1 Samuel 2

Hannah kekie

1 Hannah kekie tei eh rangdi,

"A nlung RAMPAUBE de twabam,

A kii RAMPAUBE dage pwa cuh luda.

Ih a ngauraume dade hegiela,

nang kelikebeu de ga a suiyi kebamne.✝2:1 Luk. 1:46,47

2 Migede RAMPAUBE nzwa mci ma,

Nang kenzwa migede gah;

Anui Tinggwang kenzwa tsura keda gede gah.

3 Hegie eh ngang sütla tadi lu;

Nnui mui gade ngang kela samdung pet ta dilu.

Kedanemene RAMPAUBE au maci Tinggwang;

Pa ne heta leune mdetla.

4 Reugwame lakpi cum dida,

dede kemneime de tei ngkieng beula.

5 Nggei kelame taktyei ziemne penuikatei penuide li teula dida;

Mzeu kelame mzeu si meda.

Nagah pui pe na hang hena mna luda,

dede hename kekiee ge kebam pui nnei dida.✝2:5 Luk. 1:53

6 RAMPAUBE ketsai nah kering teugwang beula.

Pa ketsaime deu gage ngngwa gai nah teucuh dai beula.

7 RAMPAUBE midung gede peu magah nah midung gede tei mahei beula.

Pa midung tei hena dila, dede pa midung gede teucuh dai beula.✝2:7 Luk. 1:52

8 Pa kegahme de rebui gade teucuh lula.

Pa naang kelame de ralie tum gade teucu beula,

penuide peu hegwang namedung de ngngwa bam kerane,

nah kerüt bam de gumlu kerane.

Kedanemene kideube tsiangdidung au RAMPAUBE gu

nah pa cidung reu gage kideube teilu.

9 Pa pe mina masang kelame de gum beuzie,

dede kenlienme de kemui gage kai zing dizie,

Migede pe kengking le ngkieng gailak lu.

10 RAMPAUBE de renia kelabe de ngkap dizie;

pa penuide mmau eh tinggim gade tingceu gaizie.

RAMPAUBE kideu pelane tutiak zie;

pa pe hegwangpei de kengkieng peuzie

nah pa keniak kelube gwangpei kii pwacuh beuzie."✝2:10 Luk. 1:69