1 जिब बाबेल का राजा नबूकदनेस्सर अपणी सारी सेना समेत अर धरती के जितने राज्य उसकै बस म्ह थे, उन सारया के माणसां समेत यरुशलेम अर उसके सारे गाम्मां तै लड़ण लागरया था, फेर यहोवा का यो वचन यिर्मयाह कै धोरै पोहच्या 2 "इस्राएल का परमेसवर यहोवा न्यू कहवै सै: जाकै यहूदा के राजा सिदकिय्याह तै कह, ‘यहोवा न्यू कहवै सै: देख, मै इस नगर नै बाबेल के राजा कै बस म्ह कर देण पै सूं, अर वो इसनै फुँकवा देवैगा। 3 तू उसकै हाथ तै ना बचैगा, पक्‍का पकड्या जावैगा अर उसकै बस म्ह कर दिया जावैगा; अर तेरी आँख बाबेल के राजा नै देखैगी, अर थम आम्ही-स्याम्ही बात करोगे; अर तू बाबेल म्ह जावैगा।’ 4 तोभी हे यहूदा के राजा सिदकिय्याह, यहोवा का यो भी वचन सुण जिसनै यहोवा तेरे बारै म्ह कहवै सै: ‘तू तलवार तै मारया ना जावैगा। 5 तू शान्ति कै गैल मरैगा। अर जिसा तेरे पितरां कै खात्तर यानिके जो तेरै तै पैहले राजा थे, उनके खात्तर सुगन्ध-द्रव्य जळाया गया, उसाए तेरे खात्तर भी जळाया जावैगा; अर माणस न्यू कहकै, "हाय मेरे प्रभु!" तेरै खात्तर छात्ती पीटैंगे, यहोवा की योए वाणी सै।’"

6 ये सारे वचन यिर्मयाह नबी नै यहूदा के राजा सिदकिय्याह तै यरुशलेम म्ह उस बखत कहे, 7 जिब बाबेल के राजा की सेना यरुशलेम तै अर यहूदा के जितने नगर बचगे थे, उनतै यानिके लाकीश अर अजेका तै लड़ण लागरी थी; क्यूँके यहूदा के जो गढ़आळे नगर थे उन म्ह तै सिर्फ वेए रहगे थे।

8 यहोवा का यो वचन यिर्मयाह के धोरै उस बखत आया जिब सिदकिय्याह राजा नै सारी प्रजा तै जो यरुशलेम म्ह थी यो करार करया के दास्सां के स्वाधीन होण का प्रचार करया जावै*, 9 के सारे माणस अपणे-अपणे दास-दास्सी नै जो इब्री या इब्रिन हों, आजाद होकै जाण दें, अर कोए अपणे यहूदी भाई तै फेर अपणी सेवा ना करावै। 10 फेर सारे हाकिमां अर सारी प्रजा नै यो करार करया के हम अपणे-अपणे दास-दासियाँ नै आजाद कर देवांगें अर फेर उनतै अपणी सेवा ना करावागें; इस करकै उस करार के मुताबिक उननै आजाद कर दिया। 11 पर इसके बाद वे फेर गये अर जिन दास-दासियाँ ताहीं उननै आजाद करकै जाण दिया था उननै फेर अपणे बस म्ह ल्याकै दास अर दास्सी बणा लिया। 12 फेर यहोवा की और तै यो वचन यिर्मयाह के धोरै पोहच्या 13 "इस्राएल का परमेसवर यहोवा थारे तै न्यू कहवै सै, जिस बखत मै थारे पितरां नै गुलाम्मी कै घर यानिके मिस्र देश तै लिकाड़ ले आया, उस बखत मन्‍नै आप उनतै न्यू कहकै करार करया 14 ‘थारा जो इब्री भाई थारै हाथ म्ह बेच्या जावै उस नै थारै सातवें साल म्ह छोड़ दियो; छः साल तो वो थारी सेवा करै पर इसके बाद थम उसनै आजाद करकै अपणे धोरै तै जाण दियो।’ पर थारे पितरां नै मेरी ना सुणी, ना मेरी और कान लगाया।* 15 थम इब्बे फिरे तो थे अर अपणे-अपणे भाई नै आजाद कर देण का प्रचार कराकै जो काम मेरी नजर म्ह भला सै उस ताहीं थमनै करया भी था, अर जो भवन मेरा कुहवावै सै उस म्ह मेरे स्याम्ही करार भी करया था; 16 पर थम भटकगे अर मेरा नाम इस रीति तै अशुद्ध करया के जिन दास-दासियाँ नै थम आजाद करकै उनकी इच्छा पै छोड़ चुके थे उननै थमनै फेर अपणे बस म्ह कर लिया सै, अर वे फेर थारे दास-दास्सी बणगे सैं। 17 इस कारण यहोवा न्यू कहवै सै: थमनै जो मेरा हुकम कै मुताबिक अपणे-अपणे भाई के आजाद होण का प्रचार न्ही करया, आखर म्ह यहोवा का यो वचन सै, सुणो, मै थारे इस तरियां तै आजाद होण का प्रचार करुँ सूं के थम तलवार, मरी अर काळ म्ह पड़ोगे; अर मै इसा करुँगा के थम धरती के राज्य-राज्य म्ह मारे-मारे फिरोगे।* 18 जो माणस मेरा करार का उलंघण करै सैं अर जो प्रण उननै मेरे स्याम्ही अर बाछड़े ताहीं दो भाग करकै उसके दोन्‍नु भागां कै बीच होकै करया पर उसनै पूरा ना करया, 19 यानिके यहूदा देश अर यरुशलेम नगर के हाकिम, खोजे, याजक अर साधारण माणस जो बाछड़े के हिस्से के बीच होकै गये थे, 20 उननै मै उनके दुश्मनां यानिके उनके प्राण के खोजियाँ कै बस म्ह कर देऊँगा अर उनकी लाश अकास कै पन्छियाँ अर मैदान के पशुआं का भोजन हो जावैंगी। 21 मै यहूदा के राजा सिदकिय्याह अर उसके हाकिमां नै उनके दुश्मनां अर उनके प्राण के खोजियाँ यानिके बाबेल के राजा की सेना कै बस म्ह कर देऊँगा जो थारै स्याम्ही तै चली गयी सै। 22 यहोवा का यो वचन सै के देक्खो, मै उननै हुकम देकै इस नगर* के धोरै बोहड़ा ले आऊँगा अर वे लड़कै इसे ले लेवैंगे अर फूँक देवैंगे; अर यहूदा के नगरां ताहीं मै इसा उजाड़ दियुँगा के कोए उन म्ह ना रहवैगा।"