1 यहोवा नै न्यू कह्या, "तू जाकै कुम्हार तै माट्टी की बणाई होई एक सुराही मोल ले, अर प्रजा के कुछ पुरनियां म्ह तै अर याजकां म्ह तै भी कुछ प्राचीनां ताहीं गैल लेकै, 2 हिन्‍नोमियां की तराई की ओड़ उस फाटक कै धोरै चल्या जा जड़ै ठीकरे फेंक दिए जावै सैं; अर जो वचन मै कहूँ, उसनै ओड़ै प्रचार कर।* 3 तू न्यू कहिए, ‘हे यहूदा के राजाओं अर यरुशलेम के सारे बासिन्दयों, यहोवा का वचन सुणो। इस्राएल का परमेसवर सेनाओं का यहोवा न्यू कहवै सै, इस जगहां पै मै इसी मुसीबत गेरण पै सूं के जो कोए उसकी खबर सुणै, उसपै सन्‍नाटा छा जावैगा। 4 क्यूँके उरै के माणसां नै मेरे ताहीं छोड़ दिया, अर इस जगहां म्ह दुसरे देवत्यां कै खात्तर जिन ताहीं ना तो वे जाणै सैं*, अर ना उनके पुरखा या यहूदा के पुराणे राजा जाणै थे धूप जळाया सै अर इसनै पराया कर दिया सै; अर उननै इस जगहां ताहीं बेकसूरां के लहू तै भर दिया, 5 अर बाल की पूजा की ऊँच्‍ची जगहां ताहीं बणाकै अपणे बाल-बच्यां ताहीं बाल कै खात्तर होम कर दिया, जै मन्‍नै कदे भी जिसका हुकम न्ही दिया, ना उसकी चर्चा करी अर ना वो कदे मेरे मन म्ह आया। 6 इस कारण यहोवा की या वाणी सै के इसे दिन आवै सैं के या जगहां फेर तोपेत या हिन्‍नोमियां की तराई ना कुह्वावैगी, बलके घात ए की तराई कुह्वावैगी। 7 अर मै इस जगहां म्ह यहूदा अर यरुशलेम की युक्तियाँ नै बेकार कर देऊँगा; अर उननै उनके प्राणां के दुश्मनां कै हाथ की तलवार चलवाकै गिरा देऊँगा। उनकी लाशां ताहीं मै अकास कै पन्छियाँ अर धरती के जीव-जन्तुआं का भोजन बणा देऊँगा। 8 मै इस यरुशलेम नगर नै इसा उजाड़ दियुँगा के माणस इसनै देखकै डरैगें; जो कोए इसकै धोरै तै होकै जावै वो इसकी सारी विपत्तियाँ कै कारण हैरान होवैगा अर घबरावैगा। 9 अर घिर जाण अर उस सकेती कै बखत जिस म्ह उनकी जान के दुश्मन उननै गेर देवैंगे, मै उनके बेट्टे-बेटियाँ का माँस उननै खुव्वाऊँगा एक दुसरे का भी माँस खुव्वाऊँगा।’"

10 "फेर तू उस सुराही ताहीं उन माणसां कै स्याम्ही तोड़ देणा जो तेरै गैल जावैंगे, 11 अर उनतै कहिए, ‘सेनाओं का यहोवा न्यू कहवै सै के जिस तरियां यो माट्टी का बरतन जो टूट ग्या के फेर बणाया ना जा सकै, इस्से तरियां मै इस देश के माणसां ताहीं अर इस नगर ताहीं तोड़ गेरूँगा। अर तोपेत नाम की तराई म्ह इतणी कब्रां होवैगी के कब्र कै खात्तर और जगहां ना रहवैगी। 12 यहोवा की या वाणी सै के मै इस नगर अर इसके रहण आळयां कै गैल इसाए काम करुँगा, मै इस नगर नै तोपेत की तरियां बणा देऊँगा। 13 अर यरुशलेम के घर अर यहूदा के राजाओं के भवन, जिनकी छात्तां पै अकास की सारी सेना कै खात्तर धूप जळाया गया, अर दुसरे देवत्यां कै खात्तर तपावन दिया गया सै, वे सारे तोपेत की तरियां अशुद्ध हो जावैंगे।*’"

14 फेर यिर्मयाह तोपेत तै बोहड़कै, जड़ै यहोवा नै उस ताहीं भविष्यवाणी करण खात्तर भेज्या था, यहोवा के भवन कै आँगण म्ह खड़या होया, अर सारे माणसां तै कहण लाग्या; 15 "इस्राएल का परमेसवर सेनाओं का यहोवा न्यू कहवै सै, देक्खो, सारे गाम्मां समेत इस नगर पै वा सारी विपत्ति गेरणा चाहूँ सूं जो मन्‍नै इसपै ल्याण नै कह्या सै, क्यूँके उननै ढीठ बणकै मेरे वचन ताहीं न्ही मान्या सै।"