1 ଆତିସ୍‌ପା ଏ ମା ଆଡ଼ିଏନ୍‌ ଜାକୁବ୍‌ ଆରି ମା ବାଚିକିତି ଇସ୍ରାଏଲ୍‌, ନଂ ୱେନା; 2 ଇନେନ୍‌ ନିଙ୍ଗେଙ୍ଗ୍‌ ରଚ୍‌ଚାତାର୍‌ ଆରି ଗରପ୍‌ତାଂ ମିଙ୍ଗେଙ୍ଗ୍‌ ରଚ୍‌ଚାତାର୍‌, ଇନେର୍‌ ମିଙ୍ଗେଙ୍ଗ୍‌ ସାଇଜ କିଦ୍‌ନାର୍‌, ହେ ନିତ୍ରେମାପ୍ରୁ ଇ କାତା ଇନାନ୍‌; "ଏ ନା ଆଡ଼ିଏନ୍‌ ଜାକୁବ୍‌, ଏ ନା ବାଚିକିତି ଜିସୁରୁଣ, ପାଣ୍ଡ୍ରାମାଟ୍‌ । 3 ଇନାକିଦେଂକି ଆପ୍‌ ଏସ୍କି ଜପି ଏସ୍ ଆରି ୱାଚ୍‌ଚି ବୁଇଁ ଜପି ଏଜ଼ୁଙ୍ଗ୍‌ ୱାକ୍‌ନାସ୍‌; ଆପ୍‌ ମି ଲାତ୍ରା ଜପି ଜାର୍‌ ୱାସ୍କି ଆରି ମି ମାଜ଼ିର୍‌ ଜପି ଜାର୍‌ ଆର୍ସିବାଦ୍‌ ୱାକ୍‌ନାସ୍‌; 4 ତାପାଚେ ହେୱାର୍‌ ନାଗୁଡ଼୍‌ ଲାଗାଂ ବାଇସି ମାର୍‌କୁ ଲାକେ କାଚ୍ରା ବିତ୍ରେତାଂ ଗାଜା ଆନାତ୍‌ । 5 ରୱାନ୍‌ ଇନାନ୍‌, ଆପ୍‌ ନିତ୍ରେମାପ୍ରୁନିକାପ୍‌; ବିନ୍‌ନିକାନ୍‌ ଜାକୁବ୍‌ ତର୍‌ଦ ଜାର୍‌ତିଂ ଡାକ୍‌ପୁଟାୟ୍‌ କିନାନ୍‌; ଆରେ, ରୱାନ୍‌ ନିତ୍ରେମାପ୍ରୁତି ଉଦେସ୍‌ତ ଜାର୍‌କେଇ ସତକ୍‌ କିନାନ୍‌ ଆରି ଇସ୍ରାଏଲ୍‌ କୁଟୁମ୍‌ ତର୍‌ଦାଂ ଜାର୍‌ତିଂ ୱିଣ୍ଡି କିନାସ୍‌ ।" 6 ନିତ୍ରେମାପ୍ରୁ, ଇସ୍ରାଏଲ୍‌ନି ରାଜା ଆରି ତା ମୁକ୍‌ଡ଼ାୟ୍‌ କାରିୟା ମେଲ୍ୟାଆଦିକାର୍‌ନି ନିତ୍ରେମାପ୍ରୁ ଇ କାତା ଇନାନ୍‌; "ଆପ୍‌ ଆଗ୍‌ଦାକାପ୍‌ ଆରି ଆପ୍‌ ୱିସ୍‌ୱାକାପ୍‌, ଆରେ ମାଂ ପିସ୍ତି ପର୍‌ମେସ୍ୱର୍‌ ଆରେ ହିଲୁର୍‌ । 7 ଆପ୍‌ ହେ ପ୍ଡାନି ଲକ୍‌ତିଂ ରଚ୍‌ନିତାଂ ମା ଲାକେ ଇନେର୍ କୁକ୍‌ତାନାର୍‌ ଆରି ହେଦାଂ ହପ୍‌ନାର୍‌ ଆରି ହାର୍‌କିଜ଼଼ି ମା କାଜିଂ ତାଦାଂ ଜାତ୍‌ନାୟ୍‌କିନାନ୍‌ ? ଆରେ, ଇନା ଇନାକା ଏକାୱାନାକା ଆରି ଇନା ଇନାକା ଗିଟାଆଦ୍‌ନାତ୍‌, ହେଦାଂ ହେୱାର୍‌ ହପେର୍‌ । 8 ଏପ୍‌ କମ୍ପାନିତ କି ପାଣ୍ଡ୍ରାମାଟ୍‌; ଆପ୍‌ ଇନାକା ଆଗେତାଂ ମି ତାକେ ହପ୍‌ୱାତାଦେର୍‌ନା ଆରି ମିଙ୍ଗେଙ୍ଗ୍‌ ହେଦାଂ ୱେଚ୍‌ଚା ୱାତାପ୍‌ନା ? ଏପ୍‌ ମା ସାକି । ମା ବିନ୍‌ନିକା ଆରେ କି ପର୍‌ମେସ୍ୱର୍‌ ମାନାନ୍‌ ? ବିନେନି ସାକ୍ତିନି ପେନ୍‌କୁ; ଆପ୍‌ ଇନେରିଂ ପୁନୁପ୍‌ ।"

9 ଇମ୍‌ଣାକାର୍‌ କାର୍‌ଚି ପୁତ୍‌ଡ଼ାତିଂ ରଚ୍‌ନାର୍‌, ହେୱାର୍‌ ୱିଜ଼଼ାର୍‌ ଆହାର୍‌ ଆରି ହେୱାର୍‌ତି ମାନ୍ତି ବିସ୍ରେନିକା ଉପ୍‌କାର୍‌ ଆଉତ୍‌; ହେୱାର୍‌ ଇନେସ୍‌କି ଲାଜାଆନାର୍‌, ଇଦାଂକାଜିଂ ହେୱାର୍‌ତି ଜାର୍‌ ସାକିର୍‌ ହୁଡ଼୍‌ନାର୍‌, କି ପୁନୁର୍‌ । 10 ଇନାକା ଇମ୍‌ଣି ବିସ୍ରେ ଉପ୍‌କାର୍‌ ଆକାୟ୍‌, ଇଲାକେ ପେନ୍‌କୁ ଇନେର୍‌ ରଚ୍‌ଚାର୍‌ନା, କି କାର୍‌ତି ପୁତ୍‌ଡ଼ା ଇନେର୍‌ ଚାଚ୍‌ତ ୱାକ୍‌ତାନ୍‌ନା ? 11 ହୁଡ଼ାଟ୍‌, ତା ପୁଜା କିନାକାର୍‌ ୱିଜ଼଼ାର୍‌ ଲାଜା ଆନାର୍‌; ଆରେ, ରଚ୍‌ନାକାର୍‌ ମାନାୟ୍‌ ମାତର୍‌; ହେ ୱିଜ଼଼ାର୍‌ ରବେ ଆୟେର୍‌, ହେୱାର୍‌ ନିଲେର୍‌; ହେୱାର୍‌ କମ୍ପା ଆନାର୍‌, ହେୱାର୍‌ ରଞ୍ଜେମାଟ୍‌ ଲାଜା ଆନାର୍‌ । 12 କାମ୍‌ରେନ୍‌ ଲୱା ଅସ୍ତର୍‌ ରଚ୍‌ଚି କେତ୍‌ତି ନାଣିଗଡାକାଂ କାମାୟ୍‌ କିନାର୍‌ ଆରି ମୁଟ୍‌ଲାତାଂ ହେଦାଂ କଲ୍‌ଜି ଜାର୍‌ ବାଡ଼୍‌କାସ୍ତାଙ୍ଗ୍‌ ହେଦାଂ ରଚ୍‌ନାନ୍‌; ଆଁ, ହେୱାନ୍‌ ନାସ୍କି ଆନାନ୍‌ ଆରି ତା ବାଡ଼୍‌କାସ୍‌ ଉଣାନାତ୍‌, ହେୱାନ୍‌ ଏସ୍‌ଉଣ୍‌ୱାଦାଂ ୱାହ୍‌ନାନ୍‌ । 13 ବାଡାୟ୍‌ ନୁଲ୍‌ ଟାଣାୟ୍‌ କିନାନ୍‌; ହେୱାନ୍‌ ବାନାକାଡି ଲାହାଂ ଚିନ୍‌ ହିନାନ୍‌, ହେୱାନ୍‌ ଚିତ୍‌ର୍‌ପାଲ୍‌ ବୁଲାଇ କିଜ଼଼ି ଲାଚ୍‌ନି ଜନ୍ତ୍ରର୍‌ ଲାକେ ଚିନ୍‌ ହିନାନ୍‌ ଆରି ଇଞ୍ଜ ବାହା କିଇକିନି କାଜିଂ ମାନାୟାର୍‌ ଆଡିୟା ଆରେ ହଲ୍‌ନାକା ଇସାପ୍ରେ ହେଦାଂ ରଚ୍‌ଚାନାର୍‌ । 14 ହେୱାନ୍‌ ତା କାଜିଂ ଏରସ୍‌ ମାର୍‌ ରାଜ୍‌ନାନ୍‌, ତର୍ସା ଆରି ଆଲନ୍‌ ମାର୍‌ ଅନାନ୍‌, ହେୱାର୍‌ ରାନ୍ତିମାର୍‌ ବିତ୍ରେ ର ମାର୍‌ ତା କାଜିଂ ଆଟ୍‌ୱା କିନାନ୍‌; ହେୱାନ୍‌ ଦେବଦାରୁ ମାର୍‌ ରୁଜ୍‌ନାନ୍‌ ଆରି ବାର୍‌ହା ହେଦାଂ ଗାଜାୟ୍‌ କିନାତ୍‌ । 15 ଇଦାଂପାଚେ ହେଦାଂ ମାନାୟାର୍‌ତି କାଡିକିନି ୱେସ୍‌ଗୁ ଆନିକ୍‌; ହେୱାର୍‌ ହେବେନି ଅଲପ୍‌ ଅଜ଼଼ି ନାଣି ଆହି କିନାର୍‌; ଆରେ, ହେୱାର୍‌ ହେଦାଂ କାଡି କିଜ଼ି ରୁଟି ମାଙ୍ଗ୍‌ନାର୍‌; ଆରେ, ର ପେନ୍‌ କିଜ଼ି ହେଦାଂ ପୁଜା କିନାର୍‌; ପର୍‌ମେସ୍ୱର୍‌ ର କାର୍‌ତି ପୁତ୍‌ଡ଼ା କିଜ଼ି ହେଦାଂ ଆଗ୍‌ଦ ଡାଣ୍ଡାହାଣ୍‌ ମାଗ୍‌ନାର୍‌ । 16 ହେୱାନ୍‌ ହେବେନି ର ବାଗ୍‌ ନାଣିତ ଦେହ୍‌ନାନ୍‌; ବିନ୍‌ ନିକିଂ ହୁଦାଂ ହେୱାନ୍‌ ଜେଇ ୱାନ୍‌ଞ୍ଜି ତିନାନ୍‌ ଆରି ହୁଜ୍‌ତି ଜେଇ ତିନ୍ଞ୍ଜି ପାନ୍‌ଞ୍ଚାନ୍‌, ଆରେ ହେୱାନ୍‌ ନାଣି କାୟ୍‌ଜି ଇନାନ୍‌, ଆଁ, ଆପ୍‌ ଉହୁମ୍‌ ଆତାପ୍‌, ଆପ୍‌ ନାଣି ଅଜଡ଼୍‌ ହୁଡ଼୍‌ତାପ୍‌ । 17 ଆରେ, ପର୍‌ମେସ୍ୱର୍‌ ତାପାଚେ ଲଡ଼ାନିକିଂ ହୁଦାଂ ର ପେନ୍‌କୁ, ଜାର୍‌ତି କାର୍‌ତି ପେନ୍‌କୁ ରଚ୍‌ନାର୍‌; ହେୱାର୍‌ ତା ଆଗ୍‌ତ ଡାଣ୍ଡା ହାଡ଼୍‌ ମାଗ୍‌ଜି ପୁଜା କିନାର୍‌ ଆରି ତା ତାକେ ପାର୍ତାନା କିଜ଼ି ଇନାନ୍‌, "ମାଙ୍ଗେଙ୍ଗ୍‌ ରାକ୍ୟା କିଦା, ଏନ୍‌ ମା ପେନ୍‌ଦି ।" 18 ହେୱାର୍‌ ପୁନୁର୍‌, କି ଏତୁ କିଉର୍‌, ଇନାକିଦେଂକି ହେୱାର୍‌ ଇନେସ୍‌କି ହୁଡ଼୍‌ଦେଂ ଆଡୁର୍‌, ବୁଦି ହିଲିକାଜିଂ ହେୱାର୍‌ତି କାଣ୍‌କୁ ଆରି ହେୱାର୍‌ ଇନେସ୍‌କି ବୁଜାଦେଂ ଆଡୁର୍‌, ଇଦାଂକାଜିଂ ହେୱାର୍‌ତି ୱାସ୍କି ଡାବାଆତାତ୍‌ନା । 19 ଇନେର୍‌ ମାନ୍ତ ଇଟୁର୍‌, କି ଇଦାଂ ଇନି କାଜିଂ ଇନେରିଂ ଗିଆନ୍‌ କି ବୁଦି ହିଲୁତ୍‌ ଜେ, "ହେବେନି ର ବାଗ୍‌ ଅଜ଼଼ି ଆପ୍‌ ନାଣିତ କାଡି କିତାପ୍‌ନା ଆରି ହେବେନି କାଚାନାକା; ନାଣିଗଡାଙ୍ଗ୍‌ ଅଜ଼଼ି ରୁଟିଂ ମାଙ୍ଗ୍‌ତାପ୍‌ନା ଆରି ଜେଇ ପାଗ୍ କିଜ଼଼ି ମାଙ୍ଗ୍‌ଜି ଚିଚାପ୍‌, ତାପାଚେ ଲଡ଼ାନିକା ଅଜ଼଼ି ଇଚିସ୍‌ ଗିଣ୍‌ବାର୍ତି ଜିନିସ୍‌ ରଚ୍‌ନାସ୍‌ ? ଆପ୍‌ କି ର ମାର୍‌ ଆଗ୍‌ଦ ଡାଣ୍ଡାହାଣ୍‌ ମାଗ୍‌ନାସ୍‌ ? 20 ହେୱାନ୍‌ ନିସ୍‌ ତିନାନ୍‌; ହେୱାନ୍‌ ଇନେସ୍‌କି ଜାର୍‌ତିଂ ପାରାଣ୍‌ ରାକ୍ୟା କିଦେଂ ଆଡୁନ୍‌, କି ମା ତିନା କେଇ ବାଗାଂ କି ମିଚ୍‌ ହିଲୁତ୍‌, ଇଦାଂ ଇଞ୍ଜେଙ୍ଗ୍‌ ଆଡୁତ୍‌, ଇଦାଂ କାଜିଂ ବୁଲ୍‌କାନି ଜିବୁନ୍ ତାଙ୍ଗେଙ୍ଗ୍‌ ବିନ୍‌ହାଜ଼଼ିନିପ ହାଲିକିତାର୍‌ନା ।"

21 ଏ ଜାକୁବ୍‌, ଏ ଇସ୍ରାଏଲ୍‌, ଏନେଙ୍ଗ୍‌ ଇସବୁ କାତା ଏତ୍‌ କିୟା, ଇନାକିଦେଂକି ଏନେଙ୍ଗ୍‌ ମା ଆଡ଼ିଏନ୍‌; ଆପ୍‌ ନିଙ୍ଗେଙ୍ଗ୍‌ ରଚ୍‌ଚାତାପ୍‌ନା; ଏନ୍‌ ମା ଆଡ଼ିଏନ୍‌ତି; ଏ ଇସ୍ରାଏଲ୍‌, ଏନେଙ୍ଗ୍‌ ମା ହୁଦାଂ ମେଙ୍ଗୁୟ୍ । 22 ଆପ୍‌ ମି ଅଦାର୍ମି ମେହାତି ଉମ୍‌ଜିହାନି ଗୁକ୍‌ଟାନି ନିୟାୟ୍‌ ଆରି ମି ପାପ୍‌ସବୁ ବାଦାଡ଼୍‌ ଲାକେ ହାମାନ୍‌ କିତାପ୍‌ନା; ମା ଲାଗାଂ ମାସ୍‌ଦି ୱାଡ; ଇନାକିଦେଂକି ଆପ୍‌ ମିଙ୍ଗେଙ୍ଗ୍‌ କେମା କିତ୍‌ତାପ୍‌ନା । 23 ଏ ଆକାସିଂ, କେରାଟ୍‌, ଇନାକିଦେଂକି ନିତ୍ରେମାପ୍ରୁ ଇଦାଂ ସମାନ୍‌ କିତାନ୍‌ନା; ଏ ପୁର୍ତିନି ତାରେନ୍‌ବାହା ସବୁ, ୱାରିନି ଗାର୍‌ଜେନ୍‌ କିୟା; ଏ ମାଡ଼଼ିଂ, ଏ ରାନ୍‌ ଆରି ତାରେନ୍‌ନି ସବୁ ମାର୍‌, ଏପେଙ୍ଗ୍‌ ଗାଜା କାଟ୍‌ତାଂ କେରାଟ୍‌; ଇନାକିଦେଂକି ନିତ୍ରେମାପ୍ରୁ ଜାକୁବ୍‌ତିଙ୍ଗ୍‌ ମୁକ୍‌ଡ଼ାୟ୍‌ କିତାନ୍‌ନା ଆରି ଇସ୍ରାଏଲ୍‌ ବିତ୍ରେ ଜାର୍‌ତିଂ ଜାଜ୍‌ମାଲ୍‌ କିନାନ୍‌ । 24 ମି ମୁକ୍‌ଡ଼ାୟ୍‌ କାରିୟା ନିତ୍ରେମାପ୍ରୁ, ଗରପ୍‌ତାଂ ଜେ ମିଙ୍ଗେଙ୍ଗ୍‌ ରଚ୍‌ଚାତାନ୍‌, ହେୱାନ୍‌ ଇଦାଂ ଇନାନ୍‌; "ଆପ୍‌ ନିତ୍ରେମାପ୍ରୁ, ଆପ୍‌ ସବୁ କାମାୟ୍‌ ସାଦୁନ୍‌ କିନାପ୍‌ ଆନ୍‌ ରୱାଙ୍ଗ୍‌ନେ ଆକାସ୍‌ତିଂ ଲାମାୟ୍‌ କିନାଙ୍ଗ୍‌; ଆନ୍‌ ପୁର୍ତିତିଂ ଅହାର୍‌ କିନାଙ୍ଗ୍‌; ନା ହାଙ୍ଗ୍‌ ଇନେନ୍‌ ? 25 ଆପ୍‌ ମିଚ୍‌ନିକାରିଂ ହିଆତି ଇଟ୍‌କାଡ଼୍ ସବୁ ପୁରାୱାକା କିନାସ୍‌ ଆରି ଚୁଟ୍‌କିୟାରିଂ ଆରାୟ୍‌ କିନାପ୍‌; ଆପ୍‌ ଗିଆନିରିଂ ପାଚ୍‌ବାଗାଂ ପେଜ୍‌ନାପ୍‌ ଆରି ହେୱାର୍‌ତି ଗିୟାନ୍‌ ମୁରୁକ୍‌ନିକା କିନାପ୍‌; 26 ଆପ୍‌ ଜାର୍‌ ଆଡ଼ିଏନ୍‌ତି ବଚନ୍‌ ପୁରା କିନାପ୍‌ ଆରି ଜାର୍‌ ଦୁତ୍‌ର୍‌ ଜଜନା ପୁରା କିନାପ୍‌; ଆପ୍‌ ଜିରୁସାଲମ୍‌ ବିସ୍ରେ ଇନାପ୍‌, ହେଦାଂ କୁଚ୍‌ଚି ଲାକେ ଆନାତ୍‌ ଆରି ଜିହୁଦାନି ଗାଡ଼୍‌ନିକାର୍‌ ବିସ୍ରେ ଇନାପ୍‌, ହେ ସବୁ ଆରେରଚ୍‌ଚ୍ୟା ଆନାତ୍‌, ଆରେ ଆପ୍‌ ହେବେନି ଡ୍ରିଂନ୍ତି ବାହା ସବୁ ଆରେରଗ ହାଜ଼଼ି ବୁଡାୟ୍‌ କିନାସ୍‌; 27 ଆପ୍‌ ଡେଙ୍ଗା ନାଗୁଡ଼୍‌ତିଂ ଇନାପ୍‌, ୱାଚା; ଆରେ ଆପ୍‌ ମି ନାଗୁଡ଼୍‌ ସବୁତିଂ ୱାଚି କିନାସ୍‌; 28 ଆପ୍‌ କରସ୍‌ ବିସ୍ରେ ଇନାପ୍‌, ହେୱାନ୍‌ ମା ମାନ୍ଦାନି ଗଡ଼଼ିଆ ଆରି ମା ଇଚା ସାଦୁନ୍‌ କିନାକାନ୍‌; ହେୱାନ୍‌ ଜିରୁସାଲମ୍‌ ବିସ୍ରେ ଇନାନ୍‌, ହେଦାଂ ଆରେରଚ୍ୟା ଆନାତ୍‌ ଆରି ମନ୍ଦିର୍‌ତିଂ ଇନାଦେର୍‌, ମି ମୁଡ଼୍‌କୁନାଦି ରଚ୍‌ଚ୍ୟା ଆନାତ୍‌ ।"