1 "ଏ ଏସ୍‌କୁପ୍‌ଲିଙ୍ଗ୍, ମା ମୁମ୍‌ଦ ଚିମ୍‌ରାଆଡ ଆରି ମାନାୟାର୍‌ ପୁନି ପୁନି ବପୁ ପୟାନାରା; ହେୱାର୍‌ ଲାଗାଂ ୱାଡ; ଲାଗି କାତା ଇନାଟ୍‌; ଆପେଙ୍ଗ୍‌ ରବେ ଆଜ଼଼ି ବିଚାର୍‌ କିନାସ୍‌ । 2 ହେୱାନ୍‌ ଦାର୍ମିନିକାନ୍‌ ଇନେରିଂ ଜାର୍‌ କାଲ୍‌ ଲାଗାଂ କୁକ୍‌ନାନ୍‌, ଇଲାକେ ରୱାନିଂ ୱେଡ଼ାହତ୍‌ନି ଦିଗ୍‌ତ ଇନେର୍‌ ଉବ୍‌ଜାୟ୍‌ କିତାର୍‌ନା ? ହେୱାନ୍‌ ବାରବିନି ଦେସ୍‌ନି ଲକ୍‌ତିଂ ତା ମୁମ୍‌ଦ ହେଲାୟ୍‌ କିନାନ୍‌ ଆରି ରାଜାର୍‌ ଜପି ତାଙ୍ଗେଙ୍ଗ୍‌ ରାଜ୍‌କିଇ କିନାନ୍‌; ହେୱାନ୍‌ ତା କାଣ୍ଡା ମୁମ୍‌ଦ ହେୱାରିଂ ଦୁଡ଼ିଲାକେ ଆରି ତା ୱିଲ୍‌ ଆଗ୍‌ଦ ଉମ୍‌ନି ପୁଟା ଲାକେ ହେଲାୟ୍‌ କିନାନ୍‌ । 3 ହେୱାନ୍‌ ହେୱାର୍‌ତି ପାଚେ ପେଜ୍‌ନାନ୍‌, ଇମ୍‌ଣି ହାଜ଼଼ିତ ହେୱାନ୍‌ ହାଞ୍ଜେଙ୍ଗ୍‌ ଆରମ୍‌ କିତାନ୍‌ନା, ହେ ହାଜ଼଼ିତ ପା ହେୱାନ୍‌ ପାଣ୍ଡ୍ରାୱାଦାଂ ସୁସ୍ତାରେ ତାଙ୍ଗ୍‌ଜି ହାନାନ୍‌ । 4 ଆଗେତାଂ ଆଡ୍ରେନିଂ ଆଣ୍ଡ୍ରେନ୍‌ କୁକ୍‌ଚି ଇନେନ୍‌ ଇ କାମାୟ୍‌ ସମାନ୍‌ କିତାନ୍‌ନା ? ଆପ୍‌ ନିତ୍ରେମାପ୍ରୁ ଇୱାପ୍‌, ଆରେ, ହାରିହାରା କାଡ଼୍‌ଦ ମାନାୟାର୍‌ ଲାହାଙ୍ଗ୍‌ ନେ ଆପ୍‌ ହେୱାପ୍‌ ଆନାପ୍‌ । 5 ଏସ୍‌କୁପ୍‌ଲି ହୁଡ଼୍‌ଜି ପାଣ୍ଡ୍ରାତାର୍‌; ପୁର୍ତିନି ଦେହାଦେସ୍‌ କମ୍ପା ଆତିକ୍‌; ହେୱାର୍‌ ଲାଗେ ଆଜ଼଼ି ୱାତାର୍‌ । 6 ହେୱାର୍‌ ଜାଣ୍‌କେ ଜାର୍‌ ପାଡ଼୍‌ହାନିକାର୍‌ ସାଇଜ କିତାର୍‌ ଆରି ସାସ୍‌ଆଡ ଇଞ୍ଜି ୱିଜ଼଼ାର୍‌ ଜାର୍‌ ଟଣ୍ଡେନିଂ ଇଚାର୍‌ । 7 ଇଲାକେ ମିସ୍ତୁରି ହନାରିଂ ସାସ୍ ହିତାନ୍ ଆରି ମୁଟ୍‌ଲାତାଂ ସମାନ୍‌ କିନି ଲଗୁ ଜଡ଼ାୟ୍‌ କିନି କାମାୟ୍‌ ହାର୍‌ ଆତାତ୍‌ନା ଇଞ୍ଜି, ମୁଟ୍‌ଲାତାଂ କଲ୍‌ନି ମାନାୟ୍‌ତିଂ ଆହ୍‌ର ହିତାନ୍‌; ଆରେ, ପୁତ୍‌ଡ଼ାଙ୍ଗ୍‌ ଇନେସ୍‌କି ଟଡ଼ମଡ଼ ଆଉକ୍‌, ଇଦାଂ କାଜିଂ ହେୱାନ୍‌ ୱାଡ଼ିଙ୍ଗ୍‌ ଲାହାଂ ହେଦାଂ ଆଟ୍‌ୱା କିତାତ୍‌ । 8 ମାତର୍‌ ମା ମାନ୍‌ ଆଡ଼ିଏନ୍‌ ଇସ୍ରାଏଲ୍‌, ମା ବାଚିକିତି ଜାକୁବ୍‌, ମା ହାଂଦାକାନ୍‌ ଅବ୍ରାହାମ୍‌ତି ଲାତ୍ରା; 9 ଆପ୍‌ ମିଙ୍ଗେଙ୍ଗ୍‌ ଆସ୍ତି ପୁର୍ତିନି ହାନ୍ଦିତ ତାଇୱାତାପ୍‌ନା ଆରି ପୁର୍ତିନି ହାନ୍ଦିତାଂ ମିଙ୍ଗେଙ୍ଗ୍‌ କୁକ୍‌ତାତାପ୍‌ନା, ଏପେଙ୍ଗ୍‌ ମା ଆଡ଼ିଏନ୍‌, ଆପ୍‌ ମିଙ୍ଗେଙ୍ଗ୍‌ ବାଚି କିତ୍‌ତାପ୍‌ନା ଆରି ଦେହା କିଦୁପ୍‌; 10 ଏପ୍‌ ପାଣ୍ଡ୍ରାମାଟ୍‌, ଇନାକିଦେଂକି ଆପ୍‌ ମି ପର୍‌ମେସ୍ୱର୍‌; ଆପ୍ ନିଂ ବାଡ୍‌କାସ୍ କିନାସ୍‌, ଆଁ, ଆପ୍ ନି ସାଇଜ କିନାସ୍; ଆଁ, ଆପ୍ ଜାର୍ ଦାର୍ମିଲାକେ ତିନି କେଇଦାଂ ନିଂ ଆସ୍ତି ଇଡ଼୍‌ଦାନାପ୍‌ । 11 ହୁଡ଼ା, ଇମ୍‌ଣାକାର୍‌ ମି କାଜିଂ ରିସାତ ମାନାର୍‌, ହେୱାର୍‌ ୱିଜ଼଼ାର୍‌ ଲାଜାନାର୍‌ ଆରି ବିଲ୍‌କି ଆନାର୍‌; ଇମ୍‌ଣାକାର୍‌ ମି ଲାହାଙ୍ଗ୍‌ ବେରୁ କିଦ୍‌ନାର୍‌, ହେୱାର୍‌ ୱାରିଆଡ୍‌ମାଡ୍‌ ଲାକେ ଆଜ଼଼ି ବୁଡାନାର୍‌ । 12 ଇମ୍‌ଣାକାର୍‌ ମି ଲାହାଙ୍ଗ୍‌ ବେରୁ କିନାର୍‌, ଏପ୍‌ ହେୱାରିଂ ହୁଡ଼୍‌ନାୟା, ମାତର୍‌ ହେୱାର୍‌ତି ଉଦେସ୍‌ ପାୟାଆଉର୍‌; ଇମ୍‌ଣାକାର୍‌ ମି ଲାହାଙ୍ଗ୍‌ ଜୁଜ୍‌ କିନାର୍‌, ହେୱାର୍‌ ଇଟ୍ୟାୱି ଲାକେ ଆରି ତାରେନ୍ ଆନାର୍‌ । 13 ଇନାକିଦେଂକି ଆପ୍‌ ନିତ୍ରେମାପ୍ରୁ ମି ପର୍‌ମେସ୍ୱର୍‌, ମି ତିନାବାଗାଂନି କେଇ ଆସ୍ତି ମିଙ୍ଗେଙ୍ଗ୍‌ ଇଞ୍ଜ୍‌ନାପ୍‌, ପାଣ୍ଡ୍ରା ଆମାଟ୍‌; ଆପେଙ୍ଗ୍‌ ମିଙ୍ଗେଙ୍ଗ୍‌ ସାଇଜ କିଦ୍‌ନାପ୍‌ । 14 ଏ ପ୍ଡିକୁ ଲାକେ ଜାକୁବ୍‌ ଆରି ଏ ଇସ୍ରାଏଲ୍‌ନି ନାର୍‌, ପାଣ୍ଡ୍ରା ଆମାଟ୍‌; ନିତ୍ରେମାପ୍ରୁ ଇଚାନ୍ନା, ଆପ୍‌ ମିଙ୍ଗେଙ୍ଗ୍‌ ସାଇଜ କିଦ୍‌ନାପ୍‌" ଆରି ଇସ୍ରାଏଲ୍‌ନି ଦାର୍‌ମିର୍‌ ମିଦାଂ ମୁକ୍‌ଡ଼ାୟ୍‌ କାରିୟା ମାନାନ୍‌ । 15 "ହୁଡ଼ାଟ, ଆପ୍‌ ମିଙ୍ଗେଙ୍ଗ୍‌ ତିପ୍‌ତିପା ହୁରିତାଂ ର ପୁନି ତାସ୍‌-ରେତିକିନି-ଜନ୍ତ୍ର ଲାକେ କିନାସ୍‌; ଏପ୍‌ ମାଡ଼ିତିଂ ରେତିକିଜ଼ି କୁଦ୍ରି କିନାଦେର୍‌ ଆରି ଜପ୍‌ଣିମାଡ଼ିତିଂ ଆକ୍‌ଡ଼଼ି ଲାକେ କିନାଦେର୍‌ । 16 ଏପ୍‌ ହେୱାରିଂ ହେଚିତାଂ ଟୁଡ଼଼ୁତାର୍‌, ଦୁକା ହେୱାରିଂ ଉପ୍‌ଚି ଅନାତ୍‌ ଆରି ହୁଜ଼଼ାୱାଣି ହେୱାରିଂ ଜେଡ଼େକେତେ କିନାତ୍‌; ଆରେ, ଏପ୍‌ ନିତ୍ରେମାପ୍ରୁତାକେ ସାର୍‌ଦା କିନାଦେର୍‌ ଆରି ଇସ୍ରାଏଲ୍‌ ଦାର୍‌ମିନିକାର୍‌ କାଜିଂ ଜାଜ୍‌ମାଲ୍‌ କିନାଦେର୍‌ । 17 ଅର୍‌କିତ୍‌ ଆରି ହିଲ୍‌ୱାକାର୍‌ ଏଜ଼ୁଙ୍ଗ୍‌ ଡେକ୍‌ନାର୍‌, ମାତର୍‌ ଏଜ଼ୁଙ୍ଗ୍‌ ହିଲୁକ୍‌, ତାପାଚେ ହେୱାର୍‌ତି ୱେନ୍ଦୁଲ୍‌ ଏସ୍କିତ ୱାଜ୍‌ଜି ହାନାତ୍‌; ଆପ୍‌ ନିତ୍ରେମାପ୍ରୁ ହେୱାରିଂ ଉତର୍‌ ହିନାସ୍‌, ଆପ୍‌ ଇସ୍ରାଏଲ୍‌ନି ପର୍‌ମେସ୍ୱର୍‌ ହେୱାରିଂ ପିହୁସ୍ । 18 ଆପ୍‌ ମାର୍‌ହିଲ୍‌ୱି ଉଚ୍‌ବାହାତ ନାଗୁଡ଼୍ କିନାସ୍‌ ଆରି ସମାନ୍‌ ବାହା ବିତ୍ରେ ଜାରାଣ୍‌ତିଂ ଜେନାସ୍‌; ଆପ୍‌ ବାଟାତିଂ ବାନ୍ଦ୍‌ ଆରେ ୱାଚ୍‌ଚି ବୁଇଁତିଂ ଜାରାଣ୍‌ ହପ୍‌ନାପ୍‌ । 19 ଆପ୍‌ ବାଟାତ ଏରସ୍‌, ବବୁର୍‌ ଆରି ବେତ୍‌ଲାମାର୍‌ ଆରି ଚିକାଣ୍‌ ମାର୍‌ ରୁଜ଼଼ୁନାସ୍‌; ଆପ୍‌ ବାଲିବାଟାତ ଦେବଦାରୁ, ତିଦର୍‌ ଆରି ସିଟିମ୍‌ ମାର୍‌ ରବେ ରୁଜ଼଼ୁନାସ୍‌; 20 ତାପାଚେ ନିତ୍ରେମାପ୍ରୁତି କେଇ ଇ କାମାୟ୍‌ କିତାନ୍‌ନା ଆରି ଇସ୍ରାଏଲ୍‌ନି ହାର୍‌ଦି ଦାର୍‌ମିର୍‌ ଲାକେ ଇଦାଂ ଉବ୍‌ଜାୟ୍‌ କିତାନ୍‌ନା ଇଞ୍ଜି ମାନାୟାର୍‌ ରଞ୍ଜେମାଟ୍‌ ହୁଡ଼୍‌ନାର୍‌ ଆରି ୱାସ୍କି ଦିୟାନ୍‌ କିଜ଼ି ବୁଜାଆନାର୍‌ ।"

21 ନିତ୍ରେମାପ୍ରୁ ଇନାନ୍‌, "ଏପେଙ୍ଗ୍‌ ମିଦାଂ କେତ୍‌ପାଆନାକା ଏକାୱାଇ କିୟାଟ୍‌," ଜାକୁବତି ରାଜା ଇନାନ୍‌, ଏପେଙ୍ଗ୍‌ ମିଦାଂ ଜାର୍‌ତି ଆଟ୍‌ୱା ପାର୍ମାଣ୍‌ ସବୁ ହପାଟ୍‌ । 22 ହେୱାର୍‌ ହେଦାଂ ସବୁ ହପିକିଜ଼ି ଇନା ଇନାକା ଗିଟାଆନାତ୍‌, ହେଦାଂ ମା ଲାଗାଂ ହପାଟ୍‌; ଆଗ୍‌ଦି ବିସ୍ରେନିକା ଇନାକା, ହେଦାଂ ଏପେଙ୍ଗ୍‌ ହପାଟ୍‌, ହେଦାଂ କିତିସ୍‌, ଆପେଙ୍ଗ୍‌ ୱେଚ୍‌ପା ଆଜ଼଼ି ହେବେନି ହାରିହାରାନି ପାଡ଼୍‌ ପୁଞ୍ଜେଙ୍ଗ୍‌ ଆଡ୍‌ନାସ୍‌; ନଲେ ଆଗ୍‌ଦି ଗଟ୍‌ଣା ମାଙ୍ଗେଙ୍ଗ୍‌ ଚଚ୍‌ଚାଟ୍‌ । 23 ଇଦାଂ ପାଚେ ଇନା ଇନାକା ଗିଟାଆଦ୍‌ନାତ୍‌, ହେଦାଂ ହପାଟ୍‌, ହେବେ ଏପେଙ୍ଗ୍‌ ଜେ ଇସ୍ୱର୍‌ନିକାଦେର୍‌, ଇଦାଂ ଆସେଙ୍ଗ୍‌ ପୁନାସ୍‌; ଆଁ, ମଙ୍ଗଲ୍‌ କିୟାଟ୍‌, କି ଅମଙ୍ଗଲ୍‌ କିୟାଟ୍‌, ହେବେ ଆପେଙ୍ଗ୍‌ ନିରାସ୍‌ ଆଜ଼଼ି ରବେ ହେଦାଂ ହୁଡ଼୍‌ନାପ୍‌ । 24 ହୁଡ଼ାଟ୍‌, ଏପେଙ୍ଗ୍‌ ତଲ୍ୟା ଆରି ମି ବଚନ୍‌ ଅଲପ୍‌ ପା ଆକାୟ୍‌; ଇମ୍‌ଣି ଲକ୍‌ ମିଙ୍ଗେଙ୍ଗ୍‌ ବାଚିକିଦ୍‌ନାନ୍‌, ହେୱାନ୍‌ ଗିଣ୍‌କାରିୟା । 25 ଆପ୍‌ ଦିଗ ଦିଗ୍‌ତାଂ ରୱାନିଂ ଉବ୍‌ଜାୟ୍‌ କିତାପ୍‌ନା ଆରି ହେୱାନ୍‌ ୱାତାନ୍‌ନା; ହେୱାନ୍‌ ୱେଡ଼ାହତ୍‌ନି ଦିଗ୍‌ତାଂ ମା ତର୍‌ଦାଂ କୁକ୍‌ତାନାନ୍‌; ହେୱାନ୍‌ ଚାଟ୍‌କାୟ୍‌କିତି ମସଲା ଆରି କୁମ୍‌ରେନ୍ କଣ୍ଡିତିଂ ଚାକ୍‌ଟାୟ୍‌ କିନି ଚିକ୍‌ଲା ଲାକେ ଦେସ୍‌ଆଦିକାରିରିଂ କ୍ଡୁସ୍‌ତାନାନ୍‌ । 26 ଆପେଙ୍ଗ୍‌ ଇନେସ୍‌କି ପୁଞ୍ଜେଙ୍ଗ୍‌ ଆଡ୍‌ନାସ୍‌, ଇଦାଂକାଜିଂ ଆଗେ ଇନେର୍‌ ଇଦାଂ ହପ୍‌ତାନ୍‌ନା ? ଆରେ, ହେୱାନ୍‌ ଦାର୍ମିନିକାନ୍‌ ଇଞ୍ଜି ଇନେସ୍‌କିଜ଼଼ି ଆସେଙ୍ଗ୍‌ ଇଞ୍ଜେଙ୍ଗ୍‌ ଆଡ୍‌ନାସ୍‌, ଇଦାଂ କାଜିଂ ଆଗେତାଂ ଇନେର୍‌ ଇଦାଂ ହପ୍‌ତାନ୍‌ନା ? ଆଁ, ହପ୍‌ତାକାନ୍‌ ଇନେନ୍‌ ହିଲୁନ୍‌, ଆଁ, ଚଚ୍‌ଚିନି ଲକ୍‌ ଇନେର୍‌ ହିଲୁର୍‌, ଆଁ, ମି କାତା ୱେନି ଲକ୍‌ ଇନେର୍‌ ହିଲୁର୍‌ । 27 ଆପ୍‌ ପର୍‌ତୁମ୍‌ ସିୟନ୍‌ତିଂ ଇନାସ୍‌, "ହୁଡ଼ା, ହେୱାରିଂ ହୁଡ଼ାଟ୍‌, ଆରେ ଆପ୍‌ ଜିରୁସାଲମ୍‌ତ ନେକ୍ରିକାବୁର୍‌ ତାନି କାଜିଂ ରୱାନିଂ ହିନାସ୍ ।" 28 ଆପ୍‌ ଏରିକିନି ୱେଡ଼଼ାଲିଂ ଇନେର୍‌ ହିଲୁର୍‌; ଆପ୍‌ ୱେନ୍‌ବିନିହିଂ ଇନେନ୍‌ ପାଦେକ୍‌ ଉତର୍‌ ହିଦ୍‌ଦେଂ ଆଡ଼୍‌ଦାନାନ୍‌, ହେୱାର୍‌ ବିତ୍ରେ ଇଲାକେ ଜଜନାକିନାକାନ୍‌ ପା ଇନେନ୍‌ ହିଲୁର୍‌ । 29 ହୁଡ଼ାଟ୍‌, ହେ ୱିଜ଼଼ାଦେର୍‌, ହେୱାର୍‌ତି ବାନ୍ୟାକାମାୟ୍‌ ସବୁ ଅହାର୍‌ ଆରି ଜିନିସ୍‌ହିଲ୍‌ୱାକା ମତର୍‌; ହେୱାର୍‌ତି ଚାଚ୍‌ତ ୱାକ୍ୟାତି ପୁତ୍‌ଡ଼ାଙ୍ଗ୍‌ ଦୁକା ଆରି ୱାରାକା ମାତର୍‌ ।