यिर्मयाह 42

यिर्मयाह तै प्रार्थना करण का निवेदन

1 फेर कारेह का बेट्टे योहानान, होशायाह का बेट्टा याजन्याह, दलां के सारे प्रधान अर छोट्टे तै लेकै बड़े ताहीं, सारे माणस 2 यिर्मयाह नबी के धोरै आकै कहण लाग्गे, "म्हारी बिनती कबूल करकै अपणे परमेसवर यहोवा तै हम सारे बचे होया कै खात्तर प्रार्थना कर, क्यूँके तू अपणी आँख्यां तै देख रह्या सै के हम जो पैहले घणेए थे, इब थोड़े ए बचगे सां। 3 इस करकै प्रार्थना कर के तेरा परमेसवर यहोवा म्हारे ताहीं बतावै के हम किस राह तै चाल्‍लां, अर कौण सा काम करां?" 4 यिर्मयाह नबी नै उनतै कह्या, "मन्‍नै थारी सुणी सै; देक्खो, मै थारे वचनां कै मुताबिक थारे परमेसवर यहोवा तै प्रार्थना करुँगा अर जो जवाब यहोवा थारे खात्तर देवैगा मै थारे ताहीं बताऊँगा; मै थारे तै कोए बात ना छिपाऊँगा।" 5 फेर उननै यिर्मयाह तै कह्या, "जै तेरा परमेसवर यहोवा तेरे जरिये म्हारे धोरै कोए वचन पोहचावै अर जै हम उसके मुताबिक ना करां*42:5 उसके मुताबिक ना करां उस सारे वचन के मुताबिक जो तेरे परमेसवर यहोवा नै यिर्मयाह के जरिये उन ताहीं पोहचाया।, तो यहोवा म्हारे बीच म्ह सच्‍चा अर बिश्वासयोग्य गवाह ठहरै। 6 चाहे वो भली बात हो, चाहे बुरी, तोभी हम अपणे परमेसवर यहोवा के हुकम, जिसकै धोरै हम तेरे ताहीं भेज्जा सा, मान्‍नागें, क्यूँके जिब हम अपणे परमेसवर यहोवा की बात मान्‍ना फेर म्हारा भला हो।"

यिर्मयाह की प्रार्थना का जवाब

7 दस दिन कै बीत जाणकै बाद यहोवा का वचन यिर्मयाह कै धोरै पोहच्या। 8 फेर उसनै कारेह के बेट्टे योहानान ताहीं, उसकै गैल के दलां के प्रधानां ताहीं, अर छोट्टे तै लेकै बड़े ताहीं जितने माणस थे, उन सारया ताहीं बुलाकै उनतै कह्या, 9 "इस्राएल का परमेसवर यहोवा, जिसकै धोरै थमनै मेरे ताहीं इस करकै भेज्या के मै थारी बिनती उसके आगै कह सुणाऊँ, वो न्यू कहवै सै: 10 जै थम इस्से देश यहूदा म्ह रह जाओ, फेर तो मै थारे ताहीं नाश न्ही करुँगा बलके बणाए राखूँगा; अर थारे ताहीं ना उखाड़ूँगा, बलके रोपे राखूँगा; क्यूँके थारा जो नुकसान मन्‍नै करया सै उसतै मै पछताऊँ सूं। 11 थम बाबेल के राजा तै डरो सो, आखर म्ह उसतै ना डरो; यहोवा की या वाणी सै, उसतै ना डरो, क्यूँके मै थारी रक्षा करण अर थारे ताहीं उसकै हाथ तै बचाण कै खात्तर थारे गैल सूं। 12 मै थारे पै दया करुँगा, के वो भी थारे पै दया करकै थारे ताहीं थारी धरती पै फेर तै बसा देवैगा। 13 पर जै थम न्यू कहकै के हम इस देश म्ह ना रहवांगे अपणे परमेसवर यहोवा की बात ना मान्‍नो, अर कहो के हम तो मिस्र देश म्ह जाकै ओड़ैए रहवांगे, 14 क्यूँके ओड़ै ना हम युद्ध देखांगे, ना नरसिंगे का शब्द सुणांगें अर ना म्हारे ताहीं भोजन की घटी होवैगी, तो, हे बचे होए यहूदियों, यहोवा का यो वचन सुणो। 15 इस्राएल का परमेसवर सेनाओं का यहोवा न्यू कहवै सै: जै थम सचमुच मिस्र की और जाण का मुँह करो, अर ओड़ै रहण कै खात्तर जाओ, 16 तो इसा होवैगा के जिस तलवार तै थम डरो सो, ओड़ैए मिस्र देश म्ह थारे पै जा लेवैगी, अर जिस काळ का भय थम खाओ सो, वो मिस्र म्ह थारा पिच्छा ना छोडैगी; अर ओड़ैए थम मरोगे। 17 जितने माणस मिस्र म्ह रहण कै खात्तर उसकी ओड़ मुँह करै, वे सारे तलवार, काळ अर मरी तै मरैगें, अर जो विपत्ति मै उनके बीच गेरूँगा, उसतै कोए बच्या ना रहवैगा।"

18 "इस्राएल का परमेसवर सेनाओं का यहोवा न्यू कहवै सै: जिस तरियां तै मेरा कोप अर जळजळाहट यरुशलेम के बासिन्दया पै भड़क उठ्या था, उसे तरियां तै जै थम मिस्र म्ह जाओ, तो मेरी जळजळाहट थारे उप्पर इसाए भड़क उठ्ठैगी के माणसां हैरान होवैगें, अर थारी तुलना करकै श्राप दिया करैंगे अर थारी निन्दा करया करैंगे। थम उस जगहां ताहीं फेर ना देखण पाओगे। 19 हे बचे होए यहूदियों, यहोवा नै थारे बारै म्ह कह्या सै: ‘मिस्र म्ह ना जाओ।’ थम पक्‍का जाणो के मन्‍नै आज थारे ताहीं चिताकै या बात बता दी सै। 20 क्यूँके जिब थमनै मेरे ताहीं न्यू कहकै अपणे परमेसवर यहोवा कै धोरै भेज दिया, ‘म्हारे खात्तर म्हारे परमेसवर यहोवा तै प्रार्थना कर अर जो कुछ म्हारा परमेसवर यहोवा कहवै उसे कै मुताबिक म्हारे ताहीं बता अर हम उसाए करांगे,’ फेर थम जाण-बुझकै अपणे आप ताहीं धोखा देओ थे*42:20 थम जाण-बुझकै अपणे आप ताहीं धोखा देओ थे यानिके मेरे ताहीं परमेसवर के धोरै भेजकै उसकी इच्छा जाणणा खुद ताहीं धोक्खा देणा था। थमनै तो ठाण लिया था के मिस्र देश तै लिकड़णा परमेसवर की इच्छा सै पर जिब परमेसवर नै इसके उल्ट अपणी इच्छा प्रगट करी तो इब थमनै उस ताहीं मान लेण म्ह परेशानी होण लागरी सै।। 21 देक्खो, मै आज थमनै बता देऊँ सूं, पर, अर जो कुछ थारे परमेसवर यहोवा नै थारे तै कहण कै खात्तर मेरे ताहीं भेज्या सै, उस म्ह तै थम कोए बात न्ही मान्दे। 22 इब थम पक्‍का जाणो, के जिस मिस्र म्ह थम परदेशी होकै रहण की इच्छा करो सो, उस म्ह थम तलवार, काळ अर मरी तै मर जाओगे।"