1 योशिय्याह के बेट्टे यहूदा के राजा यहोयाकीम के चौथे साल म्ह जो बाबेल के राजा नबूकदनेस्सर के राज्य का पैहला साल था, यहोवा का जो वचन यिर्मयाह नबी के धोरै पोहच्या, 2 उस ताहीं यिर्मयाह नबी नै सारे यहूदियाँ अर यरुशलेम के सारे बासिन्दया ताहीं बताया, वा यो सै: 3 "आमोन के बेट्टे यहूदा के राजा योशिय्याह के राज्य के तेरहवें साल तै लेकै आज कै दिन ताहीं यानिके तेईस साल तै यहोवा का वचन मेरे धोरै पोहचदा आया सै; अर मै उसनै बड़ी कोशिश कै गैल थारे तै कहन्दा आया सूं; फेर भी थमनै उस ताहीं न्ही सुण्या। 4 जै यहोवा थारे धोरै अपणे सारे दास्सां या नबियाँ नै भी या कहण कै खात्तर बड़ी कोशिश तै भेजदा आया सै 5 के ‘अपणी-अपणी बुरी चाल अर अपणे-अपणे बुरे काम्मां तै फिरो*: फेर जो देश यहोवा नै पुराणे बखत म्ह थारे पितरां ताहीं अर थारे ताहीं भी सदा कै खात्तर दिया सै उसपै बसे रहण पाओगे; फेर भी थमनै ना तो सुण्या अर ना कान लगाया सै। 6 अर दुसरे देवत्यां कै पाच्छै होकै उनकी उपासना अर उन ताहीं दण्डवत ना करो, अर ना अपणी बणाई होई चिज्जां कै जरिये मेरे ताहीं छो दुवाओ; फेर मै थारा कुछ नुकसान ना करुँगा।’ 7 या सुणण पै भी थमनै मेरी न्ही मान्‍नी, बलके अपणी बणाई होई चिज्जां कै जरिये मेरे ताहीं छो दुवान्दे आए सो जिसतै थारा नुकसान हो सकै सै, यहोवा की योए वाणी सै।"

8 "इस करकै सेनाओं का यहोवा न्यू कहवै सै: थमनै जो मेरे वचन न्ही माने, 9 इस करकै सुणो, मै उत्तर म्ह रहण आळे सारे कुलां ताहीं बुलाऊँगा, अर अपणे दास बाबेल के राजा नबूकदनेस्सर ताहीं बुलावा भेज्जूँगा; अर उन सारया ताहीं इस देश अर इसके बासिन्दया कै खिलाफ अर इसके लोवै-धोवै की सारी जात्तां कै खिलाफ भी ले आऊँगा; अर इन सारे देशां का मै सत्यानाश करकै उन ताहीं इसा उजाड़ दियुँगा के माणस इन ताहीं देखकै ताड़ी बजावैंगे; बलके ये सदा उजड़े ए रहवैंगे, यहोवा की योए वाणी सै। 10 अर मै इसा करुँगा के इन म्ह ना तो खुशी अर ना आनन्द का शब्द सुणाई पड़ैगा, अर ना बन्दड़े या बन्दड़ी का, अर ना चाक्‍की का भी शब्द सुणाई पड़ैगा अर ना इन म्ह दिया जळैगा।* 11 सारी जातियाँ का यो देश उजाड़ ए उजाड़ होवैगा, अर ये सारी पड़ोसी देश सत्तर साल ताहीं बाबेल के राजा के अधीन रहवैंगी। 12 जिब सत्तर साल बीत लेवैं, फेर मै बाबेल के राजा अर उस जात्ति के माणसां अर कसदियाँ के देश के सारे बासिन्दया ताहीं अधर्म की सजा देऊँगा, यहोवा की या वाणी सै; अर उस देश ताहीं सदा कै खात्तर उजाड़ देऊँगा। 13 मै उस देश म्ह अपणे वे सारे वचन पूरे करुँगा जो मन्‍नै उसकै बारै म्ह कह्ये सैं, अर जितने वचन यिर्मयाह नै सारी जातियाँ कै खिलाफ भविष्यवाणी करकै किताब म्ह लिखे सैं। 14 क्यूँके भोत सी जात्तां के माणस अर बड़े-बड़े राजा भी उनतै अपणी सेवा करावैंगे; अर मै उननै उनकी करणी का फळ भुगताऊँगा।"

15 इस्राएल के परमेसवर यहोवा नै मेरे ताहीं न्यू कह्या, "मेरे हाथ तै इस जळजळाहट के दाखमधु का कटोरा लेकै उन सारी जात्तां ताहीं प्यादे जिनकै धोरै मै तेरे ताहीं भेज्जू सूं।* 16 वे उसनै पीकै उस तलवार कै कारण जो मै उनके बीच म्ह चलाऊँगा लड़खड़ावैंगे अर बावळे हो जावैंगे।"

17 इस करकै मन्‍नै यहोवा कै हाथ तै वो कटोरा लेकै उन सारी जातियाँ ताहीं जिनकै धोरै यहोवा नै मेरे ताहीं भेज्या, प्या दिया। 18 यानिके यरुशलेम अर यहूदा के नगरां के बासिन्दया ताहीं, अर उनके राजाओं अर हाकिमां ताहीं प्याया, ताके उनका देश उजाड़ हो जावै अर माणस ताड़ी बजावै, अर उसकी मिसाल देकै श्राप दिया करै; जिसा आजकाल होवै सै। 19 अर मिस्र के राजा फिरौन अर उसके कर्मचारियाँ, हाकिमां, अर सारी प्रजा ताहीं; 20 अर सारे विदेशी माणसां की जात्तां ताहीं अर ऊज देश के सारे राजयां ताहीं; अर पलिश्तियाँ कै देश के सारे राजयां ताहीं अर अश्कलोन, गाज़ा अर एक्रोन के अर अश्दोद के बचे होए माणसां ताहीं; 21 अर एदोमियां, मोआबियाँ अर अम्मोनियाँ के सारे राजयां ताहीं; 22 अर सोर के अर सीदोन के सारे राजयां ताहीं, अर समुन्दर पार के देशां के राजयां ताहीं; 23 फेर ददानियां, तेमाइयां अर बूजियाँ ताहीं अर जितने अपणे गाल के बाळां नै मुँण्डा देवै सैं, उन सारया ताहीं भी; 24 अर अरब के सारे राजयां ताहीं अर बियाबान म्ह रहण आळे दोगले माणसां के सारे राजयां ताहीं; 25 अर जिम्री, एलाम अर मादै के सारे राजयां ताहीं; 26 अर के धोरै के दूर के उत्तर दिशा के सारे राजयां ताहीं एक संग प्याया, इस तरियां धरती भर म्ह रहण आळे जगत के राजयां के सारे माणसां ताहीं मन्‍नै प्याया। अर इन सारया कै बाद शेशक के राजा ताहीं भी पीणा पड़ैगा।

27 "फेर तू उनतै न्यू कहिये, ‘सेनाओं का यहोवा जो इस्राएल का परमेसवर सै, यो कहवै सै, पीओ, अर मतवाले हो* अर उलटी करो, गिर पड़ो अर फेर कदे ना उठो, क्यूँके यो उस तलवार कै कारण तै होवैगा जो मै थारे बीच म्ह चलाऊँगा*।’"

28 "जै वे तेरे हाथ तै या कटोरा लेकै पीण तै इन्कार करै तो उनतै कहणा, ‘सेनाओं का यहोवा न्यू कहवै सै के थारे ताहीं पक्‍का पीणा पड़ैगा। 29 देक्खो, जो नगर मेरे कुहवावै सै, मै पैहले उसे म्ह विपत्ति गेरण लाग्गूँगा, फेर के थम निर्दोष ठहरकै बचोगे? थम निर्दोष ठहरकै ना बचोगे, क्यूँके मै धरती के सारे रहण आळयां पै तलवार चलाण पै सूं, सेनाओं के यहोवा की योए वाणी सै।*’"

30 "इतणी बात भविष्यवाणी की रीति पै उनतै कहकै न्यू भी कहिये, ‘यहोवा उप्पर तै गरजैगा*, अर अपणे उसे पवित्र धाम म्ह तै अपणा शब्द सुणावैगा; वो अपणी चराई की जगहां कै खिलाफ जोर तै गरजैगा; वो धरती के सारे बासिन्दया कै खिलाफ भी दाख लताड़ण आळयां की तरियां ललकारैगा* ।

31 धरती की छोर ताहीं भी शोर-सराबा होवैगा, क्यूँके सारी जातियाँ तै यहोवा का मुकद्दमा सै; वो सारे माणसां तै वाद-विवाद करैगा, अर दुष्टां नै तलवार कै बस म्ह कर देवैगा।’"

32 "सेनाओं का यहोवा न्यू कहवै सै: देक्खो, विपत्ति एक जात्ति तै दुसरी जात्ति म्ह फैलैगी, अर बड़ी आँधी धरती की छोर तै उठैगी! 33 उस बखत यहोवा के मारे होया की लाश धरती की एक छोर तै दुसरी छोर ताहीं पड़ी रहवैंगी। उनकै खात्तर कोए रोण-पीटण आळा ना रहवैगा, अर उनकी लाश ना तो कठ्ठी करी जावैंगी अर ना कब्रां म्ह राक्खी जावैंगी; वे धरती के उप्पर खाद की तरियां पड़ी रहवैंगी। 34 हे पाळीयो, हाय-हाय करो अर चिल्‍लाओ, हे ताकतवर मिंढयाँ अर बकरयां, राख म्ह बोहड़ आओ, क्यूँके थारी हत्या होण के दिन आ पोहचे सैं, अर मै मनोहर बरतन की तरियां थारा सत्यानाश करुँगा*। 35 उस बखत ना तो पाळीयाँ के भाजण कै खात्तर कोए जगहां रहवैगी, अर ना ताकतवर मिंढे अर बकरे भाजण पावैंगें। 36 पाळीयाँ की चिल्‍लाहट अर ताकतवर मिंढयाँ अर बकरयां के मिमियाणे का शब्द सुणाई पड़ै सै! क्यूँके यहोवा उनकी चराई नै नाश करैगा, 37 अर यहोवा के छो भड़कण कै कारण शान्ति की जगहां नाश हो जावैंगी, जिस रहण की जगहां म्ह इब शान्ति सै, वे नाश हो जावैंगे। 38 जवान शेर की तरियां यहोवा अपणी गुफा नै छोड़कै लिकड़ै सै, क्यूँके अंधेर करण आळी तलवार अर उसके भड़के होए कोप के कारण उनका देश उजाड़ होग्या सै।"