यिर्मयाह 37

सिदकिय्याह का निवेदन

1 यहोयाकीम के बेट्टे कोन्याह की जगहां पै योशिय्याह का बेट्टा सिदकिय्याह राज्य करण लाग्या, क्यूँके बाबेल के राजा नबूकदनेस्सर नै उस्से ताहीं यहूदा देश म्ह राजा ठहराया था। 2 फेर भी ना तो उसनै, ना उसके कर्मचारियाँ नै, अर ना साधारण माणसां नै यहोवा के वचनां ताहीं मान्या जो उसनै यिर्मयाह नबी कै जरिये कह्या था।

3 सिदकिय्याह राजा नै शेलेम्याह के बेट्टे यहूकल अर मासेयाह के बेट्टे सपन्याह याजक ताहीं यिर्मयाह नबी के धोरै या कहला भेज्या, "म्हारे खात्तर म्हारे परमेसवर यहोवा तै प्रार्थना कर।" 4 उस बखत यिर्मयाह जेळ म्ह ना गेरया गया था, अर माणसां कै बीच आया-जाया करै था। 5 उस बखत फिरौन की सेना चढ़ाई के खात्तर मिस्र तै लिकड़ी; फेर कसदी जो यरुशलेम ताहीं घेरे होए थे, उसकी खबर सुणकै यरुशलेम के धोरै तै चले गये।

6 फेर यहोवा का यो वचन यिर्मयाह नबी के धोरै पोहच्या 7 "इस्राएल का परमेसवर यहोवा न्यू कहवै सै: यहूदा के जिस राजा नै थारै ताहीं प्रार्थना करण कै खात्तर मेरे धोरै भेज्या सै*37:7 थारै ताहीं प्रार्थना करण कै खात्तर मेरे धोरै भेज्या सै उरै यिर्मयाह का जवाब यिर्म. 21:4-7 की तुलना म्ह घणा विपरीत सै।, उसतै न्यू कह्यो, ‘देख, फिरौन की जो सेना थारी मदद के खात्तर लिकड़ी सै वो अपणे देश मिस्र म्ह बोहड़ जावैगी। 8 कसदी फेर दोबारा आकै इस नगर तै लड़ैंगें; वे इसनै ले लेंगे अर फूँक देवैंगे। 9 यहोवा न्यू कहवै सै: या कहकै थम अपणे-अपणे मन म्ह धोखा ना खाओ "कसदी म्हारे धोरै तै जरुर चले गये सैं;" क्यूँके वे चले न्ही गये। 10 क्यूँके जै थमनै कसदियाँ की सारी सेना ताहीं जो थारै तै लड़ै सै, इसा मार भी लिया होन्दा के उन म्ह तै सिर्फ घायल माणस रह जान्दे, तोभी वे अपणे-अपणे तम्बू म्ह तै उठकै इस नगर ताहीं फूँक देन्दे।’"

यिर्मयाह की कैद अर उसका छुटकारा

11 जिब कसदियाँ की सेना फिरौन की सेना के डरकै मारे यरुशलेम कै धोरै तै लिकड़कै गई, 12 फेर यिर्मयाह यरुशलेम तै लिकड़कै बिन्‍यामीन के देश की ओड़ इस करकै जा लिकड़या के ओड़ै तै और माणसां कै गैल अपणा भाग ले। 13 जिब वो बिन्‍यामीन क्षेत्र के फाटक म्ह पोहच्या, फेर यरिय्याह नाम का पहरेदारां का एक सरदार ओड़ै था जो शेलेम्याह का बेट्टा अर हनन्याह का पोत्ता था, अर उसनै यिर्मयाह नबी नै न्यू कहकै पकड़ लिया, "तू कसदियाँ कै धोरै भाग जावै सै।" 14 फेर यिर्मयाह नै कह्या, "या झूठ सै; मै कसदियाँ कै धोरै न्ही भाज जाऊँ सूं।" पर यरिय्याह नै उसकी एक ना मान्‍नी, अर वो उसनै पकड़कै हाकिमां कै धोरै लेग्या। 15 फेर हाकिमां नै यिर्मयाह तै छो म्ह होकै उस ताहीं पिटवाया, अर योनातान प्रधान कै घर म्ह कैदी बणाकै डलवा दिया; क्यूँके उननै उस ताहीं साधारण जेळ बणा दिया था।*37:15 इब्रा. 11:36

16 यिर्मयाह उस जेळ म्ह जिस म्ह कई एक कोठड़ियाँ थी, रहण लाग्या। 17 उसके घणे दिन बीतण पै सिदकिय्याह राजा नै उस ताहीं बुलावा भेज्या, अर अपणे भवन म्ह उसतै छिपकै या सवाल करया, "के यहोवा की ओड़ तै कोए वचन पोहच्या सै?" यिर्मयाह नै कह्या, "हाँ, पोहच्या सै। वो न्यू सै, के तू बाबेल कै राजा के बस म्ह कर दिया जावैगा।"

18 फेर यिर्मयाह नै सिदकिय्याह राजा तै कह्या, "मन्‍नै तेरा, तेरे हाकिमां का, अर तेरी प्रजा का के अपराध करया सै, के थमनै मेरे ताहीं जेळ म्ह गिरवाया सै? 19 थारे जो नबी थारे तै भविष्यवाणी करकै कह्या करै थे के बाबेल का राजा थारे पै अर इस देश पै चढ़ाई न्ही करैगा, वे इब कित्त सै? 20 इब, हे मेरे प्रभु, हे राजा, मेरी प्रार्थना ग्रहण कर कै मेरे ताहीं योनातान प्रधान कै घर म्ह फेर ना भेज, न्ही तो मै ओड़ै मर जाऊँगा।" 21 फेर सिदकिय्याह राजा के हुकम तै यिर्मयाह पहरे के आँगण म्ह छोड्या गया, अर जिब ताहीं नगर की सारी रोट्टी खतम ना होगी, तब तक उस ताहीं रोट्टी आळयां की दुकान म्ह तै हर रोज एक रोट्टी देई जाया करै थी। यिर्मयाह पहरे के आँगण म्ह रहण लाग्या।