1 ଏ ଇସ୍ରାଏଲ୍‌ ତର୍‌ଦ ଡାକ୍‌ପୁଟା ଆରି ଜିହୁଦାନି ନାଗୁଡ଼୍‌ଗୁଟିତାଂ ଉବ୍‌ଜାତି ଜାକୁବ୍‌ ଲାତ୍ରା, ଏପେଙ୍ଗ୍‌ ଇ କାତା ୱେନାଟ୍‌; ଏପେଙ୍ଗ୍‌ ନିତ୍ରେମାପ୍ରୁତି ତର୍‌ଦାଂ ପାର୍ମାଣ୍ କିନାଦେରା ଆରି ଇସ୍ରାଏଲ୍‌ନି ପର୍‌ମେସ୍ୱର୍‌ତି ତର୍‌ଦ କେର୍‌ନାଦେରା, ମାତର୍‌ ହାତ୍‌ପାତ କି ଦାର୍ମିକାତ ଆକାୟ୍‌ । 2 ଇନାକିଦେଂକି ହେୱାର୍‌ ଜାର୍‌ତିଂ ପୁଇପୁୟା ଗାଡ଼୍‌ନି ଲକ୍‌ ଇଞ୍ଜି ଡାକ୍‌ପୁଟା କିନାର୍‌ ଆରି ଇସ୍ରାଏଲ୍‌ନି ପର୍‌ମେସ୍ୱର୍‌ ଜପି ବାର୍ସି ଇଟ୍‌ନାଦେର୍‌; ତା ତର୍‌ ମେଲ୍ୟାଆଦିକାର୍‌ନି ନିତ୍ରେମାପ୍ରୁ । 3 ଆପ୍‌ ଆଗେ କାଡ଼୍‌ନି କାତା ପ୍ଡାନି କାଡ଼୍‌ଦାଂ ହପ୍‌ତାପ୍‌ନା; ଆଁ, ହେଦାଂ ମା ୱେଇଦାଂ ୱେଚ୍‌ୟା ଆତାତ୍‌ ଆରି ହେଦାଂ ଆପ୍‌ ହପ୍‌ତାପ୍‌; ଆପ୍‌ ହେଦାଂ କିତାପ୍‌ ଆରି ହାଚାଟ୍ରେ ହେ ସବୁ ଗିଟାଆତାତ୍‌ । 4 ଏପ୍‌ ଅମାନ୍ୟ, ମି ଗାଡେଲ୍‌ ଲୱାହାକ୍‌ନାଡ଼ା ଆରି ମି ନିଦାଣ୍‌ ପିତାଡ଼୍‌ ଲାକେ ଇଞ୍ଜି ଆପ୍ ପୁଚାପ୍‌ । 5 ଇଦାଂକାଜିଂ ଆପ୍‌ ପ୍ଡାନି କାଡ଼୍‌ଦାଂ ମି କାଜିଂ ହେଦାଂ ହପ୍‌ତାତାପ୍‌: ହେଦାଂ ଗିଟାନି ଆଗେ ମିଙ୍ଗେଙ୍ଗ୍‌ ୱେଚ୍‌ଚାତାପ୍‌; ନଲେ ଏପ୍‌ ୱେଚ୍‌ଚା, "ମା ପେନ୍‌କୁ ଇଦାଂ ଇନିକ୍‌, ମା କାର୍‌ତାକା ଆରି ଚାଚ୍‌ତ ୱାକ୍‌ତି ପୁତ୍‌ଡ଼ା ଇଦାଂ ବଲ୍‌ କିତାଂନା ।" 6 ଏପ୍‌ ୱେଚାଦେର୍‌ନା; ଇ ସବୁ ହୁଡ଼ାଟ୍‌ ଆରି ଏପେଙ୍ଗ୍‌ କି ହେଦାଂ ହପୁଦେର୍‌ ? ଇ ସମୁତାଂ ଆପ୍‌ ମିଙ୍ଗେଙ୍ଗ୍‌ ପୁନି ବିସ୍ରେ, ଇଚିସ୍‌, ମି ପୁନ୍‌ୱିତି ଡ଼଼ୁକ୍ତି ବିସ୍ରେ ଚଚ୍‌ଚାପ୍‌ନା । 7 ହେ ସବୁ ଆଗେ କାଡ଼୍‌ଦାଂ ଆକାୟ୍‌, ମାତର୍‌ ନଙ୍ଗ୍‌ ଉପ୍‌ଜାଣ୍‌ ଆତାତ୍‌; ନେଞ୍ଜେଙ୍ଗ୍‌ନି ଆଗେ ଏପ୍‌ ହେଦାଂ ୱେନ୍‌ୱାତାଦେର୍‌; ନଲେ ହୁଡ଼ାଟ୍‌, "ଆପ୍‌ ହେଦାଂ ସବୁ ପୁଚାପ୍‌ନା ।" 8 ହାତ୍‌ପାନିକା, ଏପ୍‌ ୱେନ୍‌ୱାତାଦେର୍‌; ଏପ୍‌ ପୁନ୍‌ୱାତାଦେର୍‌; ଆଗେ ମି କିତୁଲିଂ ଜେୟାୱାଦାଂ ମାଚିକ୍‌; ଇନାକିଦେଂକି ଏପ୍‌ ଜେ ବେସି ବିସାସ୍‌ତ ବିସ୍‌ହିନି ଲକ୍‌ ଆରି ଗର୍‌ବ୍‌ତାଂ ଅଦାର୍ମିନିକାଦେର୍‌ ଇଞ୍ଜି ତର୍‌ ଆଜ଼଼ି ମାଚାଦେର୍‌, ଇଦାଂ ଆପ୍‌ ପୁଚାପ୍‌ । 9 ଆପ୍‌ ଇନେସ୍‌କି ମିଙ୍ଗେଙ୍ଗ୍‌ ବୁଡାୟ୍‌ କିଦୁପ୍‌, ଇଦାଂ କାଜିଂ ଆପ୍‌ ଜାର୍ ତର୍‌ କାଜିଂ ଜାର୍‌ କାକ୍ରି ଉଣାକିନାପ୍‌ ଆରି ଜାର୍‌ ୱାରିକିୟ୍‌କିନି କାଜିଂ ମିଦାଂ ଟେବା ଆତାତ୍‌ । 10 ହୁଡ଼ାଟ୍‌, ଆପ୍‌ ମିଙ୍ଗେଙ୍ଗ୍‌ ନିର୍ମଲ୍‌ କିତ୍‌ତାପ୍‌ନା, ମତର୍‌ ରୁପା ଲାକେ ଆକାୟ୍‌; ମତର୍ ଆପ୍‌ ନିଙ୍ଗେଙ୍ଗ୍ ଦୁକ୍‌ଲାଗ୍‌ଦି ନାଣିତ ଉମାଇତ ମିଂ ପରିକ୍ୟା କିତ୍‌ତାପ୍‌ନା । 11 ଆପ୍‌ ଜାର୍‌ କାଜିଂ, କେବଲ୍‌ ଜାର୍‌ କାଜିଂ ହେଦାଂ କିନାସ୍‌; ଇନାକିଦେଂକି ମା ତର୍‌ ଇନାକିଦେଂ ରାଡ଼ା ଆନାତ୍‌ ? ଆରେ, ଆପ୍‌ ଜାର୍ ଗାଜା ଜାଜ୍‌ମାଲ୍‌ ବିନ୍‌ଲଗାଂ ହିଉସ୍‌ ।

12 ଏ ଜାକୁବ୍‌, ଏ ମା କୁକ୍ୟାତି ଇସ୍ରାଏଲ୍‌, ମା ବଚନ୍‌ତ ମାନ୍‌ଦିୟାନ୍‌ କିୟା; ଆପ୍ ହେୱାପ୍‌ ଆନାପ୍‌; ଆପ୍‌ ଆରମ୍‌ ଆରି ସେସ୍‌ ନିକାପ୍‌ । 13 ଆରେ, ମା କେଇ ପୁର୍ତିନି ମୁଡ଼୍‌କୁନାଦି ରଚ୍‌ଚାପ୍‌ନା ଆରି ମା ତିନା କେଇ ଆକାସ୍‌ନିକା ମେଙ୍ଗି କିତାୟ୍‌ନା; ଆପ୍‌ ହେୱାରିଂ କୁକ୍‌ତିସ୍‌, ହେୱାର୍‌ ରବେ ନିଲ୍‌ନାର୍‌ । 14 ଏପ୍‌ ୱିଜ଼଼ାଦେର୍‌ ରବେ ଆଜ଼଼ି ୱେନାଟ୍‌; ହେୱାର୍‌ ବିତ୍ରେ ଇନେର୍‌ ଇସବୁ ହପ୍‌ତାର୍‌ନା ? ନିତ୍ରେମାପ୍ରୁ ହେୱାନିଂ ଜିଉ ନତ୍‌ତାନ୍‌ନା; ହେୱାନ୍‌ ବାବିଲ୍‌ ଜପି ତାଦି ମାନ୍ତିକାତା ପୁରା କିନାନ୍‌ ଆରି କଲଦିୟର୍‌ ଜପି ହେୱାନ୍‌ତି କେଇ ମାନାତ୍‌ । 15 ଆପ୍‌, ଆପ୍‌ ନେ ବଚନ୍‌ ଇଚାପ୍‌ନା; ଆଁ, ଆପ୍‌ ତାଙ୍ଗେଙ୍ଗ୍‌ କୁକ୍‌ତାପ୍‌ନା; ଆପ୍‌ ତାଙ୍ଗେଙ୍ଗ୍‌ ତାତାପ୍‌ନା; ଆରେ ହେୱାନ୍‌ ଜାର୍‌ ହାଜ଼ିତ କିତିକାମାୟ୍‌ତ ପୁରା ଆନାତ୍‌ । 16 ଏପେଙ୍ଗ୍‌ ମା ଲାଗାଂ ୱାଜ଼଼ି ଇ କାତା ୱେନାଟ୍‌; ଆପ୍‌ ପର୍‌ତୁମ୍‌ତାଂ ଡ଼ୁକ୍‌ନିତ ଇନ୍‌ୱାତାପ୍‌ନା; ହେଦାଂ ଆଜ଼଼ିମାନି ସମୁତାଂ ଆପ୍‌ ହେବେ ମାନାପ୍‌; ଆରେ, ନଙ୍ଗ୍‌ ମାପ୍ରୁ, ନିତ୍ରେମାପ୍ରୁ ନାଙ୍ଗ୍‌ ଆରି ତା ୱାସ୍କିତିଂ ପକ୍‌ତାତାନ୍‌ନା ।

17 ନିତ୍ରେମାପ୍ରୁ ମି ମୁକ୍‌ଡ଼ାୟ୍‌କାରିୟା, ଇସ୍ରାଏଲ୍‌ନି ଦାର୍‌ମି ଲାକେ, ଇ କାତା ଇନାନ୍‌; "ଆପ୍‌ ନିତ୍ରେମାପ୍ରୁ, ମି ପର୍‌ମେସ୍ୱର୍‌, ମି ଉପ୍‌କାର୍‌ କିଦ୍‌ନାକାନ୍‌ ହିକ୍ୟା ହିଦେନ୍‌, ମି ହାନି ହାଜ଼଼ିତ ମିଙ୍ଗେଙ୍ଗ୍‌ କାଡାୟ୍‌ କିଦ୍‌ନାପ୍‌ । 18 ଏପ୍‌ ଜଦି ମା ବଲ୍‌ତ ମାନ୍‌ଦିୟାନ୍‌ କିତାଦେର୍‌ମା, ତେବେ ମି ସୁସ୍ତା ନାଗୁଡ଼୍‌ ଲାକେ ଆରି ମି ଦାର୍ମିନିକା ହାମ୍‌ଦୁର୍‌ନି ଲଡ଼ି ଲାକେ ଆତ୍‌ତାତ୍‌ମା; 19 ମି ଲାତ୍ରା ପା ବାଲ୍ୟା ଲାକେ ଆରି ମି ନେତେର୍‌ନି ହିମ୍‌ଣାଙ୍ଗ୍‌ ହେବେନି ଗୁଣ୍ଡା ଲାକେ ଆତାଦେର୍‌ମା; ତା ତର୍‌ ମା ମୁମ୍‌ଦାଂ ଚିନ୍‌ବିନ୍ କି ବୁଡା ଆୱାତାତ୍‌ମା । 20 ଏପେଙ୍ଗ୍‌ ବାବିଲ୍‌ତାଂ ହସିହାଲାଟ୍‌, କଲଦିୟର୍‌ ବିତ୍ରେତାଂ ହନାଟ୍‌; ଏପେଙ୍ଗ୍‌ କେର୍‌ନି ଗାଜେର୍‌ତାଂ ସୁଣାୟ୍‌ କିଜ଼଼ି ୱେଚାଟ୍‌, ପୁର୍ତିନି ହାରିହାର୍‌ ପାତେକ୍‌ ଇଦାଂ ହପ୍‌ଚି ୱେଚାଟ୍‌; ଏପେଙ୍ଗ୍‌ ୱେଚାଟ୍‌, ନିତ୍ରେମାପ୍ରୁ ଜାର୍‌ ଆଡ଼ିଏନ୍‌ ଜାକୁବ୍‌ତିଂ ମୁକ୍‌ଡ଼ାୟ୍‌ କିତ୍‌ତାନ୍‌ନା ।" 21 ଆରେ, ହେୱାନ୍‌ ବାଲିବାଟାତିଂ ହିଜ଼଼ି ହେୱାରିଂ ତାଙ୍ଗି କିନିହିଂ ହେୱାର୍‌ ଏସ୍କି ଆୱାତାର୍‌, ହେୱାନ୍‌ ହେୱାର୍‌ କାଜିଂ କାଲ୍‌ଦାଂ ଏଜ଼ୁଙ୍ଗ୍‌ ପିଣ୍ଡିକିତାନ୍‌, ଆରେ ହେୱାନ୍‌ କାଲ୍‌ଦାଂ କାଣ୍ଡ୍‌ୟାକାବ୍ରା କିତାନ୍‌, ଆରେ, ହେବେତାଂ ଏଜ଼ୁଙ୍ଗ୍‌ ହତ୍‌ତିକ୍‌ । 22 ନିତ୍ରେମାପ୍ରୁ ଇଚାନ୍‌, "ବାନ୍ୟା ମାନାୟ୍‌ତିଂ ଅଲପ୍‌ ପା ସୁସ୍ତା ହିଲୁତ୍‌ ।"