यिर्मयाह 24

आच्छे अंजीर अर बुरे अंजीर

1 जिब बाबेल का राजा नबूकदनेस्सर, यहोयाकीम के बेट्टे यहूदा के राजा यकोन्याह ताहीं, अर यहूदा के हाकिमां अर लोहारां अर दुसरे कारीगरां ताहीं कैदी बणाकै यरुशलेम तै बाबेल म्ह लेग्या, तो उसकै पाच्छै यहोवा नै मेरे ताहीं अपणे भवन के स्याम्ही राक्खे होए अंजीरां के दो टोकरे दिखाए। 2 एक टोकरे म्ह तो पैहले तै पके आच्छे-आच्छे अंजीर थे, अर दुसरे टोकरे म्ह घणे निकम्मे अंजीर*24:2 अंजीर अंजीर का दरखत तीन फसल देवै सै जिन म्ह तै पैहली फसल सबतै घणी स्वादिष्ट मान्‍नी जावै सै। थे, बलके वे इतणे खराब थे के खाण कै लायक भी ना थे। 3 फेर यहोवा नै मेरे तै पूच्छया, "हे यिर्मयाह, तेरे ताहीं के दिखाई देवै सै?" मन्‍नै कह्या, "अंजीर; जो अंजीर आच्छे सैं वो तो घणेए आच्छे सैं, पर जो निकम्मे सैं, वो घणेए निकम्मे सैं; बलके इसे निकम्मे सैं के खाण कै लायक भी न्ही सैं।"

4 फेर यहोवा का या वचन मेरे धोरै पोहच्या, 5 "इस्राएल का परमेसवर यहोवा न्यू कहवै सै, जिस तरियां आच्छे अंजीरां ताहीं, उसे तरियां ए मै यहूदी कैदियाँ ताहीं जिन नै मन्‍नै इस जगहां तै कसदियाँ के देश म्ह भेज दिया सै, देखकै खुश होऊँगा। 6 मै उनपै कृपादृष्टि राखूँगा अर उननै इस देश म्ह बोहड़ा ले आऊँगा; अर उन ताहीं नाश ना करुँगा, पर बणाऊँगा; उननै उखाड़ ना देऊँगा, पर लगाऐ राखूँगा। 7 मै उनका इसा मन कर देऊँगा के वे मेरे ताहीं जाणगे के मै यहोवा सूं; अर वे मेरी प्रजा ठैहरैगें अर मै उनका परमेसवर ठहरूँगा, क्यूँके वे मेरी ओड़ सारे मन तै फिरैंगे।"

8 "पर जिस तरियां निकम्मे अंजीर, निकम्मे होण कै कारण खाए न्ही जान्दे, उसी तरियां तै मै यहूदा के राजा सिदकिय्याह अर उसके हाकिमां अर बचे होए यरुशलेमियाँ नै, जो इस देश म्ह या मिस्र म्ह रहगे सैं*24:8 इस देश म्ह या मिस्र म्ह रहगे सैं ना तो वे जो यहोआहाज के गैल कैदी बणकै मिस्र म्ह ले जाये गये सैं अर ना जो भाग कै मिस्र गये सैं आशीष म्ह सहभागी होवैंगे। यहूदी राष्ट्र का नया जीवन सिर्फ बाबेल म्ह रहण आळे देश लिकाड़े होए का काम होगा। , छोड़ देऊँगा। 9 इस कारण वे धरती के राज्य-राज्य म्ह मारे-मारे फिरदे होए दुःख भोगदे रहवैंगे; अर जितनी जगहां म्ह मै उननै जबरदस्ती लिकाड़ देऊँगा, उन सारया म्ह वे बेजती अर उदाहरण अर श्राप का विषय होवैंगे। 10 अर मै उन म्ह तलवार चलाऊँगा, अर काळ अर मरी फैलाऊँगा, अर अन्त म्ह इस देश म्ह तै जिस ताहीं मन्‍नै उनके पुरखां ताहीं अर उननै दिया, वे मिट जावैंगे।"