यिर्मयाह 35

यिर्मयाह अर रेकाब की पीढी

1 योशिय्याह के बेट्टे यहूदा के राजा यहोयाकीम के राज्य म्ह यहोवा की ओड़ तै यो वचन यिर्मयाह के धोरै पोहच्या 2 "रेकाबियाँ के घराने कै धोरै जाकै उनतै बात कर अर उननै यहोवा के भवन की एक कोठड़ी म्ह ले जाकै दाखमधु पिला।" 3 फेर मन्‍नै याजन्याह*35:3 याजन्याह याजन्याह यरुशलेम म्ह शरण लेण आळे गोत्र का प्रधान था। ताहीं जो हबस्सिन्याह का पोत्ता अर यिर्मयाह का बेट्टा था, अर उसके भाईयाँ अर सारे बेट्टयाँ ताहीं, यानिके रेकाबियाँ के सारे घराने ताहीं गैल लिया। 4 मै उननै परमेसवर के भवन म्ह, यिग्दल्याह के बेट्टे हानान, जो परमेसवर का एक जन था, उसकी कोठड़ी म्ह ले आया जो हाकिमां की उस कोठड़ी के धोरै थी अर शल्‍लूम के बेट्टे डेवढ़ी के रुखाळे मासेयाह की कोठड़ी के उप्पर थी। 5 फेर मन्‍नै रेकाबियाँ के घराने ताहीं दाखमधु तै भरे होए हँडे अर कटोरे देकै कह्या, "दाखमधु पीओ।" 6 उननै कह्या, "हम दाखमधु ना पीवागें क्यूँके रेकाब के बेट्टे योनादाब नै जो म्हारा पूर्वज था म्हारे ताहीं यो हुकम दिया था, ‘थम कदे दाखमधु ना पियो; ना थम, ना थारे बेट्टे। 7 ना घर बणाईयो, ना बीज बोईयो, ना दाख की बारी लगाईयो, अर ना उनके अधिकारी होइयो; पर जिन्दगी भर तम्बूआं ए म्ह रहियो जिसतै जिस देश म्ह थम परदेशी हो, उस म्ह भोत दिन तक जिन्दे रहो।’ 8 इस करकै हम रेकाब के बेट्टे अपणे पुरखा यहोनादाब की बात मानकै, उसके सारे हुकमां कै मुताबिक चाल्‍लां सां, ना हम अर ना म्हारी जनानियाँ या बेट्टे-बेटियाँ कदे दाखमधु पीवै सैं, 9 अर ना हम घर बणाकै उन म्ह रहवां सां। हम ना दाख की बारी, ना खेत, अर ना बीज राक्खां सां; 10 हम तम्बूआं ए म्ह रह्या करा सां, अर अपणे पूर्वज योनादाब की बात मानकै उसके सारे हुकमां कै मुताबिक काम करा सां। 11 फेर भी जिब बाबेल के राजा नबूकदनेस्सर नै इस देश पै चढ़ाई करी, फेर हमनै कह्या, ‘चलो, कसदियाँ अर अरामियां के दलां के डर के मारे यरुशलेम म्ह जावां।’ इस कारण हम इब यरुशलेम म्ह रहवां सां।"

12 फेर यहोवा का यो वचन यिर्मयाह के धोरै पोहच्या। 13 इस्राएल का परमेसवर सेनाओं का यहोवा न्यू कहवै सै: "जाकै यहूदा देश के माणसां अर यरुशलेम नगर के बासिन्दया तै कह, यहोवा की या वाणी सै, के थम शिक्षा मानकै मेरी ना सुणोगे? 14 देक्खो, रेकाब के बेट्टे यहोनादाब नै जो हुकम अपणे वंश ताहीं दिया था के थम दाखमधु ना पीणा वो तो मान्या गया सै उरै ताहीं के आज कै दिन भी वे माणस कुछ न्ही पीन्दे, वे अपणे पूर्वजां का हुकम मान्‍नै सैं; पर फेर भी मै थारै तै बड़ा यत्न तै कहन्दा आया सूं, तोभी थमनै मेरी न्ही सुणी। 15 मै थारै धोरै अपणे सारे दास नबियाँ ताहीं बड़ा यत्न करकै न्यू कहण ताहीं भेजदा आया सूं, ‘अपणी बुरी चाल तै फिरो, अर अपणे काम सुधारो, अर दुसरे देवत्यां कै पाच्छै जाकै उनकी उपासना ना करो फेर थम इस देश म्ह जो मन्‍नै थारे पितरां ताहीं दिया था अर थारै ताहीं भी दिया सै, बसण पाओगे।’ पर थमनै मेरी और कान न्ही लगाया ना मेरी सुणी सै। 16 देक्खो, रेकाब के बेट्टे यहोनादाब कै वंश नै तो अपणे पुरखा का हुकम ताहीं मान लिया पर थमनै मेरी न्ही सुणी। 17 इस करकै सेनाओं का परमेसवर यहोवा, जो इस्राएल का परमेसवर सै, न्यू कहवै सै: देक्खो, यहूदा देश अर यरुशलेम नगर के सारे बासिन्दया पै जितनी विपत्ति गेरूँगा के मन्‍नै जिक्र करया सै वो उनपै इब गेरूँगा; क्यूँके मन्‍नै उन ताहीं सुणाया पर उननै न्ही सुण्या, मन्‍नै उन ताहीं बुलाया पर उननै जवाब ना दिया।"

18 पर रेकाबियाँ के घराने तै यिर्मयाह नै कह्या, "इस्राएल का परमेसवर सेनाओं का यहोवा थारै तै न्यू कहवै सै: इस करकै के थमनै जो अपणे पुरखा यहोनादाब का हुकम मान्या, बलके उसके सारे हुकमां ताहीं मान लिया अर जो कुछ उसनै कह्या उसके मुताबिक काम करया सै, 19 इस करकै इस्राएल का परमेसवर सेनाओं का यहोवा न्यू कहवै सै: रेकाब के बेट्टे योनादाब के वंश म्ह सदा इसा माणस पाया जावैगा जो मेरे स्याम्ही खड्या रहवै।"