1 फेर उसे साल, यानिके यहूदा के राजा सिदकिय्याह के राज्य के चौथे साल के पाँचवें महिन्‍ने म्ह, अज्जूर के बेट्टे हनन्याह जो गिबोन नगर*) हनन्याह हो सकै सै पुरोहित एवं भविष्यवक्ता था। का एक नबी था, उसनै मेरे ताहीं यहोवा के भवन म्ह, याजकां अर सारे माणसां के स्याम्ही कह्या, 2 "इस्राएल का परमेसवर सेनाओं का यहोवा न्यू कहवै सै मन्‍नै बाबेल के राजा के जूए ताहीं तोड़ गेरया सै*। 3 यहोवा के भवन के जितने पात्र बाबेल का राजा नबूकदनेस्सर इस जगहां तै ठाकै बाबेल लेग्या, उननै मै दो साल कै भित्तर फेर इस्से जगहां म्ह ले आऊँगा।* 4 मै यहूदा के राजा यहोयाकीम के बेट्टे यकोन्याह अर सारे यहूदी बन्दियाँ ताहीं भी जो बाबेल म्ह गये सैं, उननै भी इस जगहां म्ह बोहड़ा ले आऊँगा; क्यूँके मन्‍नै बाबेल के राजा के जूए ताहीं तोड़ दिया सै, यहोवा की योए वाणी सै।"

5 फेर यिर्मयाह नबी नै हनन्याह नबी तै, याजकां अर उन सारे माणसां कै स्याम्ही जो यहोवा के भवन म्ह खड़े होए थे कह्या, 6 "आमीन! यहोवा इसाए करै; जो बात तन्‍नै भविष्यवाणी करकै कही सैं के यहोवा के भवन के पात्र अर सारे कैदी बाबेल तै इस जगहां म्ह फेर आवैंगे, उननै यहोवा पूरा करै। 7 तोभी मेरा यो वचन सुण, जो मै तेरे ताहीं अर सारे माणसां ताहीं कह सुणाऊँ सूं। 8 जो नबी पुराणे बखत तै मेरे अर तेरे पैहले होन्दे आए थे, उननै तो भोत-से देशां अर बड़े-बड़े राजयां कै खिलाफ युद्ध अर विपत्ति अर मरी कै बारै म्ह भविष्यवाणी करी थी। 9 पर जो नबी सलामती कै बारै म्ह भविष्यवाणी करै, तो जिब उसका वचन पूरा हो, फेर ए उस नबी कै बारै म्ह यो पक्‍का हो जावैगा के यो सचमुच यहोवा का भेज्या होया सै।"

10 फेर हनन्याह नबी नै उस जूए ताहीं जो यिर्मयाह नबी की गर्दन पै था, तारकै तोड़ दिया।* 11 अर हनन्याह नै सारे माणसां कै स्याम्ही कह्या, "यहोवा न्यू कहवै सै के इस्से तरियां तै मै पूरे दो साल कै भित्तर बाबेल के राजा नबूकदनेस्सर के जूए ताहीं सारी जातियाँ की गर्दन पै तै तारकै तोड़ देऊँगा।" फेर यिर्मयाह नबी चल्या ग्या।

12 जिब हनन्याह नबी नै यिर्मयाह नबी की गर्दन पै तै जूआ तारकै तोड़ दिया, उसके बाद यहोवा का यो वचन यिर्मयाह कै धोरै पोहच्या; 13 "जाकै हनन्याह तै यो कह, ‘यहोवा न्यू कहवै सै के तन्‍नै काठ का जूआ तो तोड़ दिया, पर इसा करकै तन्‍नै उसकै बदलै लोहे का जूआ बणा लिया सै। 14 क्यूँके इस्राएल का परमेसवर, सेनाओं का यहोवा न्यू कहवै सै के मै इन सारी जात्तां की गर्दन पै लोहे का जूआ धरुँ सूं अर वे बाबेल के राजा नबूकदनेस्सर के अधीन रहवैंगें, अर इन ताहीं उसकै अधीन होणा पड़ैगा, क्यूँके मैदान के जीव जन्तु भी मै उसकै बस म्ह कर देऊँ सूं।’" 15 यिर्मयाह नबी नै हनन्याह नबी तै न्यू भी कह्या, "हे हनन्याह, देख यहोवा नै तेरे ताहीं न्ही भेज्या, तन्‍नै इन माणसां तै झूठ्ठी उम्मीद दुआई सै। 16 इस करै कै यहोवा तेरै तै न्यू कहवै सै, ‘देख, मै तेरे ताहीं धरती के उप्पर तै उठ्या देऊँगा, इस्से साल म्ह तू मरैगा; क्यूँके तन्‍नै यहोवा के बिरुध्द जाण की बात कही सैं।’" 17 इस वचन के मुताबिक हनन्याह उसे साल के सातवें महिन्‍ने म्ह मर ग्या।