1 Ang karunungan ay katulad

ng isang taong nagtayo ng kanyang bahay

na may pitong haligi.

2 Pagkatapos, nagdaos siya

ng isang malaking piging.

Naghanda siya ng mga pagkain

at inumin.

3 At inutusan niya

ang kanyang mga katulong na babae

na pumunta sa pinakamataas na lugar ng bayan

upang manawagan:

4 "Kayong mga walang muwang,

halikayo sa aking tahanan!"

Sinabi niya sa mga wala sa katinuan,

5 "Pumarito kayo at kumain

ng aking inihanda,

uminom kayo ng alak

na aking tinimpla.

6 Iwanan na ninyo ang kawalang katinuan

para kayoʼy mabuhay nang matagal

at may pang-unawa."

7 Kung sasawayin mo ang taong nangungutya,

iinsultuhin ka niya.

Kung sasawayin mo ang taong masama,

sasaktan ka niya.

8 Kaya huwag mong sasawayin

ang taong nangungutya,

sapagkat magagalit siya sa iyo.

Sawayin mo ang taong marunong

at mamahalin ka niya.

9 Kapag tinuruan mo

ang isang taong marunong,

lalo siyang magiging marunong.

At kapag tinuruan mo

ang isang taong matuwid,

lalo pang lalawak ang kanyang kaalaman.

10 Ang pagkatakot sa Panginoon

ang simula ng karunungan.

At ang pagkilala sa Banal na Diyos

ay nagpapahiwatig ng pagkaunawa.

11 Sa pamamagitan ng karunungan,

hahaba ang iyong buhay.

12 Kung may karunungan ka,

magdudulot ito sa iyo ng kabutihan,

ngunit magdurusa ka

kung itoʼy iyong tatanggihan.

13 Ang kamangmangan ay katulad

ng isang babaeng maingay,

hindi marunong at walang nalalaman.

14 Nakaupo siya sa pintuan

ng kanyang bahay

o sa upuan sa mataas

na lugar sa lungsod,

15 at tinatawag ang mga dumadaan

na papunta sa kanilang trabaho.

16 Sabi niya, "Halikayo rito,

kayong mga wala sa katinuan."

At sinabi pa niya sa walang pang-unawa,

17 "Mas masarap ang tubig na ninakaw

at mas masarap ang pagkain

na kinakain ng lihim."

18 Ngunit hindi alam ng mga taong

pumupunta sa kanya

na sila ay mamamatay.

Ang mga nakapunta na sa kanya

ay naroon na sa libingan.