ଜିସାଇୟ 29

ଦାଉଦ୍ ଗାଡ଼୍ କାଜିଂ ଡାଣ୍ଡ୍‌ତ

1 ହାୟ ଅରିୟେଲ୍‌, ଅରିୟେଲ୍‌, ଦାଉଦ୍‌ତି ଚାଉଣି ଗାଡ଼୍‌; ବାର୍‌ହୁତିଂ ବାର୍‌ହୁ ମେହାୟ୍‌ କିୟାଟ୍‌; ପାର୍ବୁମାନି କିନି ଇସାପ୍ରେ ୱାଏତ୍‌; 2 ତେବେ ଆପ୍‌ ଅରିୟେଲ୍‌ କାଜିଂ ଦୁକ୍‌ ଗିଟାୟ୍‌କିନାପ୍‌, ତାପାଚେ କାନ୍ଦାଣ୍‌ ଆରି ଦୁକ୍‌ ଆନାତ୍‌ ଆରି ହେଦାଂ ମା କାଜିଂ ଅରିଏଲ୍‌ ହୁଜ୍‌ନି ବାହା ଲାକେ ଆନାତ୍‌ । 3 ଆରେ, ଆପ୍‌ ଚାରିବେଣ୍‌ତାଂ ମି ବେରୁତ ଚାଉଣି ରଚ୍‌ନାପ୍‌ ଆରି ଗାଡ଼୍‌ବନ୍ଦ୍‌ କିଜ଼଼ି ନିଂ ବେଡ଼଼ି କିଦ୍‌ନାପ୍ ଆରି ନି ବିରୁଦ୍‌ତ ମାନିକିୱି ଜଜନା ଜାଲ୍‌ଦି କିନାପ୍‌ । 4 ତାପାଚେ ଏପେଙ୍ଗ୍‌ ତାରେନ୍‌ ଆନାଦେର୍‌ ଆରି ମେଦ୍‌ନିତାଂ କାତା ଇନାଦେର୍‌ ଆରି ଦୁଡ଼ିତାଂ ମି କାତା ନସ୍ଟ ଲାକେ ଆନାତ୍‌; ଆରେ, ଚୁଟ୍‌କିଆତି ନିୟାୟ୍‌ ମି ବିଲ୍‌କି ବୁଇଁତାଂ ହତ୍‌ନାତ୍‌ ଆରି ଦୁଡ଼ିତାଂ ମି କାତାନି ପୁସୁର୍‌ପାସାର୍‌ ଗାର୍‌ଜେନ୍‌ ନିଂନାତ୍‌ । 5 ମାତର୍‌ ମି ସାତ୍ରୁର୍‌ ମାନାୟାର୍‌ ୱାଚ୍‌ଚି ଦୁଡ଼ିନି ନିୟାୟ୍‌ ଆନାତ୍‌ ଆରି ବାଡ଼୍‌କାସ୍‌ନିକାରିଂ ମାନାୟାର୍‌ ଉମ୍‌ଜିହାନି ପୁଟା ଲାକେ ଆନାତ୍‌; ରଞ୍ଜେମାଡ୍ ହାଚାଟ୍ରେ ଇଦାଂ ଗିଟାନାତ୍‌ । 6 ୱିଜ଼଼େତିଂସାକ୍ତିକାଟି ନିତ୍ରେମାପ୍ରୁ, ବାଦାଡ଼୍‌ଗାର୍ଜାନ୍‌, ମେଦ୍‌ନିଦାଲ୍‌କାନାକା, ଗାଜାସବଦ୍‌, ହୁଜାୱାଣି, ଦୁକାବାର୍ହା ଆରି ଗୁସ୍‌ତି ନାଣିଦୁଦ୍‌ୱା ଲାହାଙ୍ଗ୍‌ ୱାନାନ୍‌ । 7 ଆରେ, ସବୁ କୁଟୁମ୍‌ନି ଇମ୍‌ଣି ଲକୁସବୁ ଅରିୟେଲ୍‌ ବେରୁତ ଜୁଜ୍‌ କିନାର୍‌, ଇଚିସ୍‌, ଇମ୍‌ଣାକାର୍‌ ହେୱାର୍‌ତି ଆରି ହେୱାର୍‌ତି ଡେଙ୍ଗା ପାନ୍ତି ମାଚା ସବୁନିପ ଜୁଜ୍‌ କିଜ଼ି ତାଂ ଆପଦ୍‌ତ କିନାର୍‌, ହେୱାର୍‌ ୱିଜ଼଼ାର୍‌ କେଚ୍‌କଣ୍‌ ଲାକେ, ନାଣାଲିଂ ହୁଡ୍‌ତି କେଚ୍‌କଣ୍‌ ଲାକେ ଆନାତ୍‌ । 8 ଆରେ, ଇନେସ୍‌କି ନାସ୍‌କିନି ଲକ୍‌ କେଚ୍‌କଣ୍‌ତ ତିନାଙ୍ଗା ଇଞ୍ଜି ହୁଡ଼୍‌ନାନ୍‌, ମାତର୍‌ ଜାଗ୍ରତ୍‌ ଆତିସ୍ ହୁଡ଼଼ାଟ୍‌, ତା ପାରାଣ୍‌ ୱାରାକା ଆନାତ୍‌, କି ଇନେସ୍‌କି ଏସ୍କିନି ମାନାୟ୍‌ ଏଜ଼ୁଙ୍ଗ୍‌ ଉଣାଙ୍ଗା ଇଞ୍ଜି କେଚ୍‌କଣ୍‌ତ ହୁଡ଼ତିସ୍‌; ମାତର୍‌ ଜାଗ୍ରତ୍‌ ଆତିସ୍‌ ହୁଡ଼ାଟ୍‌, ହେୱାନ୍‌ ନାଦାର୍‌ତ ମାନାନ୍‌ ଆରି ତା ଆତିସ୍ପା ହେୱାନ୍‌ ଏସ୍କିତ ମାନାତ୍‌, ସିୟନ୍‌ ମାଡ଼ିନି ବିରୁଦ୍‌ତ ଜୁଜ୍‌ କିନାକାର୍‌ ସବୁକୁଦାନି କୁଟୁମ୍‌ ସବୁ ହେଲାକେ ଆନାର୍‌ ।

ଅବହେଲାନି ଚେତ୍‌ନା

9 ଏପେଙ୍ଗ୍‌ ଇଟାଟ୍ ଆରି ଚାନ୍ୟାଆଡ; ନିଜେ କାଣା ଆଡ; ହେୱାର୍‌ ହଚ୍‌ଚାର୍‌ନା, ମତର୍‌ ଅଙ୍ଗରୁରାସ୍‌ ଆକାୟ୍‌; ହେୱାର୍‌ ଟଲମଲ ଆନାର୍‌, ମାତର୍‌ କାଲିଂ ଉଟିତ ଆକାୟ୍‌ । 10 ଇନାକିଦେଂକି ନିତ୍ରେମାପ୍ରୁ ମି ଜପି ଜବର୍ ହୁଞ୍ଜ୍‌ନାକାର୍‌ ଜିବୁନ୍ ୱାକ୍‌ତାନ୍‌ନା ଆରି ମି ୱାନିଦିନ୍ତକାତାଇନାକାର୍‌ ଲାକେ କାଣ୍‌କୁ ଡାବାତିକ୍‌ନା ଆରି ବେଣ୍‌ବାକ୍‌ଣାୟ୍‌କିନାକାନ୍‌ ଲାକେ ମି କାପ୍ଡା ଡାବାୟ୍‌ କିତାନ୍‌ନା । 11 ଆରେ, ବାରବିନ୍‌ କେଚ୍‌କଣ୍‌ ମି କାଜିଂ ମୁଦ୍‌ଆତାକା ପତିନି ବଚନ୍‌ ଲାକେ ଆତାତ୍‌ନା, ଇନେର୍‌ ହିକିତ୍‌ ମାନାୟ୍‌ତିଂ ହେଦାଂ ହିଜ଼ି ଗୱାରି କିଜ଼ି "ଇଦାଂ ପଡ଼ି କିୟାଟ୍‌" ଇଚାନ୍‌, ହେୱାନ୍‌ ଇନାନ୍‌, "ଇଦାଂ ମୁଦ୍‌ଆତାକା, ଲାଗାଂ ଆନ୍‌ ପଡ଼ି କିଦେଂ ଆଡୁଙ୍ଗା ।" 12 ଆରେ, ହେ ପତି ହିକାଆୱିତି ଲଗାଂ ହିଜ଼ି, ଦୟା କିଜ଼ି ଇଦାଂ ପଡ଼ି କିୟା, ହେୱାନ୍‌ ଇନାନ୍‌, "ଆନ୍‌ ହିକାୱାତାକାଂ ।" 13 ଆରେ, ମାପ୍ରୁ ଇଚାନ୍‌, "ଇ ମାନାୟାର୍‌ ମାତାକେ ୱାନାର୍‌ ଆରି ହେୱାର୍‌ ଜାର୍‌ ଜାର୍‌ ମୁମ୍‌ଦ ଆରି ଅଟି ମାଦାଂ ସମାନ୍‌ କିନାର୍‌, ମାତର୍‌ ହେୱାର୍‌ ଜାର୍‌ ଜାର୍‌ ୱାସ୍କି ମା ତାଂ ଦେହା ଇଡ଼୍‌ତାର୍‌ନା ଆରି ମା ବିସ୍ରେନିକା ହେୱାର୍‌ତି ଇମ୍‌ଣି ପାଣ୍ଡ୍ରୁ, ହେଦାଂ ମାନାୟ୍‌ତାଂ ହିକାତି ବଲ୍‌ ଆନାତ୍‌ ।" 14 ଇଲାକେ ହୁଡ଼ାଟ୍‌, ଆପେଙ୍ଗ୍‌ ଇ ମାନାୟାର୍‌ ବିତ୍ରେ ର କାବାନି କାମାୟ୍‌, ଇଚିସ୍‌, କାବାନିକା ଆରି କାବାନି କାମାୟ୍‌, ଆରେ, ହେୱାର୍‌ତି ବୁଦି ମାନାୟାର୍‌ତି ବଲ୍‌ ବୁଡା ଆତାନ୍‌ ଆରି ହେୱାର୍‌ ଗିଆନ୍‌ ମାନାୟାର୍‌ ମାନବୁଦି ଡୁକ୍ୟାଆନାତ୍‌ ।

ୱାନିଦିନ୍ତିନି ଆହା

15 ଇମ୍‌ଣାକାର୍‌ ନିତ୍ରେମାପ୍ରୁତାକେ ଜାର୍‌ ଜାର୍‌ କୁଟ୍ ଡ଼଼ୁକ୍‌ନି କାଜିଂ ଏଚେକ୍‌ ସେସ୍ଟା କିନାର୍‌, ହେୱାର୍‌ ଦୁକ୍‌ନିକାର୍‌! ଆରେ, ହେୱାର୍‌ ମାଜ୍‌ଗାତ ଜାର୍‌ ଜାର୍‌ କାମାୟ୍ କିଜ଼଼ି ଇନାର୍‌, "ମାଙ୍ଗେଙ୍ଗ୍‌ ଇନେର୍‌ ହୁଡ଼୍‌ଦାନାରା ? ଆରି ମାଙ୍ଗେଙ୍ଗ୍‌ ଇନେର୍‌ ଚିନ୍‌କିଦ୍‌ନାରା ?" 16 ଏପେଙ୍ଗ୍‌ ବିସ୍ରେତିଂ ଉଲ୍‌ଟା କିତାଦେର୍‌ନା । କୁମ୍‌ରେନ୍ କି ଚିକ୍‌ଲା ଲାକେ ଗାଣାକିୟା ଆନାନ୍‌; "ଇ ମାନାୟ୍‌ ମାଙ୍ଗେଙ୍ଗ୍‌ ରଚ୍‌ଚାୱାତାନ୍‌ନା, ରଚ୍‌ଚି ଜିନିସ୍‌ କି ରଚ୍‌ଚାକାରିଂ ବିସ୍ରେ ଇଦାଂ ଇନାନ୍‌ ?" କି "ତାଦାଂ ମୁଡ଼଼େ ବୁଦି ହିଲୁତ୍‌, ରଚ୍‌ଚି ଜିନିସ୍‌ କି ରଚ୍‌ଚିମୁଣିକା ବିସ୍ରେ ଇଦାଂ ଇନାନ୍‌ ?" 17 ଏଚେକ୍‌ ଅଲପ୍‌ କାଡ଼୍‌ ପାଚେ ଲିବାନନ୍‌ କି ପାଡ଼୍ ଆହ୍‌ନି ବାଡ଼ଦ ବାର୍ତି ଆଉତ୍‌ ଆରି ପାଡ଼୍ ଆହ୍‌ନି ବାଡ଼୍ କି ରାନ୍ ଇଞ୍ଜି ଗାଣା କିୟାଆଉତ୍‌ ? 18 ଆରେ, ହେ ଦିନା ବୟିରା ପତିନି ବଚନ୍‌ ୱେନାନ୍‌, ଆରେ, ନାଣା ଆରି ମାଜ୍‌ଗା ବିତ୍ରେତାଂ ମାଜ୍‌ଗାତ କାଣ୍‌କୁ ହୁଡ଼୍‌ନାନ୍‌ । 19 ହୁଦାର୍ ମାନାୟ୍‌ ପା ନିତ୍ରେମାପ୍ରୁତାକେ ଜାର୍‌ ଜାର୍‌ ୱାରି ବାଡାୟ୍‌କିନାର୍‌ ଆରି ମାନାୟାର୍‌ ବିତ୍ରେ ଅର୍କିତ୍‌ତାର୍‌ ଇସ୍ରାଏଲ୍‌ନି ପୁଇପୁୟା ଇସ୍ୱର୍ ଦାର୍ମି ଲାକେ ନିକାର୍‌ ତାକେ ସାର୍ଦା କିନାର୍‌ । 20 ଇନାକିଦେଂକି ବାଡ଼୍‌କାସ୍‌ନି ଲକ୍‌ ଗିଣ୍ ଆତାର୍‌ନା, ନିନ୍ଦାକିନାକାନ୍‌ ବନ୍ଦ୍‌ ଆତାନ୍‌ନା ଆରି ଇମ୍‌ଣାକାର୍‌ ଅଦର୍‌ମ୍‌ କାଜିଂ କାସି ମାନାର୍‌, ହେୱାର୍‌ ୱିଜ଼଼ାର୍‌ ଚିନ୍‌ବିନ୍‌ ଆତାର୍‌ନା; 21 ହେୱାର୍‌ କାତାତ ମାନାୟ୍‌ତିଂ ଦସି କିନାର୍‌ ଆରି ଗାଡ଼୍‌ ଦୁୱେର୍‌ତ ଦସ୍‌ ବେଣ୍‌ବାକ୍‌ଣାୟ୍‌ କିନାକାର୍‌ କାଜିଂ ଡ଼ୁକା ରଚ୍‌ନାର୍‌ ଆରି କାତାହିଲ୍‌ୱାଦାଂ ଦାର୍ମିର୍‌ କାଜିଂ ମାଟ୍‌ କିନାର୍‌ । 22 ଇଲାକେ ଅବ୍ରାହାମ୍‌ତି ମୁକ୍‌ଡ଼ାୟ୍‌କାରିୟା ନିତ୍ରେମାପ୍ରୁ ଜାକୁବ ଲାତ୍ରା ବିସ୍ରେ ଇଲାକେ ଇନାନ୍‌; "ଜାକୁବ ନଂ ଲାଜାଆଉନ୍‌, କି ତା ମୁମ୍‌ ୱାଚୁତ୍‌ । 23 ମାତର୍‌ ଏଚେକାଡ଼୍‌ଦ ହେୱାନ୍‌ ମା କେଇକିତି କାମାୟ୍‌ ତା ଲାକେ ତା ହିମ୍‌ଣାକାଂ ଜାର୍‌ ବିତ୍ରେ ହୁଡ଼୍‌ନାଦେର୍‌, ହେ ପଦ୍‌ନା ହେୱାର୍‌ ମା ତର୍‌ଦିଂ ପୁଇପୁୟା ଇଞ୍ଜି ମାନି କିନାର୍‌; ଆଁ, ହେୱାର୍‌ ଜାକୁବତି ଦାର୍‌ମିତିଂ ପୁଇପୁୟା ଇଞ୍ଜି ମାନିକିନାର୍‌ ଆରି ଇସ୍ରାଏଲ୍‌ନି ପର୍‌ମେସ୍ୱର୍‌ତିଂ ପାଣ୍ଡ୍ରାନାର୍‌ । 24 ଇମ୍‌ଣାକାର୍‌ ବୁଲ୍‌କାନିମାନ୍‌, ହେୱାର୍‌ ପା ବୁଦି ପାୟାଆନାର୍‌ ଆରି ଦାବାକିନାକାର୍ ଡ଼଼ୁକ୍ତିକାତା ହିକାନାର୍‌ ।"