1 ଆଁ, କୁସ୍‌ଦେସ୍‌ନି ଗାଡ଼୍ ନାଗୁଡ଼୍‌ନି ହେ ପାଡ଼୍‌କା ଇମେତାକେ କି ମାରାନି ସବଦ୍‌ ୱେନ୍ୟାନାତ୍‌; 2 ହେ ଦେସ୍‌ନି ମାନାୟାରିଂ ହିଡ଼଼ିତାଂ ରଚ୍‌ଚିମାନି ଡଙ୍ଗାତ ହେୱାରିଂ ପକ୍ୟା ଆନାତ୍, ମତର୍ ବେଗି କାବୁର୍ ଏକିକିଦେଂ ଏପେଙ୍ଗ୍ ଇମ୍‌ଣି କୁଟୁମ୍ ଚିକ୍‌ଣିୟା ଇମ୍‌ଣାକାର୍‌ କି ସାକ୍ତିନିକାର୍ ଆରି ଜିଣାତାକାର୍ ମାନାୟ୍ ଆନାର୍ ଆରେ ଇନେର୍ତି ଦେସ୍ ନାଗୁଡ଼୍‌ ହୁଦାଂ ବାଗ୍ ଆତାତ୍‌ନା ହେୱାର୍ତି ଲାଗାୟ୍ ଇ କାବୁର୍ ଏକିକିୟାଟ୍ । 3 ଏ ଜାଗାନିକାଦେର୍‌; ଏ ପୁର୍ତିନି ବାହାକିତି ୱିଜ଼଼ାଦେର୍‌, ମାଡ଼ିଂ ଜପି ପତ୍‌କା ଇକାୱାନାତ୍‌ ଆରମ୍‌ ଆନିହିଂ ଏପେଙ୍ଗ୍‌ ହୁଡ଼ାଟ୍‌ ଆରି ମରି ଆଡ଼୍‌ନିହିଂ ଏପେଙ୍ଗ୍‌ ୱେନାଟ୍‌ । 4 ଇନାକିଦେକି ନିତ୍ରେମାପ୍ରୁ ମାଙ୍ଗେଙ୍ଗ୍‌ ଇଲାକେ ଇନ୍‌ଚାନ୍‌ନା, "କାରା ସମୁତ ନିର୍‌ମଲ୍‌ ଉହୁମ୍‌ ଲାକେ, ତାସ୍‌ତ୍ରେନି ଉହୁମ୍‌ ସମୁତ ଲେକର୍‌ମେହାତି ବାଦାଡ଼୍‌ ଲାକେ ଆସେଙ୍ଗ୍‌ ଜମ୍‌ନାସ୍‌, ଆରି ଜାର୍‌ ବାହା କିତିତାକେ ମାନ୍‌ଞ୍ଜି ହୁଡ଼୍‌ଜି ମାନାସ୍‌ ।" 5 ଇନେସ୍‌କି ଅଙ୍ଗୁର୍‌ ରୁଣ୍ଡାୟ୍‌ କିନି ଆଗେ ମୁକ୍‌ଡ଼ାୟ୍‌ ଆତି ପାଚେ ଆରି ପୁଇ ବାର୍ତି ଅଙ୍ଗୁର୍‌ ପାଡ଼୍‌ ଆଜ଼଼ି ମାନ୍‌ଗିନି ସମୁତ ହେୱାନ୍‌ କୱେସ୍‌ ଆସ୍‌ସି ହେବେନି ପାଡ଼୍‌ ତ୍ରେସ୍‌ଦି ଇଟ୍‌ନାନ୍‌ ଆରି ହେବେନି ଲାମାତି କେନ୍ଦାଂ ସବୁ କାଦ୍‌ଦି ୱିସ୍ତି ତୁଇନାନ୍‌ । 6 ରାମାଣ୍‌ ମେଲ୍ୟାର୍‌ ହାତି ମାଡାତିଂ ତିନିକ୍‌ ମାଡ଼ିତାଂ ଦେହାନି ପଟିଂ ଆରି ପୁର୍ତିନି ପସୁଙ୍ଗ୍‌ ପା ହେବେ ସବୁ ବାର୍ତିଆନିଂ; ଦେହାନି ପଟିଂ କାରା ମାସ୍ତ ତିନିକ୍ ତା ଜପି (ଦିୱାଡ଼୍‌ ପାଣ୍ଡ୍‌ ମାସ୍ତ) ବେହାକ୍‌ତ ବାହା କିନିକ୍ ଆରି ପୁର୍ତିନି ସବୁ ତା ଜପି ପିନି କାଡ଼୍‌ତ ହୁଞ୍ଜ୍‌ନିକ୍‌ । 7 ହେ ସମୁତ ଦେହାନିକାର୍‌ ଆରି ଚିକ୍‌ଣିୟାର୍‌ ଆରି ଆଗେ ବୟଙ୍କାର କୁଟୁମ୍ ଇମ୍‌ଣାକାର୍‌ ଦୁକ୍ ଆରି ଇଲାକେ ୱିଜୁତି ସାକ୍ତିକାଟି ମାପ୍ରୁ ଇନାମ୍ ହିତ୍‌ତାନ୍‌ନା, ଇମ୍‌ଣାକାର୍‌ ଦେସ୍‌ ନଦ ନାଗୁଡ଼଼ୁତ ବାଗ୍‌, ଇଲାକେ ର ଦଲ୍‌ନି ୱିଜ଼଼ୁତିଂସାକ୍ତି ନିତ୍ରେମାପ୍ରୁତି ଇନାମ୍ ଲାକେ ୱିଜ଼଼ୁତିଂସାକ୍ତିକାଟି ନିତ୍ରେମାପ୍ରୁତି ତର୍‌ଦାଂ ବାହାତ ସିୟନ୍‌ ମାଡ଼ିତ ତାଇୱାନାନ୍‌ ।