1 जितने यहूदी माणस मिस्र देश म्ह मिग्दोल*, तहपन्हेस अर नोप नगरां अर पत्रोस देश म्ह रहवै थे, उनकै बारै म्ह यिर्मयाह कै धोरै या वचन पोहच्या 2 "इस्राएल का परमेसवर, सेनाओं का यहोवा न्यू कहवै सै: जो विपत्ति मै यरुशलेम अर यहूदा के सारे नगरां पै गेर चुक्या सूं, वो सारी थारे माणसां नै देक्खी सै। देक्खो, वे आज कै दिन किस तरियां उजड़े होए अर निर्जन सैं, 3 क्यूँके उनके बासिन्दया नै वा बुराई करी जिसतै उननै मेरे ताहीं रिस दुआई थी वे जाकै दुसरे देवत्यां के खात्तर धूप जळावै थे अर उनकी उपासना करैं थे, जिननै ना तो थम अर ना थारे पुरखा जाणै थे। 4 तोभी मै अपणे सारे दास नबियाँ नै बड़ी कोशिश तै न्यू कहण कै खात्तर थारै धोरै भेजदा रह्या के ये घृणित काम ना करो, जिसतै मै घृणा राक्खूँ सूं। 5 पर मेरे लोग्गां नै मेरी ना सुणी अर ना मेरी ओड़ कान लगाया के अपणी बुराई तै फिरै अर दुसरे देवत्यां कै खात्तर धूप ना जळावै। 6 इस कारण मेरी जळजळाहट अर छो की आग यहूदा के नगरां अर यरुशलेम की सड़कां पै भड़क गी; अर वे आज कै दिन ताहीं उजाड़ अर सुनसान पड़े सैं। 7 इब यहोवा, सेनाओं का परमेसवर, जो इस्राएल का परमेसवर सै, न्यू कहवै सै: थम क्यूँ अपणा यो बड़ा नुकसान करो सो, के माणस, के जनान्‍नी, के बाळक, कै दूध पीन्दा बाळक, थम सारे यहूदा कै बीच तै नाश करे जाओ, अर कोए ना रहवै? 8 क्यूँके इस मिस्र देश म्ह जड़ै थम परदेशी होकै रहण के खात्तर आए हो, थम अपणे काम्मां कै जरिये, यानिके दुसरे देवत्यां कै खात्तर धूप जळाकै मेरे ताहीं रिस दुवाओ सो जिसतै थम नाश हो जाओगे अर धरती भर की सारी जातियाँ के माणसां थारी जात्ति की बदनाम्मी करैंगे अर थारा उदाहरण करकै श्राप दिया करैंगे। 9 जो-जो बुराई थारे पुरखा, यहूदा के राजा अर उनकी बिरबानियाँ, अर थारी जनानियाँ, बलके थम आप यहूदा देश अर यरुशलेम की सड़कां म्ह कह्या करदे, के उसनै थम भूल गए हो? 10 आज कै दिन तक उनका मन चूर न्ही होया अर ना वे डरै सैं; अर ना मेरे उस नियम-कायदे अर उन विधियाँ पै चाल्‍लै सैं जो मन्‍नै थारे बुजुर्गां ताहीं अर थारे ताहीं भी सुणवाई सैं।"

11 "इस कारण इस्राएल का परमेसवर, सेनाओं का यहोवा, न्यू कहवै सै: देक्खो, मै थारे खिलाफ होकै थारा नुकसान करुँगा, ताके सारे यहूदियाँ का अन्त कर दियुँ। 12 बचे होए यहूदी जो हठ करकै मिस्र देश म्ह आकै रहण लाग्गे सैं, वे सारे मिट जावैंगे; इस मिस्र देश म्ह छोट्टे तै लेकै बड़े ताहीं वे तलवार अर काळ कै जरिये मर मिट जावैंगे; अर माणस उननै कोसैगें अर हैरान होवैगें; अर उनका उदाहरण देकै श्राप दिया करैंगे अर निन्दा भी करैंगे। 13 जिसा मन्‍नै यरुशलेम ताहीं तलवार, काळ अर मरी कै जरिये सजा दी सै, उसे तरियां मिस्र देश म्ह रहण आळयां नै भी सजा देऊँगा, 14 के जो बचे होए यहूदी मिस्र देश म्ह परदेशी होकै रहण के खात्तर आए सैं, जै वे यहूदा देश म्ह रहण कै खात्तर बोहड़ण की बड़ी अभिलाषा राक्खै सैं, तोभी उन म्ह तै एक भी बचकै ओड़ै ना बोहड़ण पावैगा; सिर्फ कुछ ए भाजे होया ताहीं छोड़ कोए भी ओड़ै ना बोहड़ण पावैगा।"

15 फेर मिस्र देश के पत्रोस म्ह रहण आळे सारे यहूदी माणस जाणै थे के उनकी बिरबानियाँ दुसरे देवत्यां के खात्तर धूप जळावै सै*, अर जितनी जनानियाँ बड़ी मण्डळी म्ह धोरै खड़ी थी, उन सारया नै यिर्मयाह ताहीं या जवाब दिया: 16 "जो वचन तन्‍नै म्हारे ताहीं यहोवा के नाम तै सुणाया सै, उस ताहीं हम न्ही सुणांगें। 17 जो-जो मन्‍नत हमनै मान ली सै उननै हम जरुर पूरी करांगे, हम सुर्ग की राणी कै खात्तर धूप जळावांगे अर अर्घ चढ़ावांगें, जिसतै के म्हारे बुजुर्ग माणस अर हम भी अपणे राजयां अर दुसरे हाकिमां समेत यहूदा के नगरां म्ह अर यरुशलेम की सड़कां म्ह करां थे; क्यूँके उस बखत हम पेट भरकै खान्दे अर भले-चंगे रहन्दे अर किसे मुसीबत म्ह न्ही पड़े थे। 18 पर जिब तै हमनै सुर्ग की राणी कै खात्तर धूप जळाणा अर अर्घ चढ़ाणा छोड़ दिया, तब तै म्हारे ताहीं सारी चिज्जां की कमी सै; अर हम तलवार अर काळ के जरिये मिट चाल्‍ले सां।" 19 अर जनानियाँ नै कह्या, "जिब हम सुर्ग की राणी कै खात्तर धूप जळाया करदी अर चन्द्रकार रोटियाँ बणाकै अर्घ चढ़ाया करदी, तब अपणे-अपणे घरआळे कै बिना जाणे इसा न्ही करया करदी।"

20 फेर यिर्मयाह नै, के जनान्‍नी, के माणस, जितने माणसां नै या जवाब दिया, उन सबतै कह्या, 21 "थारे पुरखा अर थम जो अपणे राजयां अर हाकिमां अर माणसां समेत यहूदा देश के नगरां अर यरुशलेम की सड़कां म्ह धूप जळाया करदे, के वो यहोवा कै ध्यान म्ह न्ही आया? 22 के उसनै उस ताहीं याद ना करया? इस करकै जिब यहोवा थारे बुरे अर सारे घृणित काम्मां नै अर घणा ना सह सक्या, फेर थारा देश उजड़ कै निर्जन अर सुनसान होग्या, उरै ताहीं के माणस उसका उदाहरण देकै श्राप दिया करै सैं, जिस तरियां के आज होवै सै। 23 क्यूँके थम धूप जळाकै यहोवा कै खिलाफ पाप करदे अर उसकी न्ही सुण्या करदे, अर उसके नियम-कायदे अर विधियाँ अर चेतावनियाँ कै मुताबिक न्ही चाल्‍ले, इस कारण या विपत्ति थारै पै आण पड़ी सै, जिस तरियां के आज सै।"

24 फेर यिर्मयाह नै उन सारे माणसां तै अर उन सारी जनानियाँ तै कह्या, "हे सारे मिस्र देश म्ह रहण आळे यहूदियों, यहोवा का वचन सुणो 25 इस्राएल का परमेसवर, सेनाओं का यहोवा, न्यू कहवै सै, के थमनै अर थारी जनानियाँ नै मन्‍नत मान्‍नी अर या कहकै उननै पूरी करो सो के हमनै सुर्ग की राणी कै खात्तर धूप जळाण अर अर्घ चढ़ाण की जो-जो मन्‍नत मान्‍नी सैं उननै हम जरूरी ए पूरी करांगे; अर थमनै अपणे हाथां तै इसाए करया। इस करकै इब थम अपणी-अपणी मन्‍नतां नै मानकै पूरी करो! 26 पर हे मिस्र देश म्ह रहण आळे सारे यहूदियों यहोवा का वचन सुणो: सुणो, मन्‍नै अपणे बड़े नाम की कसम खाई सै के इब पूरे मिस्र देश म्ह कोए यहूदी माणस मेरा नाम लेकै फेर कदे न्यू ना कहण पावैगा, ‘प्रभु यहोवा के जीवन की कसम।’ 27 सुणो, इब मै उनकी भलाई न्ही, नुकसान ए की चिन्ता करुँगा*; मिस्र देश म्ह रहण आळे सारे यहूदी, तलवार अर काळ कै जरिये मिट कै नाश हो जावैंगे जिब ताहीं के उनका सर्वनाश ना हो जावै। 28 जो तलवार तै बचकै अर मिस्र देश तै बोहड़कै यहूदा देश म्ह पोहचैंगें, वे थोड़े ए होवैंगे; अर मिस्र देश म्ह रहण कै खात्तर आए होए सारे यहूदियाँ म्ह तै जो बच पावैंगें, वे जाण लेवैगें के किसका वचन पूरा होया, मेरा या उनका। 29 इस बात का मै या निशान्‍नी देऊँ सूं, यहोवा की या वाणी सै, के मै थमनै इसी जगहां म्ह सजा देऊँगा, जिसतै थम जाण ल्योगे के थारा नुकसान करण म्ह मेरे वचन जरुर पूरे होवैंगे। 30 यहोवा न्यू कहवै सै: देक्खो, जिसा मन्‍नै यहूदा के राजा सिदकिय्याह ताहीं उसके दुश्मन यानिके उसकी जान के खोजी बाबेल के राजा नबूकदनेस्सर कै हाथ म्ह कर दिया, उसे तरियां मै मिस्र के राजा फिरौन होप्रा ताहीं भी उसके दुश्मनां कै, यानिके उसकी जान के खोजियाँ कै हाथ म्ह कर देऊँगा।"