1 योशिय्याह के बेट्टे, यहूदा के राजा सिदकिय्याह के राज्य के शरुआत म्ह यहोवा की ओड़ तै यो वचन यिर्मयाह कै धोरै पोहच्या। 2 यहोवा नै मेरे ताहीं न्यू कह्या, "बन्धन अर जूए बणवाकै अपणी गर्दन पै धर।" 3 फेर उननै एदोम, मोआब, अम्मोन, सोर अर सीदोन के राजयां कै धोरै, उन दूत्तां कै हाथ भेजिए जो यहूदा के राजा सिदकिय्याह कै धोरै यरुशलेम म्ह आए सैं। 4 उन दूत्तां ताहीं उनके मालिकां कै खात्तर न्यू कहकै हुकम दियो : "इस्राएल का परमेसवर सेनाओं का यहोवा न्यू कहवै सै: अपणे-अपणे माल्‍लिक तै न्यू कह्यो के 5 धरती ताहीं अर धरती पै के माणसां अर पशुआं नै अपणी बड़ी शक्ति अर बढ़ाई होई भुजा कै जरिये मन्‍नै बणाया, अर जिस किसे ताहीं मै चाऊँ सूं उस्से नै मै उन ताहीं दिया करुँ सूं। 6 इब मन्‍नै ये सारे देश, अपणे दास बाबेल के राजा नबूकदनेस्सर ताहीं खुद दे दिए सैं; अर मैदान के सारे जीव जन्तु भी मन्‍नै उस ताहीं दे दिये सै ताके वे उसके अधीन रहवै। 7 ये सारी जातियाँ उसके अर उसकै बाद उसके बेट्टे अर पोते कै अधीन उस बखत तक रहवैंगी जिब ताहीं उसके भी देश का दिन ना आवै; फेर भोत सी जातियाँ अर बड़े-बड़े राजा उसतै भी अपणी सेवा करवावैंगे।"

8 "पर जो जात्ति या राज्य बाबेल के राजा नबूकदनेस्सर के अधीन ना हो अर उसका जूआ अपणी गर्दन पै ना ले ले, उस जात्ति नै मै तलवार, काळ अर मरी की सजा उस बखत तक देन्दा रहूँगा जिब तक उस नै नबूकदनेस्सर के हाथ्थां तै मिटा ना दियुँ, यहोवा की योए वाणी सै। 9 इस करकै थम अपणे नबियाँ अर भावी कहण आळयां* अर टोन्हा अर तांत्रिकां की ओड़ मन ना लगाओ जो थारै तै कहवै सैं के थारै ताहीं बाबेल के राजा कै अधीन न्ही होणा पड़ैगा। 10 क्यूँके वे थारै तै झूठ्ठी भविष्यवाणी करै सैं, ताके थम अपणे-अपणे देश तै दूर हो जाओ अर मै खुद थमनै दूर करकै नाश कर दियुँ। 11 पर जो जात्ति बाबेल के राजा का जूआ अपणी गर्दन पै लेकै उसके अधीन रहवैगी उस ताहीं मै उसी के देश म्ह रहण देऊँगा; अर वा उस म्ह खेत्ती करदी होई बसी रहवैगी, यहोवा की योए वाणी सै।"

12 यहूदा के राजा सिदकिय्याह तै भी मन्‍नै ये बात कही : "अपणी प्रजा समेत तू बाबेल के राजा का जूआ अपणी गर्दन पै ले, अर उसके अर उसकी प्रजा कै अधीन रहकै जिन्दा रह। 13 जिब यहोवा नै उस जात्ति कै बारै म्ह जो बाबेल के राजा कै अधीन ना हो, न्यू कह्या सै के वा तलवार, काळ अर मरी तै नाश होवैगी; तो फेर तू क्यूँ अपणी बेट्टियाँ समेत मरणा चाहवै सै? 14 जो नबी तेरै तै कहवै सैं, ‘तन्‍नै बाबेल के राजा कै अधीन ना होणा पड़ैगा,’ उनकी ना सुण; क्यूँके वे तेरै तै झूठ्ठी भविष्यवाणी करै सैं। 15 यहोवा की या वाणी सै के मन्‍नै उन ताहीं न्ही भेज्या, वे मेरे नाम तै झूठ्ठी भविष्यवाणी करै सैं; अर इसका फळ योए होवैगा के मै तन्‍नै देश तै लिकाड़ देऊँगा, अर तू उन नबियाँ समेत जो तेरै तै भविष्यवाणी करै सैं नाश हो जावैगा।"

16 फेर याजकां अर साधारण माणसां तै भी मन्‍नै कह्या, "यहोवा न्यू कहवै सै, थारे जो नबी थारै तै या भविष्यवाणी करै सैं के ‘यहोवा के भवन के पात्र इब तावळा-ए बाबेल तै बोहड़ा दिए जावैंगे,’ उनके वचनां की ओड़ कान ना लगाओ, क्यूँके वे थारै तै झूठ्ठी भविष्यवाणी करै सैं। 17 उनकी ना सुणो, बाबेल के राजा कै अधीन होकै अर उसकी सेवा करकै जिन्दा रहो।* 18 यो नगर क्यूँ उजाड़ हो जावै? जै वे नबी भी हों, अर जै यहोवा का वचन उनकै धोरै हो, तो वे सेनाओं के यहोवा तै बिनती करैं कै जो पात्र यहोवा के भवन म्ह अर यहूदा के राजा कै भवन म्ह अर यरुशलेम म्ह रहगे सैं, वे बाबेल ना जाण पावै। 19 क्यूँके सेनाओं का यहोवा न्यू कहवै सै के जो खम्भे अर पीतळ की नांद, गंगाल अर कुर्सियाँ अर दुसरे पात्र इस नगर म्ह रहगे सैं, 20 जिननै बाबेल का राजा नबूकदनेस्सर उस बखत ना लेग्या जिब वो यहोयाकीम के बेट्टे यहूदा के राजा यकोन्याह ताहीं अर यहूदा अर यरुशलेम के सारे रईस माणसां ताहीं कैदी बणाकै यरुशलेम तै बाबेल तक लेग्या था, 21 जो पात्र यहोवा के भवन म्ह अर यहूदा के राजा कै भवन म्ह अर यरुशलेम म्ह रहगे सैं, उनकै बारै म्ह इस्राएल का परमेसवर सेनाओं का यहोवा न्यू कहवै सै के वे भी बाबेल म्ह पोहचाये जावैंगे; 22 अर जिब ताहीं मै उनकी सुधि ना ल्यूँ जिब तक ओड़ैए रहवैंगे, अर फेर मै उननै ल्याकै इस जगहां म्ह फेर राख देऊँगा, यहोवा की योए वाणी सै।"