1 मोआब कै बारै म्ह इस्राएल का परमेसवर, सेनाओं का यहोवा न्यू कहवै सै: "नबो पै हाय, क्यूँके वो नाश होग्या! किर्यातैम की उम्मीद गई, वो ले लिया गया सै; ऊँच्‍चा गढ़ निराश अर हैरान होग्या सै। 2 मोआब की बड़ाई जान्दी रही। हेशबोन म्ह उसका नुकसान की कल्पना करी गई सै: ‘आओ, हम उसनै इसा नाश करां के वो राज्य ना रह जावै।’ हे मदमेन, तू भी सुनसान हो जावैगा; तलवार तेरे पाच्छै पड़ैगी।"

3 "होरोनैम तै चिल्‍लाहट का शब्द सुणो! नाश अर बड़े दुःख का शब्द सुणाई देवै सै! 4 मोआब का सत्यानाश हो रह्या सै; उसके छोट्टे बाळकां की चिल्‍लाहट सुण पड़ी। 5 क्यूँके लूहीत की चढ़ाई म्ह माणस लगातार रोन्दे होए चढ़ैंगे; अर होरोनैम की उतार म्ह नाश की चिल्‍लाहट का संकट होया सै। 6 भाज्जो! अपणी-अपणी जान बचाओ! उस अधमूए पेड़ की तरियां हो जाओ जो जंगळ म्ह होवै सै! 7 क्यूँके तू जो अपणे काम्मां अर धन-दौलत पै भरोस्सा राक्खै सै, इस कारण तू भी पकड्या जावैगा; अर कमोश* देवता भी अपणे याजकां अर हाकिमां समेत गुलाम्मी म्ह जावैगा। 8 यहोवा के वचन कै मुताबिक नाश करण आळे थारे हर एक नगर पै चढ़ाई करैंगे, अर कोए नगर ना बचैगा; घाटी आळे अर पहाड़ पै की चौरस धरती आळे दोन्‍नु नाश करे जावैंगे।"

9 "मोआब कै पंख लगा द्यो ताके वो उड़ कै दूर हो जावै; क्यूँके उसके नगर इसे उजाड़ हो जावैंगे के उन म्ह कोए भी ना बसण पावैगा।"

10 "श्रापित सै वो जो यहोवा का काम आलस तै करै सै; अर वो भी जो अपणी तलवार लहू बहाण तै रोक राक्खै सै।"

11 "मोआब बचपन तै ए सुखी सै, उसकै नीच्‍चै तलछट सै, वो एक बरतन तै दुसरे बरतन म्ह उण्डेल्या न्ही गया अर ना गुलाम्मी म्ह गया; इस करकै उसका स्वाद उस म्ह स्थिर सै, अर उसकी गन्ध ज्यों की त्यों बणी रहवै सै। 12 इस कारण यहोवा की या वाणी सै, इसे दिन आवैंगे, के मै माणसां नै उसके उडेलण कै खात्तर भेज्जूँगा, अर वे उस ताहीं उण्डेलैगें, अर जिन घड़यां म्ह वो धरया होया सै, उननै खाल्‍ली करकै फोड़ देवैंगे। 13 तब जिस तरियां इस्राएल के घराने नै बेतेल तै शर्मिन्दा होणा पड़या*, जिसपै वे भरोस्सा राक्खै थे, उसे तरियां मोआबी माणस उनके देवता कमोश तै शर्मिन्दा होवैंगे।"

14 "थम किस तरियां कह सको सो के हम वीर अर पराक्रमी योद्धा सां? 15 मोआब तो नाश होया, उसके नगर भस्म हो गये अर उसके चुणे होए जवान घात होण नै उतर गए, राजाधिराज, जिसका नाम सेनाओं का यहोवा सै, उसकी योए वाणी सै। 16 मोआब की विपत्ति धोरै आ गी, अर उसके संकट म्ह पड़ण का दिन घणीए रफतार तै आवै सै। 17 उसके लोवै-धोवै के सारे रहण आळेयो, अर उसकी कीर्ति के सारे जाणण आळेयो, उसके खात्तर विलाप करो; कहो, ‘हाय! यो मजबूत सोंटा अर सुन्दर छड़ी किस तरियां टूटगी सै?’"

18 "हे दीबोन की रहण आळी तू अपणा वैभव छोड़कै प्यासी बैठी रह! क्यूँके मोआब के नाश करण आळे नै तेरै पै चढ़ाई करकै तेरे मजबूत गढां ताहीं नाश करया सै। 19 हे अरोएर की रहण आळी तू राह म्ह खड़ी होकै देखदी रह! जो भाज्जै सै उसतै, अर जो बच लिकड़ै सै उसतै पूछ के-के होया सै? 20 मोआब की उम्मीद टूट्टैगी, वो हैरान होग्या; थम हाय-हाय करो अर रुक्‍के मारो; अर्नोन म्ह भी या बताओ के मोआब नाश होया सै।"

21 "चौरस धरती कै देश म्ह होलोन, यहस, मेपात, 22 दीबोन, नबो, बेतदिबलातैम*, 23 अर किर्यातैम, बेतगामूल, बेतमोन, 24 अर करिय्योत, बोस्रा, अर के दूर के धोरै, मोआब देश के सारे नगरां म्ह सजा का हुकम पूरा होया सै। 25 यहोवा की या वाणी सै, मोआब का सींग कट ग्या, अर भुजा टूटगी सै।"

26 "उसनै मतवाला करो, क्यूँके उसनै यहोवा के खिलाफ बड़ाई मारी सै; इस करकै मोआब अपणी छाँट म्ह बोहड़ैगा, अर मजाक म्ह उड़ाया जावैगा। 27 के तन्‍नै भी इस्राएल ताहीं मजाक म्ह न्ही उड़ाया? के वो चोरां कै बीच पकड्या ग्या था के जिब तू उसकी चर्चा करै फेर तू सिर हिलावै था?"

28 "हे मोआब के रहण आळेयो अपणे-अपणे नगर नै छोड़कै चट्टान की दरार म्ह बसो! उस पिण्डुक की तरियां हो जो गुफा कै मुँह पै एक और घोंसला बणान्दी हो। 29 हमनै मोआब के घमण्ड कै बारै म्ह सुण्या सै के वो भोत घमण्डी सै; उसका घमण्ड अभिमान अर अहंकार, अर उसका मन फूलणा प्रसिद्ध सै। 30 यहोवा की या वाणी सै, मै उसके गुस्से ताहीं भी जाणु सूं के वो बेकार ए सै, उसके बड़े बोल तै भी कुछ हो न्ही पाया। 31 इस कारण मै मोआबियाँ कै खात्तर हाय-हाय करुँगा; हाँ मै सारे मोआबियाँ के खात्तर चिल्‍लाऊँगा; कीरहेरेस के माणसां के खात्तर विलाप करया जावैगा। 32 हे सिबमा नगर की दाखलता, मै थारे खात्तर याजेर तै भी घणा विलाप करुँगा! तेरी डालियाँ तो ताल कै पार बढ़गी, बलके याजेर के ताल तक भी पोहची थी; पर नाश करण आळा तेरे धूपकाल के फळां पै, अर तोड़ी होई दाखां पै भी टूट पड्या सै। 33 फळआळी बारियाँ तै अर मोआब के देश तै आनन्द अर मगन होणा उठ ग्या सै; मन्‍नै इसा करया के दाखरस के कुण्डां म्ह कुछ दाखमधु ना रह्या; माणस फेर ललकारदे होए दाख ना रौदैंगे; जो ललकार होण आळी सै, वो इब न्ही होवैगी।"

34 "हेशबोन की चिल्‍लाहट सुणकै माणस एलाले अर यहस ताहीं, अर सोअर तै होरोनैम अर एग्लत-शलीशिया ताहीं भी चिल्‍लान्दे होए भाजे चले गये सैं। क्यूँके निम्रीम का पाणी भी सूख ग्या सै। 35 अर यहोवा की या वाणी सै, के मै ऊँच्‍ची जगहां पै चढ़ावा चढ़ाणा, अर देवत्यां कै खात्तर धूप जळाणा, दोन्‍नु ताहीं मोआब म्ह बन्द कर देऊँगा। 36 इस कारण मेरा मन मोआब अर कीरहेरेस के माणसां कै खात्तर बाँसुरी जिसा रो-रोकै अलापता सै, क्यूँके जो कुछ उननै कमा कै बचाया सै, वो नाश होग्या सै। 37 क्यूँके सारया के सिर मुँण्ड़े गये अर सारया की दाढ़ियाँ नोच्‍ची गई; सारया के हाथ चीरे होए, अर सारया की कमर म्ह टाट बन्धा होया सै। 38 मोआब के सारया घरां की छात्तां पै अर सारे चौकां म्ह रोणा-पीटणा हो रह्या सै; क्यूँके मन्‍नै मोआब ताहीं निकम्मे बरतन की तरियां तोड़ गेरया सै यहोवा की या वाणी सै। 39 मोआब किस तरियां हैरान होग्या! हाय, हाय, करो! क्यूँके उसनै किस तरियां शर्मिन्दा होकै पीठ फेरी सै! इस तरियां मोआब कै च्यांरु ओड़ के सारे रहण आळे उसका मजाक करैंगे अर हैरान हो जावैंगे।"

40 क्यूँके यहोवा न्यू कहवै सै, "देक्खो, वो उकाब जिसा उड़ैगा*) अर मोआब कै उप्पर अपणे पंख फैलावैगा। 41 करिय्योत नगर ले लिया गया, अर गढ़आळे नगर दुसरयां कै बस म्ह पड़गे। उस दिन मोआबी वीरां के मन जच्‍चा जनान्‍नी की तरियां हो जावैंगे; 42 अर मोआब इसा आस्सै-पास्सै हो जावैगा के उसका दल टूट जावैगा, क्यूँके उसनै यहोवा कै खिलाफ बड़ाई मारी सै। 43 यहोवा की या वाणी सै के हे मोआब के रहण आळे, तेरे खात्तर भय अर खड्डा अर फंदे ठहराए गए सैं। 44 जो कोए भय तै भाज्जै वो खड्डे म्ह गिरैगा, अर जो कोए खड्डे म्ह तै लिकड़ै, वो फंदे म्ह फँसैगा। क्यूँके मै मोआब की सजा का दिन उसपै ले आऊँगा, यहोवा की योए वाणी सै।"

45 "जो भाजे होए सैं वो हेशबोन म्ह शरण लेकै खड़े होगे सैं; पर हेशबोन तै आग अर सीहोन के बीच तै लौ लिकड़ी*, जिसतै मोआब देश के कुणे अर बलवैयाँ के चोण्डे भस्म होगे सैं। 46 हे मोआब तेरै पै हाय! कमोश की प्रजा नाश होगी; क्यूँके तेरी जनान्‍नी अर माणस दोन्‍नु गुलाम्मी म्ह गये सैं। 47 तोभी यहोवा की या वाणी सै के बाद कै दिनां म्ह मै मोआब नै गुलाम्मी तै बोहड़ा ले आऊँगा।" मोआब की सजा का वचन उरैए तक होया।