1 Nk’uko shelegi itabereye kugwa mu ci canke imvura mw’iyimbura,

ni ko icubahiro kidakwiye igipfu.

2 Nk’uko intamba iguruka kandi nk’uko inyamanza iguruka,

ni ko umuvumo uvumiwe ubusa umera.

3 Nk’uko ikimoko kibereye ifarasi, n’umujiginya ukabera indogoba,

ni ko umugongo w’igipfu ubereye inkoni.

4 Ntugasubize igipfu ibihwanye n’ubupfu bwaco,

ahandi ho uzoba ubaye nka co.

5 Ariko uze wishure igipfu ibigaragaza ubupfu bwaco,

kugira ngo nticigire umunyabwenge.

6 Kurungikana ubutumwa igipfu

ni nko kwica ukuguru canke kunywa uburozi.

7 Amajambo y’ubwenge mu kanwa k’igipfu,

ni nk’ukuguru kuvunitse gusigaye kurereta ata co kumaze.

8 Guha icubahiro igipfu

ni nko kubohera ibuye ku mugozi

9 Umugani uciwe n’igipfu

umeze nk’ihwa rihanda mu kigaza c’imborerwa.

10 Uwuha akazi igipfu canke uwuhita wese

ameze nk’uwupfa kurasa mu bantu.

11 Nk’uko imbwa isubira ku vyo yadashwe,

ni ko igipfu gisubiramwo ubupfu bwaco.

12 Igipfu gifise amahirwe

kurusha uwibaza ko ari umunyabwenge kandi atari we.

13 Umunyabute avuga ati: "Hari intare mu nzira,

intare y’inkazi iriko iratontoma mu nzira!"

14 Nk’uko urugi rwizungurutsa ku mapata yarwo

ni ko umunebwe yihindukiza ku buriri bwiwe.

15 Umunebwe atwara ukuboko mw’isahani,

ariko akananirwa no kukugarukana ku munwa.

16 Umunyabute yibwira ko ari umunyabwenge

kurusha abantu indwi bashobora kwishurana ubwenge.

17 Umuntu ari ku nzira arengana akisuka mu bihari bitamwerekeye

ameze nk’umuntu afashe imbwa amatwi.

18 Umuntu abesha mugenziwe,

agaca yivugira ati: "Nariko ndatebura,"

19 ameze nk’uwurasa ibishirira

canke imyampi yica mu bantu.

20 Nk’uko iyo inkwi ziheze, umuriro uzima,

ni ko n’iyo ata rusaku ruhari ibihari bihera.

21 Nk’uko urubeya rufatisha amakara canke inkwi,

ni ko uwukunda gutongana atangura ibihari.

22 Amajambo y’urusaku ameze nk’ivyokurya biryoshe;

aramanuka agashika i bwina mu mutima w’umuntu.

23 Amajambo meza ava mu mutima mubi

ameze nk’umuringa w’ifeza ushizwe ku nkono y’ibumba.

24 Umwankanyi yihisha inyuma y’amajambo yiwe aryoshe,

ariko umutima wiwe urimwo inama z’ubuhemu.

25 Naho amajambo yiwe aryohera amatwi, ntukamwizere;

umutima wiwe wuzuye ubuyobe.

26 Naho yogenda arabesha ahisha uburyarya bwiwe,

ibikorwa bibi vyiwe bizoja ku mugaragaro.

27 Uwimbira ikinogo uwundi ni we azokigwamwo;

kandi uwuzotembagariza ikibuye ku wundi,

ni we kizofyonyora.

28 Ururimi rubesha rwanka abo rubabaza,

kandi akanwa kavuga ibinyomya karasenyura.