1 यो वचन यहोवा की ओड़ तै यिर्मयाह कै धोरै उस बखत पोहच्या जिब सिदकिय्याह राजा नै उसकै धोरै मल्किय्याह के बेट्टे पशहूर अर मासेयाह याजक के बेट्टे सपन्याह कै हाथ तै या बिनती करी 2 "म्हारे खात्तर यहोवा तै पूछ, क्यूँके बाबेल का राजा नबूकदनेस्सर म्हारे बिरुध्द युद्ध कर रह्या सै; शायद यहोवा म्हारे तै अपणे सारे अचम्भे के काम्मां कै मुताबिक इसा बरताव करै* के वो म्हारे धोरै तै चल्या जावै।"

3 फेर यिर्मयाह नै उनतै कह्या, "थम सिदकिय्याह तै न्यू कह्यो, 4 ‘इस्राएल का परमेसवर यहोवा न्यू कहवै सै: देक्खो, युद्ध के जो हथियार थारे हाथां म्ह सै, जिनतै थम बाबेल के राजा अर शहरपनाह कै बाहर घेरण आळे कसदियाँ तै लड़ रहे सो, उननै मै बोहड़ा कै इस नगर कै बीच म्ह कठ्ठा करुँगा; 5 अर मै खुद हाथ बढ़ाकै अर ताकतवर भुजा तै, अर छो अर जळजळाहट अर बड़े छो म्ह आकै थारे बिरुध्द लड़ूँगा। 6 मै इस नगर के रहण आळयां नै के माणस, के पशु सारया ताहीं मार गेरूँगा; वे बड़ी मरी तै मरैगें। 7 उसकै पाच्छै, यहोवा की या वाणी सै, हे यहूदा के राजा सिदकिय्याह, मै तेरे ताहीं, तेरे कर्मचारियाँ अर माणसां नै बलके जो माणस इस नगर म्ह मरी, तलवार अर काळ तै बचे रहवैंगे उननै बाबेल के राजा नबूकदनेस्सर अर उनकी जान के दुश्मनां कै बस म्ह कर दियुँगा। वो उननै तलवार तै मार गेरैगा; उनपै ना तो वो तरस खावैगा, ना कुछ कोमलता दिखावैगा अर ना कुछ दया करैगा।*’"

8 "इस प्रजा के माणसां तै कह के यहोवा न्यू कहवै सै, देक्खो, मै थारे स्याम्ही जीवन का राह अर मौत का राह भी बताऊँ सूं। 9 जो कोए इस नगर म्ह रहवै वो तलवार, काळ अर मरी तै मरैगा; पर जो कोए लिकड़कै उन कसदियाँ कै धोरै जो थारे ताहीं घेर रहे सैं भाग जावै वो जिन्दा रहवैगा, अर उसकी जान बच जावैगी। 10 क्यूँके यहोवा की या वाणी सै के मन्‍नै इस नगर की ओड़ अपणा मुँह भलाई कै खात्तर न्ही, बलके बुराई ए कै खात्तर करया सै; यो बाबेल के राजा कै बस म्ह पड़ जावैगा, अर वो इसनै फुँकवा देवैगा।"

11 "यहूदा के राज कुल के माणसां तै कह, ‘यहोवा का वचन सुणो 12 हे दाऊद के कुण्बे! यहोवा न्यू कहवै सै, भोर नै न्याय चुकाओ*, अर लुटे होए नै अंधेर करण आळे कै हाथ तै छुड़ाओ, न्ही तो थारे बुरे काम्मां कै कारण मेरे छो की आग भड़कैगी, अर इसी जळदी रहवैगी के कोए उसनै बुझा ना सकैगा।’"

13 "हे तराई म्ह रहण आळी अर समथर देश की चट्टान; थम जो कहो सो, ‘म्हारे पै कौण चढ़ाई कर सकैगा, अर म्हारे रहण की जगहां म्ह कौण बड़ सकैगा?’ यहोवा कहवै सै के मै थारे बिरुध्द सूं। 14 अर यहोवा की वाणी सै के मै थमनै सजा देकै थारे काम्मां का फळ थमनै भुगताऊँगा। मै उसके जंगळ म्ह आग लगाऊँगा, अर उसके च्यांरु ओड़ सारा कुछ भस्म हो जावैगा।"