यिर्मयाह 32

यिर्मयाह के जरिये खेत खरीद्या जाणा

1 यहूदा के राजा सिदकिय्याह के राज्य के दसवें साल म्ह जो नबूकदनेस्सर के राज्य का अठारहवाँ साल था, यहोवा की ओड़ तै यो वचन यिर्मयाह के धोरै पोहच्या। 2 उस बखत बाबेल के राजा की सेना नै यरुशलेम ताहीं घेर लिया था अर यिर्मयाह भविष्यवक्ता यहूदा के राजा के पहरे म्ह भवन कै आँगण म्ह कैदी था। 3 क्यूँके यहूदा के राजा सिदकिय्याह नै न्यू कहकै उस ताहीं कैद करया था, "तू इसी भविष्यवाणी क्यूँ करै सै, ‘यहोवा न्यू कहवै सै: देक्खो, मै इस नगर नै बाबेल के राजा कै बस म्ह कर देऊँगा, वो इसनै ले लेवैगा; 4 अर यहूदा का राजा सिदकिय्याह कसदियाँ कै हाथ तै ना बचैगा पर वो बाबेल के राजा के बस म्ह जरुर पड़ैगा, अर वो अर बाबेल का राजा आप्पस म्ह आम्ही-स्याम्ही बात करैंगे; अर अपणी-अपणी आँख्यां तै एक दुसरे ताहीं देक्खैंगे। 5 अर वो सिदकिय्याह नै बाबेल म्ह ले जावैगा, अर जिब ताहीं मै उसकी सुधि ना ल्यूँ, जिब ताहीं वो ओड़ैए रहवैगा, यहोवा की या वाणी सै। चाहे थम कसदियाँ तै लड़ो तोभी थारै लड़ण तै थमनै सफलता न्ही मिलैगी।’"

6 यिर्मयाह नै कह्या, "यहोवा का वचन मेरे धोरै पोहच्या, 7 देख, शल्‍लूम का बेट्टा हनमेल जो तेरा चचेरा भाई सै, वो तेरे धोरै न्यू कहण ताहीं आण पै सै, ‘मेरा खेत जो अनातोत म्ह सै उसनै मोल ले, क्यूँके उसनै मोल लेकै छुड़ाण का हक तेराए सै।’ 8 अंत म्ह यहोवा के वचन कै मुताबिक मेरा चचेरा भाई हनमेल पहरे कै आँगण म्ह मेरे धोरै आकै कहण लाग्या, ‘मेरा जो खेत बिन्‍यामीन क्षेत्र के अनातोत म्ह सै उसनै मोल ले, क्यूँके उसके माल्‍लिक होण अर उसके छुड़ा लेण का हक तेराए सै; इस करकै तू उसनै मोल ले।’ फेर मन्‍नै जाण लिया के वो यहोवा का वचन था।"

9 "इस करकै मन्‍नै उस अनातोत के खेत ताहीं अपणे चचेरे भाई हनमेल तै मोल ले लिया, अर उसका दाम चाँदी के सत्रह शेकेल *32:9 सत्रह शेकेल लगभग 200 ग्राम चाँदी तौलकै दे दिए। 10 अर मन्‍नै कागज पत्र म्ह दस्तखत अर मुहर हो जाण पै, गवाहां कै स्याम्ही वा चाँदी काण्डे म्ह तौलकै उस ताहीं दे दी। 11 फेर मन्‍नै मोल लेण के दोन्‍नु कागज पत्रां ताहीं जिन म्ह सारी शर्तें लिखी होई थी, अर जिन म्ह तै एक पै मुहर थी अर दुसरी खुली थी, 12 उननै लेकै अपणे चचेरे भाई हनमेल के अर उन गवाहां कै स्याम्ही जिननै कागज पत्र म्ह दस्तखत करे थे, अर उन सारे यहूदियाँ कै स्याम्ही भी जो पहरे के आँगण म्ह बैठ्ठे होए थे, नेरिय्याह के बेट्टे बारूक ताहीं जो महसेयाह का पोत्ता था, सौंप दिया। 13 फेर मन्‍नै उनके स्याम्ही बारूक ताहीं या हुकम दिया 14 ‘इस्राएल का परमेसवर सेनाओं का यहोवा न्यू कहवै सै, इन मोल लेण के कागज पत्रां ताहीं जिनपै मुहर लगाई होई सै अर जो खुली होई सै, इननै लेकै माट्टी के बरतन म्ह रख, ताके ये घणे दिन तक रहवैं। 15 क्यूँके इस्राएल का परमेसवर सेनाओं का यहोवा न्यू कहवै सै, इस देश म्ह घर अर खेत अर दाख की बारियाँ फेर बेच्‍ची अर मोल ली जावैंगी।’"

समझकै खात्तर यिर्मयाह की प्रार्थना

16 "जिब मन्‍नै मोल लेण के वो कागज पत्र नेरिय्याह के बेट्टे बारूक कै हाथ म्ह दिए, फेर मन्‍नै यहोवा तै या प्रार्थना करी, 17 ‘हे प्रभु यहोवा, तन्‍नै बड़े ताकत अर बढ़ाई होई भुजा तै अकास अर धरती ताहीं बणाया सै! तेरे खात्तर कोए काम मुश्किल न्ही सै। 18 तू हजारां पै करुणा करदा रहवै पर बुजुर्गां के अधर्म का बदला उनकै बाद उनके वंश के माणसां ताहीं भी देवै सै, हे महान अर पराक्रमी परमेसवर, जिसका नाम सेनाओं का यहोवा सै, 19 तू बड़ी युक्ति करण आळा अर सामर्थ्य के काम करण आळा सै; तेरी नजर माणसां के सारे चाल चलण पै लाग्गी रहवै सै, अर तू हर एक ताहीं उसके चाल चलण अर कर्म का फळ भुगतावै सै। 20 तन्‍नै मिस्र देश म्ह चिन्ह अर चमत्कार करे, अर आज ताहीं इस्राएलियाँ बलके सारे माणसां के बीच उसाए करदा आया सै, अर इस तरियां तन्‍नै अपणा इसा नाम करया सै जो आज कै दिन ताहीं बण्या सै। 21 तू अपणी प्रजा इस्राएल नै मिस्र देश म्ह तै चिन्हां अर चमत्कारां अर ताकतवर हाथ अर बढ़ाई होई भुजा के जरिये, अर बड़े भयानक काम्मां कै गैल लिकाड़ ल्याया। 22 फेर तन्‍नै यो देश उन ताहीं दिया जिसके देण की कसम तन्‍नै उनके पूर्वजां तै खाई थी; जिस म्ह दूध अर शहद की धारा बहवै सैं, अर वे आकै इसके अधिकारी होए। 23 तोभी उननै तेरी न्ही मान्‍नी, अर ना तेरे नियम-कायदे पै चाल्‍ले; बलके जो कुछ तन्‍नै उन ताहीं करण का हुकम दिया था, उस म्ह तै उननै कुछ भी न्ही करया। इस कारण तन्‍नै उनपै या सारी विपत्ति गेरी सै। 24 इब इन मोर्चाबन्‍दी नै देख, वे माणस इस नगर नै ले लेण खात्तर आ गए सैं, अर या नगर तलवार, काळ अर मरी कै कारण इन चढ़े होए कसदियाँ के बस म्ह करया गया सै। जो तन्‍नै कह्या था वो इब पूरा होया सै, अर तू इसनै देक्खै भी सै। 25 तोभी, हे प्रभु यहोवा, तन्‍नै मेरे ताहीं कह्या सै के गवाह बुलाकै उस खेत नै मोल ले, तोभी के यो नगर कसदियाँ के बस म्ह कर दिया गया सै।’"

वापसी खात्तर परमेसवर का भरोस्सा

26 फेर यहोवा का यो वचन यिर्मयाह के धोरै पोहच्या, 27 "मै तो सारे प्राणियाँ का परमेसवर यहोवा सूं; के मेरे खात्तर कोए भी काम मुश्किल सै? 28 इस करकै यहोवा न्यू कहवै सै, देख, मै यो नगर कसदियाँ अर बाबेल के राजा नबूकदनेस्सर कै बस म्ह कर देण पै सूं, अर वो इसनै ले लेवैगा। 29 जो कसदी इस नगर तै युद्ध करण लागरे सैं, वे आकै इस म्ह आग लगाकै फूँक देवैंगे, अर जिन घरां की छात्तां पै उननै बाल देवता कै खात्तर धूप जळाकै अर दुसरे देवत्यां ताहीं अर्घ चढ़ाकै मेरे ताहीं रिस दुआई सै, वे घर जळ्या दिए जावैंगे। 30 क्यूँके इस्राएल अर यहूदा, जो काम मेरे ताहीं बुरा लाग्गै सै, ओड़ै लड़कपण तै करदे आए सैं*32:30 लड़कपण तै करदे आए सैं इस्राएल के खात्तर परमेसवर के पराक्रमी काम मिस्र म्ह शरुआत होए थे, (यिर्म 32:20) अर गैल ही इस्राएल के पाप भी शरुआत होगे थे।; इस्राएली अपणी बणाई होई चिज्जां तै मेरे ताहीं रिस ए रिस दुवान्दे आए सैं, यहोवा की या वाणी सै। 31 यो नगर जिब तै बस्या सै जिब तै आज कै दिन ताहीं मेरे छो अर जळजळाहट के भड़कण का कारण होया सै, इस करकै इब मै इसनै अपणे स्याम्ही तै इस कारण दूर करुँगा 32 क्यूँके इस्राएल अर यहूदा अपणे सारे राजा, हाकिमां, याजकां अर नबियाँ समेत, के यहूदा देश के, के यरुशलेम के बासिन्दे, सारे के सारे बुराई पै बुराई करकै मेरे ताहीं रिस दुवान्दे आए सैं। 33 उननै मेरी ओड़ मुँह न्ही बलके पीठ ए फेर दी सै; जै मै उननै बड़ी कोशिश तै सिखान्दा आया सूं, तोभी उननै मेरी शिक्षा ताहीं न्ही मान्या। 34 बलके जो भवन मेरा कुहवावै सै, उस म्ह भी उननै अपणी सब घृणित चीज स्थापित करकै उसनै अशुद्ध करया सै। 35 उननै हिन्‍नोमियां की तराई म्ह बाल की ऊँच्‍ची-ऊँच्‍ची जगहां बणाकै अपणे बेट्टे-बेटियाँ ताहीं मोलेक कै खात्तर होम करया, जिसका हुकम मन्‍नै कदे भी न्ही दिया, अर ना या बात कदे मेरे मन म्ह आई के इसा घृणित काम करया जावै अर जिसतै यहूदी माणस पाप म्ह फँसे।"

36 "पर इब इस्राएल का परमेसवर यहोवा इस नगर कै बारै म्ह, जिसके खात्तर थम कहो सो, ‘वो तलवार, काळ अर मरी कै जरिये बाबेल के राजा कै बस म्ह पड़या होया सै’ न्यू कहवै सै: 37 देक्खो, मै उननै उन सारे देशां तै जिन म्ह मन्‍नै छो अर जळजळाहट म्ह आकै उन ताहीं जबरदस्ती लिकाड़ दिया था, बोहड़ा ले आकै इस्से नगर म्ह कठ्ठे करुँगा, अर निडर करकै बसा देऊँगा। 38 अर वे मेरी प्रजा ठैहरैगें, अर मै उनका परमेसवर ठहरूँगा*32:38 2 कुरि. 6:16 39 मै उननै एक ए मन अर एक ए चाल*32:39 एक ए मन अर एक ए चाल इस नया करार म्ह वे सही काम्मां के तंग राह पै एक मन होकै चाल्‍लैगें। (मत्ती 7:14) सदा यानिके लगातार, हर दिन चाल्‍लैगें। कर देऊँगा ताके वे सदा मेरा भय मान्दे रहवै, जिसतै उनका अर उनके बाद उनके वंश का भी भला हो। 40 मै उनतै न्यू करार करुँगा, के मै कदे उनका साथ छोड़कै उनका भला करणा ना छोड़ूँगा; अर अपणा भय मै उनके मन म्ह इसा उपजाऊँगा के वे कदे मेरे तै अलग होणा न्ही चाहवैंगे।*32:40 लूका. 22:20; 1 कुरि. 11:25; 2 कुरि. 3:6; इब्रा. 13:20 41 मै बड़ी खुशी कै गैल उनका भला करदा रहूँगा, अर सचमुच*32:41 सचमुच यानिके सच म्ह, वास्तव म्ह। यो परमेसवर के मजबूत मकसद के संदर्भ म्ह सै उम्मीद उन माणसां की हिफाजत एवं देख-रेख। यो नया करार अनुग्रह का सै जो परमेसवर के जरिये उसकी प्रजा पै आनन्दित होण तै अर उनके भित्तर अपणा पूरे मन उपजाण तै प्रगट होवै सै। उननै इस देश म्ह अपणे सारे मन अर प्राण तै बसा देऊँगा।"

42 "देख, यहोवा न्यू कहवै सै के जिस तरियां मन्‍नै अपणी इस प्रजा पै या सारी बड़ी विपत्ति गेर दी, उसे तरियां पक्‍का इनतै वो सारे भलाई भी करुँगा जिसके करण का वचन मन्‍नै दिया सै। इस करकै यो देश जिसके बारै थम कहो सो 43 के यो उजाड़ होग्या सै, इस म्ह ना तो माणस रहवै सैं अर ना पशु, यो तो कसदियाँ कै बस म्ह हो चुक्या सै, इस्से म्ह फेर तै खेत मोल लिए जावैंगे, 44 अर बिन्‍यामीन के क्षेत्र म्ह, यरुशलेम के लोवै-धोवै, अर यहूदा देश के यानिके पहाड़ी देश, नीच्‍चै कै देश अर दक्षिण देश के नगरां म्ह माणस गवाह बुलाकै खेत मोल लेवैगें, अर कागज पत्र म्ह दस्तखत अर मुहर लगावैंगे; क्यूँके मै उनके दिनां नै बोहड़ा ले आऊँगा; यहोवा की योए वाणी सै।"