1 ହାମ୍‌ଦୁର୍‌ ଲାଗେନି ବାଟା ବିସ୍ରେନି ବେଣ୍‌ବାକ୍‌ଣାୟ୍‌କିନାକା । ହେଦାଂ ତିନା ଦିଗ୍‌ତ ବେସି ଦେହାତାଂ ହୁଜ଼଼ାୱାଣି ବାଟାତାଂ, ର ବୟଙ୍କାର୍‌ ଦେସ୍ତାଂ ୱାନାତା । 2 ର ଦୁକ୍‌ନିକା କ୍ଡେଞ୍ଜ୍‌କଣ୍‌ ମା କାଜିଂ ୱେଚ୍‌ୟା ଆତ୍‌ତାତ୍‌ନା; ବିସାସ୍‌ତ ବିସ୍‌ହିନାକାର୍‌ ବିସ୍ ହିନାରା ଆରି ମ୍ଡାକେନ୍‌ ମ୍ଡାନାନା । ଏ ଏଲମ, ଜପି ହାଲା; ଏ ମାଦିୟେ, ବନ୍ଦ୍‌ କିୟା; ଆନ୍‌ ହେବେନି କାନ୍ଦାଣ୍‌ କାଟ୍‌ସବୁ ବନ୍ଦ୍‌କିନାଙ୍ଗା । 3 ଇଦାଂକାଜିଂ ନା ମ୍ଡେଙ୍ଗ୍‌ନନି ଲାକେ ନନାକାତ ପୁରାଆନାତା; ଗାଟାନାକାଦେଲ୍‌ନି ନନାକା ଲାକେ ନନାକା ନାଙ୍ଗେଙ୍ଗ୍‌ କାଟି କିଦ୍‌ନାତା; ଆନ୍‌ ଇ ଲାକେ ବିପ୍‌ତି ଜେ, ଆନ୍‌ ୱେନୁଙ୍ଗା; ଆନ୍‌ ଇଲାକେ ବିଲ୍‌କି ଜେ, ଆନ୍‌ ହୁଡ଼଼ୁଙ୍ଗା । 4 ନା ୱାସ୍କି ତରହର ଲାଗ୍‌ଦାନାତା, ବେସିବୁଡାନାକା ନାଙ୍ଗେଙ୍ଗ୍‌ ପାଣ୍ଡ୍ରୁ ହତ୍‌ନାତା; ଇମ୍‌ଣି ମ୍ଡିକାହାରେସ୍‌ ଆନ୍‌ ବାବି କିତାଂ, ନା କାଜିଂ ତରହରନି କାରଣ୍‌ ଆନାତା । 5 ହେୱାର୍‌ ପାଟା ରଚ୍‌ନାର୍‌, ହେୱାର୍‌ ବାହା ରଚ୍‌ନାର୍‌, ହେୱାର୍‌ ତିନାର୍‌, ହେୱାର୍‌ ଉଣାର୍‌; ଏ ଆଦିକାରିୟାର୍‌, ନିଙ୍ଗାଟ୍‌, ୱାଡୁ ଚିକାଣ୍ କାସାଟ୍‌ । 6 ଇନାକିଦେଂକି, ମାପ୍ରୁ ନାଙ୍ଗେଙ୍ଗ୍‌ ଇ କାତା ଇନ୍‌ଞ୍ଚାନ୍‌ନା, "ହାଲା, ର କାନାକାନିଂ ବାଚି କିୟାଟ୍‌; ହେୱାନ୍‌ ଇନାକା ହୁଡ଼୍‌ନାନ୍‌, ହେଦାଂ ୱେଚ୍‌ଚେନ୍‌; 7 ଆରେ, ହେୱାନ୍‌ ଏଚେକାଡ଼୍‌ଦ ର ଦଲ୍‌ ମେଲ୍ୟାର୍‌, ରି ଦଲ୍‌ ଗଡ଼଼ାଦୁମ୍‌ତାକାନ୍, ର ଦଲ୍‌ ଗଦମେଲ୍ୟାର୍‌ ଆରି ର ଦଲ୍‌ ତାଙ୍ଗ୍‌ନିମେଲ୍ୟାର୍‌ ହୁଡ଼୍‌ନାଦେର୍‌, ହେପଦନା ହେୱାନ୍‌ ମାନ୍‌ଦିୟାନ୍‌ କିଜ଼ି ଏଚେକ୍‌ ଜାତୁନ୍‌ତାଂ କିତୁଲିଂ ୱେନେନ୍‌ ।" 8 ତାପାଚେ ହେୱାନ୍‌ ସିୟଁ ଲାକେ ଗାଜା କାଟ୍‌ କିଜ଼ି ଇଚାନ୍‌, "ଏ ମାପ୍ରୁ, ଆନ୍‌ ୱେଡ଼ାଲିଂ କାନି ବାହାତ କାନି ଇଞ୍ଜ ନିଲ୍‌ଚି ମାଚାଙ୍ଗ୍‌ ଆରି ଏଚେକ୍‌ ନାଣା ଆତାତ୍‌ ଆନ୍‌ ଜାର୍‌ ବାହାତ ୱାନାଙ୍ଗା;" 9 ଆରେ, ପର୍‌ମେସ୍ୱର୍‌ ଇଚାନ୍‌ ହୁଡ଼ା, ଇବେ ର ଦଲ୍‌ ଲକ୍‌ ରି ରି କୁଦା ଗଡ଼ାମେଲ୍ୟାର୍‌ ଆଜ଼ି ୱାନାରା । ଆରେ, ହେୱାର୍‌ ୱେଇଦିଂୱେଇ କିଜ଼ି ଇଚାନ୍‌, "ବାବିଲ୍‌ ଆର୍‌ତାନ୍‌; ଆରି ତା କାର୍‌ତି ପୁତ୍‌ଡ଼ାଂ ସବୁ ଡ୍ରିଙ୍ଗ୍‌ଜି ଦୁଡ଼ିତମେହାତିକ୍‌ ।"

10 ଏ ନା ଇସ୍ରାଏଲ୍‌ନି ଲକୁ ଆରି ନା କାମାୟ୍‌ନି ତାସ୍‌, ଆନ୍‌ ଇସ୍ରାଏଲ୍‌ ପର୍‌ମେସ୍ୱର୍‌ ଆଦିକାର୍‌ନି ନିତ୍ରେମାପ୍ରୁ ତାକେ ଇନାକା ୱେଚାଙ୍ଗ୍‌ନା, ହେଦାଂ ମିଙ୍ଗେଙ୍ଗ୍‌ ୱେଚ୍‌ଚାତାଂ ।

11 ଇଦମ୍‌ ଦୁମା ବିସ୍ରେନି ବେଣ୍‌ବାକ୍‌ଣାୟ୍‌କିନାକା । ରୱାନ୍‌ ସେୟିରତାକେ ନାଂ କୁକ୍‌ଚି ଇଞ୍ଜ୍‌ନାନା, "କାନାକାୟ୍‌, କେତେକ୍‌ ନାଣା ଆତାତ୍‌ ? କାନାକାୟ୍‌, କେତେକ୍‌ ନାଣା ଆତାତ୍‌ ?" 12 କାନାକାନ୍‌, ଇଚାନ୍‌, "ନାଣାଙ୍ଗେ ୱାନାତା ଆରି ନାଣା ପା ୱାନାତା; ଏପେଙ୍ଗ୍‌ ଜଦି ୱେନ୍‌ବାଆଦ୍‌ନାଦେର୍‌, ୱେନ୍‌ବାଆଦାଟ୍‌; ଏପେଙ୍ଗ୍‌ ମାସ୍‌ଦି ୱାଡ ।"

13 ଆରବ୍‌ ବିସ୍ରେନି ବେଣ୍‌ବାକ୍‌ଣାୟ୍‌କିନାକା । ଏ ଦଦାନିୟ ହାନାକାଦେର୍ ଦଲ୍‌, ଏପେଙ୍ଗ୍‌ ଆରବନି ରାନ୍‌ ବିତ୍ରେ ନାଣା ମାନାଦେର୍‌ । 14 ଇମ୍‌ଣି ମାନାୟ୍‌ ଏସ୍କି ମାଚାନ୍‌, ହେୱାର୍‌ ତା କଚଣ୍‌ତ ଏଜ଼ୁଙ୍ଗ୍‌ ତାହିୱାତାର୍‌; ତେମା ଦେସ୍‌ନିକାର୍‌ କାଦି ଅଜ଼଼ି ପାଲାରି ଆଜ଼଼ି ପାଲାରି ମାନାୟାର୍‌ତି ହୁଦାଂ ବେଟ୍‌ଆତାର୍‌ । 15 ଇନାକିଦେଂକି ହେୱାର୍‌ କାଣ୍ଡାତାଂ, ଦାରା କାଣ୍ଡାତାଂ, ଟେକାୟ୍‌କିତି ୱିଲ୍‌ତାଂ ଆରି କସ୍ଟନି ଜୁଜ୍‌ତାଂ ହନ୍ତାର୍‌ । 16 ଇନେସ୍‌କି ନିତ୍ରେମାପ୍ରୁ ନାଂ ଇନ୍‌ଞ୍ଚାନ୍‌ନା, "କୁଲିକିଜ଼଼ି ଜିନାକା ଏକ୍ ବାର୍ହୁ ବିତ୍ରେ କେଦନି ସବୁ କିତାକା ଚର୍‌ ହାନାତ୍‌; 17 ଆରେ, କେଦନ୍‌ ଲାତ୍ରାନି ବିରର୍‌ ବିତ୍ରେ ଉଣା ମାନ୍‌ଗାନାର୍‌; ୱିଲ୍‌ଆସ୍ତାକାର୍‌ ଇନାକିଦେଂକି ନିତ୍ରେମାପ୍ରୁ ଇସ୍ରାଏଲ୍‌ନି ପରମେସ୍ୱର୍‌ ଇଦାଂ ଇନ୍‌ଚାନ୍‌ନା ।"