Lucas 7

31 Ayesu bhaheendelea kulobhola, "Bholi, mbakwalandanakia na chiniki bhandu bha chibhelei heche? Bhalandaana na chiniki? 32 Bhenaangota nga handa bhana bhabhatamite mahali pa kuhuchianga hilebhe na kemana lilubhalo kwa lilubhalo, gwendu bhakabhee bhatekutama pamakonganilo ga bhandu na kulobholelana, libhoga limo na lyengi,

‘tumpotilinge lipyombyo, nambo mwangaina!

twakanyeembelelanga nnyeembo ya kumalilo nambo mwangaguta!’

33 Kwa maana Ayohana ambatichaji bhakahika, na bhenabho bhakibha bhatenda kutama pangali kulyehe, na mwangota nkalobholanga, ‘Bhatekupoganikwa na mahoka!’ 34 Nabhena amwana bha Amundu bhatekuhika, bhatenda kulyehe na kung’wee, na mwangota nkalobholanga, ‘Mwalole habha mundu bhakulyehe muno na bhakolelwa, aganja bha bhatochanga kodi na bhabhilinge na mabhou!’ 35 Nambo luunda lwa Annoongo jitendakulangia yakubhehe nga jammbone kwa bhenibhala bhoha bhabhajikonda."

Haikege bhabhabhile na mabhou bhatenda kwapakaa mahuta Ayesu

36 Lichobha limo Amfalisayo bhamo bhakaalalika Ayesu kujaula kulyee chakulya cha kimuho kwaachakwe. Bhakajiingila nkati mwa jonojwe Mafalisayo bhakataama palikai na kulye chaakulya. 37 Bahi, mu chilambo chenichela pakibha na haikege bhamo bhabhabhile na mabhou. Pabhakajoa yakubhehe Ayesu bhatendakulyee mu nyuumba na bhenibhala Amafalisayo bhakapetula ntuumba gwa mahuta ga kunuungila muno.