1 यहूदा के राजा सिदकिय्याह के राज्य के नौवें साल के दसवें महिन्‍ने म्ह, बाबेल के राजा नबूकदनेस्सर नै अपणी सारी सेना समेत यरुशलेम पै चढ़ाई करकै उस ताहीं घेर लिया। 2 अर सिदकिय्याह के राज्य के ग्यारहवें साल के चौथे महिन्‍ने के नौवें दिन म्ह उस नगर की शहरपनाह तोड़ी गई। 3 जिब यरुशलेम ले लिया गया, फेर नेर्गलसरेसेर, अर समगर्नबो, अर खोज्यां का प्रधान सर्सकीम, अर मगों का प्रधान नेर्गलसरेसेर अर बाकी, बाबेल के राजा के सारे हाकिम बीच के फाटक* म्ह बड़कै बैठगे। 4 जिब यहूदा के राजा सिदकिय्याह अर सारे योद्धा नै उन ताहीं देख्या फेर रात ए रात राजा की बारी कै राह तै दोन्‍नु दीवारां कै बीच के फाटक तै होकै नगर तै लिकड़कै भाज लिये अर अराबा* का राह लिया। 5 पर कसदियाँ की सेना नै उन ताहीं खदेड़ कै सिदकिय्याह ताहीं यरीहो के अराबा म्ह जा लिया अर उननै बाबेल के राजा नबूकदनेस्सर कै धोरै हमात देश के रिबला म्ह लेगे; अर उसनै ओड़ै उसके सजा का हुकम दिया। 6 फेर बाबेल के राजा नै सिदकिय्याह के बेट्टयाँ ताहीं उसकी आँख कै स्याम्ही रिबला म्ह मार दिया; अर सारे कुलीन यहूदियाँ ताहीं भी मार दिया। 7 उसनै सिदकिय्याह की आँख्यां ताहीं लिकाड़ दिया अर उस म्ह बाबेल ले जाणकै खात्तर बेड़ियाँ तै जकड़वा दिया। 8 कसदियाँ नै राजभवन अर प्रजा के घरां ताहीं आग लगाकै फूँक दिया, अर यरुशलेम की शहरपनाह ताहीं ढ़ा दिया। 9 फेर अंगरक्षकां का प्रधान नबूजरदान प्रजा के बचे होया ताहीं जो नगर म्ह रहगे थे, अर जो माणस उसकै धोरै भाज आए थे उननै यानिके प्रजा म्ह तै जितने रहगे उन सारे ताहीं गुलाम करकै बाबेल म्ह लेग्या। 10 पर प्रजा म्ह तै जो इसे कंगाल थे जिनके धोरै कुछ ना था, उननै अंगरक्षकां का प्रधान नबूजरदान यहूदा देश म्ह छोड़ ग्या, अर जान्दे बखत उन ताहीं दाख की बारियाँ अर खेत दे दिए।

11 बाबेल के राजा नबूकदनेस्सर नै अंगरक्षकां के प्रधान नबूजरदान ताहीं यिर्मयाह कै बारै म्ह यो हुकम दिया, 12 "यिर्मयाह नै लेकै उसपै दया की नजर बणाए राखणा अर उसका किमे नुकसान न्ही करणा; जिसा वो तेरै तै कहवै उसाए उसतै बरताव करणा।" 13 अंत म्ह अंगरक्षकां के प्रधान नबूजरदान अर खोज्यां के प्रधान नबूसजबान अर मगों के प्रधान नेर्गलसरेसेर ज्योतिषियाँ के सरदार, 14 अर बाबेल के राजा के सारे प्रधानां नै, माणसां ताहीं भेजकै यिर्मयाह नै पहरे के आँगण म्ह तै बुलवाया अर गदल्याह ताहीं जो अहीकाम का बेट्टा अर शापान का पोत्ता था सौंप दिया के वो उसनै घर पोहचावै। फेर तै वो माणसां के गैल रहण लाग्या।

15 जिब यिर्मयाह पहरे के आँगण म्ह कैद था, फेर यहोवा का या वचन उसकै धोरै पोहच्या, 16 *"जाकै एबेदमेलेक कूशी तै कह, ‘इस्राएल का परमेसवर सेनाओं का यहोवा तेरै तै न्यू कहवै सै: देख, मै अपणे वे वचन जो मन्‍नै इस नगर कै बारै म्ह कह्ये सैं इस तरियां पूरा करुँगा के इसका कुशल ना होगा, नुकसान ए होवैगा, अर उस बखत उनका पूरा होणा तेरे ताहीं दिखाई देवैगा। 17 पर यहोवा की या वाणी सै के उस बखत मै तेरे ताहीं बचाऊँगा, अर जिन माणसां* तै तू भय खावै सै, तू उनकै बस म्ह न्ही करया जावैगा। 18 क्यूँके मै तेरे ताहीं, जरुर बचाऊँगा*, अर तू तलवार तै ना मरैगा, तेरा प्राण बच्या रहवैगा, यहोवा की या वाणी सै। यो इस कारण होवैगा, के तन्‍नै मेरे पै भरोस्सा राख्या सै।’"