1 Iyi ni imigani y’umwami Lemuweli, yavugishwa amajambo y’ubwenge yigishijwe na nyina.

2 Nyumviriza, mwana wanje! Ntega amatwi bura bwanje!

Nyumviriza, mwana wanje, wewe nyishu y’amasengesho yanje.

3 Ntugahereze inkomezi zawe mu bagore,

canke inguvu zawe ku bagwisha abami.

4 Si ivy’abami, ewe Lemuweli,

si ivy’abami kunywa umuvinyu,

n’abatware kunohokera inzoga,

5 kuko bonywa bakibagira ivyashinzwe,

bakananirwa kugirira neza abacinyijwe.

6 Reka inzoga zibe iz’abahona,

umuvinyu ube uw’abababaye!

7 Nibabe ari bo banywa, bibagire ubukene bwabo,

ntibasubire kwibuka amagorwa yabo.

8 Uvugire abadashobora kwivugira,

ugirire neza ba ntahonikora.

9 Uvuge kandi uce izibereye;

uburanire aboro n’abakene.

10 Umugore w’imico myiza yova hehe?

Asumba utubuye tw’agaciro.

11 Umugabo wiwe aramwizigira cane,

kandi nta c’agaciro amuburana.

12 Azanira ivyiza umugabo, atari ibibi,

imisi yose yo kubaho kwiwe.

13 Atoranya ubwoya bw’intama n’ipampa,

akajisha impuzu n’amaboko yiwe anezerewe.

14 Ameze nk’ubwato bw’umudandaza,

azana ivyokurya abikuye kure.

15 Avyuka bugihwibiriye;

akaronderera indya umuryango,

akaronderera n’incoreke ziwe.

16 Abona itongo akarishima, maze akarigura;

maze mu biva mu vyo akora, ahatera uruzabibu.

17 Agira umwete mwinshi mu vyo akora,

amaboko yiwe ayaha kurema.

18 Aramenya ko urudandazwa rwiwe rutera ruja imbere,

kandi itara ryiwe ntirizima mw’ijoro.

19 Amaboko yiwe atunganya ubwoya bw’intama,

intoke ziwe zikajisha impuzu

20 Apfumbaturura ibiganza agafasha aboro,

akaramvurira amaboko gufasha abakene.

21 Mu gihe c’imbeho nyinshi, ntatinyira umuryango wiwe,

kuko abambika izisusurutse.

22 Yijishira ivyo kwipfuka mw’ijoro,

akambara izera derere n’izitukura.

23 Umugabo wiwe arubahwa kw’irembo ry’igisagara,

iyo yicaranye n’abatware baho.

24 Ajisha imitamana yera derere akayigurisha,

akaronkera imikenyezo abadandaza.

25 Yambaye inkomezi n’icubahiro

ategekanya kazoza mu munezero.

26 Avugana ubwenge,

kandi impanuro z’ubwizigirwa ziri mu kanwa kiwe.

27 Yitaho ibikorwa vy’umugabo wiwe,

kandi ntarya ivyo atabiriye akuya.

28 Abana biwe bose baramushimagiza,

umugabo wiwe akamushima avuga ati:

29 "Hari abagore benshi bakora ivyiza,

ariko bose urabaruta."

30 Kugira uburanga gusa birahenda, kandi ubwiza bwo ku rukoba nta co bumaze.

Ariko umugore yubaha Uhoraho azoshimwa.

31 Arabereye guhabwa ibiva mu maboko yiwe,

kandi ibikorwa yakoze bimushire hejuru kw’irembo ry’igisagara.