Lucas 7

24 Bhenibhala bhandu bhabhakatumwanga Ayohana pabhakabhokanga, Ayesu bhakajemeka kwalilobholela lilubhalo ngani ya Ayohana, bhakilobhola, "Pankajaulanga palulemba nkajaulanga kulolanga chiniki? Bholi, kulola matete gagapukunyikwa na mboongo? 25 Bahi, nkajaulanga kulola chiniki? nkajaulanga kunnola mundu jwawalite ngobho ya bei ngolongwa? Bhandu bhabhawalanga ngobho ya bei ngolongwa na kubhehe na hilebhe yammbone bhatamanga mu nyuumba ya chipalume, yakubhehe ngatama kumanyai! 26 Bahi, nnobholelange, nambo nkajaulanga kulolanga chiniki? Nkajaulanga kwaalola alondoi bha Annoongo? Elo, ndendakunnobholelanga nkajaulanga kwaalola kupunda alondoi 27 Habhabha nga yakubhehe ngani yabhe hitekujaandikwa mu Majaandiko ga Annoongo,

‘Nnyoonikie mbakwaatuma nyuumbe jwangu bhannongolele,

yakubhe bhapakunhalakia ndela ja kupeta mwenga.’"

28 Ayesu bhakaalobholelanga kabhele bhandu, "Ntendakunnobholelanga, pakati ja bhandu yakubhehe mwikege bhapaapite bhakwa bhabhabhile nkolongwa muno kupunda Ayohana Mmbatichaji. Nambo, jonijola jwaabhile nchoko choko muno mu upalume gwa Annoongo nga nkolongwa kupunda Ayohana."

29 Bhandu bhoha pamo na hata akaatochanga kodi pabhakajoanga malobhe ga Ayesu, bhakakondaanga kubhehe Annoongo nga bhammbone. 30 Nambo Mafalisayo na bhabhajigana malagilo ga Amusa bhakakananga genigala yakubhehe Annoongo bhagatendange, bhakakananga kubatichwanga na Ayohana.