି ଆଡ଼ିୟାର୍‌ ଜିସାଇୟ ତାକେ ଏକାତାର୍‌ । 6 ହେବେ ଜିସାଇୟ୍‌ ହେୱାରିଂ ଇଚାନ୍‌, "ଏପେଙ୍ଗ୍‌ ଜାର୍‌ ମାପ୍ରୁତିଂ ଇଲାକେ ଇନାଦେର୍‌, ନିତ୍ରେମାପ୍ରୁ ଇନାନ୍‌, ଅସୁରିୟ ରାଜାତି ଆଡ଼ିୟାର୍‌ ମାଙ୍ଗେଙ୍ଗ୍‌ ନିନ୍ଦା କିଦ୍‌ନାକା ଇମ୍‌ଣି କାତା ଏପ୍‌ ୱେଚାଦେର୍‌ନା, ହେବେ ପାଣ୍ଡ୍ରା ଆମାଟ୍‌ । 7 ହୁଡ଼ାଟ୍‌, ଆପ୍‌ ତା ବିତ୍ରେ ର ଜିବୁନ୍‌ ହିନାସ୍‌, ଆରେ ହେୱାନ୍‌ ଇମ୍‌ଣି ମାନାୟ୍‌କାଟ୍‌ ୱେନ୍‌ଞ୍ଜି ଜାର୍‌ ଦେସ୍ତ ମାସ୍‌ଦି ହାନାନ୍‌; ଆରେ, ଆପ୍‌ ତା ନିଜ୍‌ ଦେସ୍‌ତ କାଣ୍ଡା ହୁଦାଂ ତାଙ୍ଗେଙ୍ଗ୍‌ ବୁଡାୟ୍‌ କିନାସ୍‌ ।"

8 ଇଦାଂପାଚେ ଅସୁରିୟ ରାଜା ଲାକିସ୍‌ତାଂ ହାଚାନା ଇଞ୍ଜି ରବସାକି ୱେନ୍‌ଞ୍ଜି ମାସ୍‌ଦି ହାଚାନ୍‌ ଆରି ତାଙ୍ଗେଙ୍ଗ୍‌ ଲିବ୍‌ନା ବେରୁତ ଜୁଜ୍‌ କିନାକା ହୁଡ଼୍‌ତାନ୍‌ । 9 ଆରେ, ଅସୁରିୟ ରାଜା କୁସ୍‌ଦେସ୍‌ନି ତିର୍ହକ ରାଜା ବିସ୍ରେ ଇ କାତା ୱେଚାନ୍‌ ଜେ, ହେୱାନ୍‌ ମି ବିରୁତ୍‌ତ ଜୁଜ୍‌ କିଦେଂ ୱାତାନ୍‌ନା; ଇଦାଂ ୱେନ୍‌ଞ୍ଜି ହେୱାନ୍‌ ହିଜକିୟ ଲାଗାଂ କାବୁର୍ ହିନାକାରିଂ ପକ୍‌ଚି ଇଚାନ୍‌, 10 "ଏପେଙ୍ଗ୍‌ ଜିହୁଦାନି ରାଜା ହିଜକିୟଙ୍ଗ୍‌ ଇ କାତା ଇନାଟ୍‌, ଜିରୁସାଲମ୍‌ ଅସୁରିୟ ରାଜାତି ହିଆ ଆଉତ୍‌, ଇ କାତା ଇଞ୍ଜି ମି ପାର୍ତି ବୁଇଁ ପର୍‌ମେସ୍ୱର୍‌ ମିଙ୍ଗେଙ୍ଗ୍‌ ପଚି କିଦେନ୍‌ ।" 11 ହୁଡ଼ାଟ୍‌, ଅସୁରିୟ ରାଜାର୍‌ ପୁରାପୁରି ରଚେ ବୁଡାୟ୍‌ କିନି କାଜିଂ ସବୁନି ଦେସ୍‌ କାଜିଂ ଇନାକା କିତାନ୍‌ନା, ହେଦାଂ ଏପେଙ୍ଗ୍‌ ୱେଚାଦେର୍‌ନା; ଆରେ, ଏପ୍‌ ଇନାକା ରାକ୍ୟା ପାୟାନାଦେର୍‌ ? 12 ନା ଆବାଲାତ୍ରାର୍‌ ଲକୁ ଇମ୍‌ଣି ଗସନ୍‌, ହାରଣ୍‌, ରେସ୍‌ପ ଦେସ୍‌ନିକାରିଂ ଆରି ତଲଃସର ବାହାନିକାର୍‌ ଏଦନ୍‌ ହିମ୍‌ଣାକାଂ ବୁଡାୟ୍‌ କିତାନ୍‌, ହେୱାର୍‌ତି ପର୍‌ମେସ୍ୱର୍‌ ପେନ୍‌କୁ ଇନାକା ହେୱାରିଂ ମୁକ୍‌ଡ଼ାୟ୍‌ କିତିକ୍‌ ? 13 ହମାତ୍‌ର ରାଜା, ଅର୍ପଦର୍‌ ରାଜା, ସପର୍ବୟିମର୍‌ ଗାଡ଼୍‌ନି, ହେନାର୍‌ ଆରି ଅବ୍‌ବାନି ରାଜା ଇମେହାଚାର୍‌ ?

14 ହେବେଣ୍ଡାଂ ହିଜକିୟ କାବୁର୍‌ହିନାକାର୍ କେଇଦାଂ ଆକି ଅଜ଼଼ି ହେଦାଂ ପଡ଼ି କିତାନ୍‌; ଆରେ, ହିଜକିୟ ନିତ୍ରେମାପ୍ରୁତି ଇଞ୍ଜ ହାଲ୍‌ଜି ନିତ୍ରେମାପ୍ରୁତି ମୁମ୍‌ଦ ହେଦାଂ ଜେସିହିତାନ୍‌ । 15 ଆରେ, ହିଜକିୟ ନିତ୍ରେମାପ୍ରୁତି ଲାଗାଂ ପାର୍ତାନା କିଜ଼ି ଇଚାନ୍‌, 16 "ଏ ମାରାମାନିଦୁତ୍‌ ଜପି କୁଚ୍‌ଚି ମେଲ୍ୟାଆଦିକାର୍‌ନି ନିତ୍ରେମାପ୍ରୁ, ଇସ୍ରାଏଲ୍‌ନି ପର୍‌ମେସ୍ୱର୍‌, ଏନ୍‌, କେବଲ୍‌ ଏନ୍‌ ପୁର୍ତିବିତ ସବୁନି ରାଜିତ ପର୍‌ମେସ୍ୱର୍‌ ଆନାୟ୍‌; ଏନ୍‌ ସାର୍ଗେ ଆରି ପୁର୍ତିତିତିଂ ରଚ୍‌ଚାୟ୍‌ନା । 17 ଏ ନିତ୍ରେମାପ୍ରୁ, ଜାର୍‌ କିତୁଲ୍‌ ଗେଣ୍‌ଞ୍ଜି ୱେନା; ଏ ନିତ୍ରେମାପ୍ରୁ, ଜାର୍‌ କାଣ୍‌କୁ ଜେସି ହୁଡ଼଼ା; ଆରେ, ଜିବୁନ୍‌ମାନି ପର୍‌ମେସ୍ୱର୍‌ତିଂ ଅପ୍‌ମାନ୍‌ କିନି କାଜିଂ ସନ୍‌ହେରିବ୍‌ ଇନାକା ଇଞ୍ଜି ପକ୍‌ତାତାନ୍‌ନା, ହେଦାଂ ସବୁ କାତା ୱେନା । 18 ଏ ନିତ୍ରେମାପ୍ରୁ, ଅସୁରିୟ ରାଜାର୍‌ ସବୁଦେସ୍‌ନି ଲକୁରିଂ, ହେୱାର୍‌ ଦେସ୍‌ତ ଚିର୍‌ବିର୍‌ କିତାର୍‌ନା 19 ଆରି ହେୱାର୍‌ତି ପେନ୍‌କୁକାଂ ନାଣିତ ତୁହିତାନ୍‌, ଇଦାଂ ହାତ୍‌ପା; ଇନାକିଦେଂକି ହେୱାଙ୍ଗ୍‌ ପର୍‌ମେସ୍ୱର୍‌ ଆକାୟ୍‌, ମାନାୟ୍‌ କେଇଦାଂ ରଚ୍‌ଚିକିଂ, ୱେସ୍‌କୁ ଆରି କାଲ୍‌ ମାତର୍‌; ଇଲାକେ ହେୱାକାଂ ବୁଡାୟ୍‌ କିତାନ୍‌ନା । 20 ଲାଗିଂ ନଂ, ଏ ନିତ୍ରେମାପ୍ରୁ, ମା ପର୍‌ମେସ୍ୱର୍‌, ତା କେଇଦାଂ ମାଙ୍ଗେଙ୍ଗ୍‌ ମୁକ୍‌ଡ଼ାୟ୍‌ କିଦା, ହେବେଣ୍ଡାଂ ଏନେଙ୍ଗ୍‌, କେବଲ୍‌ ଏନେଙ୍ଗ୍‌ ଜେ ନିତ୍ରେମାପ୍ରୁତି ଆନାୟ୍‌, ଇଦାଂ ପୁର୍ତିନି ସବୁନିପ୍‌ଣି ରାଜି ପୁଞ୍ଜ୍‌ନାତ୍‌ ।"

21 ଇଦାଂପାଚେ ଆମସ୍‌ତି ମେହି ଜିସାଇୟ ହିଜକିୟ ଲାଗାଂ ୱେଚ୍‌ଚି ପକ୍‌ତାନ୍‌, ନିତ୍ରେମାପ୍ରୁ ଇସ୍ରାଏଲ୍‌ନି ପର୍‌ମେସ୍ୱର୍‌ ଇ କାତା ଇନାନ୍‌, "ଏନ୍‌ ଆସୁର୍‌ ରାଜା ସନ୍‌ହେରିବ୍‌ ବେରୁତ ମା ଲାଗାଂ ପାର୍ତାନା କିତିଲେ, 22 ନିତ୍ରେମାପ୍ରୁ ହେଦାଂ ବିସ୍ରେ ଇ କାତା ଇଚାନ୍‌ ସିୟନ୍‌ନି ଜିପଲି ଆୱିତି ଗାଡ଼୍‌ଚେ ନିଙ୍ଗେଙ୍ଗ୍‌ ଇଣ୍‌ କିତ୍‌ତାତ୍‌ନା ଆରି ନିଙ୍ଗେଙ୍ଗ୍‌ ଗ୍ରେଚ୍‌ଚାତାନ୍‌ନା; ଜିରୁସାଲମ୍‌ନି ଗାଡ଼୍‌ଚେ ମିପ କାପ୍‌ଡ଼ା ଲେପ୍‌ତାତାତ୍‌ନା । 23 ଏନ୍‌ ଇନେରିଂ ଅପ୍‌ମାନ୍‌ ଆରି ନିନ୍ଦା କିତାୟ୍‌ନା ? ଆରି ଏନ୍‌ ଇନେର୍‌ ବେରୁତ ଜାର୍‌ ୱେଇ ଜପି କିତାୟ୍‌ନା ଆରି ଜାର୍‌ କାଣ୍‌କୁ ଜପି ନିକ୍‌ତାୟ୍‌ନା ? ଇସ୍ରାଏଲ୍‌ନି ଦାର୍‌ମିନିକାର୍‌ ବେରୁତ ହେଦାଂ । 24 ଏପ୍‌ ଜାର୍‌ ଆଡ଼ିୟାର୍‌ କାଜିଂ ମାପ୍ରୁତି ଅପମାନ୍‌ କିତାଦେର୍‌ନା ଆରି ଇଚାଦେର୍‌ନା, ଆପ୍‌ ଜାର୍‌ ବେସି ଗଡ଼଼ାଗାଡ଼଼ିତ ମାଡ଼ିନି ଜପି ଲିବାନନ୍‌ତି ଦେସ୍‌ତ ୱାନାପା; ଆରେ, ଆପ୍‌ ହେବେନି ପାନ୍ତି ଏରସ୍‌ ମାର୍‌ ଆରି ହେବେନି ହାର୍ଦି ଦେବଦାରୁ ମାର୍‌ସବୁ କାଦ୍‌ଦି ତୁହିନାସ୍‌; ଆରେ, ଆପ୍‌ ତା ଦେହାନି ପାନ୍ତି ବାହାତ ଆରି ତା ପାଡ଼୍‌ଆସ୍ତି ଜମିନି ରାନ୍ତ ହଣାସ୍‌ । 25 ଆପ୍‌ କାର୍‌ଚି ଏସୁଙ୍ଗ୍‌ ଉଣାପା, ଆରେ ଆପ୍‌ ଜାର୍‌ ପାନାତାରେନ୍‌ ମିସର୍‌ନି ନାଗୁଡ଼୍‌ ସବୁ ୱାଚି କିନାସ୍‌ । 26 ଇନେସ୍‌କିଜ଼ି ଆପ୍‌ ବେସି କାଡ଼୍‌ଦାଂ ଇଦାଂ ରଚ୍‌ଚାପ୍‌ନା ଆରି ଆଗେକାଡ଼୍‌ଦାଂ ଇଦାଂ ତିର୍‌ କିତାପ୍‌ନା, ଇଦାଂ ଇନାକା ଏପ୍‌ ୱେନ୍‌ୱାତାଦେର୍‌ନା ? ଏପ୍‌ ଜେ ଡାଣ୍ଡ୍‌କାତି ବେଡ଼଼ିକିତି ଗାଡ଼୍‌କୁକାଂ ବୁଡାୟ୍‌ କିଜ଼ି ହେ ସବୁତି କାଚ୍ରାଗାଦା କିନାୟ୍‌, ଇଦାଂ ନଂ ଆପ୍‌ ପୁରା କିତାପ୍‌ନା । 27 ଇଦାଂକାଜିଂ ହେବେନିକାର୍‌ ଅଲପ୍‌ ସାକ୍ତିନିକାର୍ ଆତାର୍‌, ହେୱାର୍‌ ନିରାସ୍‌ ଆରି କାବା ଆତାର୍‌; ହେୱାର୍‌ ଜମିନି କାଚ୍ରା ଆରି ପୁନି କାଚ୍ରା, ଇଲ୍‌ଗାଦ୍ରିନି ଜପ୍‌ଣି କାଚ୍ରା ଆରି ହେନ୍‌ୱିତି ତାସ୍‌ବୁମି ଲାକେ ଆତାର୍‌ । 28 ମାତର୍‌ ମି କୁଚ୍‌ନାକା, ବାର୍‌ତ ହାଞ୍ଜେଙ୍ଗ୍‌, ବିତ୍ରେ ୱାଦେଂ ଆରି ମା ବେରୁତ ରିସା ଆଦ୍‌ନାକା ଆପ୍‌ ପୁନାପ୍‌ । 29 ଏପ୍‌ ମା ବେରୁତ ରିସା କିତ୍‌ତାଦେର୍‌ନା ଆରି ମି ବାନ୍ୟା କାତା ମା କିତୁଲ୍‌ତ ୱାତାତ୍‌ନା, ଇଦାଂକାଜିଂ ଆପ୍‌ ମି ମୁଙ୍ଗେଲ୍‌ତ ଜାର୍‌ ମୁମ୍‌ଦ ଆକ୍‌ଡ଼଼ି ଆରି ମି ୱେଇଦ ବାକାର୍‌ ହିଦ୍‌ନାପ୍‌, ଆରି, ଏନେଙ୍ଗ୍‌ ଇମ୍‌ଣି ହାଜ଼ିତିଂ ୱାତାଦେର୍‌, ହେ ହାଜ଼଼ିତିଂ ଆପ୍‌ ମିଙ୍ଗେଙ୍ଗ୍‌ ପେସ୍‌ଦାନାପ୍‌ ।" 30 ଲାଗିଂ ଏ ହିଜକିୟ, ମି କାଜିଂ ଇ ଚିନ୍‌ ଆନାତ୍‌; ଏପେଙ୍ଗ୍‌ ଇ ବାର୍ହୁ ନିଜେ ଉବ୍‌ଜାତି ତାସ୍‌ ଆରି ରି ବାର୍ହୁ ହେବେନି ଗାଜାତି ତାସ୍‌ ତିନାଦେର୍‌; ଆରି, ତିନ୍‌ ବାର୍ହୁନି ବିୟାନ୍‌ ୱିଦ୍‌ଦି ତାସ୍‌ ତ୍ରେସ୍‌ନାଦେର୍‌ ଆରି ଅଙ୍ଗୁର୍‌ବାଡ଼୍‌ କିଜ଼ି ହେବେନି ପାଡ଼୍‌ ତିନାଦେର୍‌ । 31 ଆରେ, ଜିହୁଦା ବଁସ୍‌ନି ରାକ୍ୟାପାୟାତି ବାକି ମାନାୟାର୍‌ ଆରେରଗ ତାରେନ୍‌ ଚିରାଙ୍ଗ୍‌ ଏଚ୍‌ନାତ୍‌ ଆରି ଜପି ପାଡ଼୍‌ ଆହ୍‌ନାତ୍‌ । 32 ଇନାକିଦେଂକି ଜିରୁସାଲମ୍‌ତାଂ ର ବାକି ଲକୁ ଆରି ରାକ୍ୟାପାୟାତି ଲକୁ ସିୟନ୍‌ ମାଡ଼ିତାଂ ହତ୍‌ନାର୍‌; ମେଲ୍ୟାଆଦିକାର୍‌ନି ନିତ୍ରେମାପ୍ରୁତି ତ୍ରିକାଡ଼୍‌ ଇଦାଂ ପୁରା କିନାତ୍‌ । 33 ଇଦାଂକାଜିଂ ନିତ୍ରେମାପ୍ରୁ ଅସୁରିୟ ରାଜା ବିସ୍ରେ ଇ କାତା ଇନାନ୍‌, "ହେୱାନ୍‌ ଇ ଗାଡ଼୍‌ଦ ୱାଉନ୍‌, କି ହେବେ ଆମ୍‌ ଏଚୁନ୍‌, କି ତା ମୁମ୍‌ଦ ଆଡାନାକା ଆସ୍ତି ୱାଉନ୍‌, ଇଚିସ୍‌ ତା ବେରୁତ ବାନ୍ଦ୍ ଗାଚୁନ୍‌ । 34 ନିତ୍ରେମାପ୍ରୁ ଇନାନ୍‌, ହେୱାନ୍‌ ଇମ୍‌ଣି ହାଜ଼଼ିତିଂ ୱାତାନ୍‌, ହେ ହାଜ଼଼ିତିଂ ମାସ୍‌ଦି ହାନାନ୍‌ ଆରି ହେୱାନ୍‌ ଇ ଗାଡ଼୍‌ଦ୍‌ ୱାଉନ୍‌ । 35 ଇନାକିଦେଂକି ଆପ୍‌ ମି କାଜିଂ ଆରି ମା ଆଡ଼ିୟା ଦାଉଦ୍‌ କାଜିଂ ଇ ଗାଡ଼୍‌ଦିଂ ମୁକ୍ତି କିନି କାଜିଂ ପାକ୍ୟା ଆନାପ୍‌ ।" 36 ଇଦାଂପାଚେ ନିତ୍ରେମାପ୍ରୁତି ଦୁତ୍‌ ହସି ଅସୁରିୟାତି ଚାଉଣିତ ର ଲକ୍ୟ ଅସେପାଞ୍ଚ୍‌ ହାଜାର୍‌ ଲକୁ ଜୁଜ୍‌ତିଂ ଅହ୍ୟାତାକାର୍‌ ହାଚାର୍‌; ଆରେ, ମାନାୟାର୍‌ ଏଚେକ୍‌ ନାଣାଙ୍ଗେ ନିଙ୍ଗତିଲେ, ହୁଡ଼ାଟ୍‌, ୱିଜ଼଼ାକାର୍‌ ହାତି ମାଡ଼଼ା । 37 ତାପାଚେ ଆସୁର୍‌ନି ରାଜା ସନ୍‌ହେରିବ୍‌ ହାଚାନ୍‌ ଆରି ମାସ୍‌ଦି ହାଲ୍‌ଜି ନିନିବିତ ବାହାକିତାନ୍‌ । 38 ଇଦାଂପାଚେ ପର୍‌ମେସ୍ୱର୍‌ ଜାର୍‌ନି ନିସ୍ରକ ତର୍‌ନି ପେନ୍‌ ଇଞ୍ଜ ପୁଜା କିନିଙ୍ଗ୍‌ ଅଦ୍ରମେଲକ୍‌ ଆରି ସରେତ୍‌ସର୍‌ ତର୍‌ଦାକାର୍‌ ତା ରିୟାର୍‌ ମାଜ଼଼ିର୍‌ ତାଙ୍ଗେଙ୍ଗ୍‌ କାଣ୍ଡାତାଂ ଟୁଟାର୍‌ । ତାପାଚେ ହେୱାର୍‌ ଆରାରାଟ୍‌ ଦେସ୍‌ତ ହାନ୍‌ତାର୍‌ । ଆରେ, ତା ମେହିର୍‌ ଏସରହଦନ୍‌ ତା ପାଦ୍‌ତ ରାଜ୍‌ କିତାନ୍‌ ।