Lucas 19

Ayesu bhajingila Ku yeluchalemu kwa kuhangalala

28 Ayesu pabhakajomola kulobhola genago, bhakalongolela kujaula ku Yelusalemu. 29 Nabhena pabhakabhandikila chilambo cha ku Betifage na ku Betania kubhandikila na litombi lilikemwa Mzeituni, bhakaatuma bhanapunji bhabhe bhabhele na kwalobholela, 30 nyabhulange mu chijiji chela chichibhile nnongi jinunji, "Pampakujiingila monomwe, mpakunkolela mwana jwa liponda, yakubhee bhangaapetula amundu nnani jabhe, bhabhi bhatabhwite penapo, munnyogole, munnete pamba. 31 Handa amundu bhankonyite, kwa niki ntenda kunnyogola, mumnobholele, ‘Hangwana bhatenda kumpala.’"

32 Bhenibhala bhabhakatumwanga bhakajaula, bhakakolela kila chilebhe handa chibhakalobholelwanga na Ayesu. 33 Pabhakibhanga bhatenda kunnyogola jonijola mwa liponda, akola liponda bhakaakonyanga, "Kwa niki ntendakunyogolanga jonojwe mwana jwa liponda?" 34 Bhenibhala bhanapunji bhakajangulanga, "Hangwana bhatenda kwapala." 35 Bahi, bhakaapelekela kwa Ayesu, na bhena baada ja kutandika ngobho yabhenji nnani ja jonojwe mwana liponda, na Ayesu bhakantamila panani jakwe. 36 Pabhatendita kuendelea na ulendo, bhandu bhakajanjaanga ngobho yabhenji mundela.

37 Pabhakahika kubhandikila ku Yelusalemu, pa kujemeka chielelo cha litombi lya Mizeituni, nkutuli goha gwa bhanapunji bhabhe bhakajemeka kwaalumbalila Annoongo kwa kuhangalala kwa lilobhe likolongwa ligongo lya yakangachika hibhaibhonitinge. 38 Bhakalobholanga, "Bhatendelwa gammbone Akola bhabhahika kwa lihina lya Hangwana! Amani kunani kulihunde kwa Annoongo na ng’anyimo konokwe kunani muno."

39 Penapo Mafalisayo teno bhabhakibha mu nkutuli gwa bhandu bhakakongolela Ayesu, "Bhannyigana, mwakanakie bhanapunji bhinu!" 40 Ayesu bhakajaangulanga, "Ndenda kunnobholelanga mwangota, handa habha bhakotwikinge, maganga gapakupota nyenye."