Lucas 2

25 Muda hogwe konokwe mu Yelusalemu kukibha na mundu jumo, lihina lyabhe Asimeoni. Amundu bhenabho bhatendita kutenda hikubho yammbone nnongi ja Annoongo. Amundu bhenabho bhatendita kulendela ukombohi gwa bhandu bha Kuisilaeli. Na bhenabho bhakibha na Mboomo ja Annoongo. 26 Mboomo ja Annoongo bhakabhehe bhatekwaakikichia ngawee tangu bhangammona Akilichito bhabhaagulikwe na Hangwana. 27 Bahi Asimoni bhakahika pa Nyuumba ja Annoongo bhabhi kwaatandaa na Mboomo ja Annoongo na akaabheli bha Ayesu bhakannetanga mwana jwabhenji Ayesu pa Nyuumba ja Annoongo handa chiipalikwa na chelia, 28 Asimoni bhakantola mwana Ayesu mmabhoko gabhe kongo bhabhikwalumbalila Annoongo, bhakalobhola,

29 "Hangwana nangocheni, ntendite handa chinkalobhola,

mwaleke antumichi bhinu bhagoloke maha.

30 Kwa miho gangu ndekugubhona ukombohi ginu,

31 yakubhe ntekuyalicha gabhonekane kwa bhandu bha hilambo yoha,

32 Gongoni nga nhana gugupakwamulika bhandu bhabhangaamanya Annoongo,

na ukolo kwa bhandu bha Kuisilaeli."