1 Chamwele 19

11 Kilo jhenio, Sauli ngatumita akatumiche bhake bhakanninge Daude kajhake, kupala kilabho lukela ankome. Mikale ngannobholila Daude ungana mundo, anda mikighombwii jhe deleno, kilabho lukela nabhankoma. 12 Bhahe, Mikale nganhulwiya Daude nngana mundo kupete palidilicha, jwenio ngabhokita nu kutila. 13 Mikale ngatoila kinyagho ngakighonika pakindanda na pamuto gwa kinyagho chenio ngawalicha mangoma gha mbuhe. Peniya, ngakiyekita kwa libulangete. 14 Sauli patumita bhando kunkamuu Daude, Mikale ngabhalobholila Daude itenda kulwalwa. 15 Bhahe, Sauli ngabhalaghila kabhele bhakelebhuke kuntola Daude kukulonge, "Munneta pamba Daude ata atenda kulwalwa kupala ninkome." 16 Akatumiche bheniya pibhajhingila nkate mwa Daude, ngabhakikolela kinyagho pakindanda chenio na mutwe gwake kibhekitwe mangoma gha mbuhe. 17 Sauli ngankonyita Mikale, mwana mundo, "Kwanike undei kungolowa? Kilebhe ghane munnekite likoko lyango atile?"

Jwenie Mikale ngajhangwila, "Anobholila, nangoma anda nakunneka jhe ajhende." 18 Daude panyogholwika, ngajhenda ku Lama kwa Chamwele. Nganchimulila malobhe ghoha ghantendii Sauli. Bhahe, Chamwele na Daude ngabhabhokita nu kujhenda kutama ku muche ghuku Nayote.