1 ଇଦମ୍‌ତାଂ କାବ୍ରାଚିତ୍ରା ହେନ୍ଦ୍ରା ଉସ୍ପିସ୍‌ ବସ୍ରାତାଂ ଇୱାନ୍‌ ଜେ ୱାନାନା, ହେୱାନ୍‌ ଇନେର୍‌ ? ଜାର୍‌ ଉସ୍ପିତି ହେନ୍ଦ୍ରାତ ଜାଜ୍‌ମାଲ୍‌ ଆରି ଜାର୍‌ ବେସି ସାକ୍ତିତ ଚାଲାନା ଜେ ଇୱାନ୍‌, ହେୱାନ୍‌ ଇନେର୍‌ ? ଆପ୍‌ ଦରମ୍‌ନିକାସ୍‌ ଆରି ମୁକ୍‌ଡ଼ାୟ୍‌ କିଦେଂ ଆତାପ୍‌ । 2 ଜାର୍‌ତି ଉସ୍ପିତି ହେନ୍ଦ୍ରା ନେତେର୍‌ବାନି ଆରି କୁଣ୍ଡ୍‌ତ ଅଙ୍ଗୁର୍‌ରାସ୍‌ ଲାଗାତି ହେନ୍ଦ୍ରା ଲାକେ ଇନେକିଦେଂ ? 3 ଆପ୍‌ ରବେ ଅଙ୍ଗୁର୍‌ରାସ୍‌ ରେତିକିନାସ୍‌ ଆରି ମାନାୟାର୍‌ ବିତ୍ରେତାଂ ମା ଲାହାଂ ଇନେର୍‌ ହିଲାତାଦେର୍‌; ଆପ୍‌ ଜାର୍‌ ରିସାତ ହେୱାରିଂ ୱିସ୍ତାପ୍‌ ଆରି ଜାର୍ ରିସାତ ହେୱାରିଂ ରେତିକିନାପ୍‌; ଲାଗିଂ ହେୱାର୍‌ତି ପାରାଣ୍‌ନି ନେତେର୍‌ ଟପା ମା ହେନ୍ଦ୍ରାତ ଆର୍‌ତାତ୍‌ ଆରି ଆପ୍‌ ଜାର୍‌ ଉସ୍ପିତି ହେନ୍ଦ୍ରାସବୁ ନେତେର୍‌ ଚିନ୍‌ କିତାପ୍‌ନା । 4 ଇନେକିଦେଂକି ବାଦୁଲ୍‌ ଅନି ଦିନ୍‌ ମା ମାନ୍‌ତ ମାଚାତ୍‌ ଆରି ମୁକ୍‌ଡ଼ାତି ମାନାୟାର୍‌ ବାର୍ହୁ ଏକାୱାତାତ୍‌ । 5 ଆରେ, ଆପ୍‌ ହୁଡ଼୍‌ତାପ୍‌, ଆରେ ସାଇଜ କିଦେଂ ଇନେର୍‌ ହିଲାତାର୍‌ ଆରି ଉପ୍‌କାର୍ ଆଦେଂ ଇନେର୍‌ ହିଲିତିଲେ ଆପ୍‌ କାବାଆତାପ୍‌; ଇଦାଂକାଜିଂ ମା ଜାର୍‌ ବାପାଂ ମା ଲାଗାଂ ମୁକ୍‌ଡ଼ାନାକା ଆତାତ୍‌ ଆରି ମା ରି ରିସା ମା ସାଇଜ ଆତାତ୍‌ । 6 ଆରେ, ଆପ୍‌ ଜାର୍‌ ରିସାତ ମାନାୟାରିଂ ୱିସ୍‌ତାପ୍‌ ଆରି ମା ରିସା ହେୱାରିଂ ହଚି କିତାପ୍‌, ଆରେ ବୁଇଁତ ହେୱାରିଂ ପାରାଣ୍‌ନି ନେତେର୍‌ ବକ୍‌ତାପ୍‌ ।

7 ଆପ୍‌ ନିତ୍ରେମାପ୍ରୁତି ଜିଉନ୍‌ବାର୍ତି ଦୟାସବୁ କେର୍‌ନାସ୍‌ ଆରି ନିତ୍ରେମାପ୍ରୁ ମାଦାଂ ଇମ୍‌ଣି ସବୁ ଉପ୍‌କାର୍‌ କିତାନ୍‌ନା, ଆରେ ଜାର୍‌ତି ବାରବିନି ଦୟା ଆରି ବେସି ଜିଉନ୍‌ବାର୍ତି ଦୟା ଇସାବ୍ରେ ଇସ୍ରାଏଲ୍‌ ଲାତ୍ରାନି ଇମ୍‌ଣି ବେସି ମଙ୍ଗଲ୍‌ କିତାନ୍ନା, ତାପାଚେ ଆସେଙ୍ଗ୍‌ ନିତ୍ରେମାପ୍ରୁତି କେର୍‌କଣ୍‌ କେର୍‌ନାସ୍‌ । 8 ଇନେକିଦେଂକି ହେୱାନ୍‌ ଇଚାନ୍‌, ହାତେନେ ହେୱାର୍‌ ମା ଲକୁ, ଇମ୍‌ଣାକାର୍‌ ହାତ୍‌ପା ଆକାୟ୍‌ ବେବାର୍‌ କିଉର୍‌, ଏଲେଙ୍ଗ୍‌ ମାଜ଼ିର୍‌ ମାନାର୍‌; ଲାଗିଂ ହେୱାନ୍‌ ହେୱାର୍‌ତି ମୁକ୍‌ଡ଼ାୟ୍‌କିନାକାନ୍‌ ଆତାନ୍‌ । 9 ହେୱାର୍‌ତି ସବୁ ଦୁକ୍‌ତ ହେୱାନ୍‌ ଦୁକ୍‌ ଆତାନ୍‌ ଆରି ତା ମୁମ୍‌ ଲାକେ ଦୁତ୍‌ ହେୱାରିଂ ମୁକ୍‌ଡ଼ାୟ୍‌ କିତାନ୍‌; ହେୱାନ୍‌ ଜାର୍‌ ଜିଉନନାକା ଆରି ଜାର୍‌ ଦୟାତ ହେୱାରିଂ ମୁକ୍‌ଡ଼ାୟ୍‌ କିତାନ୍‌ ଆରି ପ୍ଡାନି କାଡ଼୍‌ନି ୱିଜ଼ୁ ଦିନ୍‌ ହେୱାରିଂ ଜାତୁନ୍‌ ଅଜ଼଼ିମାଚାନ୍‌ । 10 ମତର୍‌ ହେୱାର୍‌ କୁର୍‌ଲିଆ ଆତାର୍‌ ଆରି ତା ପୁଇପୁୟା ଜିବୁନ୍‌ତିଂ ଦୁକ୍‌ କିତାର୍‌; ଇଦାଂକାଜିଂ ହେୱାନ୍‌ ମାସ୍‌ଦି ହେୱାର୍‌ତି ବିରୁଦ୍‌ ଆତାନ୍‌ ଆରି ନିଜେ ହେୱାର୍‌ତି ବିନ୍‌ପାକ୍ୟାତ ଜୁଜ୍‌ କିତାନ୍‌ । 11 ହେପାଦ୍‌ନା ହେୱାନ୍‌ ପ୍ଡାନି କାଡ଼୍‌, ମସା ଆରି ଜାର୍‌ ମାନାୟାରିଂ ଏତୁକିଜ଼ି ଇଚାନ୍‌, "ଇନେନ୍‌ ଜାର୍‌ ମାନ୍ଦାନି ରାକ୍ୟାକିନାକାର୍‌ ଲାହାଂ ହେୱାରିଂ ହାମ୍‌ଦୁର୍‌ ନାପ୍‌ଚି ତାଇୱାତାନ୍‌, ହେୱାନ୍‌ ଇମେନ୍‌ ? ଇନେନ୍‌ ହେୱାର୍‌ ୱାସ୍କିତ ଜାର୍‌ତି ପୁଇପୁୟା ଜିବୁନ୍ ଇଡ୍‌ତାନ୍‌, 12 ଇନେନ୍‌ ମସାତି ତିନିକେଇଦ ଜାର୍‌ତି ପଙ୍ଗ୍‌ତି ବାପାଙ୍ଗ୍‌ତାଂ ହାଲିକିତାନ୍‌, ଇନେନ୍‌ ଜାର୍‌ କାଜିଂ ୱିଜ଼୍‌ୱିକାଡ଼୍‌ ପାତେକ୍‌ ତର୍‌ ରଚ୍‌ଚେଙ୍ଗ୍‌, ହେୱାର୍‌ ଲାଗାଂ ଏଜ଼ୁଙ୍ଗ୍‌ ରି ବାଗ୍‌ କିତାନ୍‌, 13 ଇନେନ୍‌ ୱାଚ୍‌ଚି ବୁଇଁତ ହାନି ଗଡ଼ା ଲାକେ ଡେଙ୍ଗା ହାମ୍‌ଦୁର୍‌ ବିତ୍ରେ ହେୱାରିଂ ହାଲି କିତାନ୍‌ ଆରି ହେୱାର୍‌ ଉଜ଼୍‌ୱାତାର୍‌, ହେୱାନ୍‌ ଇମେନ୍‌ ? 14 ମାଡ଼଼ିତାଂ ଜୁଜ଼ି ହାନି ପସୁମାନ୍ଦା ଲାକେ ନିତ୍ରେମାପ୍ରୁ ଜିବୁନ୍‌ ହେୱାରିଂ ଜମି କିତାନ୍‌; ଇଲାକେ ଏପ୍‌ ଜାର୍‌ କାଜିଂ ର ଜାଜ୍‌ମାଲ୍‌ ତର୍‌ ରଚ୍‌ନିତ ଜାର୍‌ ମାନାୟାରିଂ ହାଲି କିତାଦେର୍‌ ।"

15 ନଂ ସାର୍ଗେତାଂ ହୁଡ଼ାଟ୍‌, ମି ପୁଇପୁୟାନି ଆରି ମି ସାକ୍ତିନି ବାହାକିତିବାହାତାଂ ହୁଡ଼ାଟ୍‌; ମି ତ୍ରିକାଡ଼୍‌ନି ୱାରି ଆରି ମି କାବାନି କାମାୟିଂ ଇମେତ୍‌ ? ମି ୱାସ୍କିନି ନନାକା ଆରି ମି ୱାରିସବୁ ନା କାଜିଂ ବନ୍ଦ୍‌ ଆତାତ୍‌ନା । 16 ଆତିସ୍ପା ଅବ୍ରାହାମ୍‌ ମାଙ୍ଗ୍‌ ପୁନ୍‌ୱାତନ୍‌ନା ଆରି ଇସ୍ରାଏଲ୍‌ ମାଙ୍ଗେଙ୍ଗ୍‌ ମାନି କିଦ୍‌ୱାତାନ୍‌ନା, ଆତିସ୍ପା ଏପ୍‌ ତ ମା ଆବା; ଏ ନିତ୍ରେମାପ୍ରୁ ଏନ୍‌ ମା ଆବା ଆତାୟ୍‌ନା; ୱିଜ଼୍‌ୱିକାଡ଼୍‌ତାଂ ମା "ମୁକ୍‌ଡ଼ାୟ୍‌କିଦ୍‌ନାକାୟ୍‌" ଇଞ୍ଜି ନି ତର୍‌ ମାନାତ୍‌ । 17 ଏ ନିତ୍ରେମାପ୍ରୁ, ମାଙ୍ଗେଙ୍ଗ୍‌ ନି ହାଜ଼ିତାଂ ଇନେକିଦେଂ ବୁଲ୍‌କାୟ୍‌ କିଦ୍‌ନାୟା ଆରି ନିଙ୍ଗ୍‌ ପାଣ୍ଡ୍ରାନି କାଜିଂ ମା ୱାସ୍କିତିଂ ଆଟ୍‌ୱା କିଦ୍‌ନାୟା ? ଜାର୍‌ ଆଡ଼ିୟାର୍‌ତି, ଜାର୍‌ ଆଦିକାର୍‌ ଲାକେ ମାନାୟାରିଂ କାଜିଂ ମାସ୍‌ଦା । 18 ନି ପୁଇପୁୟା ମାନାୟାର୍‌ କେବଲ୍‌ ଅଲପ୍‌ କାଡ଼୍‌ ହେଦାଂ ଆଦିକାର୍‌ କିତାର୍‌; ମାଦାଂ ବିନ୍‌ପାକ୍ୟାର୍‌ ନି ପୁଇପୁୟାନି ପାନା ତାରେନ୍‌ ଦୁହ୍‌ନାରା । 19 ଇମ୍‌ଣାକାର୍‌ ଜପି ଏନ୍‌ ଇନାୱାଡ଼ାଂ ସାସନ୍‌ କିୱାତାଇନା, ଇମ୍‌ଣାକାର୍‌ ନି ତର୍‌ଦ ଇନାୱାଡ଼ାଂ ଡାକ୍‌ପୁଟା ଆୱାଦାଂ ମାଚାର୍‌, ଏଲେଙ୍ଗ୍‌ ମାନାୟାର୍‌ ଲାକେ ଆସେଙ୍ଗ୍‌ ଆତାସ୍‌ନା ।